ຫວຽດນາມແລະຈີນເພີ່ມທະວີການຮ່ວມມື,ຮັກສາການພົວພັນສະຖຽນລະພາບ,ຍາວນານ
ທ່ານເລຮົ່ງແອງ ແລະ ທ່ານ ຫວາງເຈ້ຍຮ້ວຍ
(vovworld) – ໂດຍໄດ້ຮັບຄຳເຊີນຂອງສູນກາງພັກກອມມູນິດ ຈີນ, ໃນລະຫວ່າງ ວັນທີ 26 – 27/8, ທ່ານເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາສູນກາງພັກ, ຢ້ຽມຢາມ ຈີນ ດ້ວຍຖານະເປັນທູດພິເສດຂອງທ່ານເລຂາທິການໃຫຍ່ ຫງວຽນຟູ໋ຈ້ອງ. ຕອນບ່າຍວັນທີ 26/8, ທ່ານ ເລຮົ່ງແອງ ໄດ້ໃຫ້ການຕ້ອນຮັບທ່ານ ຫວາງເຈ້ຍຮ້ວຍ ຮອງປະທານສະພາປຶກສາການເມືອງແຫ່ງຊາດ ຈີນ, ຫົວໜ້າຄະນະຕິດຕໍ່ພົວພັນຕ່າງປະເທດສູນກາງກອມມູນິດ ຈີນ, ເຂົ້າຢ້ຽມຂຳ່ນັບ. ທີ່ການຕ້ອນຮັບ, ທ່ານເລຮົ່ງແອງ ໄດ້ເນັ້ນໜັກຈຸດປະສົງຂອງການຢ້ຽມຢາມ ຈີນ ຄັ້ງນີ້ແມ່ນເພື່ອພ້ອມກັບບັນດາການນຳ ຈີນ ແລກປ່ຽນກ່ຽວກັບບັນດາມາດຕະການຟື້ນຟູ ແລະ ຊຸກຍູ້ການພົວພັນລະຫວ່າງ 2 ພັກ, 2 ລັດ ພັດທະນາຢ່າງປອດໄສ, ເປັນປົກກະຕິ, ຍາວນານ, ຕອບສະໜອງຄວາມມຸ່ງມາດປາດຖະໜາ ແລະ ຜົນປະໂຫຍດຂອງປະຊາຊົນ 2 ປະເທດ ຫວຽດນາມ - ຈີນ, ຢັ້ງຢືນເລື່ອງ 2 ພັກ, 2 ລັດເພີ່ມທະວີການຮ່ວມມື, ຮັກສາການພົວພັນພັດທະນາຢ່າງປອດໄສ, ເປັນປົກກະຕິ ແມ່ນຈຳເປັນທີ່ສຸດ, ພິເສດແມ່ນໃນສະພາບການສາກົນຄືປະຈຸບັນ ແລະ ສະພາບການຢູ່ທະເລຕາເວັນອອກມີບັນດາການຜັນແປເຄັ່ງຕຶງ, ສັບສົນ, ສົ່ງຜົນສະທ້ອນເຖິງການພົວພັນລະຫວ່າງ 2 ພັກ, 2 ລັດ ແລະ ສະພາບແວດລ້ອມຄວາມໝັ້ນຄົງ, ສັນຕິພາບ, ສະຖຽນລະພາບຂອງພາກພື້ນ.
ສ່ວນທ່ານ ຫວາງເຈ້ຍຮ້ວຍ ຢັ້ງຢືນວ່າ: ຝ່າຍ ຈີນ ຖືການຢ້ຽມຢາມຂອງທ່ານ ເລຮົ່ງແອງ ໃນຖານະເປັນທູດພິເສດຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ເປັນສຳຄັນ, ເຊື່ອໝັ້ນວ່າ ການຢ້ຽມຢາມຈະປະກອບສ່ວນແກ້ໄຂຄວາມຂັດແຍ້ງ, ຄວາມບໍ່ລົງລອຍກັນລະຫວ່າງ 2 ປະເທດຢ່າງສົມເຫດສົມຜົນ, ຊຸກຍູ້ການພົວພັນ ຫວຽດນາມ - ຈີນ ພັດທະນາຢ່າງປອດໄສ.