(vovworld) – ວັນທີ 30/07, ໃນການໂອ້ລົມທາງໂທລະສັບ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ແລະ ທ່ານລັດຖະມົນຕີການຕ່າງປະເທດຝລັ່ງ Laurent Fabius ໄດ້ແລກປ່ຽນ ແລະ ເປັນເອກະພາບບັນດາມາດຕະການເພື່ອແນໃສ່ຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ຝລັ່ງ. ໃນນັ້ນມີການແລກປ່ຽນຄະນະຜູ້ແທນທຸກຂັ້ນ, ເປີດກວ້າງການຮ່ວມມືໃນຂົງເຂດ ເສດຖະກິດ, ປ້ອງກັນປະເທດ, ກໍ່ສ້າງພື້ນຖານໂຄງລ່າງ, ພະລັງງານ, ການສຶກສາ, ບຳລຸງສ້າງ ແລະ ແລກປ່ຽນວັດທະນະທຳ.
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ໄດ້ຝາກຄຳເຊີນຂອງການນຳຂັ້ນສູງຫວຽດນາມ ທີ່ເຊື້ອເຊີນທ່ານປະທານາທິບໍດີຝລັ່ງ Francois Hollande ມາຢ້ຽມຢາມຫວຽດນາມ ໃນໄລຍະຈະມາເຖິງ, ສະເໜີໃຫ້ຝລັ່ງ ຊຸກຍູ້ EU ອະນຸມັດຜ່ານສັນຍາແມ່ກ່ຽວກັບຄູ່ຮ່ວມມື ແລະ ຮ່ວມມືຮອບດ້ານ (PCA) ຫວຽດນາມ - EU ແລະ ສະໜັບສະໜູນເລື່ອງສຳເລັດການເຈລະຈາສັນຍາການຄ້າເສລີຫວຽດນາມ - EU (EVFTA) ໃນປີ 2014. ທ່ານລັດຖະມົນຕີການຕ່າງປະເທດຝລັ່ງ Laurent Fabius ປາດຖະໜາວ່າ 2 ປະເທດຈະສົມທົບກັນຈັດຕັ້ງກອງປະຊຸມກ່ຽວກັບການປ່ຽນແປງຂອງດິນຟ້າອາກາດຄັ້ງທີ 21 ຂອງສະຫະປະຊາຊາດເຊິ່ງຈະຈັດຂຶ້ນຢູ່ປາຣີ ໃນປີ 2015 ໂດຍໄວ.
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ແລະ ທ່ານລັດຖະມົນຕີການຕ່າງປະເທດຝລັ່ງ Laurent Fabius ກໍ່ໄດ້ແລກປ່ຽນບາງບັນຫາພາກພື້ນ ແລະ ສາກົນ ທີ່ຕ່າງຝ່າຍຕ່າງມີຄວາມສົນໃຈ ໃນນັ້ນມີບັນຫາທະເລຕາເວັນອອກ. ທ່ານລັດຖະມົນຕີການຕ່າງປະເທດຝລ່ັງ ສະແດງໃຫ້ເຫັນຫຼັກໝັ້ນສະໜັບສະໜູນການແກ້ໄຂຄວາມເຄັ່ງຕຶງຢູ່ທະເລຕາເວັນອອກ ຜ່ານການເຈລະຈາ ແລະ ບັນດາມາດຕະການສັນຕິພາບ, ບໍ່ນຳໃຊ້ກຳລັງອາວຸດ.