ຫວຽດນາມເພີ່ມທະວີການຮ່ວມມືກັບອົງການອຸຕຸນິຍົມອຸທົກກະສາດຂອງສປຊ
ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໃຫ້ການຕ້ອນຮັບ
ທ່ານ Hoesung Lee
ພາບ:internet
|
(vovworld)- ຕອນບ່າຍວັນທີ 24/10 ຢູ່ ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໃຫ້ການຕ້ອນຮັບ ທ່ານ Hoesung Lee, ຜູ້ອຳນວຍການ ອົງການ ອຸຕຸນິຍົມອຸທົກກະສາດ ຂອງ ສປຊ, ປະທານຄະນະກຳມະການລະຫວ່າງລັດຖະບານ ກ່ຽວກັບການປ່ຽນແປງຂອງດິນຟ້າອາກາດ. ທີ່ການຕ້ອນຮັບ, ທ່ານນາຍົກລັດຖະມົນຕີ ປາດຖະຫນາ ຢາກ ໃຫ້ອົງການ ອຸຕຸນິຍົມອຸທົກກະສາດ ຮ່ວມມືຢ່າງແຫນ້ນແຟ້ນ, ຫນູນຊ່ວຍຫວຽດນາມ ໃນວຽກງານຄົ້ນຄ້ວາກໍຄືຮັບມືກັບການປ່ຽນແປງຂອງດິນຟ້າອາກາດ, ເອົາໃຈໃສ່, ສ້າງເງື່ອນໄຂໃຫ້ບັນດາອົງການ, ມະຫາວິທະຍາໄລ, ສະຖາບັນຄົ້ນຄ້ວາ, ສູນອຸຕຸນິຍົມອຸທົກກະສາດຂອງຫວຽດນາມ ເຂົ້າຮ່ວມກຸ່ມຄົ້ນຄ້ວາຂອງ ອົງການ ອຸຕຸນິຍົມອຸທົກກະສາດຂອງ ສປຊ. ທ່ານນາຍົກລັດຖະມົນຕີ ຫງວຽນຊວນຟຸກ ສະເຫນີ: ອົງການ ອຸຕຸນິຍົມອຸທົກກະສາດຂອງ ສປຊຈະ ຫນູນຊ່ວຍດ້ານເຕັກນິກ, ພາຫະນະເຄື່ອງຈັກເພື່ອໃຫ້ຫວຽດນາມ ຕີລາຄາການປ່ຽນແປງຂອງດິນຟ້າອາກາດຢ່າງຊັດເຈນກວ່າ, ເປັນຕົ້ນແມ່ນສຸມໃສ່ບັນດາບັນຫາໄພນ້ຳຖ້ວມ, ນ້ຳເຄັມຊຶມເຂົ້າ, ການປ່ຽນແປງທໍລະນີສາດ ແລະ ປາດຖະຫນາ ອົງການ ອຸຕຸນິຍົມອຸທົກກະສາດ ຂອງ ສປຊ ຈະມີການສົມທົບຢ່າງແຫນ້ນແຟ້ນກັບຫວຽດນາມ ເພື່ອປະຕິບັດບັນດາຂໍ້ຕົກລົງກອງປະຊຸມ COP21 ຊື່ງຫວຽດນາມ ໄດ້ເຂົ້າຮ່ວມ.
ສ່ວນທ່ານ Hoesung Lee ໃຫ້ຮູ້ວ່າ: ອົງການອຸຕຸນິຍົມອຸທົກກະສາດຂອງ ສປຊ ຮັບຮູ້ໄດ້ທຸກສິ່ງທ້າທາຍກ່ຽວກັບການປ່ຽນແປງຂອງດິນຟ້າອາກາດ ຊື່ງຫວຽດນາມ ພວມປະສົບ ແລະ ຫວັງວ່າ ຈະສືບຕໍ່ຮ່ວມມືກັບບັນດານັກວິທະຍາສາດ ຫວຽດນາມໃນຂົງເຂດການປ່ຽນແປງຂອງດິນຟ້າອາກາດ ຫລາຍກວ່າອີກ ກໍຄືນຳສະເຫນີບັນດາມາດຕະການຮັບມື.