ໝູ່ຄະນະນັກວິທະຍາສາດຍິງ ສະພາມະຫາບັນດິດວິທະຍາສາດ ແລະ ເຕັກໂນໂລຢີຫວຽດນາມນຳໜ້າໃນຂົງເຂດຄົ້ນຄ້ວານຳໃຊ້ບັນດາຜະລິດຕະພັນຮັບໃຊ້ຊີວິດການເປັນຢູ່, ໃນນັ້ນມີບັນດາການນຳໃຊ້ວິທະນາສາດ ແລະ ເຕັກໂນໂລຢີ ນາໂນ ຮັບໃຊ້ແກ່ການຜະລິດວັດຖຸດິບຜະລິດຕະພັນການຢາ. ເຂົາເຈົ້າໄດ້ຮັບລາງວັນໂກວາແລັສກາຍອາ ປີ 2016 ແລະ ໄດ້ຮັບການເຊີດຊູໃນລາຍການ “ ເອກອ້າງທະນົງໃຈແມ່ຍິງຫວຽດນາມ” ເດືອນ 3 /2017.
ຈຸນັກວິທະຍາສາດຍິງ 5 ຄົນສັງກັດ ສະພາມະຫາບັນດິດວິທະຍາສາດ ແລະ ເຕັກໂນໂລຢີຫວຽດນາມ |
ຈຸນັກວິທະຍາສາດຍິງ 5 ຄົນສັງກັດ ສະພາມະຫາບັນດິດວິທະຍາສາດ ແລະ ເຕັກໂນໂລຢີຫວຽດນາມຊຶ່ງລວມມີບັນດາຮອງສາດສະດາຈານ, ປະລິນຍາເອກ: ເຈີນກິມແອງ, ວູ້ທິບິກ, ຝ້າມທູງາ, ເຈີນຮົ່ງຍຸງ ແລະ ຫງວຽນເຟືອງຕຸງ ແມ່ນຜູ້ຮັບຜິດຊອບນັບ 10 ຫົວເລື່ອງລະດັບລັດ, ກະຊວງ, ສະຖາບັນ. ມາຮອດປະຈຸບັນ, ພວກເອື້ອຍແມ່ນຜູ້ຂຽນ ແລະ ຜູ້ຂຽນຮ່ວມຂອງກວ່າ 630 ບົດຂຽນ, ໃນນັ້ນ ມີປະມານ 120 ບົດ ລົງພິມໃນວາລະສານວິທະຍາສາດສາກົນ. ພິເສດ, ພວກເອື້ອຍໄດ້ປະຕິບັດຫຼາຍຫົວເລື່ອງຄົ້ນຄ້ວານຳໃຊ້ວິທະຍາສາດ ແລະ ເຕັກໂນໂລຢີ ນາໂນ ຮັບໃຊ້ແກ່ການຜະລິດວັດຖຸດິບຜະລິດຕະພັນການຢາທີ່ມີຕົ້ນກຳເນີດຈາກທຳມະຊາດ. ໃນຈຳນວນບັນດາກິດຈະການຄົ້ນຄ້ວາວິທະຍາສາດຂອງພວກເອື້ອຍນັ້ນ, ພົ້ນເດັ່ນຂຶ້ນແມ່ນ ແມ່ນບັນດາກິດຈະການຄົ້ນຄ້ວາການກຳນົດທິດໂດຍພື້ນຖານກ່ຽວກັບວິທະຍາສາດ ແລະ ເຕັກໂນໂລຢີ ນາໂນ ຮັບໃຊ້ແກ່ການຜະລິດກະສີກຳ, ແພດສາດ-ຊີວະສາດ ແລະ ການຢາວິທະຍາ. ທ່ານນາງຮອງສາດສະດາຈານ, ປອ ຝ້າມທູງາ ໃຫ້ຮູ້ວ່າ :
“ ພວກຂ້າພະເຈົ້າລວມມີ 5 ຄົນ, ເຮັດວຽກໃນບັນດາຂົງເຂດທີ່ແຕກຕ່າງກັນ, ແຕ່ລ້ວນແຕ່ນຳໃຊ້ບັນດາວັດຖຸດິບຂະໜາດນາໂນ, ໂຄງປະກອບ ນາໂນເພື່ອນຳໃຊ້ໃນຂົງເຂດ ແພດສາດ-ຊີວະສາດ ແລະ ການຢາວິທະຍາ. ຍົກຕົວຢ່າງຄື ໃນມໍ່ໆມານີ້, ແມ່ນການນຳໃຊ້ເຂົ້າໃນການກວດພົບໄວກ່ຽວກັບປະລີມານຢາປາບສັດຕູພືດທີ່ເຫຼືອເກີນໃນຕົ້ນຊາ, ໝາກໄມ້, ພືດຜັກຕ່າງໆ. ຫຼືຄືກໍລະນີນາງ ເຈີນຮົ່ງຍຸງ ໄດ້ມີການຄົ້ນຄ້ວານຳໃຊ້ໃນຂົງເຂດແພດສາດ ແນໃສ່ກວດພົບໄວກ່ຽວກັບໂລກມະເຮັ່ງ ແລະ ບາງພະຍາດອື່ນ…”
ຈຸນັກວິທະຍາສາດຍິງສັງກັດ ສະພາມະຫາບັນດິດວິທະຍາສາດ ແລະ ເຕັກໂນໂລຢີຫວຽດນາມຍັງຂະຫຍາຍການຄົ້ນຄ້ວາກ່ຽວກັບລະບົບກ້ອງຈຸລະທັດເອເລັກໂຕນິກ ສະແກນເນີ ສາມາດຖ່າຍຮູບ 3D ຈຸລັງ ແລະ ແພຈຸລັງ. ນີ້ແມ່ນເຄື່ອງ
ມືຮັບໃຊ້ຢ່າງໄດ້ການໄດ້ງານໃນການຄົ້ນຄ້ວາຊີວະວິທະຍາ ແລະ ວິນິດໄສແພດສາດ. ເພື່ອຍົກສູງຄວາມສາມາດທາງດ້ານວິຊາສະເພາະ ແລະ ຖອດຖອນບົດຮຽນໃນການຄົ້ນຄ້ວາ, ພວກເອື້ອຍໄດ້ຮ່ວມມືຢ່າງແໜ້ນແຟ້ນກັບບັນດານັກວິທະຍາສາດຍິງສາກົນຢູ່ຝະລັ່ງ, ອາເມລິກາ, ອັງກິດ, ສ.ເກົາຫຼີ… ເຂົ້າຮ່ວມບັນດາກອງປະຊຸມວິທະຍາສາດ ແລະ ໄປຮຽນຢູ່ຕ່າງປະເທດ. ທ່ານນາງຮອງສາດສະດາຈານ, ປອ ຝ້າມທູງາ ແບ່ງປັນວ່າ :
“ ປະຈຸບັນ, ພວກຂ້າພະເຈົ້າພວມຄົ້ນຄ້ວາກ່ຽວກັບຜະລິດຕະພັນການຢາ ແລະ ອາຫານເສີມຂຸຂະພາບທີ່ມີຄຸນປະໂຫຍດຄື ຜະລິດຕະພັນການຢາ. ສິ່ງເຫຼົ່ານັ້ນ ແມ່ນເອົາມາຈາກທຳມະຊາດ, ຈາກຜັກ, ໝາກໄມ້ເພື່ອຮັບໃຊ້ໃຫ້ແກ່ຂະແໜງອຸດສາຫະກຳໃນອະນາຄົດ. ການຄົ້ນຄ້ວາທັງໝົດຂອງພວກຂ້າພະເຈົ້າ ກໍລ້ວນແຕ່ສາມາດນຳໃຊ້ໃນຕົວຈິງ ”
ປະຈຸບັນ, ພວກເອື້ອຍພວມຢູ່ໃນເກັນອາຍຸພັກກິນເບ້ັຍບຳນານແລ້ວ, ບໍ່ເຂົ້າຮ່ວມວຽກງານນຳພາ, ຄຸ້ມຄອງໂດຍກົງ, ແຕ່ກໍຍັງຄົງເຂົ້າຮ່ວມສິດສອນຢູ່ໂຮງຮຽນຕ່າງໆພາຍໃນປະເທດ. ພວກເອື້ອຍຍັງໄດ້ຮັບການເຊື້ອເຊີນມາແນະນຳໃຫ້ແກ່ບັນດານັກສຶກສາມາຈາກບັນດາມະຫາວິທະຍາໄລຕ່າງປະເທດ. ດ້ວຍການແນະນຳຢ່າງສຸດຈິດສຸດໃຈຂອງພວກເອື້ອຍ, ນັກຄົ້ນຄ້ວາ 20 ຄົນສາມາດປ້ອງກັນບົດວິທະຍານິພົນປະລິນຍາເອກຢ່າງສຳເລັດຜົນ, ນັກຄົ້ນຄ້ວາ 6 ຄົນພວມສຶກສາຄົ້ນຄ້ວາເພື່ອປ້ອງກັນບົດວິທະຍານິພົນປະລິນຍາເອກໃນຊຸມປີທີ່ຈະມາເຖິງ….. ທ່ານນາງຮອງສາດສະດາຈານ, ປອ ເຈີນກິມແອງເປີດເຜີຍວ່າ :
“ ເພື່ອຖ່າຍທອດຄວາມຮູ້, ບົດຮຽນໃຫ້ແກ່ບັນດານັກຄົ້ນຄ້ວາ, ພວກຂ້າພະເຈົ້າພະຍາຍາມ ຍົກອອກບັນດາທິດຄົ້ນຄ້ວາ, ຫົວເລື່ອງຄົ້ນຄ້ວາທີ່ມີລັກສະນະດູດດື່ມ. ພວກນັກຄົ້ນຄ້ວາຕ່າງກໍເຫັນວ່າ ການຄົ້ນຄ້ວາຂອງຕົນ ທັງມີລະດັບສູງ ພ້ອມທັງຕິດແທດຕົວຈິງ ”
ດ້ວຍບັນດາການອຸທິດສ່ວນຢ່າງສຸດຂີດໃຫ້ແກ່ວິທະຍາສາດ, ຈຸນັກວິທະຍາສາດຍິງ 5 ຄົນສັງກັດ ສະພາມະຫາບັນດິດວິທະຍາສາດ ແລະ ເຕັກໂນໂລຢີຫວຽດນາມ ມີຄວາມເປັນກຽດໄດ້ຮັບລາງວັນວິທະຍາສາດ ແລະ ເຕັກໂນໂລຢີໃຫ້ແກ່ກຸ່ມກິດຈະການຄົ້ນຄ້ວາໂດຍພື້ນຖານກ່ຽວກັບແສງສະຫວ່າງ ແລະ ທາດແຂງ, ຫຼຽນກາເພື່ອພາລະກິດວິທະຍາສາດຂອງກະຊວງວິທະຍາສາດ ແລະ ເຕັກໂນໂລຢີຫວຽດນາມ, ໃບຍ້ອງຍໍນັກປັນຍາຊົນຍິງດີເດັ່ນຫວຽດນາມໄລຍະ 2010-2015…ພວກເອື້ອຍຍັງໄດ້ຮັບລາງວັນໂກວາແລັສກາຍອາ ປີ 2016 ແລະ ໄດ້ຮັບການເຊີດຊູໃນລາຍການ “ ເອກອ້າງທະນົງໃຈແມ່ຍິງຫວຽດນາມ” ເດືອນ 3 /2017. ນີ້ແມ່ນຄວາມເປັນກຽດ ແລະ ກໍເປັນກຳລັງຫນູນເພື່ອໃຫ້ບັນດານັກວິທະຍາສາດ, ພິເສດແມ່ນບັນດານັກວິທະຍາສາດຍິງສືບຕໍ່ເດີນຕາມການຄົ້ນຄ້ວາວິທະຍາສາດຂອງຕົນເພື່ອສ້າງໃຫ້ມີບັນດາຜະລິດຕະພັນຮັບໃຊ້ຊີວິດສັງຄົມຢ່າງແທດຈິງ.