(vovworld) - ກ່າວຄຳເຫັນທີ່ພິທີຮັບຈົດໝາຍມອບພາລະຈາກທ່ານເອກອັກຄະລັດຖະທູດແຫ່ງສາທາລະນະລັດອະຟະລິກາໃຕ້ Pakamisa Augustine Sfuba ປະຈຳອິນໂດເນເຊຍ. ທ່ານເລຂາທິການໃຫຍ່ອາຊຽນ ເລເລືອງມິນ ສະແດງຄວາມປາດຖະໜາ: ຢາກເພີ່ມທະວີການພົວພັນລະຫວ່າງອາຊຽນ ແລະ ສາທາລະນະລັດອະຟະລິກາໃຕ້ເວົ້າສະເພາະກໍ່ຄືກັບສະຫະພາບອາຟຣິກາ (AU) ແລະ ປະຊາຄົມພັດທະນາພາກໃຕ້ອາຟຣິກາ (SADC) ເວົ້າລວມ ຍ້ອນວ່ານີ້ແມ່ນໜຶ່ງໃນບັນດາບຸລິມະສິດຂອງອາຊຽນ. ທ່ານເລຂາທິການໃຫຍ່ເລເລືອງມິນ ເນັ້ນໜັກວ່າ: ອາຊຽນພວມຕັ້ງໜ້າເປີດກ້ວາງການພົວພັນຕ່າງປະເທດ ກັບບັນດາຄູ່ຮ່ວມມືໃໝ່, ພິເສດແມ່ນບັນດາປະເທດ ແລະ ບັນດາອົງການໃນພາກພື້ນຢູ່ ອາຟຣິກາ ແລະ ອາເມລິກາລາຕິນ, ຖືນີ້ແມ່ນໜຶ່ງໃນບັນດາທີ່ມີຄວາມສົນໃຈອັນດັບໜຶ່ງໃນລາຍການດຳເນີນງານຂອງອາຊຽນ.
ທ່ານເອກອັກຄະລັດຖະທູດ Pakamisa Augustine Sfuba ຢັ້ງຢືນວ່າ: ແຜນນະໂຍບາຍຂອງສາທາລະນະລັດອະຟະລິກາໃຕ້ ແມ່ນເພີ່ມທະວີການຮ່ວມມືຢ່າງແທດຈິງ, ມີປະສິດທິຜົນໃນທຸກຂົງເຂດ ເຊິ່ງຕ່າງຝ່າຍຕ່າງມີຄວາມສົນໃຈ ແລະ ແບ່ງປັ່ນຜົນປະໂຫຍດ ກັບອາຊຽນ ແລະ ບັນດາປະເທດສະມາຊິກອາຊຽນ, ພິເສດແມ່ນໃນບັນດາຂົງເຂດການລົງທຶນ, ການຄ້າ, ການຮ່ວມມືໃຕ້-ໃຕ້, ການພົບປະແລກປ່ຽນປະຊາຊົນ ແລະ ແບ່ງປັນບັນດາບົດຮຽນ ກ່ຽວກັບການເຊື່ອມໂຍງເຂົ້າກັບເສດຖະກິດໃນພາກພື້ນ.