vovworld)- ນະຄອນ ເຫ້ວ ບໍ່ພຽງແຕ່ ມີຊື່ສຽງ ແມ່ນສະຖານທີ່ເຕົ້າໂຮມບັນດາວິຫານ, ສຸສານຂອງ ລາຊະວົງ ຫງວຽນ ກໍຄື ວັດວາອາຮາມ, ໂບດບູຮານຫລາຍແຫ່ງ ເທົ່ານັ້ນ ຫາກຍັງແມ່ນເຂດດິນມີທິວທັດທຳມະຊາດທີ່ສວຍງາມອີກດ້ວຍ. ພູງື້ ແມ່ນ້ຳເຮືອງ ແມ່ນທັດສະນີຍະພາບທີ່ລືຊື່ຂອງເມືອງຫລວງເກົ່າ. ພູງື້ ແມ່ນ້ຳເຮືອງ ຍາມໃດກໍຄົງຕົວຄຽງຂ້າງກັນ ແລະ ໄດ້ເຂົ້າສູ່ຊີວິດທາງດ້ານວັດທະນະທຳຂອງປະຊາຊົນ ເຫ້ວ ແລະ ຝັງເລິກໃນດວງໃຈຂອງຊາວຫວຽດນາມ ແຕ່ສັດຕະວັດທີ 18 ມາຮອດປະຈຸບັນ. ນັກຂ່າວ ເລເຟືອງ ມີບົດຂຽນ ດ້ວຍຫົວຂໍ້ວ່າ: ແມ່ນ້ຳເຮືອງ ພູງື້ ຄວາມງາມດັ່ງໃນຝັນຢູ່ ນະຄອນ ເຫ້ວ.
ແມ່ນ້ຳເຮືອງ ຢູ່ ນະຄອນ ເຫ້ວ
ພາບ:dulichmientay
|
ສຳລັບປະຊາຊົນ ເຫ້ວ ແລ້ວ, ຄວາມງາມຂອງນະຄອນ ເຫ້ວ ແມ່ນຍ້ອນມີແມ່ນ້ຳເຮືອງ. ແມ່ນ້ຳສາຍນີ້ ມີຄວາມຍາວ 80 ກິໂລແມັດ ເລີ່ມຈາກສາຍພູຫລວງ ທີ່ໃຫຍ່ໂຕມະໂຫຖານ ໄຫລຜ່ານພູຜາປ່າໄມ້ທີ່ສະຫລັບຊັບຊ້ອນ ຜ່ານນະຄອນ ເຫ້ວ ແລະ ແກ່ຍາວເຖິງ ເຂດບຶງ ຟາຕາມຢາງ ກ່ອນທີ່ໄຫລສູ່ປາກທະເລ ທ້ວນອານ. ກ່ອນທີ່ໃຊ້ຊື່ ແມ່ນ້ຳເຮືອງ, ຕາມການເວລາ ແມ່ນ້ຳສາຍນີ້ ກໍມີຫລາຍຊື່ທີ່ແຕກຕ່າງກັນ. ທ່ານ ຟານທ້ວນອານ, ນັກຄົ້ນຄ້ວາວັດທະນະທຳ ເຫ້ວ ໃຫ້ຮູ້ວ່າ:
“ກ່ຽວກັບຊື່ເອີ້ນແມ່ນ້ຳເຮືອງ ແມ່ນເລີ່ມມາຈາກເຂດດິນ ເຮືອງຈາ. ຟູຊວນ ເຫ້ວ ກ່ອນນີ້ ແມ່ນຂຶ້ນກັບເຂດດິນ ເຮືອງຈາ ຊື່ງແມ່ນສະຖານທີ່ແມ່ນ້ຳໄຫລຜ່ານເມືອງ ເຮືອງຈ່າ. ສະນັ້ນ ຄົນລຸ້ນກ່ອນເອົາຊື່ ເມືອງ ເຮືອງຈ່າ ເພື່ອຕັ້ງຊື່ໃຫ້ແມ່ນ້ຳ. ເບື້ອງຕົ້ນເອີ້ນວ່າ ແມ່ນ້ຳ ເຮືອງຈ່າ, ຫລັງຈາກນັ້ນ ເອີ້ນວ່າ ແມ່ນ້ຳເຮືອງ.”
ນອກນັ້ນ ຍັງມີວິທິອະທິບາຍຫນຶ່ງອີກກ່ຽວກັບຊື່ເອີ້ນແມ່ນ້ຳເຮືອງ (ເຮືອງແປ່ວ່າກິນຫອມ), ແຕ່ກີ້ແຕ່ກອ່ນ ແມ່ນ້ຳສາຍນີ້ໄຫລຜ່ານບັນດາເຂດປ່າໄມ້ທີ່ມີກິນຫອມຫວນຂອງຕົ້ນໄມ້ໃບຫຍ້າ ສະນັ້ນ ເມື່ອໄຫລຜ່ານນະຄອນ ເຫ້ວ ແມ່ນ້ຳສາຍນີ້ ກໍນຳເອົາກິນຫອມຂອງຕົ້ນໄມ້ໃບຫຍ້າໄປນຳ.
ແມ່ນ້ຳເຮືອງໄຫລຜ່ານນະຄອນເຫ້ວ, ຜ່ານບັນດາທັດສະນີຍະພາບປະຫວັດສາດທີ່ເກົ່າແກ່ ຄືດັ່ງນຳເອົາສິ່ງເລິກລັບແຕ່ເຕັມໄປດ້ວຍຄວາມງາມດັ່ງໃນຝັນ. ນັ່ງເທິງເຮືອລ່ອງຕາມແມ່ນ້ຳ, ນັກທ່ອງທ່ຽວຈະໄດ້ຮັບຊົມທິວທັດທຳມະຊາດຢູ່ອ້ອມແອ້ມພະລາດຊະວັງ ເຫ້ວ, ຜ່ານຂົວ ຢາວຽນ, ຟູຊວນ, ຈ່າງຕຽນ ມາຢ້ຽມຢາມສຸສານ ມີງມ້າງ, ວັດ ທຽນມູ້ ຫລື ລ່ອງເຖິງ ທ້ວນອານ ເພື່ອອາບນ້ຳທະເລ, ຊີມບັນດາເຍື່ອງອາຫານທະເລທີ່ແຊບນົວ.
ພິເສດ ເມື່ອຮອດຕອນຄ່ຳ, ນັກທ່ອງທ່ຽວຢູ່ພາຍໃນ ແລະ ຕ່າງປະເທດ ເຄີຍເລືອກເຟັ້ນບັນດາລາຍການທ່ອງທ່ຽວລ່ອງເຮືອຕາມແມ່ນນ້ຳເຮືອງເພື່ອຮັບຟັງເພງພື້ນເມືອງກ່ຽວກັບເຫ້ວ.
ພູງື້ບີງໃນຍາມສາຍັນ
ພາບ:dulich
|
ຄຽງຄູ່ກັບແມ່ນ້ຳເຮືອງ, ພູງື້ບີງ ແມ່ນຂອງຂວັນອັນລ້ຳຄ່າແຫ່ງທີສອງ ຊື່ງທຳມະຊາດໄດ້ດົນບັນດານໃຫ້ນະຄອນ ເຫ້ວ. ທັດສະນີຍະພາບສອງແຫ່ງນີ້ໄດ້ສ້າງໃຫ້ນະຄອນເຫ້ວ ມີຄວາມງາມດັ່ງໃນຝັນ. ແຕ່ດົນແລ້ວ, ສາຍພູທີ່ສວຍງາມນີ້ພ້ອມກັບແມ່ນ້ຳເຮືອງ ໄດ້ກາຍເປັນສັນຍາລັກຂອງທຳມະຊາດຢູ່ນະຄອນ ເຫ້ວ. ພູງື້ບີງ ມີຄວາມສູງ 105 ແມັດ, ຢູ່ ສອງເບື້ອງ ມີພູດິນ ແມ່ນ ຕ໋າຟູເຊີນ ແລະ ຫືວເບີດເຊີນ. ຕາມບັນດານັກຄົ້ນຄ້ວາປະຫວັດສາດແລ້ວ, ກ່ອນນີ້ ຢູ່ຕີນພູເຖິງຈອມພູ ແມ່ນປູກຕົ້ນແປກຂຽວອຸ່ມທຸ່ມຕະຫລອດປີ. ສະນັ້ນ ທິວທັດທຳມະຊາດຢູ່ທີ່ນີ້ ແມ່ນສິ່ງທີ່ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ນາງ ຮ່ວາງທິບີກແຫ້ງ, ຜູ້ນຳທ່ຽວ ສັງກັດບໍລິສັດທ່ອງທ່ຽວ Sinhcafe tourist ໃຫ້ຮູ້ວ່າ:
“ໃນຊຸມມື້ອາດກາດດີ, ຖ້າຢືນຢູ່ເທິງພູງື້ບີງ ທ່ານສາມາດຊົມທິວທັດທົ່ວນະຄອນໄດ້, ໂດຍສະເພາະເຫັນໄດ້ລາຊະວັງທີ່ໃຫຍ່ໂຕ, ວັດວາອາຮາມຫລາຍແຫ່ງ ກໍຄືຮູບພາບແມ່ນ້ຳເຮືອງ. ນອກນັ້ນ ເມື່ອມຸ່ງສາຍຕາສູ່ທາງຫນ້າ ທ່ານຈະເຫັນບັນດາໂນນພູ, ປ່າແປກທີ່ກວ້າງໃຫຍ່ ແລະ ເຂດທົ່ງພຽງທີ່ກວ້າງສຸດສາຍຕາ ຂອງບັນດາເມືອງ ເຮືອງຖູຍ, ຟູວາງ, ເຮືອງຈ່າ. ຢູ່ມຸ່ງສາຍຕາໄປໄກກວ່າ ແມ່ນສາຍພູຫລວງໃຫຍ່ໂຕມະໂຫຖານ.”
ພູງື້ ບໍ່ພຽງແຕ່ແມ່ນກຳແພງ ປົກປິດໃຫ້ລາດຊະວັງ ເຫ້ວ ເທົ່ານັ້ນ, ພູງື້ ຍັງແມ່ນທັດສະນິຍະພາບທີ່ໃກ້ຊິດສະຫນິດສະຫນົມກັບ ປະຊາຊົນ ເຫ້ວ ອີກດ້ວຍ.
ໂດຍທຳມະຊາດດົນບັນດານໃຫ້, ແມ່ນ້ຳເຮືອງ ພູງື້ ບໍ່ພຽງແຕ່ແມ່ນຊັບພະຍາກອນທ່ອງທ່ຽວທີ່ສວຍງາມເທົ່ານັ້ນ ຫາກຍັງແມ່ນສະຖານທີ່ນຳມາເຊິ່ງຊີວິດທາງດ້ານຈິດວິນຍານຂອງປະຊາຊົນ ເຫ້ວ ອີກດ້ວຍ. ສະນັ້ນ ທັດສະນີຍະພາບ 2 ແຫ່ງນີ້ ຍິ່ງເຮັດໃຫ້ນະຄອນ ເຫ້ວ ສວຍງາມກວ່າ ບໍ່ພຽງແຕ່ໃນສາຍຕາຂອງ ຊາວ ເມືອງຫລວງເກົ່າເທົ່ານັ້ນ ຫາກນັບທັງນັກທ່ອງທ່ຽວມາຈາກທຸກສາລະທິດອີກດ້ວຍ.