ການຄຸ້ມຄອງຄວາມສ່ຽງຈາກໄພທຳມະຊາດ ແລະ ການດັດປັບໃຫ້ແທດ ເໝາະກັບການປ່ຽນແປງຂອງດິນຟ້າອາກາດພວມແມ່ນສິ່ງທ້າທາຍໃຫຍ່ກວ່າໝູ່ໃນສະຕະວັດທີ 21 ສຳລັບທຸກໆປະເທດ, ໃນນັ້ນ ມີຫວຽດນາມ. ຕາມບັນດາຜູ້ຊ່ຽວຊານແລ້ວ, ເພື່ອຫຼຸດຜ່ອນຜົນກະທົບທີ່ບໍ່ດີຈາກການປ່ຽນແປງຂອງດິນຟ້າອາກາດນັ້ນ ແມ່ນຄວນສຸມທຸກແຫຼ່ງກຳລັງໃນການຮັບມື ແລະ ແກ້ໄຂຜົນຮ້າຍຈາກໄພທຳມະຊາດໂດຍໄວ.
ເຂດປະສົບໄພນ້ຳຖ້ວມຢູ່ພາກກາງຫວຽດນາມ
|
ໄພແຫ້ງແລ້ງທີ່ແກ່ຍາວໃນເນື້ອທີ່ກ້ວາງຂວາງນັບແຕ່ທ້າຍປີ 2014 ຫາເດືອນ 6 ປີ 2016 ແມ່ນໄພແຫ້ງແລ້ງທີ່ຮ້າຍແຮງທີ່ສຸດຊຶ່ງໄດ້ເກີດຂຶ້ນໃນຮອບ 11 ປີທີ່ຜ່ານມາຢູ່ແຂວງນິງຖ້ວນ. ໄລຍະຈຸດສູງ ກໍໄດ້ມີ 5.792 ຄອບຄົວລວມມີພົນລະເມືອງທັງໝົດ 25.200 ຄົນຄວນຕ້ອງການໜູນຊ່ວຍແຫຼ່ງນ້ຳຮັບໃຊ້ຊີວິດປະຈຳວັນ, ກວ່າ 31.000 ຄອບຄົວລວມມີພົນລະເມືອງທັງໝົດ 130.000 ຄົນຖືກອຶດຫິວ. ການຮັບປະກັນນ້ຳສະອາດ, ອະນາໄມສິ່ງແວດລ້ອມ, ການເບິ່ງແຍງດູແລເດັກນ້ອຍ ກໍແມ່ນວຽກງານລະອຽດພວມໄດ້ຮັບການຜັນຂະຫຍາຍຈາກບັນດາຂະແໜງການ ຂັ້ນຕ່າງໆຂອງນິງຖ້ວນເພື່ອ ດັດປັບໃຫ້ແທດເໝາະກັບການປ່ຽນແປງຂອງດິນຟ້າອາກາດ. ທ່ານດັ້ງກຽນເກືອງ ຮອງຫົວໜ້າພະແນກກະສີກຳ ແລະ ພັດທະນາຊົນນະບົດແຂວງນິງຖ້ວນໃຫ້ຮູ້ວ່າ :
“ການແກ້ໄຂໄພແຫ້ງແລ້ງ, ນອກຈາກແຫຼ່ງເງິນລົງທຶນຈາກສູນກາງແລ້ວ, ການໜູນຊ່ວຍຂອງບັນດາອົງການສາກົນແມ່ນມີຄວາມໝາຍສາຄັນເພື່ອຊ່ວຍແຂວງແກ້ໄຂຜົນຮ້າຍຢ້ອນຫຼັງຈາກໄພທຳມະຊາດເພື່ອຟື້ນຟູການຜະລິດ. ພ້ອມກັບການຫນູນຊ່ວຍດ່ວນຈາກສູນກາງ, ແຂວງນິງຖ້ວນພວມຜັນຂະຫຍາຍລະບົບສະໜອງນ້ຳຮັບໃຊ້ຊີວິດປະຈຳວັນຢູ່ບັນດາເຂດແຫ້ງແລ້ງໃນເມືອງຖ້ວນບັກ, ນິງຫາຍ, ຖ້ວນນາມ, ຜ່ານນັ້ນກໍສາມາດຍົກສູງລະດັບຄວາມຮັບຮູ້ໃຫ້ແກ່ປະຊາຊົນເພື່ອເປັນເຈົ້າການ ດັດປັບໃຫ້ແທດເໝາະກັບການປ່ຽນແປງຂອງດິນຟ້າອາກາດ, ປະຢັດນ້ຳໃຊ້ໃນຊີວິດປະຈຳວັນ ກໍຄືໃນການຜະລິດ”
ໂດຍແມ່ນແຂວງທີ່ທຸກຍາກ, ນິງຖ້ວນໄດ້ຍາດແຍ່ງແຫຼ່ງໜູນຊ່ວຍດ່ວນຈາກສາກົນໃນໄລຍະເກີກແຫ້ງແລ້ງທີ່ຜ່ານມາເພື່ອປະສົມປະສານເຂົ້າກັບບັນດາການເຄື່ອນໄຫວປ້ອງກັນ ແລະ ຕ້ານໄພທຳມະຊາດ, ພິເສດແມ່ນບັນດາເປົ້າໝາຍຮັບຄວາມສ່ຽງສູງກວ່າໝູ່ເຊັ່ນ: ແມ່ຍິງ, ເດັກນ້ອຍຢູ່ບັນດາເຂດປະສົບກັບຄວາມຫຍຸ້ງຍາກພິເສດ. ໂດຍຜ່ານການຊ່ວຍເຫຼືອຈາກກອງທຶນອະນຸຊົນແຫ່ງ ສ.ປ.ຊ, ຈາກແຫຼ່ງທຶນໜູນຊ່ວຍຂອງລັດຖະບານຍີ່ປຸ່ນ, ບັນດາທັກສະຮັບມືກັບໄພທຳມະຊາດໄດ້ຖືກນຳເຂົ້າຫຼັກສູດຢູ່ໂຮງຮຽນຫຼາຍແຫ່ງໃນບໍລິເວນແຂວງນິງຖ້ວນ. ທ່ານນາງ ເລທິຕ້ຽນ ຫົວໜ້າອຳນວຍການໂຮງຮຽນອະນຸບານຕາແສງເຟືອກຕ້ຽນ ເມືອງບາກອ້າຍ ໃຫ້ຮູ້ວ່າ :
“ ທາງໂຮງຮຽນໄດ້ສ້າງແຜນການ ແລະ ຜັນຂະຫຍາຍປະຕິບັດຮອດຫ້ອງຮຽນຕ່າງໆໂດຍອີງໃສ່ບັນດາປະເພດໄພທຳມະຊາດທີ່ເປັນອັນຕາລະລາຍໃຫ້ແກ່ນັກຮຽນຢູ່ໂຮງຮຽນແຕ່ລະແຫ່ງເພື່ອນຳເຂົ້າຫຼັກສູດເພື່ອແນະນຳ ທັກສະຮັບມືກັບໄພທຳມະຊາດໃຫ້ແກ່ພວກນ້ອງ. ຄູອາຈານຈະແນະນຳໃຫ້ພວກນ້ອງນັກຮຽນກ່ຽວກັບທັກສະການຫຼີກລ້ຽງນ້ຳແກ່ງຖ້ວມ, ບໍ່ຄວນໄປຜ່ານເຂດນ້ຳໃຫຍ່, ບໍ່ອອກນອກເຮືອນເມື່ອເກີດລົມໃຕ້ຝຸ່ນ ”
ທ່ານຮອງລັດຖະມົນຕີກະຊວງກະສີກຳ ແລະ ພັດທະນາຊົນນະບົດຫວຽດນາມ ຮ່ວາງວັນທັ້ງ ໃຫ້ຮູ້ວ່າ ບັນດາທ້ອງຖິ່ນຕ້ອງນຳໃຊ້ບັນດາແຫຼ່ງກຳລັງຢ່າງມີປະສິດທິຜົນໃນການຄຸ້ມຄອງຄວາມສ່ຽງຈາກໄພທຳມະຊາດ ແລະ ດັດປັບໃຫ້ແທດເໝາະກັບການປ່ຽນແປງຂອງດິນຟ້າອາກາດ, ປະກອບສ່ວນຫຼຸດຜ່ອນຜົນກະທົບທີ່ບໍ່ດີຕໍ່ການທຳມາຫາກິນຂອງປະຊາຊົນ, ພັດທະນາເສດຖະກິດ-ສັງຄົມຂອງບັນດາທ້ອງຖິ່ນ, ສ້າງສັງຄົມມີຄວາມປອດໄພເທື່ອລະກ້າວ. ການປຸກລະດົມ ແລະ ນຳໃຊ້ແຫຼ່ງກຳລັງໜູນຊ່ວຍຈາກວົງຄະນະຍາດສາກົນຢ່າງມີປະສີດທິຜົນ ແມ່ນຄວາມໝາຍສຳຄັນທີ່ສຸດໃນການຍົກສູງຄວາມສາມາດໃນການຮັບມືກັບໄພທຳມະຊາດ. ທ່ານຮອງລັດຖະມົນຕີກະຊວງກະສີກຳ ແລະ ພັດທະນາຊົນນະບົດຫວຽດນາມ ຮ່ວາງວັນທັ້ງ ໃຫ້ຮູ້ຕື່ມອີກວ່າ :
“ ການຮ່ວມມືສາກົນແມ່ສຳຄັນທີ່ສຸດ, ບໍ່ພຽງແຕ່ແມ່ນແຫຼ່ງກຳລັງການເງິນເທົ່ານັ້ນ, ຫາກຍັງແມ່ນບັນດາບົດຮຽນທີ່ຖອດຖອນມາໄດ້ຈາກບັນດາຄູ່ຮ່ວມມືສາກົນອີກດ້ວຍ. ໃນຊຸມປີທີ່ຜ່ານມາ, ພວກເຮົາໄດ້ຮ່ວມມືກັບຫຼາຍຄູ່ຮ່ວມມືທີ່ມີທ່າແຮງໃນການຮັບມືກັບໄພທຳມະຊາດ, ຜ່ານນັ້ນ ກໍຍົກສູງຄວາມສາມາດຮັບມືກັບໄພທຳມະຊາດ ຂອງຫວຽດນາມ ”
ດ້ວຍທັດສະນະດັດປັບໃຫ້ແທດເໝາະກັບການປ່ຽນແປງຂອງດິນຟ້າອາກາດ ແລະ ຫຼຸດຜ່ອນຄວາມສ່ຽງຈາກໄພທຳມະຊາດ, ກະຊວງກະສີກຳ ແລະ ພັດທະນາຊົນນະບົດຫວຽດນາມພວມສ້າງ “ຮ່າງຍຸດທະສາດແຫ່ງຊາດກ່ຽວກັບການປ້ອງກັນ, ຕ້ານ ແລະ ຜ່ອນເບົາໄພທຳມະຊາດເຖິງປີ 2020 ໃນເງື່ອນໄຂການປ່ຽນແປງຂອງດິນຟ້າອາກາດ, ນ້ຳທະເລຂຶ້ນສູງ”. ໃນນັ້ນ, ມຸ່ງໄປສູ່ການຍົກສູງຄວາມສາມາດພະຍາກອນ, ເຕື່ອນໄພສຳລັບໄພທຳມະຊາດຕ່າງໆທີ່ໄດ້ລະບຸໃນກົດໝາຍວ່າດ້ວຍການປ້ອງກັນ ແລະ ຕ້ານໄພທຳມະຊາດ, ກ່າວເຕືອນສຳລັບໄພທຳມະຊາດປະເພດຕ່າງໆເມື່ອເກີດຂຶ້ນຫຼາຍຄັ້ງເຊັ່ນ: ພາຍຸ, ນ້ຳຖ້ວມຍ້ອນພາຍຸ, ນ້ຳແກ່ງ, ຝົນຕົກໜັກ, ດິນເຊາະເຈື່ອນ, ແຫ້ງແລ້ງ, ນ້ຳທະເລຊຶມ.