ທ່ານຮອງນາຍົກລັດຖະມົນຕີຫງວຽນຊວນຟຸກ ລົງຊີ້ນຳການປ້ອງກັນ ແລະ ຕ້ານສະພາບຝົນຕົກໜັກ,ນ້ຳຖ້ວມຢູ່ກວາງນິງ |
(vovworld)- ເມື່ອລົງເຮັດວຽກກັບການນຳແຂວງກວາງນິງເພື່ອຊີ້ນຳການປ້ອງກັນ ແລະ ຕ້ານສະພາບຝົນຕົກໜັກ,ນ້ຳຖ້ວມໃນຕອນບ່າຍວັນທີ 31/7,ທ່ານຮອງນາຍົກລັດຖະມົນຕີຫງວຽນຊວນຟຸກໄດ້ຊົມເຊີຍບັນດາຄວາມມານະພະຍາຍາມຂອງແຂວງໃນການແກ້ໄຂຄວາມຫຍຸ້ງຍາກ. ທ່ານກ່າວວ່າ :
“ ສືບຕໍ່ແກ້ໄຂຜົນຮ້າຍຢ່ອນຫຼັງກ່ຽວກັບອະນາໄມສິ່ງແວດລ້ອມ, ລະມັດລະວັງຕໍ່ການເກີດໂລກລະບາດ, ເຮັດອະນາໄມຢູ່ຕາມທ້ອງຖະໜົນເພື່ອກັບຄືນສູ່ການເຄື່ອນໄຫວປົກກະຕິ. ເບິ່ງແຍງຜູ້ຮັບບາດເຈັບ, ຢື້ຢາມຖາມຂ່າວຄອບຄົວບັນດາຜູ້ຮັບເຄາະຮ້າຍ, ຮັບປະກັນການກິນຢູ່, ນ້ຳດື່ມ, ນ້ຳໃຊ້ໃຫ້ແກ່ປະຊາຊົນ. ບໍ່ປະໃຫ້ປະຊາຊົນຖືກອຶດຫິວ, ເກີດໂລກລະບາດ. ກຽມພ້ອມຮັບມືເມື່ອເກີດສະພາບທີ່ບໍ່ດີໃນຂອບເຂດທົ່ວແຂວງ ”
ຝົນຕົກໜັກ ແລະ ນ້ຳຖ້ວມຄັ້ງປະຫວັດສາດທີ່ເກີດຂຶ້ນຢູ່ແຂວງກວາງນິງໃນຮອບ 40 ປີຜ່ານມາ ໄດ້ເຮັດໃຫ້ມີຜູ້ເສຍຊີວິດ 17 ຄົນ, 6 ຄົນຫາຍສາບສູນ, ເຮືອນຊານ, ໂຮງຮຽນກວ່າ 3.700 ຫຼັງຖືກນ້ຳຖ້ວມ, ນອກຈາກນັ້ນ, ຍັງຖືກເສຍຫາຍຢ່າງໜັກກ່ຽວກັບການລ້ຽງປູກສິນໃນນ້ຳ, ສິນທະເລ, ລະບົບຂົວທາງ, ຊົນລະປະທານ, ຄາດວ່າຄວາມເສຍຫາຍທັງໝົດຈະຂຶ້ນເຖິງ 2000 ຕື້ດົງ.
ໄລ່ຮອດເວລາ 10 ໂມງວັນທີ 1/8, ຈຳນວນນັກທ່ອງທ່ຽວທັງໝົດ 1500 ຄົນທີ່ຖືກຕິດຄ້າງຢູ່ເກາະ ໂກໂຕ ແຂວງ ກວາງນິງ ໄດ້ກັບຄືນມາດ້ວຍຄວາມປອດໄພ.
ໃນວັນດຽວກັນ, ທ່ານຮອງນາຍົກລັດຖະມົນຕີຫງວຽນຊວນຟຸກ ກໍໄດ້ລົງກວດກາ ແລະ ຊີ້ນຳວຽກງານປ້ອງກັນ ແລະ ຕ້ານສະພາບຝົນຕົກໜັກ, ນ້ຳຖ້ວມຢູ່ແຂວງລ້າງເຊີນ.