ທ່ານປະທານ ໂຮ່ຈີມິນ ໄດ້ອ່ານຖະແຫຼງການປະກາດເອກະລາດ
ສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ
(ພາບປະກອບ)
(vovworld) - ວັນທີ 02/09/1945 ຢູ່ສະໜາມຫລວງ ບາດີງ (ຮ່າໂນ້ຍ), ທ່ານປະທານ ໂຮ່ຈີມິນ ໄດ້ອ່ານ ຖະແຫຼງການປະກາດເອກະລາດ, ສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ. ນັບແຕ່ນັ້ນ, ປະຫວັດສາດຂອງຊາດ ຫວຽດນາມ ໄດ້ກ້າວເຂົ້າສູ່ໜ້າໃໝ່, ກ້າວເຂົ້າສູ່ສັງກະລາດແຫ່ງເອກະລາດ, ເສລີພາບ. ສຳລັບຊາວ ຫວຽດນາມ ແຕ່ລະຄົນ, ໃນຊຸນວັນທຳອິດທີ່ເປັນພົນລະເມືອງຂອງປະເທດເສລີພາບແມ່ນອະນຸສອນບໍ່ສາມາດຫລົງລືມໄດ້.
ຜູ້ໃດໄດ້ເຫັນປະຈັກຕາບັນຍາກາດຂອງວັນທີ 02/09/1945 ແມ່ນບໍ່ສາມາດລືມໄດ້ຈຸດເວລາປະຫວັດສາດສຳຄັນຍິ່ງ ເມື່ອປະທານ ໂຮ່ຈີມິນ ອ່ານຖະແຫຼງການປະກາດເອກະລາດ.
“ປະເທດ ຫວຽດນາມ ມີສິດ ດຳລົງຊີວິດໃນຄວາມເສລີພາບ ແລະ ເອກະລາດ ແລະ ໄດ້ກາຍເປັນປະເທດເສລີພາບ, ເອກະລາດຢ່າງແທ້ຈິງ. ປະຊາຊົນທົ່ວປະເທດ ຫວຽດນາມ ຕັດສິນນ້ຳໃຈ ປະກອບຈິດໃຈ, ກຳລັງເຫື່ອແຮງຊີວິດ ແລະ ຊັບສິນຂອງຕົນ ເພື່ອຮັກສາສິດເສລີພາບເອກະລາດນັ້ນໄວ້ຢ່າງໝັ້ນຄົງ”.
ໃນຄາວນັ້ນ, ນັບແຕ່ຮຸ່ງເຊົ້າຂອງມື້ນັ້ນ ປະຊາຊົນຈາກທົ່ວທຸກແຫ່ງໄດ້ພາກັນມຸ່ງໄປເຖິງສະໜາມຫລວງ ບາດີງ ດ້ວຍຄວາມເລີກບານມ່ວນຊື່ນ ຜູ້ໃດກໍ່ກຳທຸງແດງດາວເຫຼືອງນ້ອຍໃນມື, ໜ້າຕາສົດໃສເຕັມໄປດ້ວຍຄວາມຜາສຸກ ຍ້ອນໄດ້ເຂົ້າຮ່ວມວັນບຸນໃຫຍ່ສຸດຂອງທົ່ວປະເທດ. ທ່ານ ເລດຶກເວີນ ຜູ້ມີໜ້າຢູ່ສະໜາມຫລວງ ໃນຄາວນັ້ນ ຫວນຄືນວ່າ:
“ວັນທີ 02/09, ທົ່ວນະຄອນ ຮ່າໂນ້ຍ ຄຶກຄື້ນມ່ວນຊື່ນ, ທຸກຄົນຜູ້ເຮັດປະຕູໂຂງຕ້ອນຮັບ, ຜູ້ຫຍິບທຸງ, ມີບາງຄອບຄົວຫຍິບທຸງເຖິງ 3 ຜືນ, ແລ້ວຮຽນຂັບຮ້ອງບົດເພງຊາດ, ບົດເພງດັບສູນຟາດຊິດ. ທົ່ວປວງຊົນປິຕິຊົມຊື່ນຂ່ຳນັບຮັບຕ້ອນເອກະລາດ, ລັດຖະບານ ແລະ ຄຳຖະແຫຼງການປະກາດເອກະລາດ. ນັ້ນກໍ່ແມ່ນເທື່ອທຳອິດທຸກຄົນໄດ້ຮູ້ຈັກປະທານ ໂຮ່ຈີມິນ. ກ່ອນນັ້ນ ທຸກຄົນ ແລະ ຂ້າພະເຈົ້າເອງກໍ່ບໍ່ຮູ້ຈັກເພີ່ນແມ່ນໃຜ.”
ທ່ານ ຫງວຽນກວາງຟ່ອງ ອະດີດເປັນນັກຮົບຕຳຫລວດຂອງພະແນກສືບລາຊະການລັບຢູ່ ຮ່າໂນ້ຍ ໃຫ້ຮູ້ວ່າ: ກຳລັງສືບລາຊະການລັບ ແລະ ຕຳຫລວດພາກເໜືອເປັນກຽດໄດ້ຮັບໜ້າທີ່ປ້ອງກັນພິທີຢູ່ ບາດີງ. ປົກປັກຮັກສາຄວາມເປັນລະບຽບຮຽບຮ້ອຍໃນງານໂຮມຊຸມນຸມ, ຕ້ານຄືນທຸກການເຄື່ອນໄຫວມ້າງເພທຳລາຍຂອງສັດຕູ
“ວັນທີ 02/09 ພວກຂ້າພະເຈົ້າໄດ້ຮັບໜ້າທີ່ປົກປັກຮັກສາງານໂຮມຊຸມນຸມ ແລະ ປ້ອງກັນຂະບວນລົດຂົນສົ່ງປະທານ ໂຮ່ຈີມິນ ໄປເຖິງເວທີ. ຄາວນັ້ນ ຍັງບໍ່ທັນມີຊຸດເຄື່ອງແບບໃຫ້ກຳລັງປ້ອງກັນຄວາມສະຫງົບ ດັ່ງນັ້ນ ລ້ວນແຕ່ນຸ່ງເສື້ອເສີດ, ຖີບລົດຖີບປ້ອງກັນລົດໂອໂຕຂອງເພີ່ນເທົ່ານັ້ນ”.
ສຳລັບປ້າ ເລທີ, ຄວາມເປັນກຽດທີ່ສຸດ ສຳລັບປ້າ ນັ້ນແມ່ເວລາໄດ້ຊັກທຸງຊາດໃນເຫດການປະຫວັດສາດຂອງປະເທດກ່ອນນີ້ກ່ວາ 70 ປີ.
“ຂ້າພະເຈົ້າຂຶ້ນເວທີທັງຍ່າງທັງເປັນຫ່ວງ ເພາະວ່າ ຂ້າພະເຈົ້າບໍ່ໄດ້ກະກຽມກ່ອນ. ໃກ້ຈະໄປຮອດເວທີ ຂ້າພະເຈົ້າໄດ້ພົບແມ່ຍິງຜູ້ໜຶ່ງ, 2 ເອື້ອຍນ້ອງຈັບມືກັນຂຶ້ນເວທີ. ເມື່ອເພງຊາດດັງກອງກັນວານ ພວກຂ້າພະເຈົ້າກໍ່ຄ່ອຍໆຊັກທຸງຊາດ, ເມື່ອບົດເພງຢຸດຕິລົງ ທຸງຊາດກໍ່ປິວສະບັດ ພວກຂ້າພະເຈົ້າ ດີໃຈຫລາຍ ຍ້ອນໄດ້ປະຕິບັດສຳເລັດໜ້າທີ່”.
ກ່ວາ 70 ປີຜ່ານມາ, ແຕ່ບັນດາອະນຸສອນກ່ຽວກັບຊຸມວັນທຳອິດທີ່ປະເທດຊາດເປັນເອກະລາດ, ເສລີພາບ ຍັງຄົງຝັງເລິກໃນໃຈຂອງຊາວ ຫວຽດນາມ ແຕ່ລະຄົນຕະຫລອດໄປ.