(vovworld)- ປ່າສະຫງວນແຫ່ງຊາດ Yokdon ຢູ່ ເມືອງບວນໂດນ ແຂວງ ດັກລັກ ແມ່ນສະຖານທີ່ທ່ອງທ່ຽວເປັນເອກະລັກສະເພາະຢູ່ເຂດ ໄຕງວຽນ. ແຕ່ລະປີ ແຫ່ງນີ້ ໄດ້ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ ຍ້ອນທິວທັດທຳມະຊາດສວຍສົດງົດງາມ, ພູຜາປ່າໄມ້ໃຫຍ່ໂຕມະໂຫຖານ ພ້ອມດ້ວຍລະບົບສັດສາວາສິ່ງອຸດົມສົມບູນທີ່ສຸດ, ພິເສດແມ່ນຊ້າງປ່າຂອງຫວຽດນາມ.
|
ໂດຍຫ່າງຈາກນະຄອນ ບວນມາທວດ ໄປທາງທິດຕາເວັນຕົກສ່ຽງເຫນືອປະມານ 40 ກິໂລແມັດ, ປ່າສະຫງວນແຫ່ງຊາດ Yokdon ຢູ່ແຄມແມ່ນ້ຳ Serepok, ແມ່ນສາຂາຫນຶ່ງຂອງລະບົບແມ່ນ້ຳຂອງທີ່ໃຫຍ່ໂຕ. ການປະສານສົມທົບຢ່າງກົມກ່ຽວລະຫວ່າງພູຜາປ່າໄມ້ ແລະ ແມ່ນ້ຳລຳເຊ ຍິ່ງເຮັດໃຫ້ທັດສະນີຍະພາບຂອງປ່າສະຫງວນແຫ່ງຊາດ Yokdon ມີຄວາມງາມແບບທຳມະຊາດທີ່ເປັນເອກະລັກສະເພາະຂອງເຂດໄຕງວຽນ. ດ້ວຍເນື້ອທີ່ກວ່າ 115.000 ເຮັກຕາ, ໃນນັ້ນ ກວ່າ 97 ເຮັກຕາປ່າໂຄບ, ປ່າສະຫງວນແຫ່ງຊາດ Yokdon ແມ່ນຫນຶ່ງໃນບັນດາປ່າສະຫງວນແຫ່ງຊາດພິເສດ, ມີລະບົບຊີວະພາບອຸດົມສົມບູນ ນີ້ກໍເປັນແຫ່ງການດຳລົງຊີວິດຂອງສັດຫາຍາກຫລາຍຊະນິດຢູ່ຫວຽດນາມ. ປ່າສະຫງວນແຫ່ງຊາດ Yokdon ມີສັດ, ສັດເລືອຄານ ແລະ ປາ 89 ຊະນິດ, ໃນນັ້ນ ມີ 39 ຊະນິດຖືກຈັດເຂົ້າປື້ມປົກແດງຂອງຫວຽດນາມ ແລະ ໂລກ ຄວນໄດ້ຮັບການປົກປັກຮັກສາກ່ອນຈະຖືກສູນພັນ. ນອກຈາກຊ້າງປ່າກວມອັດຕາສ່ວນຫລາຍແລ້ວ, ປ່າສະຫງວນແຫ່ງຊາດ Yokdon ຍັງມີສັດປ່າຫາຍາກຄື: ເສືອ, ລີງ, ເມີຍ, ກະທິງ, ກວາງ …. ນອກນັ້ນ ຍັງມີນົກ, ສັດເລືອຄານອື່ນໆຫລາຍຊະນິດກໍໄດ້ຮັບຖືວ່າແມ່ນສັດປ່າຫາຍາກຢູ່ຫວຽດນາມ. ປ່າສະຫງວນແຫ່ງຊາດ Yokdon ຍັງແມ່ນເຂດອະນຸລັກຮັກສາ zen ພືກທີ່ຫາກຍາກຫຼາຍປະເພດອີກ. ດ້ວຍທ່າໄດ້ປຽບດັ່ງກ່າວ, ປະຈຸບັນ ປ່າສະຫງວນແຫ່ງຊາດ Yokdon ໄດ້ກາຍເປັນສະຖານທີ່ທ່ອງທ່ຽວ ດ້ວຍຫລາຍຮູບການທ່ອງທ່ຽວທີ່ດູດດື່ມ. ດຣ ເຈີນເທລຽນ, ພະນັກງານ ປ່າສະຫງວນແຫ່ງຊາດ Yokdon ໃຫ້ຮູ້ວ່າ:
“ປ່າສະຫງວນແຫ່ງຊາດ Yokdon ໄດ້ຮັບການສ້າງຕັ້ງ ດ້ວຍຈຸດໝາຍຕົ້ນຕໍແມ່ນອະນຸລັກຮັກສາທຳມະຊາດ, ຊີວະນາໆພັນ ແລະ ພັດທະນາທ່ອງທ່ຽວຊີວະພາບປົກປັກຮັກສາສິ່ງແວດລ້ອມ. ປະຈຸບັນ ກະຊວງກະສິກຳ ແລະ ພັດທະນາຊົນນະບົດຫວຽດນາມ ໄດ້ອະນຸມັດແຜນຮ່າງວາງແຜນສັງລວມພັດທະນາການທ່ອງທ່ຽວຊີວະພາບສິ່ງແວດລ້ອມໄລຍະ 2010-2020ໃຫ້ແກ່ ປ່າສະຫງວນແຫ່ງຊາດ Yokdon. ນີ້ແມ່ນແຜນຮ່າງສຳຄັນເພື່ອໃຫ້ ປ່າສະຫງວນແຫ່ງຊາດ Yokdon ກຳນົດທິດພັດທະນາການທ່ອງທ່ຽວຊີວະພາບ.”
ດ້ວຍຄວາມອຸດົມສົມບູນຂອງບັນດາຮູບການທ່ອງທ່ຽວຊີວະພາບ, ພັກຜ່ອນບຳລຸງສຸຂະພາບ, ທ່ອງທ່ຽວພະຈົນໄພ, ຄົ້ນຫາ ແລະ ຄົ້ນຄ້ວາລະບົບພຶກສາສາດ, ເມື່ອມາຢ້ຽມຢາມ ປ່າສະຫງວນແຫ່ງຊາດ Yokdon, ນັກທ່ອງທ່ຽວຈະເລືອກເຟັ້ນຮູບການທ່ອງທ່ຽວຢ່າງເໝາະສົມຫລາຍຢ່າງໃຫ້ແກ່ຕົນເອງ. ສຳລັບທ່ອງທ່ຽວຊີວະພາບ, ປ່າສະຫງວນແຫ່ງຊາດ Yokdon ໄດ້ມີຫລາຍລາຍການຄື: ລາຍການທ່ອງທ່ຽວຊີວະພາບ ປ່າເທື່ອງແຊງ, ເຍືອງໄຟຊົມສັດປ່າໃນຕອນຄ່ຳ, ທ່ອງທ່ຽວບົນແມ່ນ້ຳ Serepok.
ທິວທັດທຳມະຊາດສວຍງາມຢູ່ປ່າສະຫງວນແຫ່ງຊາດ Yokdon
ພາບ:caonguyen.com
|
ເມື່ອຂີ່ເຮືອລ່ອງແມ່ນ້ຳ, ຊົມທິດທັດທຳມະຊາດສວຍງາມຂອງປ່າສະຫງວນແຫ່ງຊາດ Yokdon ຍາມໃດກໍສ້າງຄວາມປະທັບໃຈໃຫ້ແກ່ນັກທ່ອງທ່ຽວຍາກທີ່ຈະຫລົງລືມໄດ້. ສຳລັບຜູ້ນິຍົມທ່ອງທ່ຽວພະຈົນໄພ ແມ່ນສາມາດຂີ່ເຮືອ Kayak ເພື່ອຂ້າມນ້ຳແກ່ງກະຕຸກກະຕາດ. ແມ່ນ້ຳ Serepok, ຕອນໄຫລຜ່ານ ປ່າສະຫງວນແຫ່ງຊາດ Yokdon ຍາວ ປະມານ 60 ກິໂລແມັດ ແລະ ລວມມີນຳ້ແກ້ງ, ນ້ຳຕົກຕາດທີ່ສວຍງາມຄື: ນ້ຳຕົກຕາດໄບ໋ແຍງ. ດ້ວຍລະບົບປ່າໄມ້, ນ້ຳຕົກຕາດເຫຼົ່ານັ້ນໄດ້ເຮັດໃຫ້ ປ່າສະຫງວນແຫ່ງຊາດ Yokdon ມີຄວາມງາມເລິກລັບສຳລັບນັກທ່ອງທ່ຽວ.
ມີຮູບການທ່ອງທ່ຽວພິເສດຫນຶ່ງອີກຢູ່ປ່າສະຫງວນແຫ່ງຊາດ Yokdon, ນັ້ນແມ່ນ ຂີ່ຊ້າງ ໄປຢ້ຽມຊົມສັດປ່າ ແລະ ທັດສະນີຍະພາບຂອງປ່າສະຫງວນແຫ່ງຊາດ Yokdon. ເມື່ອຂີ່ຊ້າງໄປທ່ຽວໃຕ້ຮົ່ມໄມ້ທີ່ໃຫຍ່ໂຕຂອງປ່າໂຄບ, ແລະໄດ້ຮັບຟັງບັນດາເລື່ອງລາວຂອງຜູ້ກວານຊ້າງນັ້ນ ນັກທ່ອງທ່ຽວຮູ້ສຶກປຕື້ນເຕັ້ນໃຈ ແລະ ນຶກຄິດເຖິງການລ່າຊ້າງປ່າທີ່ອົງອາດກ້າຫານຄືໃນເທບນິຍາຍເມື່ອກ່ອນນີ້. ນາງ ຫງວຽນທູຮ່າ, ນັກທ່ອງທ່ຽວມາຈາກນະຄອນຫລວງ ຮ່າໂນ້ຍ ໃຫ້ຮູ້ວ່າ:
“ນ້ອງຮູ້ສຶກຢ້ານກົວເລັກນ້ອຍ, ແຕ່ຈັບອົບຈັບໃຈທີ່ສຸດ. ລາຍການທ່ອງທ່ຽວແບບນີ້ ຄືດັ່ງໃນເທບນິທານ, ໄດ້ຂີ່ຊ້າງເຂົ້າປ່າເລິກ, ໄດ້ຮັບຊົມຕົ້ນໄມ້ປ່າ, ໄດ້ຮັບຟັງສຽງຕີນຊ້າງຢຽບໃບໄມ້, ສຽງນ້ຳຫ້ວຍໄຫລ, ສຽງນົກຮ້ອງ.. ໄດ້ຮັບຟັງເລື່ອງລາວກ່ຽວກັບຊີວິດຂອງຊ້າງ, ສັດປ່າ. ສຳລັບນ້ອງເອງ, ການທ່ອງທ່ຽວຄືແນວນີ້ທັງເປັນການຄົ້ນຫາ, ທັງໄດ້ເຫັນປະຈັກຕາສິ່ງທີ່ດູດດື່ມຢູ່ເຂດໄຕງວຽນ.”
ພ້ອມກັບຮູບການທ່ອງທ່ຽວຂີ່ຊ້າງຢ້ຽມຊົມ ປ່າສະຫງວນແຫ່ງຊາດ Yokdon, ນັກທ່ອງທ່ຽວສາມາດເຂົ້າຮ່ວມລາຍການທັດສະນະສຶກສາ, ຕັ້ງຄ້າຍ ຫລືພັກເຊົາຢູ່ເຮືອນຮ້ານ, ຮັບປະທານອາຫານພິເສດຂອງຊາວຊົນເຜົ່າຄື: ດື່ມເຫລົ້າໄຫ, ກິນເຂົ້າຫລາມ, ປີ້ງໄກ່. ເມື່ອຍາມຄ່ຳຄືນ, ນັກທ່ອງທ່ຽວໄດ້ຮັບຊົມລາຍການສິລະປະ ຕີຄ້ອງ, ຮ້ອງລຳທຳເພງ, ໂດຍບ່າວສາວຊາວຊົນເຜົ່າ ເມີນົງ, ເອເດ ສະແດງ.
ຄຽງຄູ່ກັບຈຸດໝາຍພັດທະນາການທ່ອງທ່ຽວ, ຊອກຮູ້ລະບົບສັດສາວາສິ່ງອຸດົມສົມບູນນັນ, ປະຈຸບັນ, ປ່າສະຫງວນແຫ່ງຊາດ Yokdon ຍັງມີບັນດາໂຄງການ, ແຜນຮ່າງສຶກສາ, ໂຄສະນາການປົກປັກຮັກສາປ່າ, ຮັກສາສິ່ງແວດລ້ອມໃນວົງຄະນາຍາດ. ພິເສດ ແມ່ນສ້າງເງື່ອນໄຂເພື່ອໃຫ້ປະຊາຊົນຢູ່ເຂດໄຕງວຽນ ເຮັດການບໍລິການທ່ອງທ່ຽວ, ສ້າງຊີວິດເປັນປົກກະຕິ. ນີ້ແມ່ນບັນດາມາດຕະການພັດທະນາການທ່ອງທ່ຽວແບບຍືນຍົງ ເພື່ອໃຫ້ ປ່າສະຫງວນແຫ່ງຊາດ Yokdon ກາຍເປັນສະຖານທີ່ທ່ອງທ່ຽວເປັນເອກະລັກສະເພາະຂອງເຂດໄຕງວຽນ ແລະ ຂອງຫວຽດນາມຕະຫຼອດໄປ.