(vovworld)- ຮ່າຢາງ ແມ່ນແຂວງຫນຶ່ງໃນເຂດພູດອຍທາງພາກເຫນືອຫວຽດນາມ ບໍ່ພຽງແຕ່ດຶງດູດນັກທ່ອງທ່ຽວດ້ວຍທັດສະນີຍະພາບທີ່ລືຊື່ຫລາຍແຫ່ງເທົ່ານັ້ນ ຫາກ ຄວາມສວຍງາມຂອງທິວທັດທຳມະຊາດ, ເສັ້ນທາງທຸລະກັນດານກໍເປັນສິ່ງທີ່ສ້າງຄວາມປະທັບໃຈອີກດ້ວຍ. ບັນດາເສັ້ນທາງໄປເຖິງຮ່າຢາງ ລ້ວນແຕ່ຕ້ອງຜ່ານຮ່ອມພູ, ຕີນພູ, ບາງບ່ອນຂຶ້ນຮອດຈອມພູ, ບາງບ່ອນກໍລຽບແຄມເຫວ. ບົດຂຽນຂອງນັກຂ່າວ ລານແອງ.
ບັນດາເສັ້ນທາງທຸລະກັນດານຢູ່ ຮ່າຢາງ
ພາບ:internet
|
ນັກທ່ອງທ່ຽວຜູ້ໃດນິຍົມໄປຄົ້ນຫາ ແນ່ນອນວ່າ ບັນດາເສັ້ນທາງທຸລະກັນດານຢູ່ ຮ່າຢາງແມ່ນສະຖານທີ່ທ່ອງທ່ຽວຂາດບໍ່ໄດ້ໃນລາຍການທ່ອງທ່ຽວເຖິງເຂດພູດອຍທາງພາກເຫນືອຫວຽດນາມ. ໄລຍະທາງຈາກ ຮ່າໂນ້ຍ ໄປເຖິງນະຄອນ ຮ່າຢາງ ຍາວກວ່າ 320 ກິໂລແມັດ ແລະ ຂີ່ລົດໂອໂຕ ໃຊ້ເວລາ ພຽງປະມານ 5 ຊົ່ວໂມງ. ສ່ວນ ໄລຍະທາງຈາກ ນະຄອນ ຮ່າຢາງ ໄປເຖິງບັນດາເມືອງ ກວ໋ານບ້າ, ອຽນມີງ, ດົງວັນ, ແມ່ວວາກ ຍາວເກືອບ 200 ກິໂລແມັດ ແຕ່ ຕ້ອງໄປໝົດມື້ຈຶ່ງມາຮອດ. ຕອນທຳອິດເສັ້ນທາງ ພຽງ ແລະໄປມາສະດວກ. ລຽບຕາມເສັ້ນທາງນີ້ ທ່ານຈະເຫັນເຮືອນຊານບ້ານຊ່ອງຂອງຊາວເຜົ່າຢູ່ ຮ່າຢາງ ພ້ອມກັບສວນສາລີທີ່ກວ້າງໃຫຍ່, ຫ້ວຍນ້ຳໄຫລຕະຫລອດປີ, ສ້າງເປັນຮູບພາບທີ່ສວຍງາມ. ແຕ່ເມື່ອໄປຮອດເສັ້ນທາງ ແຫ້ງຟຸກ, ແມ່ນຄ່ອຍໆສູງຂຶ້ນ. ນັກທ່ອງທ່ຽວຕ້ອງຜ່ານກີ່ວ ບັກຊຸມ ຈຶ່ງຮອດເມືອງ ກວ໋ານບ້າ ຊື່ງແມ່ນສະຖານທີ່ມີທັດສະນີຍະພາບມີຊື່ສຽງຄື ນູຍໂດຍ ໂກຕຽນ. ຕໍ່ມາແມ່ນຮອດເມືອງ ອຽນມີງ ແລະ ເລີ່ມຈາກນີ້ ເສັ້ນທາງໄປເຖິງເຂດພູພຽງຫີນ ດົງວັນ ຍິ່ງທຸລະກັນດານເທົ່ານັ້ນ ແລະ ໄປຍາກທີ່ສຸດ. ເອື້ອຍ ເຕື່ອງວີ ຜູ້ອຳນວຍການບໍລິສັດ ATA ຫວຽດນາມ ຈຳກັດ ໃຫ້ຮູ້ວ່າ: ເສັ້ນທາງຢູ່ນີ້ແມ່ນແຄບ, ທົບສອບ, ຟາກທາງເບື້ອງຫນຶ່ງແມ່ນຜາຫີນ ສ່ວນອີກເບື້ອງຫນຶ່ງແມ່ນເຫວເລິກ, ນີ້ແມ່ນການທົດສອບຄວາມກ້າຫານຂອງນັກທ່ອງທ່ຽວ. ແຕ່ພວກທ່ານຈະໄດ້ຮັບຊົມທິວທັດທຳມະຊາດທີ່ສວຍງາມຂອງເຂດພູຫີນທີ່ໃຫຍ່ໂຕມະໂຫຖານເມື່ອຢືນຢູ່ບ່ອນສູງ.
“ ບັນດາເສັ້ນທາງຢູ່ ຮ່າຢາງແມ່ນທຸລະກັນດານທີ່ສຸດ. ຂ້າພະເຈົ້າແມ່ນຜູ້ຢ້ານຄວາມສູງທີ່ສຸດ ແຕ່ເມື່ອໄປຜ່ານເສັ້ນທາງແຄບ, ແຄມເຫວຊັນຮູ້ສຶກວ່າ ຕົນເອງແມ່ນຄົນກ້າຫານແລ້ວ ແລະ ເມື່ອຢືນຢູ່ບ່ອນສູງຫລຽວລົງມາເຫັນວ່າ ທິວທັດທຳມະຊາດສວຍງາມດັ່ງໃນຝັນ, ພິເສດ ແມ່ນຮູບພາບນາຂັ້ນໄດ.”
ພາບ:internet
|
ສະຖານທີ່ສຸດທ້າຍແມ່ນ ກີ່ວ ໝາປີແລ່ງ, ຊື່ງແມ່ນທາງກີ່ວທຸລະກັນດານ ຂຶ້ນກັບ ເມືອງແມ່ວວາກ. ກີ່ວ ໝາປີແລ່ງ ນອນໃນເສັ້ນທາງ ແຫ້ງຟຸກ ເຊື່ອມຕໍ່ນະຄອນ ຮ່າຢາງ ຜ່ານບັນດາເມືອງ ກວ໋ານບ້າ, ອຽນມີງ, ດົງວັນ ແລະ ສິ້ນສຸດແມ່ນເທດສະບານ ແມ່ວວາກ. ເສັ້ນທາງນີ້ ມີລວງຍາວປະມານ 200 ກິໂລແມັດ ແລະ ໄດ້ຮັບການກໍ່ສ້າງແຕ່ປີ 1959 -1965 ໂດຍຊາວຫນຸ່ມຕະລຸມບອນນັບໝື່ນໆຄົນທີ່ຂຶ້ນກັບ 16 ຊົນເຜົ່າຂອງ 8 ແຂວງ ທາງພາກເຫນືອຫວຽດນາມ. ດ້ວຍອຸປະກອນຫລ້າຫລັງ ແຕ່ບັນດາຊາວຫນຸ່ມຕະລຸມບອນໃນໄລຍະນັ້ນ ໄດ້ຕັດສິນໃຈກໍ່ສ້າງເສັ້ນທາງໃຫ້ສຳເລັດເພື່ອຮັບໃຊ້ຊາວຊົນເຜົ່າມົ້ງ 8 ໝື່ນຄົນ ຢູ່ 4 ເມືອງເຂດພູສູງທີ່ປະສົບກັບຄວາມຫຍຸ້ງຍາກຂອງ ຮ່າຢາງ, ຊ່ວຍໃຫ້ປະຊາຊົນເຂດພູດອຍມີຄວາມໃກ້ຊິດກັບປະຊາຊົນເຂດທົ່ງພຽງກວ່າ.
ຢືນຢູ່ບ່ອນສູງສຸດຂອງກີ່ວ ໝ໋າປີແລ່ງ ດ້ວຍຄວາມສູງເກືອບ 2000 ແມັດ ເມື່ອທຽບໃສ່ຫນ້ານ້ຳທະເລ, ນັກທ່ອງທ່ຽວຈະຮູ້ສຶກແປກປະຫລາດຕໍ່ຄວາມງາມດັ່ງໃນຝັນຂອງເຂດພູຜາປ່າໄມ້ທາງທິດຕາເວັນອອກສ່ຽງເຫນືອຫວຽດນາມ. ນາງ ມາຍທິເຮືອງ, ພະນັກງານບໍລິສັດທ່ອງທ່ຽວ vietSense Travel ໃຫ້ຮູ້ວ່າ:
“ຂ້າພະເຈົ້າຮູ້ສຶກປະທັບໃຈທີ່ສຸດ ເມື່ອຢືນຢູ່ບ່ອນສູງສຸດຂອງກີ່ວ ໝ໋າປີແລ່ງ ນັ້ນ ແມ່ນຄວາມໃຫຍ່ໂຕມະໂຫຖານຂອງພູຜາປ່າໄມ້ຢູ່ທີ່ນີ້ ພິເສດ ແມ່ນແມ່ນ້ຳ ຍໍເກວໄຫລຜ່ານບັນດາສາຍພູຫີນສ້າງຄວາມງາມທີ່ແຕກຕ່າງຊື່ງແຫ່ງອື່ນບໍ່ມີ.”
ໄປຢ້ຽມຢາມ ແຂວງ ຮ່າຢາງເທື່ອຫນຶ່ງ, ໄດ້ຜ່ານບັນດາເສັ້ນທາງທຸລະກັນດານ ແລະ ຜ່ານກີ່ວ ໝ໋າປີແລ່ງ ເພື່ອຊົມທິວທັດທຳມະຊາດສວຍງາມ, ເຂດພູຜາປ່າໄມ້ໃຫຍ່ໂຕມະໂຫຖານກໍຄືຈຸດທີ່ເປັນເອກະລັກສະເພາະຂອງພູຫີນ ດົ່ງວັນ, ຊົມແມ່ນ້ຳ ຍໍເກວ ໄຫລຜ່ານສາຍພູຕ່າງໆ… ທຸກສິ່ງທຸກຢ່າງນັ້ນແມ່ນສິ່ງທີ່ສ້າງຄວາມປະທັບໃຈສຳລັບນັກທ່ອງທ່ຽວຜູ້ທີ່ມັກໄປຄົ້ນຫາ.