ທ່ານຫງວຽນຊວນຟູ໋ກ ກ່າວຄຳເຫັນທີ່ພິທີໄຂ (CAEXPO) - (CABIS)
(ພາບ: VGP/LeSon)
(vovworld) – ຕອນເຊົ້າວັນທີ 18/9, ທ່ານຮອງນາຍົກລັດຖະມົນຕີ ຫວຽດນາມ ຫງວຽນຊວນຟູ໋ກ ແລະ ຄະນະຜູ້ແທນ ຫວຽດນາມ ເຂົ້າຮ່ວມພິທີໄຂງານຕະຫລາດນັດວາງສະແດງ ຈີນ - ອາຊຽນ (CAEXPO) ແລະ ກອງປະຊຸມສຸດຍອດການຄ້າ ແລະ ການລົງທຶນ ຈີນ - ອາຊຽນ (CABIS) ຄັ້ງທີ 12 ດຳເນີນຢູ່ນະຄອນ ໜານໜິງ, ເມືອງເອກເຂດປົກຄອງດ້ວຍຕົນເອງເຜົ່າ ຈ໋ວາງ, ແຂວງ ກວາງຊີ,ປະເທດ ຈີນ. ກ່າວຄຳເຫັນທີ່ພິທີໄຂ, ທ່ານຮອງນາຍົກລັດຖະມົນຕີ ຫງວຽນຊວນຟູ໋ກ ຕີລາຄາສູງບົດບາດຂອງງານຕະຫລາດນັດວາງສະແດງ CAEXPO ແລະ ກອງປະຊຸມ CABIS ໃນການຊຸກຍູ້ສາຍພົວພັນຮ່ວມມືຫລາຍດ້ານລະຫວ່າງ ອາຊຽນ - ຈີນ, ກໍຄືບັນດາຂໍ້ລິເລີ່ມ, ແນວຄວາມຄິດເພີ່ມທະວີການຮ່ວມມືເສດຖະກິດ, ຊຸກຍູ້ການເຊື່ອມຕໍ່ພາກພື້ນ ໂດຍ ອາຊຽນ ແລະ ຈີນ ສະເໜີ, ປະກອບສ່ວນສ້າງສະພາບແວດລ້ອມສະດວກໃຫ້ແກ່ວິສາຫະກິດເພື່ອຜັນຂະຫຍາຍບັນດາການເຄື່ອນໄຫວດຳເນີນທຸລະກິດ, ການຄ້າ ແລະ ການລົງທຶນ. ທີ່ງານຕະຫລາດນັດວາງສະແດງປີນີ້, ຫວຽດນາມ ເປັນປະເທດມີຈຳນວນວິສາຫະກິດເຂົ້າຮ່ວມຫລາຍສຸດ ໃນບັນດາປະເທດ ອາຊຽນ ດ້ວຍວິສາຫະກິດກ່ວາ 100 ແຫ່ງ, ຮ້ານສະແດງຜະລິດຕະພັນ, ການບໍລິການຂອງ ຫວຽດນາມ ກ່ວາ 200 ຮ້ານ.