ປະທານປະເທດ ເຈືອງເຕິ໋ນຊາງ
ພີ່ນ້ອງຮ່ວມຊາດ, ສະຫາຍ ແລະ ນັກຮົບທີ່ຮັກແພງທັງຊາດ!
ປີ 2013, ປະເທດຫວຽດນາມ ໄດ້ຜ່ານຜ່າການທ້າທາຍຫຼາຍຢ່າງ. ທົ່ວພັກ, ທົ່ວປວງຊົນ, ທົ່ວກອງທັບ ໄດ້ມານະພະຍາຍາມຈົນສຸດຄວາມສາມາດ, ຍາດໄດ້ຜົນງານສຳຄັນຫຼາຍຢ່າງ ແລະ ຫຼາຍບົດຮຽນອັນລຳ້ຄ່າ. ພາລະກິດສ້າງສາ ແລະ ປົກປັກຮັກສາປະເທດຊາດໃນປະຈຸບັນ ພວມຮຽກຮ້ອງໃຫ້ມີຄວາມຕັດສິນໃຈສູງ, ມີເຈດຈຳນົງ ແລະ ການກະທຳເປັນເອກະພາບ, ມີການປ່ຽນແປງດ້ານຈິດໃຈຢ່າງແຮງ, ຮອບດ້ານ ແລະ ຄົບຊຸດ.
ກ້າວເຂົ້າສູ່ປີໃໝ່ 2014, ປະເທດຊາດຍັງປະສົບກັບຄວາມຫຍຸ້ງຍາກຫຼາຍຢ່າງ, ແຕ່ບັນດາຜົນງານຂອງພາລະກິດປ່ຽນໃໝ່ ຍາມໃດກໍ່ເປັນການລະດົມກຳລັງໃຈອັນໃຫຍ່ຫຼວງ ເພື່ອໃຫ້ປະຊາຊົນຫວຽດນາມ ກ້າວຂຶ້ນຢ່າງໝັ້ນຄົງ ນຳປະເທດຊາດໄປສູ່ອະນາຄົດທີ່ສົດໄສ. ພວກເຮົາໝັ້ນໝາຍຈະເຮັດວຽກ, ອຸທິດສ່ວນໃຫ້ສົມກັບບັນພະບຸລຸດ, ກັບປະຫວັດສາດອັນສະຫງ່າລາສີຂອງຊາດ ແລະ ເພື່ອອະນາຄົດຂອງລຸ່ນລູກລຸ່ນຫຼານໃນພາຍພາກໜ້າ. ຂ້າພະເຈົ້າຮຽກຮ້ອງໃຫ້ພີ່ນ້ອງຮ່ວມຊາດ, ສະຫາຍ ແລະ ນັກຮົບທັງຫຼາຍ ຈົ່ງສາມັກຄີກັນເປັນຈິດໜຶ່ງໃຈດຽວ, ຮ່ວມແຮງຮ່ວມໃຈ, ປະກອບພູມປັນຍາ ແລະ ຄວາມສາມາດທັງໝົດ, ຍູ້ແຮງພາລະກິດປ່ຽນໃໝ່, ປະຕິບັດປະຊາທິປະໄຕຢ່າງກວ້າງຂວາງ ດ້ວຍແນວຄິດອຳນາດນິຕິບັນຍັດທີ່ກ້າວໜ້າ, ສືບຕໍ່ນຳປະເທດກ້າວຂຶ້ນ.
ເວລາສົ່ງທ້າຍປີເກົ່າຕ້ອນຮັບປີໃໝ່ ປີມະເມຍມາຮອດແລ້ວ, ລະດູບານໃໝ່ໄດ້ວຽນມາປະເທດຊາດ ແລະ ຊາວຫວຽດນາມ. ໃນຈຸດເວລາສັກກະລະບູຊານີ້, ຂ້າພະເຈົ້າຂໍສົ່ງພອນໄຊອັນປະເສີດມາຍັງພີ່ນ້ອງຮ່ວມຊາດ, ສະຫາຍ, ນັກຮົບທັງຊາດ, ພີ່ນ້ອງຊາວຫວຽດນາມຢູ່ຕ່າງປະເທດ ແລະ ເພື່ອນມິດສາກົນ. ໃນນາມປະຊາຊົນທົ່ວປະເທດ, ຂ້າພະເຈົ້າຂໍສົ່ງຄວາມຮັກແພງມາຍັງບັນດາພະນັກງານ, ນັກຮົບທີ່ພວມປະຕິບັດໜ້າທີ່ຢູ່ເຂດຊາຍແດນ, ເກາະທະເລທີ່ຫ່າງໄກ. ອວຍພອນໃຫ້ປະເທດຫວຽດນາມ ສັນຕິພາບ, ວັດທະນາຖາວອນ; ປະຊາຊົນຫວຽດນາມ ອິ່ມໜຳສຳລານ ແລະ ມີຄວາມຜາສຸກ, ປີໃໝ່ບັນຍາກາດໃໝ່, ໄຊຊະນະໄໝ່.