(vovworld)- ດ້ວຍຜົນສຳເລັດກ່ຽວກັບປະສິດທິຜົນ ແລະ ຄຸນນະພາບໃນການພົວພັນແລກປ່ຽນດ້ານການຄ້າໃນຕະຫລອດ 13 ປີຜ່ານມາ, ງານຕະຫລາດນັດການຄ້າສາກົນນະຄອນ ໂຮ່ຈິມີນ ຄັ້ງທີ 14 (VietNam Expo 2016 – Hochiminh City) ສືບຕໍ່ແມ່ນຈຸດນັດພົບສຳຄັນ, ແມ່ນຂົວເຊື່ອມຕໍ່ດ້ານການຄ້າທີ່ສະຫງວນໃຫ້ແກ່ບັນດາວິສາຫະກິດ ຫວຽດນາມ ແລະ ສາກົນ ເພື່ອພົບປະ, ແລກປ່ຽນການຮ່ວມມືດຳເນີນທຸລະກິດ. ມີ ວິສາຫະກິດ 520 ກວ່າແຫ່ງທີ່ ເຂົ້າຮ່ວມງານຕະຫລາດນັດຄັ້ງນີ້ ໄດ້ມີກາລະໂອກາດຊຸກຍູ້ການພັດທະນາດ້ານການຄ້າ ແລະ ການລົງທຶນຢູ່ຕະຫລາດຫວຽດນາມ ທີ່ເຕັມໄປດ້ວຍຄວາມສາມາດບົ່ມຊ້ອນ. ບົດຂຽນຂອງນັກຂ່າວ ເຮືອງຈາ.
 |
ໃນເນື້ອທີ່ເກືອບ 10.000 ຕາແມັດ, ມີຮ້ານວາງສະແດງກວ່າ 600 ຮ້ານຂອງກວ່າ 20 ປະເທດ ແລະ ເຂດແຄ້ວນໄດ້ຮັບການຈັດວາງຢ່າງມີວິທະຍາສາດ ແລະ ຈັບອົກຈັບໃຈ. ຢູ່ທາງເຂົ້າເຂດວາງສະແດງແມ່ນສະຫງວນໃຫ້ແກ່ບັນດາວິສາຫະກິດຫວຽດນາມ ໂດຍວາງສະແດງບັນດາຜະລິດຕະພັນທີ່ເປັນມູນເຊື້ອຄື: ເຄື່ອງສິລະປະຫັດຖະກຳ, ອາຫານ, ເຄື່ອງດືມ, ອຸດສາຫະກຳຫນູນຊ່ວຍ, ໂທລະຄົມມະນາຄົມ… ໃນນັ້ນ ມີບັນດາວິສາຫະກິດທີ່ມີຊື່ສຽງຢູ່ຕະຫລາດຫວຽດນາມ ຄື: ເຂົ້າ ຫນົມຖົ່ວຂຽວຫາຍເຢືອງ , ບໍລິສັດໂທລະຄົມມະນາຄົມ Mobifone, ເຄື່ອງເຟີນີເຈີ ດົງກີ້ ຕະຫລອດຮອດບັນດາບໍລິສັດໃຫມ່ໃນຕະຫລາດຄື: ທູບຫວຽດ, ຫົວທຽມດຳ ລີງດານ ລ້ວນແຕ່ເຂົ້າຮ່ວມງານຕະຫລາດນັດ ແລະ ປາດຖະຫນາຢາກຊອກຫາຄູ່ຮ່ວມມືດຳເນີນທຸລະກິດຫລາຍແຫ່ງຕື່ມອີກ.
ຮ້ານຂາຍຜ້າ batick ຂອງອິນໂດເນເຊຍ
|
ໃນງານຕະຫລາດນັດປີນີ້, ອິນໂດເນເຊຍ ໄດ້ຮັບເລືອກເຟັ້ນແມ່ນປະເທດກິຕິມະສັກ ຍ້ອນມີຈຳນວນວິສາຫະກິດເຂົ້າຮ່ວມຫລາຍສຸດນັບແຕ່ກ່ອນມາຮອດປະຈຸບັນ. 66 ຮ້ານວາງສະແດງຂອງ ອິນໂດເນເຊຍ ຖືກຕັ້ງຢູ່ເຂດໃຈກາງ ແລະ ໄດ້ຮັບການປະດັບປະດາດ້ວຍສີແດງທີ່ສວຍງາມ, ໃນນັ້ນມີບັນດາຂະແຫນງສິນຄ້າຄື: ວັດສະດຸກໍ່ສ້າງ, ເຄື່ອງກິນດື່ມ, ຫົວອາຫານສັດ, ຜ້າ batik, ອາສັງຫາລິມະຊັບ… ທ່ານ Ridwan Hassan, ຜູ້ໃຫ້ຄຳປຶກສາຂັ້ນສູງກ່ຽວກັບເສດຖະກິດ ແລະ ການທູດ, ກະຊວງການຕ່າງປະເທດ ອິນໂດເນເຊຍ ແບ່ງປັນວ່າ:
“ອິນໂດເນເຊຍ ແລະ ຫວຽດນາມ ແມ່ນສອງປະເທດສະມາຊິກຂອງອາຊຽນ ທີ່ມີຕະຫລາດໃຫຍ່ ແລະ ມີການພົວພັນດ້ານເສດຖະກິດເປັນຢ່າງດີ. ຫວຽດນາມ ແມ່ນຕະຫລາດມີຄວາມສາມາດບົ່ມຊ້ອນຢູ່ພາກພື້ນ. ສະນັ້ນ ພວກຂ້າພະເຈົ້າເຂົ້າຮ່ວມ VietNam Expo ຄືດັ່ງປະເທດກິຕິມະສັກ. ຈຳນວນວິສາຫະກິດ ອິນໂດເນເຊຍ 66 ແຫ່ງເຂົ້າຮ່ວມງານຕະຫລາດນັດ ເປັນການສະແດງໃຫ້ເຫັນວ່າ ອິນໂດເນເຊຍ ມີຄວາມສົນໃຈເຖິງຕະຫລາດຫວຽດນາມ. ວົງເງິນການຄ້າ ອິນໂດເນເຊຍ - ຫວຽດນາມ ບັນລຸກວ່າ 4 ຕື້ໂດລາສະຫະລັດ, ພວກເຮົາຫວັງວ່າ ວົງເງິນການຄ້າລະຫວ່າງສອງປະເທດຈະນັບມື້ນັບເຕີບໂຕ, ພິເສດແມ່ນຂະແຫນງສິນໃນນ້ຳ.”
ທ່ານນາງ Hartini, ບໍລິສັດ Uni atik ມາຈາກນະຄອນ Solo ປະເທດອິນໂດເນເຊຍ ໄດ້ນຳເອົາຜະລິດຈະພັນຫລາຍຢ່າງຈາກ ຜ້າ batik ຄື: ໂສ້ງເສື້ອ, ຜ້າພັນຄໍ, ຜ້າປູໂຕະ, ເຄື່ອງປະດັບປະດາ ມາແນະນຳໃນງານຕະຫລາດນີ້. ກົງກັນຂ້າມກັບຄວາມຄິດໃນເບື້ອງຕົ້ນວ່າ ຜ້າ batik ຍາກທີ່ຈະຂາຍໄດ້ຢູ່ຫວຽດນາມ ຍ້ອນມີລວດລາຍຫລາຍ, ແຕ່ເມື່ອເຂົ້າຮ່ວມງານຕະຫລາດນັ້ນຄັ້ງນີ້ ທ່ານນາງເຫັນໄດ້ຄວາມສາມາດບົ່ມຊ້ອນຂອງຕະຫລາດຫວຽດນາມ.
“ນີ້ເປັນຄັ້ງທຳອິດຂ້າພະເຈົ້າເຂົ້າຮ່ວມງານຕະຫລາດນັດຢູ່ຫວຽດນາມ. ໂຊກດີຫລາຍ ຜະລິດຕະພັນຜ້າ batik ຊື່ງຂ້າພະເຈົ້ານຳມາຫວຽດນາມ ໄດ້ຮັບຄວາມສົນໃຈຈາກປະຊາຊົນຫວຽດນາມເປັນຈຳນວນຫລວງຫລາຍ. ສະນັ້ນ ໄລຍະຈະມາເຖິງ ຂ້າພະເຈົ້າຈະສົ່ງອອກຜະລິດຕະພັນຜ້າ batik ມາຫວຽດນາມ ຫລາຍກວ່າ. ຕະຫລາດຫວຽດາມ ແມ່ນຕະຫລາດທີ່ມີຄວາມສາມາດບົ່ມຊ້ອນທີ່ສຸດ.”
ຄຽງຂ້າງເຂດວາງສະແດງຂອງອິນໂດເນເຊຍ ແມ່ນບັນດາຮ້ານວາງສະແດງຂອງໄຕ້ຫວັນ(ຈີນ), ເນປານ ແລະ ສເກົາຫລີ. ເປັນຫນ້າສົນໃຈ ແມ່ນບັນດາຮ້ານວາງສະແດງສິນຄ້າຂອງ ສເກົາຫລີ ຍາມໃດກໍດຶງດູດຜູ້ມາຊົມເປັນຈຳນວນຫລວງຫລາຍ ດ້ວຍບັນດາຜະລິດຕະພັນຄື: ເຄື່ອງສຳອາງ, ອາຫານເສີມ, ເຄື່ອງຈັກຜະລິດແກຼມ.. ທ່ານ Ki Choon Lee, ຜູ້ອຳນວຍການ ບໍລິສັດ Bars Korea ຜະລິດສະເພາະບັນດາອຸປະກອນຜະລິດແກຼມ ໄດ້ແບ່ງປັນວ່າ:
“ປະຈຸບັນ ຢູ່ ໄຊງ່ອນ ມີເຄື່ອງຈັກຜະລິດແກຼມ 7 ເຄື່ອງ ໂດຍພວກຂ້າພະເຈົ້າຜະລິດ ພວມໄດ້ນຳໃຊ້ຢູ່ບັນດາຮ້ານກາເຟ. ຜ່ານງານຕະຫລາດນັດຄັ້ງນີ້ ຂ້າພະເຈົ້າຢາກຊອກຫາລູກຄ້າ ແລະ ໂຄສະນາຢ່າງກວ້າງຂວາງໃຫ້ແກ່ປະຊາຊົນກ່ຽວກັບຜະລິດຕະພັນຈາກເຄື່ອງຈັກຜະລິດແກຼມນີ້. ຜະລິດຕະພັນຂອງພວກຂ້າພະເຈົ້າ ປະຢັດໄຟຟ້າ ແລະ ເປັນມິດກັບສິ່ງແວດລ້ອມ. ເມື່ອທຽບໃສ່ງານຕະຫລາດນັດໃນປີກາຍ, ຈຳນວນລູກຄ້າຊື້ຜະລິດຕະພັນຂອງພວກຂ້າພະເຈົ້າໄດ້ເພີ່ມຂຶ້ນ 200% ແລະ ຍັງມີໃບສັ່ງຊື້ສິນຄ້າຫລາຍສະບັບຍັງບໍ່ທັນຕອບສະຫນອງໄດ້.”
ຈຸດພົ້ນເດັ່ນຂອງ VietNam Expo 2016 ຢູ່ ນະຄອນ ໂຮ່ຈິມີນ ແມ່ນເຂດວາງສະແດງຫົວເລື່ອງເປັນມິດກັບສິ່ງແວດລ້ອມ. ໃນນັ້ນ ວາງສະແດງເຕັກໂນໂລຊີມີທ່າແຮງຂອງໄຕ້ຫວັນຄື: ພະລັງງານຜະລິດຄືນໃຫມ່, ກຳຈັດນ້ຳ, ຄຸ້ມຄອງສິ່ງແວດລ້ອມ, ວັດສະດຸກໍ່ສ້າງຂຽວ, ຜະລິດແກ້ວຄືນໃຫມ່. ຄຽງຄູ່ກັນນັ້ນ, ບັນດາຜົນງານດ້ານເຕັກໂນໂລຊີຂອງຫວຽດນາມ ແລະ ເຕັກໂນໂລຊີພົ້ນເດັ່ນຂອງ ສເຊັກໂກ ຈຳນວນຫນຶ່ງ ກໍໄດ້ຮັບການແນະນຳໃນງານຕະຫລາດນັດຄັ້ງນີ້. ທ່ານ ຫງວຽນຄັກລ້ວນ, ຜູ້ອຳນວຍການໃຫຍ່ Vinexad, ຫົວຫນ່ວຍຈັດຕັ້ງ VietNam Expo 2016 ຢູ່ ນະຄອນ ໂຮ່ຈິມີນ ໃຫ້ຮູ້ວ່າ:
“ໃນສະພາບປະຈຸບັນ, ການເຕີບໂຕຂຽວ ແມ່ນຮູບແບບພັດທະນາໃຫມ່ ເພື່ອແນໃສ່ຍົກສູງຄຸນນະພາບ, ປ່ຽນແປງອົງປະກອບການຜະລິດ ແລະ ການໃຊ້ສອຍຕາມທິດໝັ້ນຄົງ ກໍຄືປັບປຸງຊີວິດການເປັນຢູ່ຂອງປະຊາຊົນ, ຫລຸດຜ່ອນອາຍແກສເຮືອນແກ້ວ ພ້ອມທັງຍົກສູງຄວາມສາມາດຮັບມືກັບການປ່ຽນແປງຂອງດິນຟ້າອາກາດ. ນີ້ແມ່ນສາຍເຫດເຂດຫົວເລື່ອງສະເພາກ່ຽວກັບເຕັກໂນໂລຊີເປັນມິດກັບສິ່ງແວດລ້ອມໄດ້ດຶງດູດແຂກເຂົ້າຊົມເປັນຈຳນວນຫລວງຫລາຍ. ສິ່ງດັ່ງກ່າວໄດ້ຕອບສະຫນອງຍຸດທະສາດແຫ່ງຊາດກ່ຽວກັບການເຕີບໂຕຂຽວ ແລະ ແຜນການດຳເນີນງານແຫ່ງຊາດກ່ຽວກັບການເຕີບໂຕຂຽວ, ແມ່ນຂົວຕໍ່ການຄົ້ນຄ້ວາ ແລະ ການໝູນໃຊ້ເຕັກໂນໂລຊີລະຫວ່າງຕະຫລາດພາຍໃນປະເທດ ແລະ ໂລກ.”
ໃນຂອບເຂດງານຕະຫລາດນັດຍັງມີເຂດວາງສະແດງຫົວເລື່ອງສະເພາະກ່ຽວກັບເຕັກໂນໂລຊີເປັນມິດກັບສິ່ງແວດລ້ອມ ປີ 2016 ແລະ ງານວາງສະແດງ ໂລຫະທາດເພື່ອຜະລິດເຄື່ອງໃຊ້ ແລະ ອຸປະກອນມືຖື.
ໂດຍໄດ້ຮັບການຈັດຕັ້ງ ຈາກ VINEXAD ຊື່ງແມ່ນຫົວຫນ່ວຍ ທີ່ມີ ປະສົບການໃນຂົງເຂດງານຕະຫລາດນັດ- ງານວາງສະແດງ - ຈັດຕັ້ງເຫດການ ຢູ່ຫວຽດນາມ ກວ່າ 40 ປີ, ດ້ວຍຄຳໝັ້ນສັນຍາ “ ມານະພະຍາຍາມຢ່າງບໍ່ຢຸດຢັ້ງເພື່ອສ້າງຄຸນຄ່າແທ້ຈິງໃຫ້ແກ່ວິສາຫະກິດ”, VietNam Expo 2016 ຢູ່ ນະຄອນ ໂຮ່ຈິມີນ ແນ່ນອນວ່າຈະແມ່ນຊ່ອງພົວພັນແລກປ່ຽນການຄ້າຢ່າງມີປະສິດທິຜົນທີ່ຂາດບໍ່ໄດ້ສຳລັບວິສາຫະກິດ.