(vovworld)- ເມື່ອໄດ້ມາຢ້ຽມຢາມ ຮ່າຢາງ ໃນຄັ້ງທຳອິດ, ນັກທ່ອງທ່ຽວບໍ່ວ່າຜູ້ໃດກໍຕົກສະເຫງີ້ຕໍ່ຄວາມໃຫຍ່ໂຕມະໂຫຖານຂອງສາຍພູຫີນ ກໍຄືເສັ້ນທາງລະອິດລະອ້ຽວ, ທຸລະກັນດານຢູ່ເນີນພູ. ນອກຈາກບັນດາສະຖານທີ່ທ່ອງທ່ຽວສ້າງຄວາມປະທັບໃຈຄື: ກວ໋ານບ້າ, ອຽນມີງ, ຫລູງກູ, ແມ່ວວາກ .. ແລ້ວ, ເຂດດິນຕອນເຫນືອສຸດຂອງຫວຽດນາມ ທີ່ມີຄວາມງາມດັ່ງໃນຝັນນັ້ນ ຍັງມີສະຖານທີ່ທ່ອງທ່ຽວແຫ່ງຫນຶ່ງທີ່ດຶງດູດນັກທ່ອງທ່ຽວມາຢ້ຽມຢາມນັບມື້ນັບຫລາຍ ນັ້ນແມ່ນ ເທດສະບານ ຟໍບ໋າງ ຂຶ້ນກັບເມືອງ ດົງວັນ ແຂວງ ຮ່າຢາງ.
ເທດສະບານ ຟໍບ໋າງ
|
ຟໍບ໋າງ ເຄີຍແມ່ນເທດສະບານເກົ່າຂອງເມືອງ ດົງວັນ ຊື່ງແມ່ນສະຖານທີ່ດຳລົງຊີວິດຂອງ ຊາວຮວາ ແລະ ຊາວເຜົ່າມົ້ງ. ຟໍບ໋າງ ກ່ອນນີ້ແມ່ນສູນກາງການປົກຄອງ - ເສດຖະກິດ ສັງຄົມ ຂອງເມືອງ ດົງວັນ, ຮ່າຢາງ. ຟໍບ໋າງ ຫ່າງຈາກນະຄອນ ຮ່າຢາງ ປະມານ 117 ກິໂລແມັດ ແລະ ຖືກຕັ້ງຢູ່ຮ່ອມພູ ອ້ອມແອ້ມແມ່ນພູຫີນ. ທົ່ວເທດສະບານ ມີ ຄຸ້ມຖະຫນົນພຽງ 2 ສາຍ, ດ້ວຍເຮືອນຂອງຊາວ ເຜົ່າ ປະມານກວ່າ 20 ຫລັງຖືກປຸກສ້າງກະແຈກກະຈາຍຕາມແຄມທາງຕົ້ນຕໍ ແລະ ທາງນ້ອຍບາງສາຍ. ບັນດາ ເຮືອນດັ່ງກ່າວນັ້ນແມ່ນ ເຮັດດ້ວຍດິນ ແລະ ມີອາຍຸນັບຮ້ອຍປີ. ຟໍບ໋າງ ແມ່ນສະຖານທີ່ດຳລົງຊີວິດຂອງຊາວເຜົ່າມົ້ງ ແລະ ຊາວຮວາ ເປັນສ່ວນຫລາຍ, ສະນັ້ນ ຢູ່ເທດສະບານ ຟໍບ໋າງ ແມ່ນບໍ່ມີເຮືອນຮ້ານຄືຢູ່ແຫ່ງອື່ນໃນເມືອງ ດົງວັນ ທີ່ມີຊາວເຜົ່າມົ້ງ, ເຜົ່າຢ້າວ, ໄຕ່, ນຸ່ງ ດຳລົງຊີວິດຢູ່ຮ່ວມກັນ. ອ້າຍ ມົວຊານໄຊ, ຢູ່ເທດສະບານ ຟໍບ໋າງ ໃຫ້ຮູ້ວ່າ:
“ບັນດາຫລັງເຮືອນຢູ່ທີ່ນີ້ ລ້ວນແຕ່ແມ່ນເຮືອນທີ່ເປັນມູນເຊື້ອ, ເສົາເຮືອນເຮັດດ້ວຍໄມ້, ສ່ວນຝາເຮືອນເຮັດດ້ວຍດິນ. ພວກຂ້າພະເຈົ້າມັກຢູ່ໃນເຮືອນທີ່ເປັນມູນເຊື້ອນີ້ກວ່າ. ເພາະເຮືອນດິນ ໃນລະດູຫນາວ ຈະຮູ້ສຶກອົບອຸ່ນກວ່າ ສ່ວນລະດູຮ້ອນ ຈະເຢັນກວ່າ. ຖ້າວ່າເຮົາກະກຽມໄມ້ ແລະ ດິນຂໍໄວ້ພຽງພໍແລ້ວ ການປຸກສ້າງເຮືອນຫຼັງໜຶ່ງໃຊ້ເວລາພຽງໜຶ່ງເດືອນກໍ່ສຳເລັດ.”
ມາຢ້ຽມຢາມເທດສະບານ ຟໍບ໋າງ ແລະ ໄດ້ເຫັນປະຈັກຕາຊີວິດການເປັນຢູ່ທີ່ສະຫງົບສຸກຂອງຊາວເຜົ່າ ມົ້ງ, ຊາວຮວາຢູ່ທີ່ນີ້, ນັກທ່ອງທ່ຽວຈະມີຄວາມຮູ້ສຶກ ສະຫວາດສະເຫວີຍກວ່າ ບໍ່ເນືອງນັນຄືຢູ່ເຂດຕົວເມືອງ. ອ້າຍ ຫງວຽນວັນນາມ, ນັກທ່ອງທ່ຽວ ມາຈາກ ຮ່າໂນ້ຍ ໃຫ້ຮູ້ວ່າ:
“ຂ້າພະເຈົ້າມາຢ້ຽມຢາມ ຟໍບ໋າງ ຍ້ອນຢູ່ທີ່ນີ້ ມີທິວທັດທຳມະຊາດສວຍງາມ, ມີການດຳລົງຊີວິດທີ່ລຽບງ່າຍ ກໍຄືຄວາມຮັກແພງແຂກຄົນຂອງຊາວເຜົ່າຢູ່ທີ່ນີ້. ສິ່ງທີ່ຂ້າພະເຈົ້າມັກທີ່ສຸດ ແມ່ນຍ່າງເລາະຫລິ້ນທົ່ວເທດສະບານ ເພື່ອຄົ້ນຫາກຊີວິດການເປັນຢູ່ຂອງຊາວເຜົ່າໃນເທດສະບານ.”
ເມື່ອເຂົ້າໄປໃນເຮືອນດິນຂອງຊາວ ເຜົ່າ, ທ່ານຈະພົບເຫັນຮູບພາບຜູ້ເຖົ້າຜູ້ແກ່ນັ່ງຂ້າງເຕົາໄຟ ກຳລັງຖັກແສ່ວ ແຕ່ເຊົ້າຈົນຮອດຄ່ຳ. ແຕ່ເມື່ອເຫັນນັກທ່ອງທ່ຽວມາຢ້ຽມຢາມ, ເຂົາເຈົ້າກໍ່ພ້ອມກັນ ຕ້ອນຮັບແຂກດ້ວຍຄວາມອົບອຸ່ນສະຫນິດສະຫນົມຄືດັ່ງຍາດຕິພີ່ນ້ອງທີ່ຢູ່ຫ່າງໄກກັບຄືນມາບ້ານ. ນອກນັ້ນ ປະຊາຊົນ ຟໍບ໋າງ ຍັງປຸງແຕ່ງບັນດາເຍື່ອງອາຫານພິເສດທີ່ແຊບນົວຕ້ອນຮັບບັນດານັກທ່ອງທ່ຽວທີ່ມາຈາກທຸກສາລະທິດ. ປ້າ ລານໄມຢີ, ຊາວເຜົ່າຮວາ ຢູ່ເທດສະບານ ຟໍບ໋າງ ພວມປຸງແຕ່ງເຍື່ອງອາຫານພິເສດຂອງບ້ານ ໃຫ້ຮູ້ວ່າ:
“ເຍື່ອງອາຫານນີ້ ເອີ້ນວ່າ ເດົ້າຊີ້ ມັນແຊບຫລາຍ. ວິທີປຸງແຕ່ງ, ເອົາໝາກເຜັດ ແລະ ເຄື່ອງປຸງໃສ່ ລວມມີ: ຂີງ, ເຄື່ອງເທດ, ເກືອ, ເຕົາຫູ້ຕົ້ມ. ອາຫານເຍື່ອງນີ້ແມ່ນເຍື່ອງອາຫານກິນກັບເຂົ້າສະນັ້ນເຮືອນໃດກໍ່ເຮັດ ແລະ ເຄີຍປຸງແຕ່ງໃນບຸນເຕັດ ແລະ ລະດູຫນາວເທົ່ານັ້ນ. ອາຫານເຍື່ອງນີ້ກິນກັບເຂົ້າປຽກກໍແຊບ, ຈ້ຳກັບເຂົ້າຫນຽວກໍແຊບ. “
ປະຊາຊົນຢູ່ ຟໍບ໋າງ ອາຊີບຕົ້ນຕໍຂອງເຂົາເຈົ້າ ສ່ວນຫລາຍແມ່ນເຮັດໄຮ່ເຮັດນາ ແລະ ປູກດອກໄມ້, ໃນນັ້ນ ດອກກຸລາບ ແມ່ນປູກຫລາຍສຸດ. ດອກກຸລາບຢູ່ທີ່ນີ້ ດອກຈະບໍ່ໃຫຍ່ຄືຢູ່ເຂດພູພຽງ ແຕ່ວ່າສີຂອງມັນແມ່ນງາມກວ່າ. ອາຊີບປູກດອກໄມ້ ໄດ້ນຳມາເຊິ່ງລາຍຮັບໃຫ້ປະຊາຊົນຢູ່ທີ່ນີ້ ຫລາຍສົມຄວນ, ຊີວິດການເປັນຢູ່ໄດ້ຮັບການປັບປຸງດີຂຶ້ນ.
ຕະຫລາດນັດ ຢູ່ ເທດສະບານ ຟໍບ໋າງ
|
ເທດສະບານ ຟໍບ໋າງ ບໍ່ພຽງແຕ່ດຶງດູດນັກທ່ອງທ່ຽວ ດ້ວຍຄວາມງາມຂອງທິວທັດທຳມະຊາດ, ບັນຍາກາດສະຫງົບງຽບ ແລະ ຊີວິດການເປັນຢູ່ທີ່ລຽບງ່າຍຂອງປະຊາຊົນຢູ່ທີ່ນີ້ ເທົ່ານັ້ນ ຫາກຕະຫລາດນັດທີ່ຈັດຂຶ້ນ ໃນ 6 ມື້/ເທື່ອຫນຶ່ງ ກໍແມ່ນສິ່ງທີ່ດຶງດູດນັກທ່ອງທ່ຽວທີ່ສຸດ. ໃນງານຕະຫລາດນັດ, ປະຊາຊົນພາກັນໄປຕະຫລາດແຕ່ຮຸ່ງເຊົ້າ ແລະ ນຳເອົາບັນດາຜະລິດຕະພັນພິເສດມາຂາຍ ເພື່ອຊື້ເຄື່ອງຂອງທີ່ຈຳເປັນຮັບໃຊ້ຊີວິດປະຈຳວັນຂອງຕົນ .