ໄລຍະທີ່ຜ່ານມາ, ຍ້ອນມີການຍູ້ແຮງການຮ່ວມສຳພັນ, ຖ່າຍທອດເຕັກນິກ ແລະ ສີມືອາຊີບຂອງບັນດາທ່ານໝໍຈາກໂຮງໝໍຂັ້ນສູນກາງ ໄດ້ປະກອບສ່ວນຍົກສູງຄວາມສາມາດທາງດ້ານວິຊາສະເພາະໃຫ້ແກ່ຖັນແຖວແພດໝໍຢູ່ຕາມໂຮງໝໍແຂວງ, ສາສຸກສາລາ…ຢູ່ແຂວງກວາງນິງ, ການຖ່າຍທອດເຕັກນິກນີ້ໄດ້ບັນລຸປະສິດທິຜົນຢ່າງຕັ້ງໜ້າ, ປະກອບສ່ວນຍົກສູງຄຸນນະພາບການກວດ ແລະ ປິ່ນປົວພະຍາດຢູ່ທ້ອງຖິ່ນ, ພ້ອມກັນນັ້ນ, ກໍເປັນການຫຼຸດຜ່ອນສະພາບຮັບຄົນເຈັບເກີນຂອບເຂດຂອງໂຮງໝໍຂັ້ນສູນກາງ.
ບັນດາທ່ານໝໍເມືອງເດີມຮ່າພວມດຳເນີນການຜ່າຕັດຜ່ານທໍ່ |
ຖ້າຫາກວ່າເມື່ອກ່ອນນີ້, ບັນດາກໍລະນີຜ່າຕັດທີ່ຫຍຸ້ງຍາກເຊັ່ນ: ຜ່າຕັດກະດູກສັນຫຼັງ, ການຜ່າຕັດໂລກກ້ອນເບົ້າໃນກະໂຫຼກຫົວ, ຜ່າຕັດຫົວໃຈວາຍ…ກໍລ້ວນແຕ່ຕ້ອງສົ່ງໄປໂຮງໝໍສູນກາງນັ້ນ, 2,3 ປີມໍ່ໆມານີ້, ບັນດາໂຮງໝໍໃຫຍ່ຢູ່ແຂວງກວາງນິງໄດ້ສາມາດຜ່າຕັດຢ່າງສຳເລັດຜົນ. ຂະແໜງສາທາລະນະສຸກແຂວງກວາງນິງໄດ້ ແລະ ພວມມີບັນດາບາດກ້າວເດີນຢ່າງກະໂດດຂັ້ນຂະນະທີ່ໄດ້ກ້າເຊືອເຊີນບັນດາສາດສະດາຈານ, ປະລິນຍາເອກ, ທ່ານໝໍຊັ້ນນຳຢູ່ບັນດາໂຮງໝໍຂັ້ນສູນກາງມາກວດ, ປິ່ນປົວ, ບຳລຸງສ້າງ ແລະ ຖ່າຍທອດເຕັກນິກໃຫ້ແກ່ບັນດາແພດໝໍໃນແຂວງ. ພ້ອມກັນນັ້ນ, ບັນດາໂຮງໝໍໃນແຂວງກວາງນິງ ໄດ້ຮັບການລົງທຶນກໍ່ສ້າງພື້ນຖານໂຄງລ່າງ, ປະກອບພາຫະນະອຸປະກອນທີ່ທັນສະໄໝ, ຄົບຊຸດຢ່າງບໍ່ຢຸດຢັ້ງ. ຄົນເຈັບ ວູ້ຮຶງບິງ ພວມປິ່ນປົວຢູ່ຂະແໜງໂລກກ້ອນເບົ້າ-ມະເຮັງ, ໂຮງໝໍບ້າຍໄຈ້ ເປີດເຜີຍວ່າ :
“ ໂຮງໝໍມີພາຫະນະເຄື່ອງຈັກຢ່າງຄົບຖ້ວນເຊັ່ນນີ້, ຂ້າພະເຈົ້າຄິດວ່າ ບໍ່ຕ້ອງຍ້າຍໄປໂຮງໝໍຂັ້ນສູນກາງອີກ. ເຮົາປິ່ນປົວຢູ່ໂຮງໝໍໃກ້ເຮືອນຂອງເຮົາ ກໍຍິ່ງສະດວກສະບາຍ, ທັງຄົນເຈັບ ແລະ ຄອບຄົວຕ່າງກໍຮູ້ສຶກສະບາຍໃຈ ”
ແຕ່ເຖິງຢ່າງໃດກໍຕາມ, ເພື່ອສ້າງເຄື່ອງໝາຍການແພດຂອງໂຮງໝໍຂັ້ນແຂວງໃຫ້ເປັນຢ່າງດີ, ຊ່ວຍຄົນເຈັບມີຄວາມອຸ່ນອຽນໃຈປີ່ນປົວ, ຈຳກັດສະພາບຮັບຄົນເຈັບເກີນຂອບເຂດຂອງໂຮງໝໍຂັ້ນສູນກາງ ກໍຍັງປະສົບກັບຄວາມຫຍຸ້ງຍາກຫຼາຍຢ່າງ. ມີຄົນເຈັບຫຼາຍຄົນຍັງຄົງຮັກສາຄວາມຄິດແບບບໍ່ກ້າວໜ້າຄື ຕ້ອວປິ່ນປົວຢູ່ ໂຮງໝໍຂັ້ນສູນກາງ ຈຶ່ງມີທ່ານໝໍທີ່ດີ, ມີຄວາມເກັ່ງກ້າສາມາດຫຼືວ່າ ປິ່ນປົວຢູ່ໂຮງໝໍຂັ້ນລຸ່ມ, ພາຫະນະອຸປະກອນການແພດບໍ່ທັນສະໄໝຄືໂຮງໝໍຂັ້ນສູນກາງ. ສິ່ງນີ້ໄດ້ພາໃຫ້ຫຼາຍກໍລະນີຄົນເຈັບມັກຍ້າຍໄປປິ່ນປົວຢູ່ໂຮງໝໍຂັ້ນສູນກາງ. ທ່ານ ຈິ້ງວັນແມ້ງ, ຜູ້ອຳນວຍການໂຮງໝໍຫຼາຍຂະແໜງແຂວງກວາງນິງ ໃຫ້ຮູ້ວ່າ : (ເທບ) : “ ໄລຍະກ່ອນນີ້, ຄວາມສາມາດໃນການກວດ ແລະ ປິ່ນປົວພະຍາດຢູ່ ໂຮງໝໍຂັ້ນແຂວງ ແມ່ນຍັງບໍ່ທັນສາມາດຕອບສະໜອງຄວາມຮຽກຮ້ອງຕ້ອງການໃນການປິ່ນປົວ, ອັນໄດ້ພາໃຫ້ ຄົນເຈັບຫຼາຍຄົນໄດ້ຍ້າຍໄປປິ່ນປົວຢູ່ໂຮງໝໍຂັ້ນສູນກາງ. ກ່ຽວກັບລະດັບຈ່າຍຄ່າປະກັນສຸຂະພາບນັ້ນ, ຢູ່ໂຮງໝໍຂັ້ນສູນກາງ, ລະດັບໃຊ້ຈ່າຍແມ່ນສູງກ່ວາ, ດັ່ງນັ້ນຄົນເຈັບຍອມຈ່າຍຄ່າບໍລິການຕ່າງໆທີ່ເກີດໃໝ່ດ້ວຍລະດັບສູງກວ່າເພື່ອໄດ້ຊົມໃຊ້ລະດັບປະກັນສຸຂະພາບສູງສຸດ”
ແຕ່ໃນໄລຍະມໍ່ໆມານີ້, ສະພາບການໄດ້ປ່ຽນແປງໄປ. ຍ້ອນບັນດາທ່ານໝໍເກັ່ງຈາກໂຮງໝໍຂັ້ນສູນກາງໄດ້ລົງຖ່າຍທອດເຕັກນິກ, ດັ່ງນັ້ນ, ສີມືອາຊີບຂອງແພດໝໍຂັ້ນທ້ອງຖິ່ນໄດ້ບັນລຸປະສິດທິຜົນດີ, ອັນໄດ້ເຮັດໃຫ້ທາງດ້ານຈິດຕະຂອງຄົນເຈັບຄ່ອຍໆຫັນປ່ຽນຕາມທິດອັນຕັ້ງໜ້າ. ຍົກຕົວຢ່າງຄື ໂຮງໝໍ K ສູນກາງໄດ້ຖ່າຍທອດເຕັກນິກລົງເລິກຂະແໜງໂລກມະເຮັງໃຫ້ແກ່ໂຮງໝໍບ້າຍໄຈ້ ແລະ ໂຮງໝໍຫຼາຍຂະແໜງແຂວງກວາງນິງໄດ້ຮັບການຖ່າຍທອດເຕັກນິກການຜ່າຕັດຫົວໃຈວ່າຍ ແລະ ຜ່າຕັດຊີບພະຈອນຈາກໂຮງໝໍມິດຕະພາບຫວຽດນາມ-ເຢັຍລະມັນ. ທ່ານ ວູ້ຊວນຢ້ຽນ, ຜູ້ອຳນວຍການພະແນກສາທາລະນະສຸກ ແຂວງກວາງນິງໃຫ້ຮູ້ວ່າ:
“ ໄລຍະທີ່ຈະເຖິງ, ພວກຂ້າພະເຈົ້າສຸມໃສ່ຊີ້ນຳເພີ່ມທະວີການກໍ່ສ້າງແຫຼ່ງຊັບພະຍາກອນມະນຸດ, ຕັ້ງໜ້າເພີ່ມທະວີການດຶງດູດແຫຼ່ງຊັບພະຍາກອນມະນຸດຄຸນນະພາບສູງ, ຮ່ວມມືກັບບັນດາໂຮງໝໍຂັ້ນສູນກາງ, ຊອກຫາໂອກາດຮ່ວມມືກັບບັນດາຜູ້ຊ່ຽວຊານຕ່າງປະເທດ, ແຕ່ງຕັ້ງບັນດາທ່ານໝໍເກັ່ງລົງໄປໜູນຊ່ວຍໂຮງໝໍຂັ້ນເມືອງ ”
ການບຳລຸງສ້າງ, ຖ່າຍທອດເຕັກນິກໃຫ້ແກ່ບັນດາໂຮງໝໍຂັ້ນລຸ່ມແມ່ນມີຄວາມໝາຍສຳຄັນທີ່ສຸດ ເພາະໃນເມື່ອ ໂຮງໝໍຂັ້ນແຂວງສາມາດປະຕິບັດເຕັກນິກທັນສະໄໝ, ກໍຈະມີຄວາມສະດວກສຳລັບຄອບຄົວຄົນເຈັບໃນການເຄື່ອນຍ້າຍກໍຄືໃນການກວດ, ປິ່ນປົວພະຍາດ. ພ້ອມກັນນັ້ນ, ໝາກຜົນນີ້ ຍັງປະກອບສ່ວນຫຼຸດຜ່ອນການຍ້າຍໄປປິ່ນປົວຢູ່ໂຮງໝໍຂັ້ນສູນກາງ ພ້ອມທັງຫຼຸດຜ່ອນສະພາບຮັບຄົນເຈັບເກີນຂອບເຂດຂອງໂຮງໝໍຂັ້ນສູນກາງອີກດ້ວຍ.