(ພາບປະກອບຈາກ NGUYENTANDUNG.ORG)
(vovworld) - ບັ້ນຮົບ ດ້ຽນບຽນຝູ ແລະ ສຸດທ້າຍໃນວັນທີ 7/5 ກ່ອນນີ້ 60 ປີເຕັມ ຂອງປະຊາຊົນ ຫວຽດນາມ ໄດ້ຖືກຈົດຈຳໃນປະຫວັດສາດການທະຫານໂລກຄືເປັນໜຶ່ງໃນບັນດາວິລະກຳທີ່ຍິ່ງໃຫຍ່ທີ່ສຸດຂອງມວນມະນຸດກ່ຽວກັບການຕໍ່ຕ້ານພວກສັດຕູເຂົ້າມາຮຸກຮານ. ມີນາຍທະຫານ, ນັກການທະຫານຫຼາຍທ່ານຍັງຄົ້ນຄວ້າກ່ຽວກັບໄຊຊະນະ ດ້ຽນບຽນຝູຈົນຮອດປະຈຸບັນເພື່ອຖອດຖອນບັນດາບົດຮຽນທີ່ລ້ຳຄ່າ.
ສຳລັບພົນໂທ Anatoli Khiupenen, ສາດສະດາຈານ, ດອກເຕີວິທະຍາສາດການທະຫານ, ເຊີ່ງເຄີຍມີໜ້າຢູ່ ຫວຽດນາມ ດ້ວຍຖານະເປັນຫົວໜ້າຄະນະນັກຄົ້ນຄວ້າການທະຫານຂອງອະດີດສະຫະພາບ ໂຊວຽດ, ໃນການຕໍ່ສູ້ຕ້ານ ອາເມລິກາ ກູ້ຊາດ, ໄຊຊະນະ ດ້ຽນບຽນຝູ ແມ່ນສັນຍາລັກທີ່ຍິ່ງໃຫຍ່ຂອງປະຊາຊົນ ຫວຽດນາມ:
“ອາດເວົ້າໄດ້ວ່ານັ້ນແມ່ນໄຊຊະນະທີ່ສະຫງ່າອົງອາດຂອງສົງຄາມກອງຫຼອນດ້ວຍຍຸດທະວິທີ, ຍຸດທະສາດທີ່ເກັງກ້າສາມາດຂອງກອງທັບ ຫວຽດນາມ ພາຍໃຕ້ການນຳພາຂອງທ່ານປະທານ ໂຮ່ຈີ໋ມິນ ແລະ ຜູ້ບັນຊາການການທະຫານສູງສຸດ ພົນໂທ ຫວໍ້ງວຽນຢາບ. ຂາ້ພະເຈົ້າມັກປຽບທຽບລະຫວ່າງບັນຮົບ ດ້ຽນບຽນຝູ ຂອງ ຫວຽດນາມ ກັບບັ້ນຮົບ Stalingrat ຂອງອະດີດສະຫະພາບ ໂຊວຽດ. ສຳລັບພວກຂ້າພະເຈົ້າແລ້ວ, Stalingrat ແມ່ນບັ້ນຮົບສຳຄັນທຳອິດ, ເມື່ອພວກຂ້າພະເຈົ້າປະເຊີນໜ້າກັບຟາດຊິດ ເຢຍລະມັນ ຮຸກຮານ, ແລ້ວກໍ່ສືບຕໍ່ສິ້ນສຸດສົງຄາມປ້ອງກັນປະເທດທີ່ຍິ່ງໃຫຍ່.”
ປື້ມຫົວຕ່າງໆທີ່ຄົ້ນຄວ້າກ່ຽວກັບບັ້ນຮົບ ດ້ຽນບຽນຝູ ໄດ້ຖືກພິມຈຳໜ່າຍຢູ່ ສະຫະພັນ ລັດເຊຍ. ໃນເວລາມໍ່ໆມານີ້, ໃນປື້ມທີ່ມີຊື່ວ່າ “ 77 ບັ້ນຮົບໂດ່ງດັງກວ່າໝູ່”, ບັນຮົບ ດ້ຽນບຽນຝູ ຂອງ ຫວຽດນາມ ກໍ່ໄດ້ຮັບເລືອກມາສະເໜີ. ນັກຄົ້ນຄວ້າກ່ຽວກັບ ຫວຽດນາມ Anatoli Sokolov, ຊຶ່ງແມ່ນຜູ້ໄດ້ຄົ້ນຄວ້າ ແລະ ຮຽບຮຽງເນື້ອໃນດັ່ງກ່າວໃຫ້ຮູ້ວ່າ:
“ 3-4 ປີກ່ອນນີ້, ຢູ່ ໂມດສະກູ ໄດ້ຕົກລົງຮຽບຮຽງປື້ມຫົວໜຶ່ງກ່ຽວກັບບັນດາບັ້ນຮົບທີ່ໂດ່ງດັງໃນປະຫວັດສາດຂອງມວນມະນຸດ. ທຸກຄົນເຂົ້າຮ່ວມຮຽບຮຽງປື້ມໄດ້ຕົກລົງວ່າຈຳເປັນຕ້ອງນຳບັ້ນຮົບ ດ້ຽນບຽນຝູ ຂອງຫວຽດນາມ ເຂົ້າປື້ມ. ບັ້ນຮົບດັ່ງກ່າວບໍ່ພຽງແຕ່ຕັດສິນຊາຕະກຳຂອງປະຊາຊົນ ຫວຽດນາມ ເທົ່ານັ້ນ, ຫາກຍັງແມ່ນຊາຕະກຳຂອງປະຊາຊົນໂລກອີກດ້ວຍ. ມັນພິສູດໄຫ້ເຫັນວ່າເມື່ອປະຊາຊົນຕັດສິນໃຈຍາດເອົາເອກະລາດ ແລະ ເສລີພາບ, ເຂົາເຈົ້າຈະສ້າງເປັນໄຊຊະນະ. ໄຊຊະນະ ດ້ຽນບຽນຝູ ໄດ້ເປີດຊອງທາງໃຫ້ແກ່ບັນດາປະຊາຊາດຢູ່ໃນໂລກລຸກຮື້ຂຶ້ນຍາດເອົາເອກະລາດໃຫ້ແກ່ປະເທດຂອງຕົນ.”