ດົງເຊີມ ຊຶ່ງແມ່ນໝູ່ບ້ານແກະສະຫຼັກເງິນທີ່ມີຊື່ສຽງໄປດ້ວຍໝູ່ບ້ານອາຊີບ “ ສີມືດີ” ໃນແຂວງທ້າຍບີງ. ມາຢ້ຽມຢາມມູ່ບ້ານ ດົງເຊີມ ໃນທຸກວັນນີ້, ແຂກທ່ອງທ່ຽວຈະມີໂອກາດຊອກຮູ້ກ່ຽວກັບໝູ່ບ້ານທີ່ມີມູນເຊື້ອວັດທະນະທຳນັບຮ້ອຍປີມ
ໝູ່ບ້ານດົງເຊີມປະກອບອາຊີບແກະສະຫຼັກເງິນໃນແຂວງທ້າຍບີງ |
ຈາກໃຈກາງເທດສະບານເມືອງ ກ້ຽນເຊືອງ, ໄປຜ່ານເສັ້ນທາງນ້ອຍແຄມແມ່ນ້ຳສາຍໜຶ່ງທີ່ເປັນຈັບໃຈປະມານ 10 ກມ, ແຂກທ່ອງທ່ຽວກໍຈະຮອດໝູ່ບ້ານດົງເຊີມ, ທີ່ຂຶ້ນກັບຕາແສງຮົ່ງທ້າຍ, ເມືອງກ້ຽນເຊືອງ, ແຂວງທ້າຍບີງ.
ເຂົ້າໄປໝູ່ບ້ານດົງເຊີມ, ກ່ອນອື່ນໝົດແຂກທ່ອງທ່ຽວອາດຈະໄດ້ໄປຢາມວິຫານດົງເຊີມ, ແຫ່ງບູຊາຜູ້ກໍ່ຕັ້ງອາຊີບຂອງຫມູ່ບ້ານ. ໂດຍຖືກຕັ້ງຢູ່ໃຈກາງຂອງໝູ່ບ້ານ, ວິຫານດົງເຊີມ ແມ່ນກຸ່ມສະຖາປັດຕະຍະກຳທີ່ໂຫຍ່ໂຕ ແລະ ເຄັ່ງຂຶມປະກອບດ້ວຍ 12 ກິດຈະກຳ, ລວມມີ 40 ຫ້ອງຖືກປຸກສ້າງບົນເນື້ອທີ່ດິນປະມານພັນຕາແມັດ. ວິຫານດົງເຊີມແມ່ນບູຊາພໍ່ຕູ້ ຫງວຽນກິມເລົາ, ຜູ້ກໍ່ຕັ້ງອາຊີບແກະສະຫຼັກເງິນ ແລະ ມີຄຸນງາມຄວາມດີຖ່າຍທອດອາຊີບແກະສະຫຼັກເງິນໃຫ້ແກ່ຊາວບ້ານດົງເຊີມ. ລຸງຫງວຽນຊວນເງີ້ນ ຜູ້ເວນຍາມຢູ່ວິຫານໃຫ້ຮູ້ວ່າ :
“ ເມື່ອກ່ອນນີ້, ວິຫານນີ້ແມ່ນນ້ອຍ ແຕ່ງາມທີ່ສຸດ, ມີຫຼັງຄາມີຮູບໂຄ້ງ ແລະ ຖືກມຸງດ້ວຍກະເບື້ອງ. ເມື່ອທ້າຍບີງຖືກແຍກເປັນແຂວງຕ່າງຫາກ, ວິຫານແຫ່ງນີ້ ໄດ້ຮັບການບູລະນະປະຕິສັງຂອນຄືນໃໝ່ ທີ່ໃຫຍ່ໂຕ ແລະ ງາມກ່ວາເກົ່າ ແລະ ມາຮອດປະຈຸບັນ, ມີອາຍຸກວ່າຮ້ອຍປີແລ້ວ ”
ໝູ່ບ້ານດົງເຊີມເມື່ອກ່ອນນີ້ ມີຊື່ສຽງໂດ່ງດັງຍ້ອນປະກອບອາຊີບແກະສະຫຼັກເງິນ, ດ້ວຍບັນດານາຍຊ່າງທີ່ມີສີມືດີ ແລະ ດຸໝັ້ນໃນການຜະລິດ. ປັດໄຈສືບທອດອາຊີບໃນວົງຕະກູນ ແບະ ຮັກສາອາຊີບ ຍາມໃດກໍໄດ້ຮັບການປະຕິບັດຈາກລຸ່ນລູກລຸ່ນຫຼານ. 2-3 ປີມໍ່ໆມານີ້, ເພື່ອສ້າງວຽກເຮັດງານທຳ ແລະ ຕອບສະໜອງຄວາມຮຽກຮ້ອງຕ້ອງການໃນທ້ອງຕະຫຼາດ, ຊາວບ້ານດົງເຊີມ ບໍ່ພຽງແຕ່ ແກະສະຫຼັກບັນດາຜະລິດຕະພັນຈາກເງິນເທົ່ານັ້ນ, ຫາກຍັງເປີດກ້ວາງສູ່ ແກະສະຫຼັກບັນດາຜະລິດຕະພັນຈາກທອງແດງອີກດ້ວຍ. ຍົກຕົວຢ່າງຄື: ພາເຂົ້າ, ພາບ, ເຄື່ອງຮັບໃຊ້ການບູຊາທີ່ເຮັດດ້ວຍທອງ…ລຸງຝ້າມວັນຕື, ນັກສິລະປະການແກະສະຫຼັກເງິນເປີດເຜີຍວ່າ :
“ ອາຊີບນີ້ແມ່ນອາຊີບທີ່ເປັນມູນເຊື້ອ, ສືບທອດມາຈາກລຸ່ນປູ່ຂ້າພະເຈົ້າ. ແຕ່ລະປີ, ຮອດຍາມຕົ້ນປີ ແລະ ທ້າຍປີ ຕ້ອງເຮັດຫຼາຍເພື່ອຮັບໃຊ້ລູກຄ້າ. ນີ້ແມ່ນອາຊີບທີ່ມີມາແຕ່ດົນນານ, ສືບທອດໃນວົງຕະກູນ. ເຄັດລັບ ແມ່ນຕ້ອງຮັກສາ, ບໍ່ເປີດເຜີຍ. ເມື່ອເຫັນຜະລິດຕະພັນຂອງໝູ່ບ້ານດົງເຊີມ ແມ່ນສາມາດຮູ້ໂລດແມ່ນຂອງໝູ່ບ້ານເລີຍ ”
ເມື່ອຍ່າງໄປຈາກຫົວບ້ານຫາຫາງບ້ານ, ກໍໄດ້ຍິນສຽງຄ້ອນຕີ, ເຈາະ, ແກະສະຫຼັກເງິນຢ່າງບໍ່ຂາດສາຍ. ຮູບພາບທີ່ປະທັບໃຈແມ່ນພວກນາຍຊ່າງນັກແກະສະຫຼັກບັນດາຜະລິດຕະພັນດ້ວຍສີມືດີ. ນາງ ຫງວຽນທິງ່າ ໃຫ້ຮູ້ວ່າ :
“ 2 ແມ່ລູກຂ້າພະເຈົ້າ ພຽງເຮັດຂັ້ນຕອນຕີທອງເທົ່ານັ້ນ, ຫຼັງຈາກນັ້ນ ແມ່ນຍັງມີຫຼາຍຂັ້ນຕອນອື່ນໆ. ສຳລັບພວກເດັກແມ່ນເຮັດຂັ້ນຕອນງ່າຍ, ສຳລັບຜູ້ໃຫຍ່ແມ່ນແມ່ນເຮັດຂັ້ນຕອນຍາກກວ່າ. ”
ຕູ່ງຈີ ລູກສາວຂອງນາງງ່າ ກໍເຂົ້າຮ່ວມຮຽນວິຊາຊີບ ແລະ ໃນເບື້ອງຕົ້ນກໍສາມາດເຮັດຂັ້ນຕອນທີ່ງ່າຍດາຍໄດ້. ຕຸ່ງຈີເວົ້າວ່າ :
“ ແມ່ຂອງນ້ອງເຮັດແຕ່ 20 ປີມານີ້, ແມ່ຂອງນ້ອງມີວຽກຫຼາຍ. ປີນີ້, ນ້ອງເຂົ້າຮຽນຫ້ອງ ມ 7 , ຍາມພັກແລ້ງ, ມີເວລາວ່າງ ກໍຊ່ວຍແມ່ເຮັດ ”
ດົງເຊີມ ບໍ່ພຽງແຕ່ແມ່ນໝູ່ບ້ານແກະສະຫຼັກເງິນ, ທອງທີ່ມີມານັບຮ້ອຍປີມານີ້, ຫາກຍັງມີຄວາມປະທັບໃຈຍ້ອນບັນດານາຍຊ່າງທີ່ມີສີມືດີ ແລະ ດຸໝັ້ນໃນການຜະລິດ. ມາຢ້ຽມຢາມ ໝູ່ບ້ານດົງເຊີມເພື່ອຊອກຮູ້ກ່ຽວກັບ ໝູ່ບ້ານອາຊີບທີ່ມີຊື່ສຽງຍ້ອນມີບັນດາຜະລິດຕະພັນຈາກເງິນ, ທອງທີ່ຖືກເຮັດຢ່າງລະອຽດອ່ອນນັ້ນ ຈະແມ່ນການລົງຕົວຈິງທີ່ເປັນໜ້າຈົດຈຳສຳລັບທຸກໆຄົນ.