(vovworld) – ໃນວາລະປະຊຸມຕອນບ່າຍວັນທີ 25/11, ຂອງກອງປະຊຸມສະໄໝສາມັນເທື່ອທີ 8, ສະພາແຫ່ງຊາດຫວຽດນາມ ຊຸດທີ 13, ບັນດາສະມາຊິກສະພາແຫ່ງຊາດ (ສສຊ)ໄດ້ລົງມະຕິຮັບຮອງເອົາກົດໝາຍວ່າດ້ວຍເຮືອນຢູ່ (ສະບັບປັບປຸງ) ແລະ ກົດໝາຍວ່າດ້ວຍດຳເນີນທຸລະກິດອະສັງຫະລິມະຊັບ (ສະບັບປັບປຸງ).
ກົດໝາຍວ່າດ້ວຍເຮືອນຢູ່ (ສະບັບປັບປຸງ) ລວມມີ 13 ພາກ, ດ້ວຍ 183 ມາດຕາທີ່ກຳນົດກ່ຽວກັບກຳມະສິດ, ການພັດທະນາ, ການຄຸ້ມຄອງ, ການນຳໃຊ້ເຮືອນຢູ່; ການທຸລະກຳກ່ຽວກັບເຮືອນຢູ່; ການຄຸ້ມຄອງລັດກ່ຽວກັບເຮືອນຢູ່ ຂອງຫວຽດ ນາມ.
ກົດໝາຍວ່າດ້ວຍດຳເນີນທຸລະກິດອະສັງຫະລິມະຊັບ (ສະບັບປັບປຸງ) ລວມມີ 6 ພາກ, ດ້ວຍ 82 ມາດຕາ, ເຊິ່ງໄດ້ປັບປຸງບັນດາບັນຫາທີ່ກ່ຽວຂ້ອງເຖິງການດຳເນີນທຸລະກິດອະສັງຫະລິມະຊັບ, ຮັບປະກັນລັກສະນະເປັນເອກະພາບ, ຄົບຊຸດ, ຫຼືກເວັ້ນສະພາບກ່າຍກອງກັນລະຫວ່າງກົດໝາຍດຳເນີນທຸລະກິດອະສັງຫະລິມະຊັບ ກັບບັນດາກົດໝາຍອື່ນທີ່ກ່ຽວຂ້ອງ.
ເມື່ອແລກປ່ຽນກັບວົງການສື່ມວນຊົນກ່ຽວກັບ ກົດໝາຍວ່າດ້ວຍເຮືອນຢູ່ (ສະບັບປັບປຸງ) ແລະ ກົດໝາຍວ່າດ້ວຍດຳເນີນທຸລະກິດອະສັງຫະລິມະຊັບ (ສະບັບປັບປຸງ), ທ່ານລັດຖະມົນຕີວ່າການກະຊວງກໍ່ສ້າງ ຈິ້ງດິ່ງຢຸງ, ໃຫ້ຮູ້ວ່າ:
“ບັນດາກົດໝາຍນີ້ຕອບສະໜອງຫຼັກການສຳຄັນນັ້ນແມ່ນພັດທະນາອະສັງຫະລິມະຊັບ ແລະ ເຮືອນຢູ່ຕ້ອງປະຕິບັດຕາມແຜນກຳນົດ, ມີແຜນການ ແລະ ຍົກສູງຄວາມຮັບຜິດຊອບໃນການຄຸ້ມຄອງລັດຂອງສູນກາງ ແລະ ທ້ອງຖີ່ນ; ຮັບປະກັນໃຫ້ຕະຫຼາດພັດທະນາຢ່າງປອດໃສ. ສ່ວນກົດໝາຍວ່າດ້ວຍເຮືອນຢູ່ບໍ່ພຽງແຕ່ພັດທະນາເຮືອນຢູ່ການຄ້າເທົ່ານັ້ນ ຫາກຍັງຕ້ອງພັດທະນາເຮືອນຢູ່ສັງຄົມ ໂດຍມີການໜູນຊ່ວຍຂອງລັດ. ກົດໝາຍທັງສອງນີ້ໄດ້ຮັບການຮັບຮອງເອົາ ຈະແມ່ນເຄື່ອງມື, ແມ່ນພື້ນຖານນິຕິກຳ, ສ້າງສິ່ງແວດລ້ອມໃຫ້ແກ່ການລົງທຶນພັດທະນາທັງດ້ານເສດຖະກິດ - ສັງຄົມ, ຍົກສູງຄຸນນະພາບການດຳລົງຊີວິດ“
ແລະກໍ່ໃນຕອນບ່າຍວັນດຽວກັນ, ສະພາແຫ່ງຊາດປຶກສາຫາລືກ່ຽວກັບຮ່າງກົດໝາຍວ່າດ້ວຍງົບປະມານແຫ່ງລັດ (ສະບັບປັບປຸງ)