(vovworld) – ເປັນຄັ້ງທຳອິດ, ທີ່ນະຄອນ ຍາຈາງ, ແຂວງແຄ໋ງຮ່ວາ ຖືກຄັດເລືອກເຟັ້ນເປັນສະຖານທີ່ຈັດຕັ້ງກອງປະຊຸມເຈົ້າໜ້າທີ່ອາວຸໂສ APEC ຄັ້ງທີ 1 (SOM 1) ໃນຂອບເຂດປີ APEC 2017. ນີ້ບໍ່ພຽງແຕ່ແມ່ນເຫດການສາກົນທີ່ມີຂອບຂະໜາດໃຫຍ່ເທົ່ານັ້ນ ຫາກຍັງແມ່ນໂອກາດເພື່ອໃຫ້ນະຄອນທ່ອງທ່ຽວຍາຈາງ ໄດ້ແນະນຳເຖິງບັນດາຜູ້ແທນເຂົ້າຮ່ວມ APEC ແລະ ແຂກທ່ອງທ່ຽວສາກົນກ່ຽວກັບຄວາມງາມທຳມະຊາດ, ວັດທະນະທຳ ແລະ ປະຊາຊົນຂອງດິນແດນແຫ່ງນີ້ອີກດ້ວຍ. ບົດຂຽນຂອງ ທ໋າຍບີ່ງ, ນັກຂ່າວ VOV.
ວີເຮັດດ້ວຍເກດສະໜາມອບໃຫ້ບັນດາຜູ້ແທນເຂົ້າຮ່ວມ APEC
|
ໂດຍເປັນນະຄອນທ່ອງທ່ຽວເຂດແຄມທະເລ ແລະ ເປັນເຂດໃຈກາງຂອງແຂວງ ແຄ໋ງຮ່ວາ, ນະຄອນ ຍາຈາງ ລືຊື່ດ້ວຍບັນດາຫາດຊາຍທະເລທີ່ສວຍງາມ, ທິດທັດທຳມະຊາດທີ່ດູດດື່ມ. ຍາຈາງ ຍັງໄດ້ຮັບຖືວ່າເປັນຈຸດນັດພົບດູດດື່ມໃຫ້ແກ່ບັນດາຜູ້ນິຍົມຊົມຊອບ ແລະ ຢາກມາຊອກຮູ້ບັນດາຈຸດວັດທະນະທຳທີ່ເປັນເອກະລັກສະເພາະ ແລະ ປະຊາຊົນຢູ່ທີ່ນີ້. ດ້ວຍບັນດາທ່າແຮງນັ້ນ, ລັດຖະບານ ຫວຽດນາມ ຈຶ່ງໄດ້ຄັດເລືອກເອົານະຄອນ ຍາຈາງ ແມ່ນສະຖານທີ່ຈັດຕັ້ງກອງປະຊຸມຄັ້ງທີ 1 ເຈົ້າໜ້າທີ່ອາວຸໂສ APEC – SOM 1 ເຊິ່ງດຳເນີນແຕ່ວັນທີ 18/2 ຫາວັນທີ 3/3. ນີ້ແມ່ນການເຄື່ອນໄຫວທຳອິດໃນປີ APEC 2017 ຢູ່ ຫວຽດນາມ. SOM 1 ລວມມີກອງປະຊຸມ, ກອງປະຊຸມສຳມະນາ, ການເຈລະຈາສຳຄັນລວມ 56 ຄັ້ງ, ດ້ວຍການເຂົ້າຮ່ວມຂອງຜູ້ແທນເກືອບ 2.500 ທ່ານທີ່ມາຈາກ 21 ພື້ນຖານເສດຖະກິດສະມາຊິກ. ໂດຍກຳນົດໄດ້ວ່ານີ້ແມ່ນເຫດການລະດັບສາກົນ, ມີຄວາມໝາຍອັນໃຫຍ່ຫຼວງດ້ານວັດທະນະທຳ, ເສດຖະກິດ, ການທູດ, ນັບແຕ່ຫຼາຍເດືອນມານີ້, ແຂວງແຄ໋ງຮ່ວາ ໄດ້ຜັນຂະຫຍາຍທຸກວຽກງານກະກຽມບັນດາພື້ນຖານໂຄງລ່າງ, ການບໍລິການ… ເພື່ອຮັບປະກັນໃຫ້ບັນດາກອງປະຊຸມໃນຂອບເຂດ APEC ປະສົບຜົນສຳເລັດ. ເຫດການກໍ່ໄດ້ຮັບຄວາມຫວັງວ່າຈະນຳມາເຊິ່ງກາລະໂອກາດການເຊື່ອມຕໍ່, ການຮ່ວມມາໃຫ້ບັນດາເພື່ອນມິດຢູ່ປະເທດຕ່າງໆໃນພາກພື້ນ ແລະ ຢູ່ໃນໂລກ. ທ່ານ ຫງວຽນຢູຍບັກ, ຮອງປະທານຄະນະກຳມະການປະຊາຊົນແຂວງແຄ໋ງຮ່ວາ, ໃຫ້ຮູ້ວ່າ:
“ນີ້ແມ່ນກາລະໂອກາດເພື່ອໂຄສະນາຮັບພາບກ່ຽວກັບປະເທດຊາດ, ປະຊາຊົນ, ບັນດາຄວາມສາມາດບົ່ມຊ້ອນ, ທ່າແຮງຂອງແຂວງແຄ໋ງຮ່ວາ ສຳລັບ 21 ພື້ນຖານເສດຖະກິດໃຫຍ່ໃນໂລກ ແລະ ກັບເພື່ອນມິດສາກົນ. ແຂວງ ກໍ່ໄດ້ສະເໜີໃຫ້ຄະນະເລຂາ APEC ຊ່ວຍການນຳແຂວງ ຈັດຕັ້ງບັນດາການພົບປະ 2 ຝ່າຍກັບບັນດາພື້ນຖານເສດຖະກິດໂລກໃນໂອກາດຈັດກອງປະຊຸມນີ້.”
ໃນເວລາດຳເນີນກອງປະຊຸມ, ແຂວງແຄ໋ງຮ່ວາ ໄດ້ຈັດຕັ້ງການເຄື່ອນໄຫວຫຼາຍຢ່າງເພື່ອແນໃສ່ແນະນຳຄວາມງາມດ້ານວັດທະນະທຳ, ທຳມະຊາດຂອງແຂວງກໍ່ຄືຂອງບັນດາແຂວງທາງທິດໃຕ້ພາກກາງ. ງານວາງສະແດງຮູບຖ່າຍສີລະປະດ້ວຍຫົວຂໍ້ວ່າ: “ຄວາມງາມຂອງເຂດດິນແດນ, ຊາວແຄ໋ງຮ່ວາ ແລະ ບັນດາແຂວງທາງທິດໃຕ້ພາກກາງ” ໄດ້ຈັດຕັ້ງຢູ່ໂຮງແຮມ 5 ແຫ່ງ, ເຊິ່ງເປັນສະຖານທີ່ຈັດຕັ້ງບັນດາໂຄງການດຳເນີນງານກອງປະຊຸມ SOM 1 ຄຽງຂ້າງນັ້ນທີ່ບັນດາງານລ້ຽງເຈົ້າໜ້າທີ່ ຂັ້ນສູງເຂົ້າຮ່ວມກອງປະຊຸມ ຄະນະຟ້ອນລຳທຳເພງ ຫາຍດັງ ຂອງແຂວງ ແຄ໋ງຮ່ວາ ໄດ້ສະແດງບັນດາລາຍການສິລະປະ, ສະແດງບັນດາດົນຕີພື້ນເມືອງຄື: ພິນຫີນ, ພິນສາຍດຽວ, ເປົ່າປີ… ສະແດງ ບັນດາທຳນອງເພງພື້ນເມືອງຂອງ 3 ພາກ: ພາກເໜືອ - ພາກກາງ - ພາກໃຕ້, ບັນດາລາຍການຟ້ອນທີ່ເປັນຂອງບັນດາເຜົ່າເຂດໄຕງວຽນ ແລະ ຊົນເຜົ່າຈຳ ຢູ່ແຄມທະເລພາກກາງ ຫວຽດນາມ. ໃນຊຸມວັນຈັດກອງປະຊຸມ, ບັນດາຜູ້ແທນ, ແຂກທ່ອງທ່ຽວສາກົນຍັງມີໂອກາດໄດ້ໄປຢ້ຽມຊົມທັດສະນີຍະພາບ, ທິດທັດທຳມະຊາດຂອງອ່າວ ຍາຈາງ, ເຊິ່ງເປັນໜຶ່ງ ໃນຈຳນວນອ່າວທະເລທີ່ສວຍງາມທີ່ສຸດໃນໂລກ 20 ແຫ່ງ, ຢ້ຽມຢາມບັນດາໝູ່ບ້ານຫັດຖະກຳ, ຊື້ເຄື່ອງຂອງ, ບັນດາຜະລິດຕະພັນວັດທະນະທຳການທ່ອງທ່ຽວທີ່ເປັນເອກະລັກສະເພາະຂອງແຂວງແຄ໋ງຮ່ວາ. ໃນປະຫວັດສາດ, ຍາຈາງ - ແຄ໋ງຮ່ວາ ແມ່ນເຂດດິນປູກຕົ້ນໄມ້ເກດສະໜາທີ່ລືຊື່, ຍ້ອນເຫດນັ້ນ, ຄະນະກຳມະການປະຊາຊົນແຂວງແຄ໋ງຮ່ວາ ໄດ້ຄັດເລືອກເອົາຂອງຂວັນທີ່ລະນຶກເພື່ອມອບໃຫ້ບັນດາຜູ້ແທນຂັ້ນຮອງລັດຖະມົນຕີເຂົ້າຮ່ວມກອງປະຊຸມ, ນັ້ນແມ່ນວີເຮັດດ້ວຍໄມ້ເກດສະໜາທີ່ໄດ້ຮັບການຜະລິດຢ່າງສວຍງາມ. ທ່ານ ຫງວຽນວັນເຕື໋ອງຜູ້ອຳນວຍການບໍລິສັດໄມ້ເກດສະໜາແຄ໋ງຮ່ວາ, ໃຫ້ຮູ້ວ່າ:
“ດ້ວຍສີມືອັນຄ່ອງແຄ້ວ, ບັນດານາຍຊ່າງຂອງພວກເຮົາໄດ້ຜະລິດວີດ້ວຍໄມ້ເກດສະໜາ. ນີ້ບໍ່ພຽງແມ່ນແມ່ນເຄື່ອງໃຊ້ສອຍອັນສະໜິດກັບຊາວ ຫວຽດນາມ ເທົ່ານັ້ນ ຫາກຍັງເປັນຜະລິດຕະພັນສີລະປະເພື່ອສົ່ງເຖິງບັນດາຜູ້ແທນ ເພື່ອສະແດງໃຫ້ເຫັນຄວາມຮັກແພງແຂກຄົນ, ນຳ້ໃຈມະນຸດຢູ່ສະຖານທີ່ໂດຍທຳມະຊາດໄດ້ດົນບັນດານໃຫ້ຄວາມງາມແບບມະຫັດສະຈັນນີ້.”
ທະເລຍາຈາງ
|
ບັນດາການເຄື່ອນໄຫວວັດທະນະທຳສິລະປະທີ່ໄດ້ຈັດຕັ້ງໃນໂອກາດດຳເນີນກອງປະຊຸມ APEC ຍັງໄດ້ດຶງດູດແຂກທ່ອງທ່ຽວໄປມາຢ້ຽມຢາມ ຍາຈາງ - ແຄ໋ງຮ່ວາ ໃນໂອກາດນີ້ເປັນຈຳນວນຫຼວງຫຼາຍ. ເອື້ອຍ ທູເຮືອງ, ຜູ້ນຳທ່ຽວຢູ່ຍາຈາງ, ໃຫ້ຮູ້ວ່າ:
“ນີ້ແມ່ນໂອກາດດຶງດູດແຂກທ່ອງທ່ຽຍວມາຢ້ຽມຢາມດ້ວຍບັນດາທ່າແຮງກ່ຽວກັບບັນດາຄວາມງາມຕາມທຳມະຊາດ, ການທ່ອງທ່ຽວທະເລທີ່ຈັບອົບຈັບໃຈແຂກທ່ອງທ່ຽວທຸກໆຄົນຢູ່ໃນໂລກຢ່າງແທ້ຈິງ. ແຂກທ່ອງທ່ຽວທັງໄດ້ໄປຢ້ຽມຊົມທ່ອງທ່ຽວ ທັງໄດ້ຊອກຮູ້ສິ່ງທີ່ປະທັບໃຈກ່ຽວກັບວັດທະນະທຳ ຫວຽດນາມ ອີກດ້ວຍ.”
ຍາຈາງ ແມ່ນສະຖານທີ່ດຶງດູດແຂກທ່ອງທ່ຽວທີ່ມາຈາກຫຼາຍປະເທດໃນໂລກເປັນຈຳນວນຫຼວງຫຼາຍ. ການຈັດຕັ້ງບັນດາເຫດການໂຄສະນາກ່ຽວກັບການຮ່ວມມືດ້ານເສດຖະກິດ, ຍູ້ແຮງສົ່ງເສີມການລົງທຶນ, ບັນດາລາຍການວັດທະນະທຳທ່ອງທ່ຽວໃນໂອກາດດຳເນີນກອງປະຊຸມ APEC ຄັ້ງນີ້ແນ່ນແນວ່າຈະໄດ້ສ້າງຄວາມປະທັບໃຈອັນດີງາມໃຫ້ບັນດາຜູ້ແທນ ແລະ ແຂກທ່ອງທ່ຽວກ່ຽວກັບຮູບພາບປະເທດຊາດ, ປະຊາຊົນຊາວ ຫວຽດນາມ, ກ່ຽວກັບເຂດດິນແດນ ແຄ໋ງຮ່ວາ ທີ່ເຕັມໄປດ້ວຍຄວາມສາມາດບົ່ມຊ້ອນແຫ່ງການພັດທະນາ ແລະ ຮັກແພງແຂກຄົນ.