(vovworld)- ເທດສະບານ ຊາປາ ຂຶ້ນກັບເມືອງ ຊາປາ ແຂວງ ລາວກາຍ ແມ່ນສະຖານທີ່ທ່ອງທ່ຽວທີ່ມີຄວາມງາມດັ່ງໃນຝັນ ແລະ ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ໂດຍຕັ້ງຢູ່ຄວາມສູງ 1600 ແມັດເມື່ອທຽບໃສ່ໜ້ານ້ຳທະເລ, ຊາປາ ແມ່ນແຫ່ງທີ່ສ້າງຄວາມດູດດື່ມທັງ 4 ລະດູ. ລະດູໃບໄມ້ຫລົ່ນ, ຊາປາ ຖືກປົກຄຸມໄປດ້ວຍນາຂັ້ນໄດສຸກເຫລືອງທີ່ງາມຕາ. ລະດູຮ້ອນ, ອາກາດເຢັນສະບາຍ ແລະ ສົດໃສ, ບໍ່ຮ້ອນເອົ້າຄືຢູ່ບັນດາຕົວເມືອງ. ລະດູບານໃຫມ່, ດອກໄມ້ເບັ່ງບານອວດອ້າງສີສັນຄືດັ່ງຮູບແຕ້ມທີ່ສວຍງາມ. ແລະ ລະດູຫນາວ ຊາປາຖືກປົກຄຸມໄປດ້ວຍນ້ຳໝອກ.
ເມື່ອລະດູຫນາວວຽນມາ ນ້ຳໝອກ ປົກຄຸມໄປທົ່ວທຸກຖະຫນົນຫົນທາງ, ຕົ້ນໄມ້ໃບຫຍ້າ ແລະ ເຮືອນຊານບ້ານຊ່ອງ. ມາຢ້ຽມຢາມ ຊາປາ ເທື່ອຫນຶ່ງ, ນັກທ່ອງທ່ຽວບໍ່ອາດຫລົງລືມໄດ້ຄວາມຮູ້ສຶກເມື່ອຢືນຫ່າງກັນພຽງສອງສາມແມັດແຕ່ບໍ່ເຫັນຫນ້າເຫັນຕາກັນ. ອ້າຍ ຫງວຽນກີ, ນັກທ່ອງທ່ຽວ ມາຈາກ ຮ່າໂນ້ຍ ໃຫ້ຮູ້ວ່າ:
“ຄວາມປະທັບໃຈ ກ່ຽວກັບຊາປາ ສຳລັບນັກທ່ອງທ່ຽວ ນັ້ນແມ່ນ ເມື່ອພັກອາໄສຢູ່ໃນຄວາມສູງເກືອບ 2000 ແມັດ ທຽບໃສ່ຫນ້ານ້ຳທະເລ ແມ່ນໄດ້ສູບອາກາດທີ່ປອດໂປ່ງ. ລະດູຮ້ອນ ແມ່ນ ເຢັນສະບາຍ, ລະດູຫນາວ ຮູ້ສຶກຫນາວຈັດ ຊ້ຳບໍ່ໜຳມີຫິມະ. ສິ່ງທີ່ສ້າງຄວາມປະທັບໃຈຫນຶ່ງອີກນັ້ນແມ່ນ ຊາປາ ຕັ້ງຢູ່ໃນເຂດດິນໃກ້ກັບຟ້າ ສູງທີ່ສຸດ,. ກາງເວັນໄປຫ່າງກັນປະມານ 2-3 ແມັດ ກໍ່ບໍ່ເຫັນຫນ້າເຫັນຕາກັນໄດ້. ສ່ວນກາງຄືນ ພາຍໃຕ້ໂຄມໄຟເຫັນທຸກຄົນກໍ່ບໍ່ແຈ້ງ. ນັ້ນແມ່ນບັນດາຮູບພາບທີ່ສວຍງາມຢູ່ຊາປາ.”
ຍ່າງເລາະຫລິ້ນໃນຍາມນ້ຳໝອກປົກຄຸມ ເຮັດໃຫ້ນັກທ່ອງທ່ຽວຜູ້ໃດກໍຮູ້ສຶກຫນາວຈັດແຕ່ພັດມີຄວາມປະທັບໃຈເມື່ອໄດ້ສຳພັດກັບນ້ຳໝອກ. ສຳລັບຜູ້ມັກທິວທັດທຳມະຊາດ, ທັດສະນີຍະພາບແລ້ວ, ລະດູຫນາວ ແມ່ນຈຸດເວລາສວຍງາມທີ່ສຸດເພື່ອຮັກສາບັນດາຈຸດພິເສດສະເພາະຂອງ ຊາປາໄວ້. ຢືນຢູ່ແຄມຫນອງ ຊາປາ ເພື່ອຮັບຮູ້ຄວາມປະທັບໃຈໂດຍລະດູຫນາວນຳມາໃຫ້ ແລະ ຊົມນັກທ່ອງທ່ຽວ, ຊາວທ້ອງຖິ່ນໄປມາຕາມເສັ້ນທາງທີ່ຖືກປົກຄຸມໄປດ້ວຍນຳ້ໝອກ. ຫຼືຢືນຢູ່ຕໍ່ຫນ້າ ໂບດຫີນ ຊາປາ, ທ່ານຈະເຫັນຮູບພາບເທດສະບານຊາປາ ທັງໝົດທີ່ສວຍງາມດັ່ງໃນຝັນ ດ້ວຍນ້ຳໝອກປົກຄຸມ, ຮູບພາບແມ່ຍິງຊາວເຜົ່າມົ້ງເຈ່ຍລູກ ເຂົາເຈົ້າທັງໄປທັງຖັກແສ່ວແພພື້ນເມືອງດ້ວຍສີສັນຫລາກຫລາຍ. ສິ່ງດັ່ງກ່າວໄດ້ສ້າງເປັນຮູບພາບທີ່ເປັນເອກະລັກສະເພາະຂອງຊາປາ. ຫງວຽນຢ້ຽວລີງ, ເຮັດວຽກງນໃນຂົງເຂດການເງິນ ຢູ່ ຮ່າໂນ້ຍ ໃຫ້ຮູ້ວ່າ:
“ຊາປາ ແມ່ນແຫ່ງທີ່ຖືກປົກຄຸມໄປດ້ວຍນຳ້ໝອກໃນຍາມຮຸ່ງເຊົ້າ ແລະ ຕອນຄ່ຳ. ສະນັ້ນ ເມື່ອໄປເລາະຫລິ້ນຢູ່ຕະຫລາດ, ກໍຄືລົງຖະຫນົນສາຍຕ່າງໆ ພວກເຮົາຈະເຫັນຮູບພາບແພພື້ນເມືອງທີ່ເປັນເອກະລັກສະເພາະປະກົດອອກໃນນ້ຳໝອກ, ສ້າງເປັນຄວາມງາມຍາກທີ່ຫລົງລືມໄດ້.”
ສິ່ງທີ່ສ້າງຄວາມປະທັບໃຈຫນຶ່ງອີກເມື່ອມາຢ້ຽມຢາມ ຊາປາ ໃນລະດູຫນາວ, ນັ້ນແມ່ນ ນອກຈາກທິວທັດທຳມະຊາດສວຍງາມທີ່ສ້າງຄວາມພໍໃຈໃຫ້ບັນດານັກຖ່າຍຮູບແລ້ວ, ອາຫານການກິນຂອງ ຊາປາ ກໍເປັນສິ່ງທີ່ຂາດບໍ່ໄດ້ສຳລັບນັກທ່ອງທ່ຽວ. ຜູ້ໃດກໍສາມາດຢຸດເຊົາຢູ່ຄຽງຂ້າງໂບດຫີນ ເພື່ອຊີມສາລີປີ້ງ. ຫລືນັ່ງຢູ່ໃນຮ້ານອາຫານນ້ອຍ, ດື່ມກາເຟຮ້ອນ, ຊົມຖະຫນົນສາຍນ້ອຍ ແລະ ເຫັນປະຈັກຕາຊີວິດປະຈຳວັນຂອງຊາວຊົນເຜົ່າຢູ່ ຊາປາ. ນອກນັ້ນບັນດາຮ້ານອາຫານປີ້ງຄື: ເຕົາຫູ້, ຕີນໄກ່, ຕີນເປັດ, ຊີ້ນໝູ, ປາຫ້ວຍ, ເຫັດ, ຜັກ… ຍາມໃດກໍດຶງດູດແຂກມາກິນເປັນຈຳນວນຫລວງຫລາຍ. ເອື້ອຍ ຫງວຽນທິແທງ, ຜູ້ຂາຍຂອງປີ້ງ ຢູ່ ຊາປາ ໃຫ້ຮູ້ວ່າ:
“ທຳອິດ ຂ້າພະເຈົ້າຂາຍພຽງແຕ່ສາລີປີ້ງ, ມັນຕົ້ນ, ໄຂ່ປີ້ງເທົ່ານັ້ນ ຫລັງຈາກນັ້ນ ມີຊີ້ນປີ້ງ, ເຫັດປີ້ງອີກ. ອາຫານປີ້ງທຸກເຍື່ອງແມ່ນປຸງແຕ່ງຕາມຄວາມນິຍົມຂອງແຂກ.”
ຍາມຄ່ຳຄືນ ແມ່ນຈຸດເວລາສ້າງຄວາມປະທັບໃຈທີ່ສຸດເພື່ອຊີມອາຫານປີ້ງຢູ່ ຊາປາ. ບໍ່ມີສິ່ງໃດປະເສີດໄປກວ່າ ເມື່ອຍາມຄ່ຳຄືນລົງມາ ແລະ ນ້ຳໝອກປົກຄຸມໄປທົ່ວຖະຫນົນຫົນທາງ ແມ່ນໄດ້ນັ່ງຢູ່ອ້ອມເຕົາໄຟ ຮັບປະທານເຍື່ອງອາຫານປີ້ງສົດໆຮ້ອນ ໆແລະ ເຈືອຈານໃນບັນຍາກາດສັນຕິສຸກຂອງຖະຫນົນເຂດພູດອຍໃນຍາມກາງຄືນ.