ໝູ່ບ້ານຄວກທີ່ຂຶ້ນກັບຕາແສງ ຟອງເຈົາ, ເມືອງດົງຮຶງ ແມ່ນອູ່ໃຫ້ກຳເນີດສິລະປະຂັບແຈ່ວທ້າຍບີງ. ເມື່ອເວົ້າເຖິງສິລະປະຂັບແຈ່ວທ້າຍບີງ, ຜູ້ນິຍົມສິລະປະຂັບແຈ່ວກໍເລີຍເຕື້ອງເຖິງໝູ່ບ້ານຄວກ. ການຟ້ອນລຳທຳເພງ ແລະ ສະແດງລະຄອນແຈ່ວໄດ້ກາຍເປັນວິຖີຊີວິດຂອງຊາວບ້ານຄວກແຕ່ລະຄົນ. ຫຼາຍຄົນໃນ ໝູ່ບ້ານຄວກແມ່ນສິລະປີນສັງກັດຄະນະນັກສະແດງລະຄອນແຈ່ວອາຊີບຢູ່ຫວຽດນາມ. ບັນດານັກສະແດງລະຄອນແຈ່ວໃນໝູ່ບ້ານຄວກໄດ້ນຳສິລະປະຂັບແຈ່ວໄປສະແດງຢູ່ຫຼາຍປະເທດໃນໂລກເຊັ່ນ: ອາເມລິກາ, ຝະລັ່ງ, ການາດາ, ຊູແອດ, ຍີປຸ່ນ… ເພື່ອຮັບໃຊ້ມວນຊົນ.
ລາຍການສະແດງຂັບແຈ່ວຂອງສະໂມສອນຂັບແຈ່ວບ້ານຄວກ |
ສະໂມສອນຂັບແຈ່ວບ້ານຄວກໂດຍແມ່ນນັກສິລະປີນ ກາວທິບັກ ເປັນຫົວໜ້າ. ສະໂມສອນລວມມີສະມາຊິກ 16 ຄົນ ກໍລ້ວນແຕ່ແມ່ນຊາວບ້ານຄວກ, ໄດ້ຕິດພັນກັບສິລະປະຂັບແຈ່ວນັບແຕ່ຄາວຍັງນ້ອຍ, ເມື່ອໃຫຍ່ມາ ກໍສືບຕໍ່ໄດ້ຮັບການຖ່າຍທອດຈາກບັນດານັກສິລະປີນທີ່ມີຊື່ສຽງໃນບ້ານ. ນັກສິລະປີນ ກາວທິບັກ ປີນີ້ ມີອາຍຸ 67 ປີ ຫົວໜ້າສະໂມສອນ ໃຫ້ຮູ້ວ່າ :
“ ພວກຂ້າພະເຈົ້າມີຄວາມຫວັງພຽງຢ່າງດຽວວ່າ ຢາກເຕົ້າໂຮມລູກນ້ອງຂອງບັນດານັກສິລະປີນ ຝຶກແອບນຳກັນເພື່ອສ້າງຄວາມມ່ວນຊື່ນໃນບ້ານ. ໃນເບື່ອງຕົ້ນກໍຄິດວ່າເທົ່ານັ້ນ ແລະ ເຊື່ອວ່າ ມັນພັດຂະຫຍາຍຕົວຄືໃນປະຈຸບັນ. ຊື່ສຽງຮຽງນາມຂອງສະໂມສອນໄດ້ດົງດັງໄປໄກ, ແຂວງຕ່າງໆເມື່ອຈັດງານບຸນ ຕ່າງກໍເຊື້ອເຊີນເຂົ້າຮ່ວມ. ສິລະປະຂັບແຈ່ວຂອງໝູ່ບ້ານຄວກໄດ້ຮັບຄວາມນິຍົມຈາກຫຼາຍຄົນ ”
ເພື່ອໂຄສະນາສິລະປະຂັບແຈ່ວຂອງໝູ່ບ້ານຄວກຜ່ານທາງສື່ສັງຄົມ, ທາງສະໂມສອນໄດ້ອັດສຽງ, ຖ່າຍທຳວີດີໂອເພື່ອໂຄສະນາທາງສື່ສັງຄົມ ແນໃສ່ແນະນຳກ່ຽວກັບ ສິລະປະຂັບແຈ່ວຢູ່ໝູ່ບ້ານຄວກ. ຕາມນັກສິລະປີນ ກາວທິບັກ ແລ້ວ, ນີ້ແມ່ນວິທີເພື່ອໃຫ້ບັນດາຜູ້ນິຍົມຂັບແຈ່ວ ຮູ້ຈັກກ່ຽວກັບສິລະປະຂັບແຈ່ວຢູ່ໝູ່ບ້ານຄວກທີ່ມີມາແຕ່ດົນນານແລ້ວ. ຕາມນັ້ນແລ້ວ, ການເດີນທາງໄປສະແດງລະຄອນແຈ່ວຂອງສະໂມສອນໄດ້ເພີ່ມຫຼາຍຂຶ້ນ. ນັກສິລະປີນ ກາວທິບັກ ກ່າວວ່າ :
“ຢູ່ບັນດາທ້ອງຖິ່ນ, ເມື່ອງານບຸນປີຜ່ານມາ, ໄດ້ຮັບການເຊື້ອເຊີນແລ້ວ, ຮອດງານບຸນປີນີ້ ກໍໄດ້ຮັບການເຊື້ອເຊີນຕໍ່. ແຂກທ່ອງທ່ຽວຊາວຕ່າງປະເທດກໍໄປຊອກຫາສະໂມສອນເພື່ອມາແລກປ່ຽນ ແລະ ຮຽນຂັບແຈ່ວ. ບັນດາບໍລິສັດທ່ອງທ່ຽວເມື່ອມີແຂກ, ກໍໄດ້ໂທລະສັບຫາພວກຂ້າພະເຈົ້າ ໃຫ້ກະກຽມບາງລາຍການເພື່ອສະແດງ ແລະ ແນະນຳໃຫ້ແຂກຕ່າງປະເທດອີກດ້ວຍ. ເຖິງວ່າ ຊາວຕ່າງປະເທດບໍ່ຮູ້ພາສາຫວຽດກໍຕາມ, ແຕ່ກໍສາມາດແອບຂັບຮ້ອງໄດ້. ”
ກໍເຊັ່ນດຽວກັນກັບນັກສິລະປີນ ກາວທິບັກ, ລຸງ ວູ້ເລເຍີມ ຮອງຫົວໜ້າສະໂມສອນຂັບແຈ່ວຢູ່ໝູ່ບ້ານຄວກ ກໍມີຄວາມເມົາມົວກັບສິລະປະຂັບແຈ່ວ. ລຸງ ວູ້ເລເຍີມ ເວົ້າວ່າ :
“ ອ້າຍເອື້ອຍນ້ອງທຸກຄົນໃນສະໂມສອນ ຕ່າງກໍເຮັດກະສີກຳ, ມີບາງຄົນກໍປະກອບອາຊີບຄ້າຂາຍ. ເມື່ອມີລາຍການ, ພຽງແຕ່ຕ້ອງໂທລະສັບໃຫ້ກັນ ເພື່ອເປັນເອກະພາບດ້ານເນື້ອໃນຂອງລາຍການ ກໍຄືການຝຶກແອບເພື່ອກະກຽມໄປສະແດງ. ທຸກໆຄົນໃນສະໂມສອນຍາມໃດກໍກຽມພ້ອມ, ຖ້າຫາກໄດ້ຮັບຄຳເຊີນ ກໍໄປໂລດ ”
ສ່ວນປ້າ ແກັວກທິທູ ກໍເປັນສະມາຊິກໃນສະໂມສອນ, ມີຄວາມຊົມຊອບສິລະປະຂັບແຈ່ວນັບແຕ່ຄາວຍັງນ້ອຍ, ແຕ່ຫາກໍໄດ້ເຂົ້າຮ່ວມສະໂມສອນ ນັບແຕ່ເມືອ່ລູກເຕົ້າໄດ້ຮຽນຈົບ ແລະ ໄປເຮັດວຽກແລ້ວ. ປ້າ ແກັວກທິທູ ເວົ້າວ່າ :
“ ຈາກຄວາມເມົາມົວກັບສິລະປະຂັບແຈ່ວ, ຂ້າພະເຈົ້າໄດ້ຕິດພັນກັບ ສິລະປະຂັບແຈ່ວມາຮອດປະຈຸບັນ, ຂະນະທີ່ອາຍຸໄດ້ສູງແລ້ວ. ເພື່ອຮັກສາສິລະປະຂັບແຈ່ວທ້າຍບີງ, ຂ້າພະເຈົ້າໄດ້ສອນ ແລະ ຖ່າຍທອດວິທີຂັບແຈ່ວໃຫ້ລູກຫຼານເພື່ອຮັກສາສິລະປະຂັບແຈ່ວຂອງ ໝູ່ບ້ານຄວກ ເພາະວ່າ ນີ້ແມ່ນສີສັນຊາດ”
ໃນທ່າມກາງຄວາມຫຍຸ້ງຍາກນາໆປະການໃນຊີວິດປະຈຳວັນ, ບັນດານັກສິລະປີນໃນ ໝູ່ບ້ານຄວກ ໄດ້ພະຍາຍາມສະຫຼະເວລາ ທັງເຮັດກະສີກຳ, ທັງແອບຂັບແຈ່ວເພື່ອຮັກສາປະເພດສິລະປະໂດຍລຸ່ນປູ່ລຸ່ນພໍ່ປະໄວ້ໃຫ້. ໃນບັນຍາກາດທີ່ສະຫງົບງຽບໃນໝູ່ບ້ານຄວກທີ່ແຂວງທ້າຍບີງ, ສຽງຂັບແຈ່ວປະສານກັບສຽງລໍ ດັງກ້ອງກັນວານໄປທົ່ວໝູ່ບ້ານ.