ກຽນຢາງ ຊຶ່ງແມ່ນແຂວງທາງທິດຕາເວັນຕົກສ່ຽງໃຕ້ຂອງປະເທດຊາດ, ເປັນທີ່ຮູ້ຈັກດີ ຍ້ອນແມ່ນດິນແດນແຫ່ງວັດທະນະທຳ ແລະ ທ່ອງທ່ຽວທີ່ລືຊື່ຂອງເຂດທົ່ງພຽງແມ່ນ້ຳຂອງຕອນພາກໃຕ້ຫວຽດນາມ. ທຳມະຊາດໄດ້ດົນບັນດານໃຫ້ແຂວງກຽນຢາງບັນດາທິວທັດທຳມະຊາດທີ່ສວຍສົດງົດງາມ ແລະ ດູດດື່ມຕໍ່ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ກຽນຢາງຍັງມີປູຊະນີຍະສະຖານປະຫວັດສາດຫຼາຍແຫ່ງເຊັ່ນ: ຮ່ອນຈົງ, ຮ່ອນແຈ້ມ, ຮ່ອນຟຸຕື, ຫາດຊາຍ ມຸ້ຍນາຍ, ປ່າອູມິນ.
ກຽນຢາງແມ່ນແຂວງທີ່ມີຄວາມສາມາດບົ່ມຊ້ອນຫຼາຍຢ່າງເພື່ອພັດທະນາບັນດາຮູບແບບທ່ອງທ່ຽວ (baokiengiang.com) |
ເມື່ອທຽບໃສ່ແຂວງອື່ນໆໃນເຂດທົ່ງພຽງແມ່ນ້ຳຂອງຕອນພາກໃຕ້ຫວຽດ ນາມນັ້ນ, ກຽນຢາງແມ່ນແຂວງທີ່ມີຄວາມສາມາດບົ່ມຊ້ອນຫຼາຍຢ່າງເພື່ອພັດທະນາບັນດາຮູບແບບທ່ອງທ່ຽວປະຫວັດສາດ, ວັດທະນະທຳ, ທຳມະຊາດ, ພິເສດແມ່ນທ່ອງທ່ຽວທະເລ. ໂດຍແມ່ນດິນແດນທີ່ເຕັມໄປດ້ວຍມູນເຊື້ອປະຫວັດສາດ, ດິນຟ້າອາກາດເອື້ອອຳນວຍຄວາມສະດວກ, ກຽນຢາງພວມແມ່ນສະຖານທີ່ທ່ອງທ່ຽວທີ່ດູດດື່ມສຳລັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ປີນີ້, ແຂວງກຽນຢາງໄດ້ຮັບເລືອກເຟັ້ນເປັນຫົວໜ່ວຍເປັນເຈົ້າພາບຈັດຕັ້ງເຫດການປີທ່ອງທ່ຽວແຫ່ງຊາດ 2016 - ຟູ້ກ໋ວກ - ເຂດທົ່ງພຽງແມ່ນ້ຳຂອງຕອນພາກໃຕ້ຫວຽດ ນາມດ້ວຍຫົວເລື່ອງ: “ ຄົ້ນຫາດິນແດນພາກໃຕ້ ”. ການຈັດຕັ້ງປີທ່ອງທ່ຽວແຫ່ງ ຊາດ 2016 ຢ່າງສຳເລັດຜົນນັ້ນ ຈະປະກອບສ່ວນແນະນຳ, ໂຄສະນາທ່າແຮງ ບົ່ມຊ້ອນ, ຜະລິດຕະພັນທ່ອງທ່ຽວທີ່ເປັນເອກະລັກສະເພາະຂອງກຽນຢາງ ແລະ ບັນດາທ້ອງຖິ່ນໃນຂົງເຂດ, ຜ່ານນັ້ນ ກໍສືບຕໍ່ຊຸກຍູ້ການດຶງດູດແຂກທ່ອງທ່ຽວ, ສ້າງບາດກ້າວບຸກທະລຸໃນການພັດທະນາການທ່ອງທ່ຽວ, ຢັ້ງຢືນບົດບາດຂອງຂະແໜງທ່ອງທ່ຽວໃນການພັດທະນາເສດຖະກິດ-ສັງຄົມ. ທ່ານ ເຈີນຈີ້ຢຸງ, ຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງກຽນຢາງ ໃຫ້ຮູ້ວ່າ :
“ປີທ່ອງທ່ຽວແຫ່ງຊາດ, ພວກເຮົາໄດ້ເຊື້ອເຊີນແຂກສາກົນໃນພາກພື້ນ, ບັນດາປະເທດທີ່ມີເກາະ, ທະເລມາທ່ອງທ່ຽວຢູ່ ກຽນຢາງ. ວຽກງານນີ້ເພື່ອແນໃສ່ເປີດສາຍທ່ອງທ່ຽວໃຫ້ຫຼາຍກວ່າອີກໃນອະນາຄົດເພື່ອປະກອບສ່ວນພັດທະນາຂະແໜງທ່ອງທ່ຽວຂອງແຂວງ ກຽນຢາງ ”
ກຽນຢາງແມ່ນໜຶ່ງໃນຈຳນວນ 28 ແຂວງ ແລະ ນະຄອນຕິດກັບທະເລ. ເຂດທະເລຂອງແຂວງ ກຽນຢາງກ້ວາງກວ່າ 63.000 ຕາລາງກິໂລແມັດດ້ວຍຝັ່ງທະເລມີຄວາມຍາວປະມານ 200 ກິໂລແມັດ ແລະ 143 ເກາະດອນ, ໃນນັ້ນມີເກາະ 43 ແຫ່ງມີປະຊາຊົນມາດຳລົງຊີວິດ. ລະບົບໝູ່ເກາະ ແລະ ເກາະດອນຂອງແຂວງມີຄວາມບົ່ມຊ້ອນຢ່າງໃຫຍ່ຫຼວງທີ່ສຸດກ່ຽວກັບການພັດທະນາບັນດາຮູບແບບທ່ອງທ່ຽວທຳມະຊາດ, ພັດຜ່ອນບຳລຸງສຸຂະພາບ. ບັນດາຫາດຊາຍທະເລທີ່ສວຍງາມ, ລະບົບປະກາລັງທີ່ມີສີສັນຫຼາກຫຼາຍ, ປ່າດົງດິບທີ່ອຸດົມສົມບູນ ແລະ ຫຼາຍຮູບຫຼາຍສີ ກໍລ້ວນແຕ່ແມ່ນທ່າແຮງເພື່ອໃຫ້ ກຽນຢາງ ພັດທະນາການທ່ອງທ່ຽວທະເລ. ພິເສດເກາະຟູ້ກ໋ວກ ພວມແມ່ນສະຖານທີ່ທ່ອງທ່ຽວທີ່ດີສຳລັບແຂກທ່ອງທ່ຽວຜູ້ຊົມຊອບທະເລ. ຖ້າຫາກໄດ້ເຂົ້າມາທ່ອງທ່ຽວຢູ່ຟູ້ກ໋ວກຂອງ ກຽນຢາງ ຄັ້ງໜຶ່ງ, ແນ່ນອນວ່າຄວາມງາມແບບຮົກເຮື້ອ ແລະ ຈັບໃຈໃນເກາະຈະຊ່ວຍໃຫ້ແຂກທ່ອງທ່ຽວທັງຫຼາຍສາມາດເຂົ້າໃຈໄດ້ວ່າ ເປັນຫຍັງ ຟູ້ກ໋ວກ ຍາມໃດກໍນອນໃນບັນດາສະຖານທີ່ທ່ອງທ່ຽວທີ່ດູດດື່ມກວ່າໝູ່ສຳລັບແຂກທ່ອງທ່ຽວສາກົນເມື່ອມາຢ້ຽມຢາມຫວຽດນາມ. ນາງ Iris Bijlisma ແຂກທ່ອງທ່ຽວມາຈາກໂຮງລັງ ໃຫ້ຮູ່ວ່າ :
“ ນີ້ແມ່ນສະຖານທີ່ທ່ອງທ່ຽວທີ່ຈັບອົກຈັບໃຈ, ທິວທັດທຳມະຊາດສວຍສົດງົດງາມດັ່ງໃນຝັນ. ຂ້າພະເຈົ້້າຄິດວ່າ ຍາກທີ່ຈະຫາໄດ້ຢູ່ແຫ່ງໃດງາມເຊັ່ນນີ້. ຟູ້ກ໋ວກແມ່ນສະຖານທີ່ດູດດື່ມອີ່ຫຼີ”
ຟູ້ກ໋ວກມີພູມິສັນຖານທີ່ເປັນເອກະລັກສະເພາະ ລວມມີສາຍພູຍາວຢຽດຈາກເໜືອຮອດໃຕ້ຂອງເກາະ, ມີປ່າດົງດິບດ້ວຍລະບົບສັດ, ພຶກສາຊາດທີ່ອຸດົມສົມບູນ, ມີຫາດຊາຍທະເລຫຼາຍແຫ່ງທີ່ສວຍງາມຄື ຫາດຊາຍເຈື່ອງດ້ວຍລວງຍາວ 20 ກິໂລແມັດ, ຫາດຊາຍຊາວ, ຫາດຊາຍດ້າຍ, ຫາດຊາຍຮ່ອນເທີມ ພ້ອມກັບ 26 ເກາະນ້ອຍໃຫຍ່ຢູ່ອ້ອມແອ້ມ. ຟູ້ກ໋ວກຖືກອ້ອມຮອບດ້ວຍທະເລ, ແຕ່ຍ້ອນມີປ່າ ດັ່ງນັ້ນໃນເກາະກໍມີຫ້ວຍນ້ຳລຳເຊ ແລະ ມີແຫຼ່ງນ້ຳຈືດເຢັນສະບາຍ. ທຳມະຊາດໄດ້ດົນບັນດານໃຫ້ແກ່ແຫ່ງນີ້ມີທິດທັດທຳມະຊາດແບບຮົກເຮື້ອຂອງປ່າໄມ້, ຄວາມງາມທີ່ຈັບໃຈຂອງທະເລ ແລະ ລັກສະນະເພິນຈິດຂອງຫ້ວຍນ້ຳລຳເຊ, ທັງໝົດເຫຼົ່ານັ້ນໄດ້ປະສານກົມກືນເຂົ້າກັນກາຍເປັນຮູບພາບສວຍງາມດັ່ງໃນຝັນ. ທ່ານຮີ່ງກວາງຮຶງ ຮອງປະທານຄະນະກຳມະການປະຊາຊົນເມືອງຟູ້ກ໋ວກ ໃຫ້ຮູ້ວ່າ ບັນດາກິດຈະກຳ, ໂຄງການຈຸດສຸມໄດ້ຮັບການຜັນຂະຫຍາຍ, ໂຄງສ້າງໂຄງລ່າງນັບມື້ນັບກໍ່ສ້າງໃຫ້ສົມບູນແບບ, ອັນໄດ້ຕອບສະໜອງຄວາມຮຽກຮ້ອງຕ້ອງການທີ່ນັບມື້ນັບສູງໃນການພັດທະນາການທ່ອງທ່ຽວ, ພິເສດແມ່ນບັນດາໂຄງການໃຫຍ່ເຊັ່ນ: ລະບົບສາຍກາບແຂວນ ອານເທີ່ຍ-ຮ່ອນເທີມ, ສວນສາທາລະນະສັດປ່າ, ໂຮງແຮມ 5 ດາວ…ເມື່ອບັນດາກິດຈະກຳ, ໂຄງການນີ້ໄດ້ຮັບການກໍ່ສ້າງສຳເລັດ ຈະຮັບໃຊ້ຄວາມຕ້ອງການຂອງແຂກທ່ອງທ່ຽວດີກວ່າອີກ, ພ້ອມກັນນັ້ນ ກໍມຸ່ງໄປສູ່ບັນດາເຫດການໃຫຍ່ຂອງປີທ່ອງທ່ຽວແຫ່ງຊາດທີ່ຖືກຈັດຂຶ້ນຢູ່ແຫ່ງນີ້. ທ່ານຮີ່ງກວາງຮຶງ ຮອງປະທານຄະນະກຳມະການປະຊາຊົນເມືອງຟູ້ກ໋ວກ ໃຫ້ຮູ້ຕື່ມອີກວ່າ:
“ ພວກຂ້າພະເຈົ້າໄດ້ກຳນົດວ່າ ປີ 2016, ຈຳນວນ ແຂກທ່ອງທ່ຽວມາທ່ອງທ່ຽວຢູ່ ຟູ້ກ໋ວກຈະເພີ່ມຂຶ້ນຢ່າງກະໂດດຂັ້ນ ເພາະໃນປີ 2016 ຈະຈັດຕັ້ງຫຼາຍເຫດການ, ພິເສດແມ່ນປີທ່ອງທ່ຽວແຫ່ງຊາດທີ່ຖືກຈັດຂຶ້ນຢູ່ຟູ້ກ໋ວກ. ມີຫຼາຍໂຄງການກໍ່ສ້າງເຂດ ຣີສອດ ລະດັບສູງຈະສຳເລັດການລົງທຶນກໍ່ສ້າງ ແລະ ນຳເຂົ້າສູ່ໃຊ້ການ”
ກ່ຽນຢາງມີປູຊະນີຍະສະຖານປະຫວັດສາດລະດັບຊາດ, ທິດທັດທຳມະຊາດ ທີ່ລືຊື່ຫຼາຍແຫ່ງເຊັ່ນ: ວັດຮາງ, ສາລາບູຊານັກວິລະຊົນ ຫງວຽນຈຸງຈຶກຢູ່ທີ່ນະຄອນ ແຣກຣ້າ, ປູຊະນີຍະສະຖານ ມຸ້ຍນາຍ, ແຖກດົ້ງ ແລະ ປູຊະນີຍະສະຖານໂບດ ຟູ້ກ໋ວກ. ພິເສດໃນປີ 2016, ແຂວງກຽນຢາງມີຄວາມເປັນກຽດຕ້ອນຮັບໃບຢັ້ງຢືນປ່າສະຫງວນແຫ່ງຊາດ ອຸມິນເທື້ອງ ກາຍເປັນເຂດ Ramsar ແຫ່ງທີ 2.228 ຂອງໂລກ ແລະ ເປັນເຂດ Ramsar ແຫ່ງທີ 8 ຂອງຫວຽດນາມອີກດ້ວຍ.