ທ່ານນາຍົກລັດຖະມົນຕີ ຫງວຽນເຕີນຢູງ ເຈລະຈາກັບ
ນາຍົກລັດຖະມົນຕີ ຝລັ່ງ Manuel Vall
|
(vovworld)- ໃນຂອບເຂດການເຂົ້າຮ່ວມກອງປະຊຸມ COP 21 ຢູ່ ນະຄອນຫລວງ ປາຣີ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ມີການເຈລະຈາກັບນາຍົກລັດຖະມົນຕີ ຝລັ່ງ Manuel Vall. ນາຍົກລັດຖະມົນຕີ ທັງສອງທ່ານ ໄດ້ເຫັນດີ ສືບຕໍ່ຜັນຂະຫຍາຍບັນດາເນື້ອແທ້ຂອງການພົວພັນຄູ່ຮ່ວມມືຍຸດທະສາດ ແລະ ເປັນເອກະພາບຫລາຍມາດຕະການລະອຽດ ເພື່ອເພີ່ມທະວີການຮ່ວມມື ລະຫວ່າງ ຫວຽດນາມ ແລະ ຝລັ່ງ ໃນໄລຍະຈະມາເຖິງ. ກ່ຽວກັບດ້ານການເມືອງ, ສອງຝ່າຍເຫັນດີ ເພີ່ມທະວີການພົບປະຄະນະຜູ້ແທນທຸກຂັ້ນ, ເປັນຕົ້ນແມ່ນຂັ້ນສູງ, ຍົກສູງບົດບາດຂອງບັນດາກົນໄກຊີ້ນຳ, ກຳນົດທິດຮ່ວມມືໃນບັນດາຂົງເຂດ. ກ່ຽວກັບເສດຖະກິດ, ສອງຝ່າຍເນັ້ນຫນັກວ່າ: ຄວນເພີ່ມທະວີການຮ່ວມມືໃນບັນດາໂຄງການຈຸດສຸມກ່ຽວກັບຄົມມະນາຄົມຂົນສົ່ງ, ພະລັງງານ, ການບິນ ອາວະກາດ, ກະສິກຳ ແລະ ການຢາ. ທ່ານນາຍົກລັດຖະມົນຕີ ຝລັ່ງ Manuel Vall ຊີ້ແຈ້ງວ່າ: ຝລັ່ງ ເອົາໃຈໃສ່ທີ່ສຸດເຖິງຄຳສະເຫນີຂອງຫວຽດນາມ ໃນການຮັບມືກັບການປ່ຽນແປງຂອງດິນຟ້າອາກາດ ແລະ ເຫັນດີ ສອງຝ່າຍຄວນມານະພະຍາຍາມຫນູນຊ່ວຍເຊິ່ງກັນ ແລະກັນ ໃນຄວາມມານະພະຍາຍາມບັນລຸຄາດໝາຍຫລຸດຜ່ອນອາຍພິດເຮືອນແກ້ວ ພ້ອມແລ້ວ ສົ່ງເສີມວິສາຫະກິດ ຝລັ່ງ ເຂົ້າຮ່ວມຢ່າງຕັ້ງຫນ້າເຂົ້າໃນບັນດາໂຄງການພັດທະນາຂຽວ ຢູ່ ຫວຽດນາມ. ທ່ານ ນາຍົກລັດຖະມົນຕີ ຫງວຽນເຕີນຢູງ ຢືນຢັນ: ຫວຽດນາມ ສະຫນັບສະຫນູນ ແລະ ພ້ອມແລ້ວເປັນຂົວຕໍ່ຊ່ວຍ ຝລັ່ງ ເພີ່ມທະວີການພົວພັນກັບພາກພື້ນ ອາຊີ ປາຊີຟີກ ແລະ ກັບອາຊຽນ.
ສອງຝ່າຍກໍເຫັນດີຖືວ່າ: ທຸກການຂັດແຍ້ງກັນຢູ່ ທະເລຕາເວັນອອກ ຕ້ອງແກ້ໄຂໂດຍສັນຕິວິທີ, ບົນພື້ນຖານ ເຄົາລົບກົດໝາຍສາກົນ, ສົນທິສັນຍາ ສປຊ ກ່ຽວກັບກົດໝາຍທະເລປີ 1982, ຮັບປະກັນຄວາມໝັ້ນຄົງ, ຄວາມປອດໄພໃນການເດີນທະເລ ແລະການບິນ ເພື່ອຜົນປະໂຫຍດຂອງພາກພື້ນ ແລະ ຂອງທັງປະຊາຄົມໂລກ.