(vovworld)-ໂດຍຫ່າງຈາກນະຄອນ ບວນມາທວດ ໄປທາງທິດຕາເວັນຕົກສ່ຽງເຫນືອປະມານ 50 ກິໂລແມັດ, ມີສະຖານທີ່ທ່ອງທ່ຽວຊີວະພາບທຳມະຊາດແຫ່ງຫນຶ່ງທີ່ມີຊື່ສຽງກ່ຽວກັບອາຊີບ ເຝີກສອນຊ້າງປ່າ ແລະ ຍັງຄົງຮັກສາຮີດຄອງປະເພນີ, ຈຸດວັດທະນະທຳທີ່ເປັນເອກະລັກສະເພາະຫລາຍຢ່າງຂອງບັນດາເຜົ່າຢູ່ເຂດໄຕງວຽນ. ນັ້ນແມ່ນ ບ້ານໂດນ ຂຶ້ນກັບຕາແສງ ກະຣົງນາ (Krong Na) ເມືອງ ບວນໂດນ ແຂວງ ດັກລັກ.
ນັກທ່ອງທ່ຽວຂີ່ຊ້າງຢ້ຽມຊົມບ້ານໂດນ
ພາບ:dulich.vn
|
ເພື່ອໄປຢ້ຽມຢາມ ບ້ານໂດນ ທ່ານສາມາດຂີ່ລົດໂອໂຕຫລື ລົດຈັກ. ໃນການເດີນທາງຢ້ຽມຢາມ ບ້ານໂດນ, ນັກທ່ອງທ່ຽວ ສາມາດພັກເຊົາຢູ່ບ່ອນໃດບ່ອນໜ່ຶງເພື່ອຊົມທິວທັດທຳມະຊາດສວຍງາມຂອງເຂດດິນແດນໄຕງວຽນ. ນັ້ນແມ່ນບັນດາບ້ານຂອງຊາວເຜົ່າ ເອເດ(Ede), ເມີນົງ ( Mnong) ດ້ວຍເຮືອນຍາວ, ເຮືອນຮ້ານຖືກປຸກສ້າງໃຕ້ຕົ້ນໄມ້ທີ່ໃຫຍ່ໂຕ.
ຕາມການອະທິບາຍຂອງຊາວທ້ອງຖິ່ນແລ້ວ ບ້ານໂດນ ຕາມພາສາລາວແມ່ນ ບ້ານດອນ ໝາຍຄວາມວ່າ ແມ່ນບ້ານແຫ່ງຫນື່ງໄດ້ຮັບການກໍ່ສ້າງໃນດອນເກາະຂອງແມ່ນ້ຳ Serepok. ແຕ່ດົນນານມາແລ້ວ, ບ້ານໂດນ ແມ່ນບ້ານແຫ່ງຫນຶ່ງທີ່ມີຊື່ສຽງດ້ວຍອາຊີບເຝີກສອນຊ້າງປ່າ. ມາຢ້ຽມຢາມບ້ານໂດນ , ນັກທ່ອງທ່ຽວບໍ່ພຽງແຕ່ໄດ້ຮັບຊົມທິວທັດທຳມະຊາດສວຍງາມເທົ່ານັ້ນ ຫາກຍັງໄດ້ເຫັນປະຈັກຕາຊ້າງໃຫຍ່ຫລາຍໂຕ ຍ່າງບົນຖະຫນົນ ພາຍໃຕ້ການບັນຊາຂອງກວານຊ້າງ. ນາງ ເຮີລວານ ( H’ Loan) ຜູ້ນຳທ່ຽວຢູ່ບ້ານໂດນ ໃຫ້ຮູ້ວ່າ:
“ຢູ່ທີ່ນີ້ ປະຊາຊົນຮັກແພງຊ້າງທີ່ສຸດ ແລະ ຖືຊ້າງຄືຄົນ. ສຳລັບຜູ້ລ້ຽງຊ້າງ, ເຝີກສອນຊ້າງປ່າ ຖືຊ້າງຄືດັ່ງສະມາຊິກຫນຶ່ງໃນຄອບຄົວຂອງຕົນ. ກ່ອນນີ້ ຊ້າງຫລາຍໂຕ ໄດ້ຊ່ວຍປະຊາຊົນ ແລະ ທະຫານໃນການຕໍ່ຕ້ານກູ້ຊາດ. ປະຈຸບັນ ຊ້າງຍັງຊ່ວຍປະຊາຊົນໃນວຽກງານຫຼາຍຢ່າງຄື: ເຮັດໄຮ່ເຮັດນາ, ຂົນສົ່ງໄມ້ເພື່ອປຸກສ້າງເຮືອນ ຫລືພາປະຊາຊົນຜ່ານແມ່ນ້ຳລຳເຊ..”
ຢູ່ບ້ານໂດນ, ມີສະຖານທີ່ທ່ອງທ່ຽວແຫ່ງໜຶ່ງຊື່ງນັກທ່ອງທ່ຽວຢາກຊອກຮູ້ກວ່າໝູ່ ນັ້ນແມ່ນ ສວນຮູບປັ້ນຊ້າງ ແລະ ຮູບປັ້ນຜູ້ລ່າຊ້າງ ຄຸນສະນຸບ(1827-1937). ໃນຄາວຍັງມີຊີວິດຢູ່, ທ່ານ ຄຸນສະນຸບ ລ່າຊ້າງປ່າໄດ້ 480 ໂຕເພື່ອເອົາເມືອເຝີກສອນ, ໃນນັ້ນ ມີ ຊ້າງເພືອກຫາຍາກ 2 ໂຕ, ເພີ່ນໄດ້ມອບໃຫ້ພະເຈົ້າມະຫາຊີວິດ ໄທ ແລະ ເຈົ້າຊີວິດ ບ໋າວດ້າຍ ຂອງຫວຽດນາມ. ປະຈຸບັນ ຢູ່ບ້ານໂດນ ຍັງມີເຮືອນບູຮານຂອງທ່ານ ອາມາກົງ, ຊື່ງແມ່ນຫລານຜູ້ດຽວທີ່ໄດ້ຮັບການສືບທອດອາຊີບລ່າຊ້າງ, ເຝີກສອນຊ້າງປ່າຈາກທ່ານ ຄຸນສະນຸບ. ທ່ານ ອາມາກົງ ເຖິງແກ່ມໍລະນະກຳເມື່ອປີ 2012 ແຕ່ປະຈຸບັນ ໃນເຮືອນຂອງທ່ານຍັງຄົງຮັກສາຮູບພາບ, ວັດຖຸພັນຫລາຍຢ່າງເພື່ອຊ່ວຍໃຫ້ຜູ້ຊົມເຂົ້າໃຈຕື່ມອີກກ່ຽວກັບການລ່າຊ້າງປ່າ ແລະ ເຝີກສອນຊ້າງປ່າໃນເມື່ອກ່ອນ.
ເຮືອນຮ້ານບູຮານຢູ່ ບ້ານໂດນ
ພາບ:internet
|
ສິ່ງທີ່ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວເມື່ອມາຢ້ຽມຢາມບ້ານໂດນ ນັ້ນແມ່ນໄດ້ຂີ່ຊ້າງຂ້າມແມ່ນ້ຳລຳເຊ, ຊົມທິວທັດທຳມະຊາດຂອງພູຜາປ່າໄມ້ທີ່ໃຫຍ່ໂຕມະໂຫຖານຢູ່ເຂດ ໄຕງວຽນ. ເມື່ອຂີ່ຊ້າງ, ຜ່ານການເລົ່າເລື່ອງຂອງກວານຊ້າງ, ນັກທ່ອງທ່ຽວມີໂອກາດຊອກຮູ້ບັນດາສິ່ງທີ່ສ້າງຄວາມປະທັບໃຈກ່ຽວກັບອາຊີບເຝີກສອນຊ້າງປ່າ, ກ່ຽວກັບທິວທັດທຳມະຊາດສວຍສົດງົດງາມ, ມໍລະດົກວັດທະນະທຳທີ່ເປັນເອກະລັກສະເພາະຂອງຊາວຊົນເຜົ່າຢູ່ເຂດໄຕງວຽນ. ທ່ານ ອີຕີງ, ຜູ້ເຝີກສອຍຊ້າງປ່າຢູ່ ບ້ານໂດນ ເລົ່າສູ່ຟັງວ່າ
“ລ້ຽງຊ້າງຕ້ອງຮູ້ຈັກນິດໄສຂອງມັນ. ຕ້ອງໃຫ້ຊ້າງກິນອີ່ມ, ຢູ່ໃນປ່າຕ້ອງເກັບໃບໄມ້ໃຫ້ຊ້າງກິນ, ແຕ່ເມື່ອກັບບ້ານໃຫ້ມັນກິນໝາກກ້ວຍ, ຕົ້ນອ້ອຍ, ໃຫ້ດື່ມນ້ຳປົນກັບເກືອ, ມັນຈື່ງຈື່ບ້ານ, ບໍ່ປະບ້ານໄປອີກ. ຍາມເຊົ້າເມື່ອເຫັນຊ້າງເຮົາຕ້ອງເບິ່ງຕາ, ເບິ່ງດັງຂອງມັນ. ພວກເຮົາຕ້ອງຮັກແພງຊ້າງເໝືອນດັ່ງຄົນ. ເມື່ອໃດຊ້າງເປັນພະຍາດຕ້ອງໃຫ້ມັນພັກຜ່ອນ ແລະ ປິ່ນປົວໃຫ້ມັນ.”
ເມື່ອມາຢ້ຽມຢາມບ້ານໂດນ, ນັກທ່ອງທ່ຽວບໍ່ພາດກາລະໂອກາດຍ່າງໄປຜ່ານບັນດາຂົວລອຍທີ່ເຮັດດ້ວຍເຄື່ອງຈັກສານ ແລະ ຮາກໄມ້ປ່າ ທີ່ມີຄວາມງາມແບບພິເສດສະເພາະຂອງເຂດໄຕງວຽນ. ຢູ່ເຂດທ່ອງທ່ຽວຂົວລອຍໃນບ້ານໂດນ, ນັກທ່ອງທ່ຽວສາມາດພັກເຊົາ ແລະ ຮັບອາຫານທ່ຽງກັບເຂົ້າຫລາມ, ປີ້ງໄກ່, ບັນດາເຍື່ອງອາຫານພິເສດຂອງຊາວຊົນເຜົ່າຢູ່ທີ່ນີ້. ຄວາມປະທັບໃຈທີ່ສຸດ ນັ້ນແມ່ນທັງຮັບປະທານອາຫານ, ທັງໄດ້ຮັບຟັງສຽງນ້ຳປ່າໄຫລ, ສຽງລົມພັດມາພ້ອມດ້ວຍສຽງຫົວ, ສຽງລົມກັນຂອງນັກທ່ອງທ່ຽວ.
ຈາກຂົວລອຍຂີ່ລົດໄປຕື່ມອີກປະມານ 20 ນາທີ, ນັກທ່ອງທ່ຽວຈະໄປຮອດເຂດອະນຸລັກຮັກສາແຫ່ງຊາດ Yok Don. ປ່າສະຫງວນແຫ່ງຊາດ Yok Don, ອ້ອມຮອບຫນອງ Dak Minh ເຊິ່ງປະຈຸບັນຍັງຄົງຮັກສາຄວາມງາມແບບເປົ່າຫວ່າງດັ້ງເດີມໄວ້ໄດ້. ຍາມສາຍັນ, ນັກທອ່ງທ່ຽວສາມາດຂີ່ເຮືອທ່ຽວຫລິ້ນຢູ່ຫນອງເພື່ອຊົມທັດສະນີຍະພາບໃນຍາມສາຍັນ. ເມື່ອຕອນຄ່ຳວຽນມາ, ນັກທ່ອງທ່ຽວຈະພັກຜ່ອນຢູ່ບັນດາເຮືອນຮ້ານຂອງຊາວຊົນເຜົ່າ ແລະ ຮັບຊົມລາຍການສະແດງສິລະປະທີ່ເຂັ້ມຂົ້ນໄປດ້ວຍສີສັນຊົນເຜົ່າຂອງເຂດພູຜາປ່າໄມ້ໄຕງວຽນ.
ເມື່ອລາຈາກບ້ານໂດນ, ນັກທ່ອງທ່ຽວຈະມີອະນຸສອນຫລາຍຢ່າງທີ່ບໍ່ອາດຫລົງລືມໄດ້. ບັນດາລາຍການທ່ອງທ່ຽວຢູ່ ບ້ານໂດນ ລ້ວນແຕ່ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ນັກທ່ອງທ່ຽວ. ການທ່ອງທ່ຽວຢູ່ ບ້ານໂດນ ຍັງມີຄວາມສາມາດບົ່ມຊ້ອນຫລາຍຢ່າງ. ອັນຈະດຶງດູດນັກທ່ອງທ່ຽວມາຢ້ຽມຢາມ, ຄົ້ນຫາເປັນຈຳນວນຫລວງຫລາຍ.