ເປັນເຈົ້າການເຈລະຈາເພື່ອຍູ້ແຮງການສົ່ງອອກຜະລິດຕະພັນ ກະເສດ
(ພາບປະກອບ)
(vovworld) – ຕາມກະຊວງກະສິກຳ ແລະ ພັດທະນາຊົນນະບົດຫວຽດນາມ ແລ້ວ, ໄລ່ຮອດຈຸດເວລານີ້, ຫວຽດນາມ ມີການພົວພັນດ້ານການຄ້າຢ່າງໝັ້ນຄົງກັບກວ່າ 160 ປະເທດ ແລະ ເຂດແຄວ້ນໃນໂລກ. ໃນໄລຍະຜ່ານມາ, ອັດຕາສົ່ງອອກຜະລິດຕະພັນກະເສດໃນການສົ່ງອອກສິ້ນຄ້າຂອງທັງປະເທດຍາມໃດກໍຢູ່ໃນລະດັບສູງ, ບັນລຸ 26% ຫາ 27%. ກະສິກຳກໍ່ແມ່ນຂະແໜງດຽວທີ່ສົ່ງອອກເກີນດຸ່ນໄປຍັງຕ່າງປະເທດ ດ້ວຍລະດັບ 8,5 ຕື້ USD ໃນປີ 2013 ແລະ 9,5 ຕື້ USD ໃນປີ 2014. ປະຈຸບັນ, ຫວຽດນາມ ມີຜະລິດຕະພັນກະເສດສົ່ງອອກ 10 ປະເພດ, ດ້ວຍຍອດວົງເງິນການຄ້າກວ່າ 1 ຕື້ USD. ຫວຽດນາມ ໄດ້ ແລະ ພວມເຂົ້າຮ່ວມການເຈລະຈາ, ລົງນາມໃນ 7 ສັນຍາການຄ້າເສລີ (FTA) ກັບບັນດາຄູ່ຮ່ວມມືຫຼາຍຝ່າຍ, ພາກພື້ນ ແລະ 2 ຝ່າຍ. ທ່ານ ເຈີນກິມລອງ, ຫົວໜ້າກົມຮ່ວມມືກັບສາກົນ, ກະຊວງກະສິກຳ ແລະ ພັດທະນາຊົນນະບົດ ໃຫ້ຮູ້ວ່າ: ຫວຽດນາມ ໄດ້ເສີມຂະຫຍາຍທ່າແຮງ ແລະ ກຳແໜ້ນກາລະໂອກາດ, ພ້ອມທັງເປັນເຈົ້າການປະເຊີນໜ້າກັບສິ່ງທ້າທາຍເຊິ່ງການເຊື່ອມໂຍງນຳມາໃຫ້. ເລື່ອງລົງນາມບັນດາສັນຍາການຄ້າ 2 ຝ່າຍ ແລະ ຫຼາຍຝ່າຍ ໄດ້ປະກອບສ່ວນເພີ່ມທະວີການເຕີບໂຕ, ຫັນຕະຫຼາດເປັນຫຼາຍຮູບຫຼາຍແບບ, ຊຸກຍູ້ການພັດທະນາການຜະລິດພາຍໃນປະເທດ, ສ້າງວຽກເຮັດງານທຳເພີ່ມລາຍຮັບໃຫ້ຊາວກະສິກອນ.
“ກຳລັງຄວາມສາມາດໃນການຄຸ້ມຄອງຂອງອົງການຈັດຕັ້ງລັດ ແລະ ວິສາຫະກິດຫວຽດນາມ ໃນໄລຍະຈະມາເຖິງ ຕ້ອງເຂົ້າໃຈຢ່າງເລິກເຊິ່ງກ່ຽວກັບການເຊື່ອມໂຍງເຂົ້າກັບເສດຖະກິດສາກົນ ແລະ ເອົາໃຈໃສ່ຫຼາຍກວ່າເຖິງຂົງເຂດດັ່ງກ່າວ. ຂ້າພະເຈົ້າຄິດວ່າ, ທ່າແຮງຂອງຫວຽດນາມ ຢູ່ຂົງເຂດໃດ ຕ້ອງສຸມໃສ່ຂົງເຂດນັ້ນ. ສິ່ງດັ່ງກ່າວອາດປະຕິບັດໄດ້ ຖ້າຫາກພວກເຮົາຮູ້ວິທີປະສານສົມທົບ ແລະ ນຳໃຊ້ບັນດາມາດຕະການດ້ານເຕັກນິກທີ່ກ້າວໜ້າ ຕາມມາດຖານທີ່ເໝາະສົມກັບກົດໝາຍສາກົນ ເພື່ອໃຫ້ຜະລິດຕະພັນກະເສດທີ່ຜະລິດອອກມີຕົ້ນກຳເນີດຢ່າງຈະແຈ້ງ, ຕອບສະໜອງຄວາມຮຽກຮ້ອງເຊິ່ງຕະຫຼາດຕ່າງໆໃນໂລກຕ້ອງການ”.