(vovworld) – ນັບແຕ່ວັນທີ 16/11, ໄທ ໄດ້ເພີ່ມທະວີການຄວບຄຸມປ້ອງກັນຄວາມສະຫງົບເຂດຊາຍແດນກັບມາເລເຊຍ ຍ້ອນມີຄວາມວິຕົກກັງວົນຕໍ່ເລື່ອງພວກ ກໍ່ການຮ້າຍຊາວມຸດສະລິມຫົວຮຸ່ນແຮງ ອາດຈະແຊກຊຶມເຂົ້າປະເທດນີ້ ເພື່ອບຸກໂຈມຕີ ພາຍຫຼັງບັນດາການບຸກໂຈມຕີທີ່ນອງເລືອດຢູ່ນະຄອນຫຼວງປາຣີ, ປະເທດຝລັ່ງ ແລະ ຢູ່ລີບານ. ອະທິບາຍກ່ຽວກັບເລື່ອງນຳໃຊ້ມາດຕະການເພີ່ມທະວີການປ້ອງກັນຄວາມສະຫງົບນີ້, ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດໄທ ພຣະວິດ ວົງສຸວັນ ໃຫ້ຮູ້ວ່າ, ບັນດາບຸກຄົນທີ່ເປັນສະມາຊິກຂອງອົງການລັດອິດສະລາມ (IS) ອ້າງຊື່ເອງ ໄດ້ມີໜ້າຢູ່ພາກພື້ນນີ້. ຄຳຖະແຫຼງດັ່ງກ່າວຖືກຍົກອອກມາພາຍຫຼັງທ່ານ ພຣະວິດ ວົງສຸວັນ ເປັນປະທານກອງປະຊຸມເຊິ່ງລວມມີບັນດາຜູ້ຕາງໜ້າຂອງອົງການປ້ອງກັນຄວາມສະຫງົບ ເພື່ອປຶກສາຫາລືມາດຕະການປ້ອງກັນຄວາມສະຫງົບ ແນໃສ່ສະກັດກັ້ນການບຸກໂຈມຕີກໍ່ການຮ້າຍຢູ່ພາຍໃນປະເທດ, ພາຍຫຼັງເກີດມີບັນດາການບຸກໂຈມຕີທີ່ນອງເລືອດຢູ່ນະຄອນຫຼວງປາຣີ, ປະເທດຝລັ່ງ.