ໝາກກ້ວຍ, ໝາກສົ້ມໂອ, ໃບຕອງຈິງ, ໝາກໄມ້…ກໍແມ່ນບັນດາປະເພດສິນຄ້າທີ່ຂາດບໍ່ໄດ້ໃນຕະຫຼາດນັດເຂດບ້ານນາໃນຍາມບຸນເຕັດ. ເຖິງວ່າຕ້ອນຮັບ ບຸນເຕັດຢູ່ແຫ່ງຫົນໃດໃນທົ່ວປະເທດກໍຕາມ, ແຕ່ຊາວຫວຽດນາມກໍສາມາດຮູ້ສຶກໄດ້ເຖິງສີສັນເຂດບ້ານນາໃນຕະຫຼາດນັດຍາມບຸນເຕັດ.
ຕະຫຼາດບ້ານນາໃນຍາມບຸນເຕັດ
|
ເມື່ອບຸນເຕັດວຽນມາໃນແຕ່ປີ, ນັບແຕ່ວັນທີ 23 ເດືອນ 12, ບັນຍາກາດກະກຽມ ບຸນເຕັດພັດຟົດຟື້ນຫຼາຍຂຶ້ນ, ຜູ້ຊື້ຄົນຂາຍຢ່າງຄຶກຄື້ນມ່ວນຊື່ນ. ຖ້າຫາກຕະຫຼາດບຸນເຕັດຢູ່ຕາມຖະໜົນຍາມໃດກໍເຕັມໄປດ້ວຍສີສັນຫຼາກຫຼາຍຂອງດອກໄມ້, ເຄື່ອງປະດັບທີ່ສວຍງາມໃນຍາມບຸນເຕັດນັ້ນ, ຕະຫຼາດບຸນເຕັດຢູ່ເຂດບ້ານນາພັດມີຄວາມລຽບງ່າຍ ແລະ ໃກ້ຊິດຕິດພັນດ້ວຍໝາກກ້ວຍ, ໝາກ, ໝາກກ້ຽງ, ໝາກສົມໂອ….ຫຼືຜັກ 2-3 ມັດ ແລະ ຂອງຂວັນເຂດບ້ານນາທີ່ພວກແມ່ປ້າຫາບໄປຂາຍຢູ່ຕະຫຼາດ. ທັງໝົດເຫຼົ່ານັ້ນ ກໍລ້ວນແຕ່ແມ່ນວັດຖຸສິ່ງຂອງທີ່ຊາວທ້ອງຖິ່ນສາມາດເຮັດໄດ້ເອງ, ອັນໄດ້ເຮັດໃຫ້ຜູ້ຄົນໄປຕະຫຼາດບຸນເຕັດຮູ້ສຶກໄດ້ເຖິງຄວາມໃກ້ຊິດສະໜິດສະໜົມ ແລະ ລຽບງ່າຍຂອງເຂດບ້ານນາ. ປ້າ ຫງວຽນແທງເວີນ ຜູ້ຂາຍເຄື່ອງຢູ່ຕະຫຼາດນັດບ້ານນາທີ່ເມືອງແທງອວາຍ, ຮ່າໂນ້ຍ ໃຫ້ຮູ້ວ່າ :
“ ຂ້າພະເຈົ້າຂາຍຂອງກິນຫຼາຍຊະນິດເຊັ່ນ: ສາລີຕົ້ມ, ມັນຕົ້ມ, ເຂົ້າຕົ້ມ, ປັນກວນ…ຂ້າພະເຈົ້າເຫັນວ່າ ຕະຫຼາດນັດມ່ວນຫຼາຍ, ມີຄົນມາຊື້ຂາຍຢ່າງໜາແໜ້ນ ແລະ ທຸກໆຄົນມີຄວາມນິຍົມບໍລິໂພກອາຫານຫຼາຍຊະນິດຢູ່ເຂດບ້ານນານີ້ ”
ບັນຍາກາດຢູ່ຕະຫຼາດບ້ານນາໃນຊຸມວັນໃກ້ຈະຮອດບຸນເຕັດ ຍິ່ງຄຶກຄື້ນມ່ວນຊື່ນຫຼາຍຂຶ້ນ, ຊາວທ້ອງຖິ່ນໄດ້ພາກັນມາເຕົ້າໂຮມຢູ່ຕະຫຼາດຢ່າງຄັບຄາໜາແໜ້ນ. ໂດຍທົ່ວໄປແລ້ວ, ບັນດາຕະຫຼາດນັດເຂດບ້ານນາເຄີຍມີຂຶ້ນໃນຍາມເຊົ້າ. ແຕ່ຮອດຍາມ ບຸນເຕັດ, ປະຊາຊົນໄປຕະຫຼາດກໍມີຫຼາຍກວ່າທົບຫຼາຍເທົ່າຍ້ອນຄວາມຕ້ອງການຊື້ເຄື່ອງຂອງເຂົາເຈົ້າ, ດັ່ງນັ້ນຕະຫຼາດນັດແກ່ຍາວໝົດມື້. ພວກແມ່ປ້າໄປຊື້ໃບຕອງກ້ວຍ, ໃບຕອງຈິງ, ຫົວຜັກບົວດອງ, ໝາກໄມ້ເພື່ອກະກຽມພາເຂົ້າ ແລະ ພາໝາກໄມ້ 5 ຊະນິດເພື່ອບູຊາບັນພະບູລຸດໃນຈຸດເວລາສົ່ງທ້າຍປີເກົ່າຕ້ອນຮັບປີໃໝ່ . ນາງ ຫວຽນກິມຕ້ຽນ ຂາຍເຄື່ອງຢູ່ຕະຫຼາດບ້ານນາເມືອງແທງອວາຍ, ຮ່າໂນ້ຍ ແບ່ງປັນວ່າ :
“ ຂ້າພະເຈົ້າຂາຍມິດ, ມິດຕັດທຸກຊະນິດຫຼືເຄື່ອງຈັກສານຫຼາຍຊະນິດ…ຂ້າພະເຈົ້າເຫັນວ່າ ບັນຍາກາດຍາມບຸນເຕັດຢູ່ຕະຫຼາດບ້ານນາແມ່ນຟົດຟື້ນທີ່ສຸດ, ມີຫຼາຍຄົນມາຊື້ເຄື່ອງ ”
ຢູ່ຕະຫຼາດບ້ານນາ, ພວກບາວສາວພາກັນມາຊື້ເຄື່ອງປະດັບປະດາເຮືອນຊານ ແລະ ຊອກຊື້ເຄື່ອງນຸ່ງເພື່ອໄປທ່ຽວຫຼິ້ນຍາມ ບຸນເຕັດ. ສ່ວນພວກຫຼານນ້ອຍກໍດີໃຈເມື່ອພໍ່ແມ່ພາໄປຊື້ເຄື່ອງຫຼິ້ນຕ່າງໆ. ປ້າຫງວຽນທິເຕືອງ ເຈົ້າຂອງຮ້ານຂາຍເຄື່ອງຫຼິ້ນເດັກນ້ອຍໃຫ້ຮູ້ວ່າ :
“ ຂ້າພະເຈົ້າຂາຍເຄື່ອງປັ້ນໃຫ້ເດັກຢູ່ຕະຫຼາດບ້ານນາ. ຂ້າພະເຈົ້າເຄີຍປັ້ນເອົາຮູບດອກໄມ້, ຮູບໄກ່, ມັງກອນ…ຮູບປັ້ນແບບໃດ, ເດັກກໍມັກໝົດ ”
ໃນທຸກວັນນີ້, ຊີວິດການເປັນຢູ່ໃນເຂດບ້ານນາໄດ້ມີການພັດທະນາກວ່າເກົ່າ, ແຕ່ຄວາມລຽບງ່າຍໃນຕະຫຼາດນັດເຂດບ້ານນາໃນຍາມບຸນເຕັດນັ້ນ, ຖ້າຫາກຜູ້ໃດເຄີຍໄດ້ເຫັນປະຈັກຕາຢູ່ບໍ່ວ່າເຂດບ້ານນາແຫ່ງໃດໃນຫວຽດນາມ, ແນ່ນອນວ່າຈະມີຄວາມປະທັບໃຈອີຫຼີ. ສຳລັບບັນດາຜູ້ໄປເຮັດວຽກຢູ່ແດນໄກ, ເມື່ອກັບມາຕ້ອນຮັບບຸນເຕັດຢູ່ບ້ານເກີດເມືອງນອນນັ້ນ, ຕ່າງກໍພະຍາຍາມເພື່ອໄດ້ເຊື່ອມຕົວເຂົ້າກັບຂະບວນຄົນໄປຕະຫຼາດບຸນເຕັດຊຶ່ງມີພຽງປີລະຄັ້ງ, ເພື່ອຄົ້ນຫາວິນຍານເຂດບ້ານນາ ແລະ ກໍແມ່ນໂອກາດຫວນຄືນອະນຸສອນໃນຄາວເຍົາໄວ. ເພື່ອຫງວຽນທິຕີ້ ຜູ້ໄປຊື້ເຄື່ອງຢູ່ຕະຫຼາດບ້ານນາ ແບ່ງປັນວ່າ
“ ຂ້າພະເຈົ້າເຫັນວ່າ ຕະຫຼາດນັດບ້ານນາໃນຍາມບຸນເຕັດແມ່ນມີຄວາມລຽບງ່າຍ, ຂາຍເຄື່ອງຂອງທຸກຢ່າງເພື່ອກະກຽມໃຫ້ແກ່ບຸນເຕັດຄື: ໃບຕອງຈິງເພື່ອຫໍ່ເຂົ້າຕົ້ມ, ເຂົ້າປຸ່ນ, ເຂົ້າໜົມ… ”
ໃນຊຸມມື້ທ້າຍປີ, ໄປຕະຫຼາດບ້ານນາຈຶ່ງຈະຮູ້ສຶກໄດ້ເຖິງບັນຍາກາດຍາມບຸນເຕັດ. ທຸກໆຄົນໃບໜ້າຍິ້ມແຍ້ມແຈ່ມໃສ່ ໄປຊື້ເຄື່ອງຂອງ ກະກຽມຕ້ອນຮັບປີໃໝ່. ຕະຫຼາດນັດຍາມບຸນເຕັດ ກໍແມ່ນໂອກາດເພື່ອຕັກເຕືອນລຸ່ນຫນຸ່ມອວາຍໜ້າສູ່ກົກເຄົ້າເຫງົ້າກໍດ້ວຍຈຸດວັດທະນະທຳທີ່ເປັນມູນເຊື້ອອັນດີງາມ.