(vovworld) - ຫວຽດນາມ ແລະ ສ.ເຊັກໂກ ໄດ້ປຶກສາຫາລືຫຼາຍມາດຕະການເພື່ອແນໃສ່ຊຸກຍູ້ການຮ່ວມມື 2 ຝ່າຍໃນຂົງເຂດເຕັກໂນໂລຊີຂໍ້ມູນຂ່າວສານ ແລະ ສື່ສານ (ICT) ເນື່ອງໃນໂອກາດການຢ້ຽມຢາມ ສ.ເຊັກໂກ ໃນລະຫວ່າງວັນທີ 01 – 04/12 ຂອງທ່ານລັດຖະມົນຕີກະຊວງຖະແຫຼງຂ່າວ ແລະ ສື່ສານ ເຈືອງມິງຕ໋ວນ. ທີ່ການເຮັດວຽກກັບທ່ານຮອງລັດຖະມົນຕີກະຊວງວັດທະນະທຳສ.ເຊັກໂກ Petra Smolikova, 2 ຝ່າຍໄດ້ແລກປ່ຽນໝານຜົນການເຄື່ອນໄຫວຮ່ວມມືລະຫວ່າງ 2 ປະເທດໃນຂົງເຂດຖະແຫຼງຂ່າວ ແລະ ສື່ສານໃນໄລຍະຜ່ານມາ. 2 ຝ່າຍເຫັນດີນຳກັນຈະສືບຕໍ່ແລກປ່ຽນຄະນະຜູ້ແທນຂັ້ນສູງ ກໍຄືນັກຂ່າວ, ສົ່ງເສີມ ແລະ ສ້າງເງື່ອນໄຂສະດວກເພື່ອໃຫ້ບັນດາອົງການ, ສື່ສານ, ບັນດາໂທລະພາບ, ກະຈາຍສຽງ ສ້າງບັນດາໂຄງການຮ່ວມມືໂດຍກົງກ່ຽວກັບການແລກປ່ຽນດ້ານເນື້ອໃນ, ລາຍການ. ເພີ່ມທະວີການຮ່ວມມືໃນຂົງເຂດເຕັກໂນໂລຊີຂໍ້ມູນຂ່າວສານນີ້ກໍແມ່ນຫົວຂໍ້ທີ່ໄດ້ນຳມາປຶກສາຫາລືທີ່ການພົບປະລະຫວ່າງທ່ານລັດຖະມົນຕີ ເຈືອງມິງຕ໋ວນ ແລະ ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າສ.ເຊັກໂກ Karel Novotny. ທ່ານລັດຖະມົນຕີ ເຈືອງມິງຕ໋ວນ ເນັ້ນໜັກວ່າ, ຫວຽດນາມ ປາດຖະໜາໄດ້ຮັບການແບ່ງປັນບົດຮຽນໃນການພັດທະນາພື້ນຖານໂຄງລ່າງເຕັກໂນໂລຊີຂໍ້ມູນຂ່າວສານ, ໃນນັ້ນມີການຮັບປະກັນຄວາມປອດໄພດ້ານໃນການສື່ສານຈາກຝ່າຍສ.ເຊັກໂກ. ຝ່າຍ ສ.ເຊັກໂກ ໄດ້ຊົມເຊີຍຂໍ້ສະເໜີຂອງຄະນະຜູ້ແທນຫວຽດນາມ, ພ້ອມທັງຢືນຢັນ ພ້ອມແລ້ວທີ່ຈະແບ່ງປັນບົດຮຽນພັດທະນາພື້ນຖານໂຄງລ່າງເຕັກໂນໂລຊີຂໍ້ມູນຂ່າວສານກັບຫວຽດນາມ.