ໄຂງານປະກວດສີມືແຮງງານອາຊຽນ ຄັ້ງທີ 10 ຢູ່ຫວຽດນາມ
(ໄຂງານປະກວດສີມືແຮງງານອາຊຽນ ຄັ້ງທີ 10 ຢູ່ຫວຽດນາມ)
(vovworld) – ພິທີໄຂງານປະກວດສີມືແຮງງານອາຊຽນ ຄັ້ງທີ 10 ຢູ່ຫວຽດນາມ, ດຳເນີນໄປໃນຕອນຄໍ່າວັນທີ 23/10, ຢູ່ສູນປະຊຸມແຫ່ງຊາດ ມິ້ດິ່ງ, ຮ່າໂນ້ຍ, ດ້ວຍຫົວຂໍ້ວ່າ “ທັກສະວິຊາຊີບ - ຄຸນຄ່າແທດຈິງຂອງພວກເຮົາ” (Skills – Our intrinsic values). ງານປະກວດສີມືແຮງງານອາຊຽນ ມີການເຂົ້າຮ່ວມຂອງນາຍຊ່າງເກືອບ 300 ຄົນ ທີ່ມາຈາກ 10 ປະເທດສະມາຊິກອາຊຽນ, ເຊິ່ງຈະແຂ່ງຂັນກັນໃນ 25 ວິຊາ, ໃນນັ້ນ 23 ວິຊາທາງການ ແລະ 2 ວິຊາສະແດງ.
ກ່າວຄຳເຫັນທີ່ພິທີໄຂ, ທ່ານນາງຮອງປະທານສະພາແຫ່ງຊາດ ຫງວຽນທິກິມເງິນ ເນັ້ນໜັກວ່າ, ການເພີ່ມທະວີການບຳລຸງສ້າງວິຊາຊີບ ເພື່ອແນໃສ່ຍົກສູງຄວາມສາມາດມີວຽກເຮັດງານທຳ ແລະ ເພີ່ມທະວີທັກສະຂອງກຳລັງຄົນງານ ເຊິ່ງແມ່ນຈຸດໝາຍທີ່ໄດ້ຢືນຢັນໃນຖະແຫຼງການຂອງບັນດາການນຳອາຊຽນ ກ່ຽວກັບການພັດທະນາແຫຼ່ງຊັບພະຍາກອນມະນຸດ ແລະ ທັກສະໃຫ້ແກ່ການຟື້ນຟູເສດຖະກິດ, ການເຕີບໂຕຢ່າງໝັ້ນຄົງ. ປະຈຸບັນ, ບັນດາປະເທດອາຊຽນ ພວມປະເຊີນໜ້າກັບສິ່ງທ້າທາຍທີ່ໃຫຍ່ຫຼວງກ່ຽວກັບແຫຼ່ງຊັບພະຍາກອນມະນຸດ ເພື່ອຮັກສາ, ຟື້ນຟູເສດຖະກິດ ແລະ ພັດທະນາ. ເພາະສະນັ້ນ, ເລື່ອງຍົກສູງລະດັບທັກສະວິຊາຊີບໃຫ້ຄົນງານແມ່ນເນື້ອໃນມີຄວາມສຳຄັນທີ່ສຸດ, ສ້າງກຳລັງໜູນໃຫ້ແກ່ການພັດທະນາຢ່າງໄວ ແລະ ໝັ້ນຄົງຂອງອາຊຽນ ເວົ້າລວມ ແລະ ຂອງແຕ່ລະປະເທດສະມາຊິກອາຊຽນ ເວົ້າສະເພາະ.
“ຂ້າພະເຈົ້າຫວັງວ່າ, ຜ່ານງານປະກວດສີມືແຮງງານອາຊຽນຄັ້ງນີ້, ພວກເຮົາຈະປະກອບສ່ວນຊຸກຍູ້ການພັດທະນາບັນດາມາດຖານທັກສະວິຊາຊີບໃນກຸ່ມອາຊຽນ ໃນການຕີລາຄາລະດັບທັກສະວິຊາຊີບ, ເປັນການເຄື່ອນໄຫວສຳຄັນທີ່ສຸດເມື່ອອາຊຽນ ກາຍເປັນປະຊາຄົມລວມໃນວັນທີ 31/12/2015 ຢ່າງເປັນທາງການ. ດ້ວຍຈິດໃຈນັ້ນ, ນາຍຊ່າງແຕ່ລະຄົນ ຕ້ອງມານະພະຍາຍາມຈົນສຸດຄວາມສາມາດຂອງຕົນ ເພື່ອສະແດງໃຫ້ເຫັນຄວາມສາມາດ, ຫົວຄິດປະດິດສ້າງ, ຄວາມເມົາມົວກັບວິຊາຊີບເຊິ່ງຕົນເອງໄດ້ເລືອກເຟັ້ນ”.
ງານປະກວດສີມືແຮງງານອາຊຽນ ຈະອັດລົງໃນວັນທີ 28/10.