(vovworld)- ໂບດດືກບາ(ພະແມ່) ຢູ່ ນະຄອນ ໂຮ່ຈິມີນ ແມ່ນຫນຶ່ງໃນບັນດາກິດຈະກຳສາສະຫນາ ຊື່ງໄດ້ຮັບການອອກແບບຕາມສະຖາປັດຕະຍະກຳ ຝລັ່ງ. ນີ້ກໍແມ່ນກິດຈະກຳສະຖາປັດຕະຍະກຳທີ່ເປັນເອກະລັກສະເພາະ, ພົ້ນເດັ່ນຢູ່ ນະຄອນໂຮ່ຈິມີນ ແລະ ມີຂອບຂະຫນາດໃຫຍ່ຢູ່ ຫວຽດນາມ. ໂບດ ດືກບາ ນະຄອນໂຮ່ຈິມີນ ປະຈຸບັນ ແມ່ນສະຖານທີ່ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ບົດຂຽນຂອງນັກຂ່າວໂຕຕວນ ທີ່ພາດຫົວຂໍ້ວ່າ: “ຄົ້ນຫາຄວາມງາມສະຖາປັດຕະຍະກຳຂອງໂບດດືກບາຢູ່ນະຄອນໂຮ່ຈິມີນ”.
ໂບດດືກບາ ຢູ່ ນະຄອນ ໂຮ່ຈິມີນ
ພາບ:baomoi.com
|
ໂບດດືກບາ ຕັ້ງຢູ່ເລກ 1 ສະຫນາມຫລວງ ກົງສາ ປາຣີ ເມືອງ 1 ນະຄອນ ໂຮ່ຈິມີນ ແລະ ແມ່ນຫນຶ່ງໃນບັນດາກິດຈະກຳສາສະຫນາຊື່ງໄດ້ຮັບການກໍ່ສ້າງມາແຕ່ດົນນານ ຖັດຈາກ ໂບດໃຫຍ່ ຮ່າໂນ້ຍ. ພາຍຫລັງຢືດຄອງ ໄຊງ່ອນ (ຊື່ຂອງນະຄອນໂຮ່ຈິມີນໃນເມື່ອກ່ອນ), ຝລັ່ງ ໄດ້ກໍ່ສ້າງໂບດແຫ່ງນີ້ເພື່ອເປັນບ່ອນທຳພິທີສວດມົນໃຫ້ຊາວ ຝລັ່ງ ທີ່ຖືສາສະຫນາກາໂຕລິກ. ໂບດ ດືກບາ ໄດ້ຮັບການກໍ່ສ້າງແຕ່ປີ 1877. ສະນັ້ນ ໂບດດືກບາ ໄດ້ຮັບການອອກແບບຕາມສະຖາປັດຕະຍະກຳ ບູຮານ ຂອງເອີລົບ ໃນໄລຍະນັ້ນ. ນັກສະຖາປານິກ ຫງວຽນຫືວທາຍ, ຜູ້ທີ່ຄົ້ນຄ້ວາປະຫວັດຄວາມເປັນມາບັນດາກິດຈະກຳສະຖາປັດຕະຍະກຳ ຝລັ່ງ ຢູ່ ນະຄອນ ໂຮ່ຈິມີນ ມາເປັນເວລາຫລາຍປີໃຫ້ຮູ້ວ່າ: ຂີດໝາຍສະຖາປັດຕະຍະກຳຂອງ ຝລັ່ງ ຢູ່ ໄຊງ່ອນ ໃນເມື່ອກອ່ນ ແລະ ນະຄອນ ໂຮ່ຈິມີນ ປະຈຸບັນ ໄດ້ຮັບການກໍ່ສ້າງຜ່ານຫລາຍໄລຍະ ແລະ ກິດຈະກຳ ໂບດດືກບາ ໄດ້ຮັບການກໍ່ສ້າງໃນໄລຍະທຳອິດ.
“ນັ້ນແມ່ນໄລຍະຂອງບັນດາພົນເຮືອເອກ ຝລັ່ງ. ສະຖາປັດຕະຍະກຳຂອງ ນະຄອນໃນໄລຍະນັ້ນໄດ້ຮັບການອອກແບບຕາມຮູບແບບທະຫານ. ບ່ອນສີ່ແຍກ, ຫົກແຍກ ເຄີຍມີບັນດາກິດຈະກຳທີ່ໄດ້ຮັບການກໍ່ສ້າງຕາມສະຖາປັດຕະຍະກຳຝລັ່ງ. ບັນດາກິດຈະກຳທຳອິດແມ່ນ ທຳນຽບ ໂນໂຣດົມ ປະຈຸບັນ ແມ່ນທຳນຽບທົງເຍີດ ແລະ ໂບດດືກບາ.”
ໂບດ ດືກບາ ໄດ້ຮັບການກໍ່ສ້າງຕາມການອອກແບບຂອງນັກສະຖາປານິກ Bourard, ຜູ້ຊ່ຽວຊານກ່ຽວກັບບັນດາກິດຈະກຳສາສະຫນາ. ໂບດ ດືກບາ ແມ່ນການປະສານສົມທົບຢ່າງຄ່ອງແຄ້ວລະຫວ່າງສະຖາປັດຕະຍະກຳ Roman ແລະ Gotich, ຕາມຮູບແບບ ໂບດດືກບາ ປາຣີ ຂອງຝລັ່ງ. ສະຖາປັດຕະຍະກຳແຫ່ງນີ້ ໄດ້ຮັບການຕີລາຄາວ່າແມ່ນກິດຈະກຳສວຍງາມກວ່າໝູ່ໃນບັນດາໂບດຢູ່ ບັນດາປະເທດຫົວເມືອງຂຶ້ນຂອງຝລັ່ງໃນສັດຕະວັດທີ 19. ຈຸດພົ້ນເດັ່ນຂອງກິດຈະກຳແຫ່ງນີ້ ແມ່ນສີແດງຂອງ ດິນຈີ່ ອັນໄດ້ເຮັດໃຫ້ໂບດດືກບາສວຍງາມ ແລະ ພົ້ນເດັ່ນຂຶ້ນ ຢູ່ໃຈກາງນະຄອນທີ່ທັນສະໄຫມ. ນັກສະຖາປານິກ ຫງວຽນຫືວທາຍ ໃຫ້ຮູ້ວ່າ:
“ໃນໄລຍະນັ້ນ ຊາວຝລັ່ງ ລ້ວນແຕ່ນຳເຂົ້າວັດສະດຸກໍ່ສ້າງຈາກ ຝລັ່ງ, ເປັນຕົ້ນ ແມ່ນດິນຈີ່ທີ່ເອົາມາກໍ່ສ້າງໂບດດືກບາ ແມ່ນນຳເຂົ້າຈາກເຂດ Marseille ຂອງຝລັ່ງ. ສິ່ງພິເສດ ບັນດາກ້ອນດິນຈີ່ສີແດງນີ້ ບໍ່ເປັນໄຄ.ສະນັ້ນ ໃນກວ່າຫນຶ່ງສັດຕະວັດຜ່ານມາ ມັນຍັງຄົງຮັກສາສີແດງດັ້ງເດີມໄວ້.”
ກວ່າຫນຶ່ງສັດຕະວັດທີ່ລ່ວງເລີຍໄປ, ມາຮອດປະຈຸບັນ ກິດຈະກຳສະຖາປັດຕະຍະກຳນີ້ ຍັງຄົງຮັກສາຈຸດດັ້ງເດີມໄວ້. ອາຄານຕົ້ນຕໍຂອງໂບດແມ່ນກິດຈະກຳສະຖາປັດຕະຍະກຳ ໄດ້ຮັບການກໍ່ສ້າງຕາມແບບ Roman ມີລວງຍາວ 91 ແມັດ, ລວງກວ້າງ 35 ແມັດ, ຫລັງຄາສູງ 21 ແມັດ. ມີ 2 ທາດລະຄັງ ສູງ 60,5 ແມັດ ແລະ ບັນຈຸລະຄັງ 6 ຫນ່ວຍ , ຢູ່ຍອດທາດຕິດໄມ້ກາງເຂັນ. ີ.
ເບື້ອງໃນຂອງຫໍທຳມະມີເສົາ 2 ແຖວ, ແຕ່ລະແຖວ ມີ 6 ເສົາ ຊື່ງແມ່ນຕົວແທນຂອງ ພະອໍລະຫັນ 12 ອົງ. ເບື້ອງຫລັງແຖວເສົາ ແມ່ນ ລະບຽງ ແລະ ຕໍ່ມາແມ່ນຫໍແຈກນ້ອຍ ດ້ວຍແທ່ນບູຊານ້ອຍ ແລະ ຮູບປັ້ນພະອໍລະຫັນນ້ອຍເຮັດດ້ວຍຫີນຂາວທີ່ລະອຽດລະອໍ. ແທ່ນບູຊາ ແມ່ນຜະລິດຕະພັນປະຕິມາກຳທີ່ເປັນເອກະລັກສະເພາະ. ການປະດັບປະດາ, ລວດລາຍ ຢູ່ໂບດແຫ່ງນີ້ ລ້ວນແຕ່ເຮັດຕາມແບບ Roman ແລະ Gotich. ເບື້ອງຫນ້າຂອງໂບດ ແມ່ນສວນສາທາລະນະ ດ້ວຍເສັ້ນທາງ 4 ສາຍໄຄ່ວກັນສ້າງເປັນຮູບໄມ້ກາງເຂັນ. ຢູ່ໃຈກາງສວນສາທາລະນະ ແມ່ນຮູບປັ້ນພະແມ່ຮ່ວາບີງ ສູງ 4,6 ແມັດ ເຮັດດ້ວຍຫີນຂາວ ໂດຍນັກປະຕິມາກຳ G.Ciocchetti ຊາວອີຕາລີ ປະຕິບັດເມື່ອປີ 1959. ຮູບປັ້ນພະແມ່ ໃນທ່າຢືນຊື່, ມືຈັບຮູບຈຳລອງຫນ່ວຍໂລກຕິດໄມ້ກາງເຂັນ, ສາຍຕາຂອງພະແມ່ແມ່ນມຸ່ງໄປສູ່ນທ້ອງຟ້າຄືພວມພາວະນາໃຫ້ຫວຽດນາມ ແລະ ໂລກມີສັນຕິພາບ.
ປະຈຸບັນ ໂບດດືກບາ ນະຄອນໂຮ່ຈິມີນ ແມ່ນກິດຈະກຳສະຖາປັດຕະຍະກຳທີ່ເປັນເອກະລັກສະເພາະທີ່ພົ້ນເດັ່ນຂອງເຂດດິນ ໄຊງ່ອນ ກວ່າ 300 ປີແຫ່ງການພັດທະນາ ແລະ ສ້າງສາ. ດ້ວຍຄວາມງາມດ້ານສະຖາປັດຕະຍະກຳເປັນເອກະລັກສະເພາະ ແລະ ມີອາຍຸຫລາຍປີ, ໂບດ ດືກບາ ນະຄອນໂຮ່ຈິມີນ ປະຈຸບັນ ຍາມໃດກໍແມ່ນສະຖານທີ່ດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ມາຢ້ຽມຢາມເປັນຈຳນວນຫລວງຫລາຍ.