ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ
(vovworld) – ຕອນບ່າຍວັນທີ 23/7, ຕາມເວລາ ຫວຽດນາມ, ທີ່ສຳນັກງານສະພາເອີລົບ ຢູ່ ບຣຸກແຊນ ປະເທດ ແບນຊິກ, ໄດ້ດຳເນີນວາລະປະຊຸມຄົບຄະນະຂອງກອງປະຊຸມລັດຖະມົນຕີການຕ່າງປະເທດ ອາຊຽນ - ເອີລົບ ຄັ້ງທີ 20. ຄະນະຜູ້ແທນ ຫວຽດນາມ ໂດຍທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ເຂົ້າຮ່ວມວາລະປະຊຸມຄົບຄະນະກໍ່ຄືການພົບປະ 2 ຝ່າຍທີ່ສຳຄັນຕ່າງໆ.
ກ່ອນທີ່ໄຂກອງປະຊຸມ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ໄດ້ມີການພົບປະຢູ່ນອກກອງປະຊຸມກັບລັດຖະມົນຕີການຕ່າງປະເທດ ແດນມາກ, ເຢຍລະມັນ ແລະ ຂະຫຼວງໃຫຍ່ຮັບຜິດຊອບນະໂຍບາຍການຕ່າງປະເທດຂອງຄະນະກຳມະການ ເອີລົບ. ໃນການແລກປ່ຽນກັບລັດຖະມົນຕີການຕ່າງປະເທດ ແດນມາກ Martin Lidagaard, 2 ຝ່າຍເຫັນດີເປັນເອກະສັນຕັ້ງໜ້າຜັນຂະຫຍາຍແຜນການເຄື່ອນໄຫວ 2014 – 2015 ເພື່ອເຮັດໃຫ້ການພົວພັນຄູ່ຮ່ວມມືຮອບດ້ານ ຫວຽດນາມ - ແດນມາກ ທີ່ໄດ້ຮັບການສ້າງຕັ້ງໃນເດືອນ 9/2013 ປະກົດຜົນເປັນຈິງ. 2 ຝ່າຍຢືນຢັນຄວາມຕັດສິນໃຈຍົກສູງວົງເງິນການຄ້າ 2 ສັ້ນຂຶ້ນເຖິງ 1 ຕື້ USD ໃນປີ 2016. ແດນມາກ ສະເໜີເຈລະຈາ FTA ກັບ ຫວຽດນາມ ແລະ ໃຫ້ຄຳໝັ້ນສັນຍາຈະຊຸກຍູ້ ອີຢູ ສິ້ນສຸດການເຈລະຈາ FTA ລະຫວ່າງ ຫວຽດນາມ ແລະ ອີຢູ ໂດຍໄວ. ທີ່ການຕ້ອນຮັບທ່ານລັດຖະມົນຕີການຕ່າງປະເທດ ເຢຍລະມັນ Frank Walter Steinmeier, ຝ່າຍເຢຍລະມັນ ຢືນຢັນວ່າ: ຝ່າຍ ເຢຍລະມັນ ພວມຕັ້ງໜ້າກະກຽມໃຫ້ແກ່ການຢ້ຽມຢາມ ເຢຍລະມັນຂອງທ່ານນາຍົກລັດຖະມົນຕີ ຫງວຽນເຕີນຢູ້ງໃນເດືອນ 10/2014, ເຊື່ອໝັ້ນວ່າການຢ້ຽມຢາມຈະເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດເລິກເຊິ່ງຂຶ້ນຕື່ມ, ພິເສດແມ່ນໃນຂົງເຂດເສດຖະກິດ - ການເມືອງ - ການລົງທຶນ. 2 ຝ່າຍເຫັນດີເປັນເອກະສັນຕັ້ງໜ້າຊຸກຍູ້ວິວັດການຜັນຂະຫຍາຍບັນດາໂຄງການຈຸດສຸມ. ໃນການແລກປ່ຽນກັບ ທ່ານ Catherine Ashton ຜູ້ຕາງໜ້າຂັ້ນສູງຂອງອີຢູ ກ່ຽວກັບການຕ່າງປະເທດ ແລະ ຄວາມໝັ້ນຄົງ, ທ່ານຮອງນາຍົກລັດຖະມະນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ໄດ້ສະແດງຄວາມຂອບອົກຂອບໃຈຄະນະກຳມະການເອີລົບ ແລະ ບັນດາປະເທດສະມາຊິກ ທີ່ໄດ້ສະຫງວນໃຫ້ຫວຽດນາມ 540 ລ້ານເອີໂຣ ເພື່ອໜູນຊ່ວຍການພັດທະນາໃນປີ 2014, ພ້ອມທັງໃຫ້ຄຳໝັ້ນສັນຍາຈະອຸປະຖຳ 400 ລ້ານເອີໂຣ ໃຫ້ຫວຽດນາມ ໃນໄລຍະ 2014 – 2020. ສ່ວນຜູ້ຕາງໜ້າຂັ້ນສູງຂອງອີຢູ ກ່ຽວກັບການຕ່າງປະເທດ ແລະ ຄວາມໝັ້ນຄົງກໍ່ຢືນຢັນວ່າ ອີຢູ ຈະໜູນຊ່ວຍຫວຽດນາມ ຍົກສູງກຳລັງຄວາມສາມາດຄວບຄຸມວິກິດການ, ໜູນຊ່ວຍຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ.
ກ່ຽວກັບການຮ່ວມມື ຫວຽດນາມ - ອີຢູ, ບັນດາລັດຖະມົນຕີການຕ່າງປະເທດ ໄດ້ຢືນຢັນສະໜັບສະໜູນຫວຽດນາມ ເພີ່ມທະວີການພົວພັນຮ່ວມມືຮອບດ້ານກັບອີຢູ, ຊຸກຍູ້ວິວັດການໃຫ້ສັດຕະຍາບັນສັນຍາແມ່ກ່ຽວກັບຄູ່ຮ່ວມມື ແລະ ຮ່ວມມືຮອບດ້ານ (PCA) ລະຫວ່າງຫວຽດນາມ - ອີຢູ ແລະ ສິ້ນສຸດການເຈລະຈາສັນຍາການຄ້າເສລີ ຫວຽດນາມ - ອີຢູ.
ກ່ຽວກັບສະພາບການຢູ່ທະເລຕາເວັນອອກ, ປະເທດຕ່າງໆ ແລະ ອີຢູສະແດງຄວາມສົນໃຈ ແລະ ສະໜັບສະໜູນທັດສະນະຂອງຫວຽດນາມແມ່ນແກ້ໄຂຄວາມຂັດແຍ້ງ ດ້ວຍສັນຕິວິທີ, ປະຕິບັດຕາມກົດໝາຍສາກົນ, ຮັບປະກັນສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມເສລີໃນການເດີນທະເລຢູ່ພາກພື້ນ.