ປະທານາທິບໍດີ ອາເມລິກາ Barark Obama ມີບົດກ່າວປາໄສ
ຕໍ່ໜ້ານັກຮຽນ, ນັກສຶກສາ, ວົງການປັນຍາຊົນ ແລະ ຊາວຮ່າໂນ້ຍທຸກຊັ້ນວັນນະ
(ພາບ: dantri)
(vovworld) - ຕອນເຊົ້າວັນທີ 24/5, ຢູ່ສູນກອງປະຊຸມແຫ່ງຊາດ ຮ່າໂນ້ຍ, ປະທານາທິບໍດີ ອາເມລິກາ Barark Obama ໄດ້ມີບົດກ່າວປາໄສຕໍ່ໜ້ານັກຮຽນ, ນັກສຶກສາ, ວົງການປັນຍາຊົນ ແລະ ຊາວຮ່າໂນ້ຍທຸກຊັ້ນວັນນະ ປະມານ 2 ພັນຄົນ. ປະທານາທິບໍດີ Barark Obama ໄດ້ຂອບອົກຂອບໃຈອາລົມຈິດອັນອົບອູ່ນເຊິ່ງການນຳພັກ, ລັດ, ລັດຖະບານ ແລະ ປະຊາຊົນ ຮ່າໂນ້ຍໄດ້ສະຫງວນໃຫ້ແກ່ທ່ານ. ປະທານາທິບໍດີ Barark Obama ເນັ້ນໜັກວ່າ ຫວຽດນາມແມ່ນປະເທດເອກະລາດ, ມີອະທິປະໄຕ, ບໍ່ມີປະເທດໃດສາມາດຈັດວາງ, ຕັດສິນຊາຕາກຳແທນໃຫ້ ຫວຽດນາມໄດ້. ປະທານາທິບໍດີ Barark Obama ກໍ່ເນັ້ນໜັກເຖິງຄວາມສຳຄັນຂອງສາຍພົວພັນລະຫວ່າງສອງປະເທດ, ຜ່ານຜ່າຄວາມເຈັບປວດຂອງອະດີດຕະການເພື່ອມຸ່ງໄປເຖິງອະນາຄົດອັນຈົບງາມ.
“ສອງປະເທດເຄີຍມີສົງຄາມ, ສົງຄາມໄດ້ເປັນການຂີດຂັ້ນສອງປະເທດ, ແຕ່ປະຈຸບັນພວກເຮົາໄດ້ຮຳບາດແຜສົງຄາມ, ຜ່ານບັນດາລາຍການຮ່ວມມືຫຼັງສົງຄາມ. ພວກຂ້າພະເຈົ້າໃຫ້ຄຳໝັ້ນສັນຍາໜູນຊ່ວຍ ຫວຽດນາມໃນລະດັບສູງສຸດທີ່ສາມາດເປັນໄປໄດ້. ຂ້າພະເຈົ້າເຊື່ອໝັ້ນວ່າ, ວິວັດແຫ່ງການໄກ່ເກ່ຍປອງດອງຊາດຂອງພວກເຮົາແມ່ນມີການປະກອບສ່ວນຂອງຊາວ ຫວຽດນາມ ແລະ ອາເມລິກາເປັນຈຳນວນຫຼວງຫຼາຍ. ພວກເຮົານັບມື້ນັບຫຍັບມໍ່ໃກ້ກັນກວ່າ, ນັບແຕ່ດ້ານການຄ້າ, ການລົງທຶນຕະຫຼອດຮອດການສຶກສາ. ຫວຽດນາມ ໄດ້ເຂົ້າຮ່ວມກຳລັງຮັກສາສັນຕິພາບຂອງ ສະຫະປະຊາຊາດ. ຂ້າພະເຈົ້າມີຄວາມປະເອີບໃຈຕໍ່ອະນາຄົດຂອງສອງປະເທດ“.
ປະທານາທິບໍດີ Barark Obama ໄດ້ເອີ້ນສົງຄາມກັບ ຫວຽດນາມແມ່ນບົດຮຽນໃຫຍ່ໃຫ້ໂລກ, ຈາກສອງປະເທດທີ່ເປັນປໍລະປັກໄດ້ກາຍເປັນຄູ່ຮ່ວມມື, ເປັນເພື່ອນມິດນຳກັນ. ທ່ານຢືນຢັນເຖິງຄຳໝັ້ນສັນຍາຂອງ ອາເມລິກາໃນການໜູນຊ່ວຍ ຫວຽດນາມປະຕິບັດພາລະກິດພັດທະນາວັດຖະນາຖາກອນ, ພິເສດແມ່ນໃນຂົງເຂດເສດຖະກິດ. ໜຶ່ງໃນບັນດາຄຳໝັ້ນສັນຍາແຮງທີ່ສຸດຂອງ ອາເມລິກາ ນັ້ນແມ່ນໜູນຊ່ວຍ ຫວຽດນາມ ຊຸກຍູ້ການເຂົ້າຮ່ວມສັນຍາຄູ່ຮ່ວມມືຂ້າມປາຊີຟິກ TPP. ເມື່ອເຕື້ອງເຖິງບັນຫາຄວາມສະຫງົບປອດໄພໃນການເດີນທະເລຢູ່ທະເລຕາເວັນອອກ, ປະທານາທິບໍດີ Barark Obama, ຖືວ່າ:
“ຄວາມເປັນລະບຽບຮຽບຮ້ອຍສາກົນຕ້ອງມີພື້ນຖານຢ່າງແນ່ນອນ. ອະທິປະໄຕຂອງແຕ່ລະປະເທດຕ້ອງໄດ້ຮັບການເຄົາລົບນັບຖື. ບັນດາປະເທດໃຫຍ່ບໍ່ໄດ້ນາບຂູ່ບັນດາປະເທດນ້ອຍ. ຄວາມຂັດແຍ້ງທັງໝົດລ້ວນແຕ່ຕ້ອງໄດ້ຮັບການແກ້ໄຂບົນພື້ນຖານກົດໝາຍສາກົນ ແລະ ການເຈລະຈາໂດຍສັນຕິວິທີ. ໃນບັນຫາທະເລຕາເວັນອອກ, ພວກເຮົາຈະພ້ອມກັບບັນດາຄູ່ຮ່ວມມືເພື່ອຍົກສູງບັນດາຫຼັກການພື້ນຖານ ນັ້ນແມ່ນຄວາມເສລີໃນການເດີນທະເລ ແລະ ດ້ານການບິນ“.
ກ່າວຄວາມເຫັນກັບວົງການໄວໜຸ່ມ ຫວຽດນາມທີ່ມີໜ້າຢູ່ສູນກອງປະຊຸມແຫ່ງຊາດ, ປະທານາທິບໍດີ Barark Obama ກໍ່ຍົກສູງນ້ຳໃຈດຳເນີນອາຊີບຂອງໄວໜຸ່ມ ຫວຽດນາມ. ທ່ານເວົ້າວ່າ, ອາເມລິກາຈະສືບຕໍ່ໃຫ້ຄຳໝັ້ນສັນຍາໜູນຊ່ວຍທາງດ້ານສຶກສາໃຫ້ ຫວຽດນາມ, ສະຫງວນທຶນສຶກສາໃຫ້ໄວໜຸ່ມ ແລະ ນັກຮຽນຮູ້ຫຼາຍຄົນ. ປະທານາທິບໍດີ Barark Obama ຢືນຢັນວ່າ “ໄວໜຸ່ມ ຫວຽດນາມວມມີບັນດາກາລະໂອກາດເພື່ອພັດທະນາປະເທດຊາດ ແລະ ອາເມລິກາຈະຊ່ວຍເຫຼືອພວກເພື່ອນ.