(vovworld)- ໂດຍຫ່າງຈາກໃຈກາງເທດສະບານ ຊາປາ ກວ່າ 10 ກິໂລແມັດ, ບ້ານ ຕາຝິ່ນ ຊື່ງແມ່ນແຫ່ງດຳລົງຊີວິດຂອງຊາວເຜົ່າຢ້າວແດງ ນີ້ກໍແມ່ນສະຖານທີ່ທ່ອງທ່ຽວທີ່ດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ມາຄົ້ນຫາເປັນຈຳນວນຫລວງຫລາຍກ່ອນທີ່ໄປຢ້ຽມຢາມແຫ່ງອື່ນໃນນະຄອນນ້ຳໝອກນີ້. ຢູ່ ຕາຝີ່ນ, ນັກທ່ອງທ່ຽວຈະເຫັນປະຈັກຕາການດຳລົງຊີວິດຂອງຊາວເຜົ່າຢ້າວແດງ ພິເສດແມ່ນການຜະລິດຢາສະໝູນໄພຈາກໃບໄມ້ຫລາຍຊະນິດ.
ນັກທ່ອງທ່ຽວມາຢ້ຽມຢາມບ້ານ ຕາຝີ່ນໃນລະດູບານໃຫມ່
ພາບ:baomoi.com
|
ເມື່ອມາຢ້ຽມຢາມ ຊາປາ, ນັກທ່ອງທ່ຽວຈຳນວນຫນຶ່ງເຄີຍເລືອກວິທີເຊົ່າລົດຈັກຄັນຫນຶ່ງເພື່ອໄປເຖິງ ບ້ານຕາຝີ່ນ. ຢູ່ສອງຟາກທາງໄປຍັງໝູ່ບ້ານນີ້ ແມ່ນບັນດາທົ່ງນາຂັ້ນໄດທີ່ສ້າງເປັນຮູບພາບທີ່ສວຍງາມ. ບ່ອນທຳອິດທີ່ນັກທ່ອງທ່ຽວມັກແວ່ຢາມແມ່ນຫໍທຳມະບູຮານ ຕາຝີ່ນ. ເຖິງວ່າ ປະຈຸບັນ ພຽງແຕ່ມີບັນດາຮ່ອງຮອຍຝາຜະຫນັງຫີນກໍຕາມ ແຕ່ຫໍທຳມະແຫ່ງນີ້ຍັງຄົງຮັກສາ ບັນດາຄຸນຄ່າວັດທະນະທຳ ແລະ ສະຖາປັດຕະຍະກຳທີ່ເປັນເອກະລັກສະເພາະໄວ້ຢູ່.
ຢູ່ ບ້ານ ຕາຝີ່ນ, ນັກທ່ອງທ່ຽວສ່ວນຫລາຍມັກຢູ່ໃນເຮືອນຂອງຊາວເຜົ່າຢ້າວແດງ ເພື່ອໄດ້ເຫັນປະຈັກຕາຊີວິດການເປັນຢູ່ປະຈຳວັນຂອງເຂົາເຈົ້າ. ໃນຫລັງຄາເຮືອນປຸກສ້າງດ້ວຍໄມ້ຂອງຊາວເຜົ່າຢ້າວ, ນັກທ່ອງທ່ຽວຈະພ້ອມກັບຊາວບ້ານ ປຸງແຕ່ງອາຫານ. ກາງເວັນ, ນັກທ່ອງທ່ຽວພ້ອມກັບຊາວບ້ານໄປຊອກຫາໃບໄມ້,ຕົ້ນໄມ້ຜະລິດຢາສະໝູນໄພ ແລະ ຢ້ຽມຢາມບໍລິເວນບ້ານ. ເມື່ອຮອດຕອນຄ່ຳ, ນັກທ່ອງທ່ຽວນັ່ງໂອ້ລົມກັບຊາວບ້ານຢ່າງເບິກບານມ່ວນຊື່ນຢູ່ອ້ອມເຕົາໄຟຕັ້ງຢູ່ໃຈກາງເຮືອນ.
ນັກທ່ອງທ່ຽວພາຍໃນປະເທດ ກໍຄືນັກທ່ອງທ່ຽວຕ່າງປະເທດຜູ້ໃດກໍຢາກຊອກຮູ້ກ່ຽວກັບຮີດຄອງປະເພນີກໍຄືວັດທະນະທຳຂອງຊາວເຜົ່າຢາວແດງຫລາຍກວ່າ. ອ້າຍ Max, ນັກທ່ອງທ່ຽວມາຈາກ ອົດສະຕາລີ, ຊື່ງແມ່ນຜູ້ທີ່ໄດ້ຢູ່ໃນຄອບຄົວຂອງ ປ້າ ຟານມານໄມ ມາເປັນເວລາ 2 ມື້ໃຫ້ຮູ້ວ່າ:
“ປະຊາຊົນຢູ່ທີ່ນີ້ສະຫນິດສະຫນົມ ແລະ ຮັກແພງແຂກທີ່ສຸດ. ສະນັ້ນ, ຢູໃນເຮືອນເຂົາເຈົ້າ, ຂ້າພະເຈົ້າຮູ້ສຶກສະບາຍໃຈທີ່ສຸດ. ສິ່ງທີ່ແຕກຕ່າງກັບຢູ່ ອົດສະຕາລີ, ນັ້ນແມ່ນ ຢູ່ທີ່ນີ້ທຸກຄົນພ້ອມກັນປຸງແຕ່ງອາຫານ ອັນໄດ້ສ້າງຄວາມອົບອຸ່ມທີ່ສຸດ, ສ່ວນຢູ່ ອົດສະຕາລີ ພຽງແຕ່ແມ່ເປັນຜູ້ປຸງແຕ່ງອາຫານເທົ່ານັ້ນ.”
ທ່ານ ດັ້ງທາຍອານ ພ້ອມກັບລູກຫລານມາຈາກ ຮ່າໂນ້ຍ ໄດ້ສະຫງວນເວລາ 3 ວັນ ເພື່ອກິນນອນໃນຄອບຄົວ ປ້າ ຟານມານໄມ. ທ່ານ ອານໃຫ້ຮູ້ວ່າ ທ່ານຮູ້ສຶກປະທັບໃຈຫລາຍເມື່ອເປັນຄັ້ງທຳອິດໄປທ່ອງທ່ຽວແຕ່ບໍ່ນອນໃນໂຮງແຮມທີ່ທັນສະໄຫມ, ບໍ່ຮັບປະທານອາຫານຢູ່ຮ້ານກິນດື່ມ ແທນທີ່ນັ້ນ ແມ່ນໄດ້ຢູ່ຮ່ວມກັບຄອບຄົວຊາວຊົນເຜົ່າ.
ຫໍທຳມະບູຮານ ຕາຝີ່ນ
ພາບ:sotaydulich.com
|
“ນີ້ເປັນຄັ້ງທຳອິດທີ່ຂ້າພະເຈົ້າເຂົ້າຮ່ວມລາຍການທ່ອງທ່ຽວແບບນີ້. ໄດ້ຢູ່ຮ່ວມກັບຄອບຄົວຊາວຊົນເຜົ່າ, ໄດ້ເຈືອຈານເຂົ້າກັບຊີວິດຂອງເຂົາເຈົ້າ, ຂ້າພະເຈົ້າຮູ້ສຶກປະທັບໃຈທີ່ສຸດ. ເມື່ອໄດ້ໄປໄຮ່ເຮັດນາ, ໄດ້ແຕ່ງກິນ ກໍຄືເຮັດທຸກສິ່ງທຸກຢ່າງພ້ອມກັບເຂົາເຈົ້າ, ນັກທ່ອງທ່ຽວຄືພວກຂ້າພະເຈົ້າຈະມີຄວາມເຂົ້າໃຈຕື່ມອີກກ່ຽວກັບການດຳລົງຊີວິດ ກໍ່ຄືຮີດຄອງປະເພນີຂອງຊາວເຜົ່າຢ້າວແດງ.”
ອ້າຍ ດັ້ງທາຍວີງ, ລູກຊາຍ ຂອງທ່ານ ທ່າຍອານ ໄດ້ມີໂອກາດໄປຢ້ຽມຢາມ ຊາປາ ເປັນຫລາຍຄັ້ງແລ້ວ, ສະນັ້ນ ອ້າຍຢາກໃຫ້ທຸກຄົນໃນຄອບຄົວຂອງຕົນຮູ້ຈັກເຖິງ ຊາປາ ບໍ່ພຽງແຕ່ມີພູ ຮ່າມຣົ່ງ, ຖະຫນົນ ເກົ່າໄມ, ນ້ຳຕົກຕາດ ທາກບາກເທົ່ານັ້ນ. ອ້າຍໃຫ້ຮູ້ວ່າ:
“ສາຍເຫດທີ່ຂ້າພະເຈົ້າມາແຫ່ງນີ້, ຫາກບໍ່ແມ່ນຢູ່ໃຈກາງເທດສະບານ ຊາປາ ເພາະວ່າ ຢູ່ໃຈກາງພຽງແຕ່ໄປຢ້ຽມຢາມທັດສະນີຍະພາບອ້ອມແອ້ມເທົ່ານັ້ນ ສ່ວນຢູ່ທີ່ນີ້ ທຸກຄົນໄດ້ສູບອາກາດປອດໂປ່ງ, ໄດ້ເຈືອຈານເຂົ້າກັບຊີວິດປະຈຳວັນຂອງຊາວຊົນເຜົ່າຢ້າວແດງ, ໄດ້ເຂົ້າໃຈກ່ຽວກັບວັດທະນະທຳ, ຮີດຄອງປະເພນີກໍຄືໄດ້ຮຽນພາສາເຜົ່າຢ້າວອີກ.”
ກ່ອນນີ້, ຊາວເຜົ່າຢ້າວ ເຄີຍນຳໃຊ້ໃບໄມ້ທີ່ເປັນຢາສະໝູນໄພໃນປ່າ ມາຕົ້ມນ້ຳເພື່ອອາບໃນມື້ທ້າຍປີເພື່ອຕ້ອນຮັບປີໃຫມ່. ເມື່ອເຫັນວ່າ ເລື່ອງອາບນ້ຳດ້ວຍໃບໄມ້ເປັນຢາສະໝູນໄພແມ່ນດີທີ່ສຸດຕໍ່ສຸຂະພາບ, ສະນັ້ນ ຊາວ ຕາຝີ່ນຈຶ່ງຫັນມັນເປັນຜະລິດຕະພັນທີ່ພິເສດສະເພາະຮັບໃຊ້ແຂກທ່ອງທ່ຽວ. ເພື່ອອາບນ້ຳຕາມປະເພນີຂອງຊາວເຜົ່າຢ້າວແດງ, ນ້ຳອາບແຕ່ລະຖັງຕ້ອງມີໃບໄມ້ເປັນຢາສະໝູນໄພກວ່າ 10 ປະເພດ, ຊ້ຳບໍ່ໜຳບາງເທື່ອມີເຖິງ 120 ປະເພດ. ປ້າ ຟານມານໄມ ໃຫ້ຮູ້ວ່າ:
“ ຢາກມີໃບໄມ້ເປັນຢາສະໝູນໄພ ແມ່ນຕ້ອງເຂົ້າປາຫາເອງ, ມີບາງປະເພດບໍ່ມີຢູ່ທີ່ນີ້, ກໍ່ຕ້ອງໄປຊື້ຕື່ມອີກ. ເມື່ອອິດເມື່ອຍ, ອາບນ້ຳດ້ວຍໃບໄມ້ເປັນຢາສະໝູນໄພນັກທ່ອງທ່ຽວຈະຮູ້ສຶກບະບາຍ, ນອນລັບດີ ແລະ ຈິດໃຈກໍ່ສະຫວາດສະເຫວີຍກວ່າ.”
ດ້ວຍຄວາມຮັກແພງສະຫນິດສະຫນົມຂອງຊາວເຜົ່າຢ້າວແດງ ພ້ອມກັບທິວທັດທຳມະຊາດທີ່ສວຍງາມ, ອາກາດປອດໂປ່ງ, ຮີດຄອງປະເພນີເປັນເອກະລັກສະເພາະນັ້ນ ໄດ້ເຮັດໃຫ້ບ້ານຕາຝີ່ນ ກາຍເປັນສະຖານທີ່ທ່ອງທ່ຽວທີ່ສ້າງຄວາມດູດດື່ມສຳລັບນັກທ່ອງທ່ຽວຜູ້ມັກຄົ້ນຫາວັດທະນະທຳຊົນເຜົ່າຕ່າງໆ.