(vovworld)- ໃນປີຜ່ານມາ, ເຖິງວ່າຕ້ອງປະເຊີນຫນ້າກັບບັນດາການກະທົບຢ່າງຫຍໍ້ທໍ້ຈາກພື້ນຖານເສດຖະກິດໂລກ ກໍຄືພາຍໃນປະເທດ ກໍຕາມ, ພິເສດແມ່ນການກະທົບຈາກເຫດການຈີນ ຕັ້ງຮ້ານເຈາະນ້ຳມັນ ໄຮ່ຢາງ 981 ຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ, ເຮັດໃຫ້ຈຳນວນແຂກທ່ອງທ່ຽວສາກົນມາຢ້ຽມຢາມຫວຽດນາມຫລຸດລົງ. ເຖິງຢ່າງໃດກໍຕາມ, ຍ້ອນເພີ່ມທະວີບັນດາມາດຕະການຢ່າງຮີບດ່ວນ, ເປີດກວ້າງຕະຫລາດທ່ອງທ່ຽວຈຸດສຸມ, ກະຕຸກຊຸກຍູ້ຄວາມຕ້ອງການທ່ອງທ່ຽວພາຍໃນປະເທດ, ຂະແຫນງທ່ອງທ່ຽວ ຫວຽດນາມ ຍັງຄົງຮັກສາລະດັບເຕີບໂຕເປັນປົກກະຕິ ແລະ ໄດ້ຮັບຖືວ່າ ແມ່ນປີທີ່ການເຄື່ອນໄຫວສົ່ງເສີມໂຄສະນາການທ່ອງທ່ຽວປະສົບຜົນສຳເລັດ.
ໃນປີ 2014, ຂະແຫນງທ່ອງທ່ຽວຫວຽດນາມ ໄດ້ຕ້ອນຮັບນັກທ່ອງທ່ຽວສາກົນ 8 ລ້ານເທື່ອຄົນ, ເພີ່ມຂຶ້ນ 4% ແລະ ນັກທ່ອງທ່ຽວພາຍໃນປະເທດ 38,5 ລ້ານເທື່ອຄົນ, ເພີ່ມຂຶ້ນ 10%. ຍອດລາຍຮັບຈາກການເຄື່ອນໄຫວທ່ອງທ່ຽວບັນລຸປະມານ 230.000 ຕື້ດົງ, ເພີ່ມຂຶ້ນ 15% ເມື່ອທຽບໃສ່ປີ 2013. ຜົນງານປະທັບໃຈທີ່ສຸດໃນປີຜ່ານມາ ນັ້ນແມ່ນການທ່ອງທ່ຽວແຫ່ງຊາດນັບມື້ນັບໄດ້ຮັບການຮັບຮູ້ ແລະ ຕີລາຄາສູງຈາກເພື່ອນມິດສາກົນ. ມີສະຖານທີ່ທ່ອງທ່ຽວຫລາຍແຫ່ງໄດ້ຮັບການຄັດເລືອກຈາກອົງການທີ່ມີຊື່ສຽງໃນໂລກວ່າ ແມ່ນສະຖານທີ່ທ່ອງທ່ຽວໄດ້ຮັບຄວາມນິຍົມກວ່າໝູ່ຈາກນັກທ່ອງທ່ຽວ. ພົ້ນເດັ່ນ ແມ່ນ ອ່າວຮ້າລອງ ໄດ້ຮັບການຄັດເລືອກຈາກ ຫນ້າເວັບ BuzzFeed ຂອງອາເມລິກາວ່າ ແມ່ນຫນຶ່ງໃນຈຳນວນທັດສະນີຍະພາບ 25 ແຫ່ງທີ່ມີຄວາມງາມມະຫັດສະຈັນກວ່າໝູ່ໃນໂລກ; ນະຄອນ ຮ່າໂນ້ຍ ໄດ້ຮັບການຄັດເລືອກຈາກ ວາລະສານ TripAdvisor ແມ່ນຫນຶ່ງໃນຈຳນວນ 10 ຕົວເມືອງ ທີ່ສ້າງຄວາມດຶງດູດນັກທ່ອງທ່ຽວທີ່ສຸດຂອງໂລກ. ສ່ວນວາລະສານທ່ອງທ່ຽວ Travel&Leisure ຂອງອາເມລິກາ ຄັດເລືອກ ຫວຽດນາມ ແມ່ນສະຖານທີ່ທ່ອງທ່ຽວຢືນອັນດັບທີ 6 ໃນຈຳນວນສະຖານທີ່ທ່ອງທ່ຽວ 20 ແຫ່ງດີທີ່ສຸດ, ດ້ວຍຄວາມປອດໄພ ແລະ ຄວາມຮັກແພງ, ສະຫນິດສະຫນົມຂອງປະຊາຊົນ. ຖ້ຳ ເຊີນດອງ ໄດ້ຮັບການຄັດເລືອກຈາກວາລະສານທ່ອງທ່ຽວ Business Insider ຂອງອາເມລິກາ ວ່າ ແມ່ນຫນຶ່ງໃນຈຳນວນຖ້ຳ 12 ແຫ່ງທີ່ສ້າງຄວາມປະທັບໃຈທີ່ສຸດໃນໂລກ ແລະ ວາລະສານ National Geographic ພາສາລັດເຊຍ ຄັດເລືອກວ່າແມ່ນລາຍການທ່ອງທ່ຽວພະຈົນໄພປະທັບໃຈທີ່ສຸດຂອງໂລກໃນປີ…ນອກນັ້ນ ມີບໍລິສັດທ່ອງທ່ຽວ ແລະ ໂຮງແຮມ ຫລາຍແຫ່ງ ຂອງຫວຽດນາມ ກໍໄດ້ຮັບການເຊີດຊູຈາກອົງການຕ່າງໆ ແລະ ເວັບໄຊ ວ່າ ມີຄຸນນະພາບບໍລິການດີເດັ່ນ. ທ່ານ ຮ່າວັນຊຽວ, ຮອງຫົວຫນ້າກົມໃຫຍ່ທ່ອງທ່ຽວຫວຽດນາມ ໃຫ້ຮູ້ວ່າ:
ປີ 2014, ຈຳນວນນັກທ່ອງທ່ຽວສາກົນມາຢ້ຽມຢາມ
ຫວຽດນາມ 8 ລ້ານເທື່ອຄົນ
ພາບ:internet
|
“ປີ 2014, ຂະແຫນງທ່ອງທ່ຽວຫວຽດນາມ ຍັງຄົງຮັກສາບັນດາມາດຖານເຕີບໂຕຢ່າງລຽນຕິດນັບແຕ່ປີ 2009 ມາຮອດປະຈຸບັນ ແລະ ຍາມໃດລະດັບເຕີບໂຕຂອງປີນີ້ກໍສູງກວ່າໄລຍະດຽວກັນຂອງປີກາຍ. ນີ້ເປັນຫນ້າຊື່ນຊົມ, ສະແດງໃຫ້ເຫັນຄວາມມານະພະຍາຍາມຂອງທົ່ວຂະແຫນງ, ພິເສດແມ່ນປະຊາຄົມວິສາຫະກິດ ໄດ້ພະຍາຍາມຜ່ານຜ່າສິ່ງທ້າທາຍເພື່ອຢັ້ງຢືນທີ່ຕັ້ງບົດບາດ ແລະ ການປະກອບສ່ວນຢ່າງມີປະສິດທິຜົນຂອງຂະແຫນງທ່ອງທ່ຽວໃຫ້ແກ່ການພັດທະນາເສດຖະກິດສັງຄົມຂອງປະເທດຊາດ.”
ອ່າວຮ້າລອງ
ພາບ:anhdepdulich
|
ທິດທາງສຳຄັນຂອງການພັດທະນາການທ່ອງທ່ຽວຫວຽດນາມ ໃນໄລຍະຜ່ານມາ ນັ້ນແມ່ນວຽກງານໂຄສະນາ, ສົ່ງເສີມການທ່ອງທ່ຽວໄດ້ຮັບຄວາມເອົາໃຈໃສ່ຜັນຂະຫຍາຍເປັນຢ່າງດີ, ມີຄຸນນະພາບ ແລະ ມີປະສິດທິຜົນກວ່າ. ໃນປີຜ່ານມາ, ການສ້າງເຄື່ອງໝາຍທ່ອງທ່ຽວຫວຽດນາມຕິດພັນກັບ logo&slogan “ຫວຽດນາມ-ຄວາມງາມມະຫັດສະຈັນ” ໄດ້ຮັບຖືວ່າແມ່ນຫນ້າທີ່ຈຸດສຸມຂອງຂະແຫນງ. ຂະແຫນງທ່ອງທ່ຽວ ໄດ້ເຂົ້າຮ່ວມງານຕະຫລາດນັດທ່ອງທ່ຽວສາກົນໂດຍກົງ ແລະ ສົມທົບກັນປະຕິບັດຫນ້າທີ່ໂຄສະນາ, ສົ່ງເສີມການທ່ອງທ່ຽວໃນບັນດາເຫດການວັດທະນະທຳ, ການທູດ ຢູ່ປະເທດ ເອີລົບ, ອາຊີ ຈຳນວນຫນຶ່ງຄື: ອັງກິດ, ເຢຍລະມັນ, ລັດເຊຍ, ຍີ່ປຸ່ນ, ສິງກະໂປ, ຈີນ, ມາເລເຊຍ.. ຢູ່ພາຍໃນປະເທດ, ການເຄື່ອນໄຫວໂຄສະນາ, ສົ່ງເສີມການທ່ອງທ່ຽວສະແດງອອກຜ່ານການຕ້ອນຮັບບັນດາຄະນະແຂກສາກົນ, ການເຂົ້າຮ່ວມງານຕະຫລາດນັດ ແລະ ເຫດການທ່ອງທ່ຽວຕ່າງໆ, ອັນໄດ້ປະກອບສ່ວນດຶງດູດນັກທ່ອງທ່ຽວສາກົນ. ທ່ານ ຈີ້ງດັງແທງ, ຮອງຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກວ໋າງນີງ ຖືວ່າ:
“ຢາກພັດທະນາການທ່ອງທ່ຽວແບບຍືນຍົງ ຄວນອີງໃສ່ 3 ເສົາຄ້ຳ: ເສດຖະກິດ, ວັດທະນະທຳ, ສັງຄົມ ແລະ ສິ່ງແວດລ້ອມ. ເລື່ອງເລືອກເຟັ້ນຜູ້ໃຫ້ຄຳປຶກສາສາກົນທີ່ມີຊື່ສຽງ ພ້ອມກັບທ້ອງຖິ່ນເຂົ້າຮ່ວມວຽກງານວາງແຜນກຳນົດ, ພັດທະນາການທ່ອງທ່ຽວແມ່ນຈຳເປັນທີ່ສຸດ. ຄຽງຄູ່ກັນນັ້ນ ຄວນເອົາໃຈໃສ່ປະຕິບັດວຽກງານຄຸ້ມຄອງສະພາບແວດລ້ອມແຫ່ງການທ່ອງທ່ຽວ, ລາຄາບໍລິການ, ຄວາມເປັນລະບຽບຮຽບຮ້ອຍຢູ່ບັນດາສະຖານທີ່ທ່ອງທ່ຽວ.”
ຜົນສຳເລັດຂອງປີ 2014 ເປັນພື້ນຖານເພື່ອໃຫ້ຂະແຫນງທ່ອງທ່ຽວຫວຽດນາມ ວາງຄາດໝາຍໃນປີ 2015 ຈະຕ້ອນຮັບນັກທ່ອງທ່ຽວສາກົນໃຫ້ໄດ້ 8,5 ລ້ານເທື່ອຄົນ, ຮັບໃຊ້ນັກທ່ອງທ່ຽວພາຍໃນປະເທດໃຫ້ໄດ້ 41 ເທື່ອຄົນ. ເພື່ອບັນລຸຄາດໝາຍດັ່ງກ່າວ, ຂະແຫນງທ່ອງທ່ຽວວາງຫນ້າທີ່ຈຸດສຸມ, ນັ້ນແມ່ນ ກໍ່ສ້າງບັນດາເຂດທ່ອງທ່ຽວຈຸດສຸມແຫ່ງຊາດ ເພື່ອສ້າງກຳລັງພັດທະນາການທ່ອງທ່ຽວ, ພັດທະນາລະບົບທ່ອງທ່ຽວຄຸນນະພາບ, ເປັນເອກະລັກສະເພາະ, ຫລາຍຮູບຫລາຍແບບ ແລະ ຄົບຊຸດ,ມີມູນຄ່າເພີ່ມຂຶ້ນສູງ, ຕອບສະຫນອງຄວາມຕ້ອງການຂອງນັກທ່ອງທ່ຽວພາຍໃນ ແລະ ສາກົນ. ຂະແຫນງທ່ອງທ່ຽວ ຈະສືບຕໍ່ຜັນຂະຫຍາຍລາຍການກະຕຸຊຸກຍູ້ຄວາມຕ້ອງການທ່ອງທ່ຽວພາຍໃນປະເທດ ດ້ວຍຫົວຂໍ້: “ຊາວຫວຽດນາມບຸລິມະສິດທ່ອງທ່ຽວຫວຽດນາມ”, ຍູ້ແຮງວຽກງານສົ່ງເສີມການທ່ອງທ່ຽວ ຕາມທິດເປັນອາຊີບ, ຖືຜະລິດຕະພັນທ່ອງທ່ຽວ ແລະ ເຄື່ອງໝາຍທ່ອງທ່ຽວເປັນຈຸດສຸມ, ຕິດພັນກັບການໂຄສະນາພາບພົບປະເທດຊາດ.