ເພີ່ມທະວີການຮ່ວມມືຫວຽດນາມ-ນອກແວ,ນິວຊີແລນແລະການາດາ
ທ່ານ ຟ້າມບີ່ງມີງ ພົບປະກັບ ທ່ານ Boerge Brende
ລັດຖະມົນຕີກະຊວງການຕ່າງປະເທດ ນອກແວ
(ພາບ: ຟ້າມກຽນ)
(vovworld) - ວັນທີ 26/7, ວັນປະຊຸມສຸດທ້າຍຂອງກອງປະຊຸມລັດຖະມົນຕີກະຊວງການຕ່າງປະເທດ ສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ຄັ້ງທີ 49 (AMM 49) ແລະບັນດາກອງປະຊຸມທີ່ກ່ຽວຂ້ອງ ຢູ່ນະຄອນຫຼວງວຽງຈັນ (ລາວ), ທ່ານ ຟ້າມບີ່ງມີງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ສືບຕໍ່ມີການພົບປະຄັ້ງຕ່າງໆກັບຄູ່ຕຳແໜ່ງ ນອກແວ, ນິວຊີແລນ ແລະ ການາດາ. ທີ່ການພົບປະກັບ ທ່ານ Boerge Brende ລັດຖະມົນຕີກະຊວງການຕ່າງປະເທດນອກແວ, ລັດຖະມົນຕີສອງທ່ານເຫັນດີເປັນເອກະສັນນຳກັນວ່າ ສືບຕໍ່ບັນດາວິທີຍົກສູງປະສິດທິຜົນການຮ່ວມມືລະຫວ່າງ 2 ປະເທດ. ທ່ານ ຟ້າມບີ່ງມີງ ຮອງນາຍົກລັດຖະມົນຕີ ຢືນຢັນວ່າ ຈະສົມທົບກັນຢ່າງແໜ້ນແຟ້ນເພື່ອຊຸກຍູ້ບັນດາຄວາມສາມາດບົ່ມຊ້ອນຮ່ວມມືສອງຝ່າຍ. ທ່ານ ຟ້າມບີ່ງມີງ ຮອງນາຍົກລັດຖະມົນຕີ ສະເໜີສອງຝ່າຍສົມທົບກັນເພື່ອແນໃສຊຸກຍູ້ຄວາມຄຶບໜ້າໃຫ້ການເຈລະຈາສັນຍາການຄ້າເສລີ ຫວຽດນາມ - ສະຫະພາບເອີລົບ (EU).
ທີ່ການພົບປະກັບທ່ານ Murray McCully ລັດຖະມົນຕີການຕ່າງປະເທດ ນິວຊີແລນ, ສອງຝ່າຍເພິ່ງພໍໃຈເມື່ອເຫັນວ່າການພົວພັນສອງປະເທດພວມມີບັນດາບາດກ້າວພັດທະນາຢ່າງແທດຈິງ, ການຮ່ວມມືດ້ານການຄ້າ, ການທ້ອງທ່ຽວພັດທະນາ ພໍສົມຄວນແລະ ໝັ້ນໝາຍຈະເຕີບໂຕໃນໄລຍະຈະມາເຖິງ. ນິວຊີແລນເຫັນດີຈະສົມທົບກັບຫວຽດນາມຢ່າງແໜ້ນແຟ້ນເພື່ອຈັດຕັ້ງ ກອງປະຊຸມຂັ້ນສຸດຍອດເວທີປາໄສຮ່ວມມືເສດຖະກິດອາຊີ - ປາຊີຟີກ (APEC) 2017 ຢູ່ຫວຽດນາມ, ການຮ່ວມມືໃນຂອບເຂດ ອາຊຽນ - ນິວຊີແລນ ກໍ່ຄືບັນດາເວທີປາໄສສາກົນ ແລະ ໃນພາກພື້ນປະສົບຜົນສຳເລັດ.
ທີ່ການແລກປ່ຽນກັບ ທ່ານ Stephane Dion ລັດຖະມົນຕີການຕ່າງປະເທດການາດາ, ທ່ານ ຟ້າມບີ່ງມີງ ຮອງນາຍົກລັດຖະມົນຕີ ປາດຖະໜາຢາກ ເປິດກວ້າງການຮ່ວມມືກັບການາດາ ໃນຫຼາຍຂົງເຂດ; ແລະສະເໜີການາດາສືບຕໍ່ມີທັດສະນະຕັ້ງໜ້າໃນການປົກປັກຮັກສາສັນຕິພາບ, ສະຖຽນລະພາບໃນພາກພື້ນ ແລະ ໃນໂລກ.