(vovworld) – ບັນດາລັດຖະມົນຕີວ່າການກະຊວງການເງິນ ແລະ ຜູ້ວ່າການທະນາຄານສູນກາງຂອງບັນດາປະເທດສະມາຊິກ ອາຊຽນ ພ້ອມກັບ ຍີ່ປູ່ນ, ຈີນ, ສ.ເກົາຫຼີ (ASEAN+3) ໄດ້ເຫັນດີຊຸກຍູ້ການປະຕິຮູບໂຄງປະກອບ ເພື່ອແນໃສ່ແກ້ໄຂບັນດາສິ່ງກີດຂວາງສຳລັບການເຕີບໂຕແບບຍືນຍົງ, ພ້ອມທັງລະມັດລະວັງຕໍ່ບັນດາຄວາມສ່ຽງທີ່ເກີດຈາກການຮົ່ວໄຫຼທຶນດ້ວຍຂອບຂະໜາດໃຫຍ່. ຄຳໝັ້ນສັນຍາດັ່ງກ່າວໄດ້ຍົກອອກໃນການພົບປະ ທີ່ນອກກອງປະຊຸມປະຈຳປີຂອງທະນາຄານພັດທະນາອາຊີ (ADB) ຢູ່ນະຄອນຫຼວງ Baku ຂອງ ປະເທດ Azerbaijan ໃນວັນທີ 3/5. ໃນຖະແຫຼງການຮ່ວມຢູ່ການພົບປະ, ບັນດາຜູ້ແທນ ອາຊຽນ +3 ຢັ້ງຢືນວ່າ ພື້ນຖານເສດຖະກິດຂອງປະເທດຕົນເອງໃນປີນີ້ພ້ອມແລ້ວຮັກສາທ່າເຕີບໂຕສູງພໍສົມຄວນຂອງປີກ່າຍນີ້.
ໃນຖະແຫຼງການຕ່າງຫາກຂອງກະຊວງການເງິນ ຍີ່ປູ່ນ, ປະເທດນີ້ໄດ້ມີຄຳໝັ້ນສັນຍາສືບຕໍ່ມານະພະຍາຍາມ ເພີ່ມທະວີການຮ່ວມມືດ້ານການເງິນ 2 ຝ່າຍ ກັບບັນດາປະເທດ ອາຊຽນ ຄືໄດ້ເຫັນດີໃນປີ 2013. ການກະທຳນີ້ ແນໃສ່ຊ່ວຍພັດທະນາພື້ນຖານໂຄງລ່າງ ເພື່ອເຊື່ອມຕໍ່ລະຫວ່າງປະເທດ ອາຊຽນ ຢ່າງແຂງແຮງກວ່າອີກ, ປັບປຸງຄວາມສາມາດຕິດຕາມກວດກາດ້ານການເງິນ ກໍ່ຄືບັນດາຈຸດໝາຍອື່ນໆ.