(VOVWORLD) -ເວທີປາໄສເສດຖະກິດສາກົນ Saint Petersburg (SPIEF) ຄັ້ງທີ 23 ໄດ້ໄຂຂຶ້ນຢ່າງສົມກຽດໃນວັນທີ 6 ມິຖຸນາ ຢູ່ສູນວາງສະແດງ “Expoforum” ນະຄອນ Saint Petersburg, ສະຫະພັນ ລັດເຊຍ.
ທ່ານ ຫງວຽນວັນບິ່ງ ກໍາມະການກົມການເມືອງ, ເລຂາສູນກາງພັກ, ຫົວໜ້າຄະນະເສດຖະກິດສູນກາງກອມມູນິດ ຫວຽດນາມ ໄດ້ນໍາໜ້າຄະນະຜູ້ແທນພັກກອມມູນິດ ຫວຽດນາມ ເຂົ້າຮ່ວມເວທີປາໄສດັ່ງກ່າວ.
 ທ່ານ ຫງວຽນວັນບິ່ງ ມີບົດກ່າວປາໄສທີ່ເວທີປາໄສ SPIEF – 2019 (ພາບ: TTXVN) |
ທີ່ວາລະໄຂ, ທ່ານ ຫງວຽນວັນບິ່ງ ມີບົດກ່າວປາໄສສໍາຄັນກ່ຽວກັບການພັດທະນາແບບຍືນຍົງ ແລະ ການຄ້າສາກົນ, ເຂົ້າຮ່ວມການສົນທະນາຂັ້ນສູງພ້ອມກັບທ່ານເລຂາທິການໃຫຍ່ ສປຊ Antonio Guterres, ທ່ານ Tirgan Sargsyan ປະທານຄະນະກໍາມະການເສດຖະກິດ ອາຊີ - ເອີຣົບ, ທ່ານປະທານາທິບໍດີ ສາທາລະນະລັດ Moldova Igor Dodon, ທ່ານ Anton Siluanov ຮອງນາຍົກລັດຖະມົນຕີຜູ້ທີ 1 ສະຫະພັນລັດເຊຍ ແລະ ທ່ານ Ulizisaikhan Enkhtuvshin ຮອງນາຍົກລັດຖະມົນຕີ ມົງໂກນ ໄດ້ແລກປ່ຽນໂດຍກົງ ກ່ຽວກັບບັນດາບັນຫາທີ່ພົ້ນເດັ່ນໃນການພົວພັນເສດຖະກິດສາກົນໃນປັດຈຸບັນ.
ນອກຈາກນັ້ນ, ຄະນະຜູ້ແທນຫວຽດນາມ ກໍໄດ້ເຂົ້າຮ່ວມການປະກອບຄໍາເຫັນ ແລະ ປຶກສາຫາລືທີ່ວາລະ “ຍຸດທະສາດໃຫ້ແກ່ອະນາຄົດຂອງ ສະຫະພັນເສດຖະກິດ ອາຊີ - ເອີີລົບ” ດ້ວຍການເຂົ້າຮ່ວມຂອງທ່ານ Anton Siluanov ຮອງນາຍົກລັດຖະມົນຕີຜູ້ທີ 1 ສະຫະພັນລັດເຊຍ, ຮອງນາຍົກລັດຖະມົນຕີບັນດາປະເທດ ກາຊັກສະຖານ, ອາກເມເນຍ, ກີກິດສະຖານ, ເບລາຣຸດ ແລະ ການນໍາບາງອົງການຈັດຕັ້ງພາກພື້ນ ແລະ ສາກົນ.