ຮອງນາຍົກລັດຖະມົນຕີຟ້າມບິ່ງມິງພົບປະສອງຝ່າຍຢູ່ນອກກອງປະຊຸມລັດຖະມົນຕີການຕ່າງປະເທດ ASEAN

ວັນສຸກ ທີ 28 ເມສາ ຄ.ສ. 2017 | 19:22:51

ລັດຖະມົນຕີການຕ່າງປະເທດ ຟີລິບປິ່ນ Enirque Manalo ແລະ ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ

(vovworld) – ຕອນເຊົ້າວັນທີ 28/4, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ມີການພົບປະສອງຝ່າຍກັບຜູ້ຮັກສາການລັດຖະມົນຕີການຕ່າງປະເທດ ຟີລິບປິ່ນ Enirque Manalo, ລັດຖະມົນຕີການຕ່າງປະເທດ ມາເລເຊຍ Anifa Aman ແລະ ລັດຖະມົນຕີການຕ່າງປະເທດ ອິນໂດເນເຊຍ Retno Marsudi ເນື່ອງໃນໂອກາດໄປເຂົ້າຮ່ວມກອງປະຊຸມສຸດຍອດສະມາຄົມບັນດາປະເທດອາຊີຕາເວັນອອກສ່ຽງໃຕ້ (ASEAN) ຄັ້ງທີ 30 ໄດ້ຈັດຕັ້ງຢູ່ນະຄອນຫຼວງມະນີລາ ປະເທດຟີລິບປິ່ນ ໃນລະຫວ່າງວັນທີ 28-29. ທີ່ການພົບປະກັບ ຜູ້ຮັກສາການລັດຖະມົນຕີການຕ່າງປະເທດ ຟີລິບປິ່ນ, ສອງຝ່າຍຕີລາຄາສູງການພົວພັນທີ່ມີມາແຕ່ດົນນານ ແລະ ການຮ່ວມມືຢ່າງແໜ້ນແຟ້ນລະຫວ່າງສອງປະເທດ; ເຫັນດີເປັນເອກະພາບນຳກັນຊຸກຍູ້ບັນດາການຢ້ຽມຢາມຂັ້ນສູງກໍ່ຄືກອງປະຊຸມຄະນະກຳມະການຮ່ວມມືສອງຝ່າຍຂັ້ນລັດຖະມົນຕີການຕ່າງປະເທດໃນປີ 2017; ເພີ່ມທະວີການຮ່ວມມືກ່ຽວກັບບັນດາບັນຫາຢູ່ທະເລກໍ່ຄືຕ້ານໂຈນສະລັດ.

ທີ່ການພົບປະກັບທ່ານລັດຖະມົນຕີການຕ່າງປະເທດ ມາເລເຊຍ Anifa Aman, ສອງຝ່າຍໄດ້ແລກປ່ຽນບັນດາມາດຕະການເພື່ອຊຸກຍູ້ການພົວພັນຄື ກອງປະຊຸມຄະນະກຳມະການປະສົມກ່ຽວກັບເສດຖະກິດ, ວິທະຍາສາດ, ເຕັກນິກຄັ້ງທີ 6 ກໍ່ຄືຕັ້ງໜ້າຜັນຂະຫຍາຍການປະຕິບັດຂໍ້ຕົກລົງທີ່ໄດ້ລົງນາມ.

ທີ່ການພົບປະກັບທ່ານ ລັດຖະມົນຕີການຕ່າງປະເທດ ອິນໂດເນເຊຍ Retno Marsudi, ສອງຝ່າຍໄດ້ເຫັນດີເປັນເອກະພາບ ຍູ້ແຮງບັນດາການຢ້ຽມຢາມຂັ້ນສູງ ກໍ່ຄືວິວັດການເຈລະຈາແບ່ງກຳນົດຢູ່ເຂດເສດຖະກິດພິເສດໃນຂົງເຂດທະເລສອງຝ່າຍໄດ້ແບ່ງກຳນົດໄຫຼ່ທະວີບ, ປະຕິບັດໝາກຜົນກອງປະຊຸມ ຄະນະກຳມະການປະສົມກ່ຽວກັບເສດຖະກິດ, ວິທະຍາສາດ, ເຕັກນິກຄັ້ງທີ 7 ໃຫ້ມີປະສິດທິຜົນ ເພື່ອບັນລຸໄດ້ຄາດໝາຍວົງເງິນການຄ້າ 10 ຕື້ໂດລາສະຫະລັດ ໃນປີ 2018.