(vovworld) – ຫວຽດນາມ ແລະ ສ. Kiribati, ເຊິ່ງແມ່ນປະເທດເກາະຢູ່ມະຫາສະມຸດປາຊີຝິກ ໄດ້ສ້າງຕັ້ງການພົວພັນທາງການທູດຢ່າງເປັນທາງການ ເພື່ອແນໃສ່ຊຸກຍູ້ການພົວພັນຮ່ວມມືຫຼາຍດ້ານລະຫວ່າງ 2 ປະເທດ. ວັນທີ 15/09, ຢູ່ສຳນັກງານຄະນະຜູ້ຕາງໜ້າຫວຽດນາມຄຽງຂ້າງສະຫະປະຊາຊາດທີ່ນິວຢອກ, ປະເທດອາເມລິກາ, ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມ, ຫົວຫນ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ ເລຮ່ວາຍຈູງ ແລະ ທ່ານນາງ Makurita Baao, ເອກອັກຄະລັດຖະທູດວິສາມັນ, ຜູ້ມີອຳນາດເຕັມ, ຫົວຫນ້າຄະນະຜູ້ຕາງໜ້າ ສ.Kiribati ປະຈຳສະຫະປະຊາຊາດ ໄດ້ລົງນາມໃນແຈ້ງການຮ່ວມກ່ຽວກັບການສ້າງຕັ້ງການພົວພັນທາງການທູດລະຫວ່າງ ສສ.ຫວຽດນາມ ແລະ ສ.Kiribati. 2 ຝ່າຍເຫັນດີແລກປ່ຽນຜູ້ຕາງຫນ້າການທູດຢູ່ຂັ້ນເອກອັກຄະລັດຖະທູດ ແລະ ນຳໃຊ້ສົນທິສັນຍາ ວຽນ ປີ 1961 ກ່ຽວກັບການພົວພັນທາງການທູດ ໃນການພົວພັນທາງການທູດລະຫວ່າງ 2 ປະເທດ.
ເລື່ອງສ້າງຕັ້ງການພົວພັນທາງການທູດກັບສ.Kiribati ຢ່າງເປັນທາງການ ໄດ້ສ້າງພື້ນຖານຢ່າງໝັ້ນຄົງເພື່ອຊຸກຍູ້ການພົວພັນຮ່ວມມືຫຼາຍດ້ານລະຫວ່າງ 2 ປະເທດໃນໄລຍະຈະມາເຖິງ, ຕອບສະຫນອງຄວາມມຸ່ງມາດປາດຖະໜາລວມຂອງປະຊາຊົນ 2 ປະເທດ. ຄຽງຂ້າງນັ້ນ, ເລື່ອງສ້າງຕັ້ງການພົວພັນທາງການທູດກັບສ.Kiribati ກໍ່ສະແດງໃຫ້ເຫັນນະໂຍບາຍການຕ່າງປະເທດເປີດກວ້າງ, ຫຼາຍຮູບຫຼາຍແບບ, ຫຼາຍຝ່າຍຂອງຫວຽດນາມ, ຖືການພົວພັນກັບບັນດາປະເທດຂຶ້ນກັບພາກພື້ນມະຫາສະມຸດປາຊີຟິກໃຕ້ ເປັນສຳຄັນ.