(vovworld)- ວັນທີ 31/12/2015 ເປັນຂີດໝາຍສຳຄັນໃນປະຫວັດສາດຂອງ ອາຊຽນ. ເພື່ອຂ່ຳນັບຮັບຕ້ອນເຫດການນີ້ ມີການເຄືີ່ອນໄຫວຫລາຍຢ່າງ ໄດ້ ແລະ ພວມດຳເນີນໄປຫວ່າງແລ້ວນີ້ ພິເສດ ແມ່ນບັນດາການເຄື່ອນໄຫວພົບປະແລກປ່ຽນວັດທະນະທຳສິລະປະ. ໃນຕອນຄ່ຳວັນທີ 22/12 ຜ່ານມາ ຢູ່ ໂຮງລະຄອນໃຫຍ່ ຮ່າໂນ້ຍ, ງານລາຕີ
“ຊາຍຄາລວມ ອາຊຽນ” ໂດຍມີການເຂົ້າຮ່ວມຂອງບັນດານັກສິລະປິນ, ນັກສະແດງມາຈາກບັນດາປະເທດໃນພາກພື້ນ ອາຊຽນ ອັນໄດ້ນຳມາເຊິ່ງການ ພົບປະແລກປ່ຽນຢ່າງມີຊີວິດຊີວາ, ເຕັມໄປດ້ວຍສີສັນວັດທະນະທຳຂອງແຕ່ລະປະເທດ ແລະ ຮັດແຫນ້ນນ້ຳໃຈມິດຕະພາບ.
ລາຍການສິລະປະໃນງານລາຕີ
ພາບ:hanoitv.vn
|
ເວລາ 8 ໂມງຄ່ຳ, ເວທີສະແດງໄດ້ກຽມພ້ອມທຸກສິ່ງທຸກຢ່າງໃຫ້ລາຍການສະແດງ. ຢູ່ກາງເວທີ, ມີຮູບພາບກ່ຽວກັບສັນຍາລັກຂອງກຸ່ມ ອາຊຽນ, ຢູ້ອ້ອມຂ້າງແມ່ນທຸງຊາດບັນດາປະເທດອາຊຽນ ໄດ້ແຜ່ພາບຜ່ານຫນ້າຈໍຂະຫນາດໃຫຍ່. ຜູ້ຊົມ ແລະ ແຂກຖືກເຊີນ ໄດ້ເຂົ້າມານັ່ງເຕັມ ແລະ ເມື່ອເຖິງເວລາສະແດງກໍມີສຽງດົນຕີ ພ້ອມດ້ວຍບົດເພງ “ຫວຽດນາມ ບ້ານເກີດເມືອງນອນຂອງຂ້ອຍ” ໄດ້ດັ່ງຂຶ້ນເພື່ອເປັນການເປີດສາກ.
ບົດເພງ: ເຊີນເພື່ອນມາຢ້ຽມຢາມບ້ານເກີດເມືອງນອນຂອງພວກຂ້າພະເຈົ້າ” ໂດຍ ນັກຮ້ອງ ຈ້ອງເຕີນ ສະແດງ ໄດ້ສ້າງຄວາມປະທັບໃຈຕໍ່ຜູ້ຊົມ. ໃນ 9 ລາຍການຂອງຄະນະສິລະປະກອນຫວຽດນາມ ນຳມາສະແດງ, ສ່ວນຫລາຍແມ່ນບັນດາບົດເພງ, ວາດຟ້ອນທີ່ເຂັ້ມຂົ້ນໄປດ້ວຍມູນເຊື້ອວັດທະນະທຳຂອງຫວຽດນາມຄື: ບົດເພງພື້ນເມືອງຂອງຫວຽດນາມ ໂດຍກຸ່ມນັກຮ້ອງ ທັງລອງ ສະແດງ, ສຽງພິນສາຍດຽວ ໂດຍ ຈ້ອງເຕີນ ສະແດງ, ບົດເພງ “ໝາກຫົວໃຈຫວຽດນາມ”. ນັກຮ້ອງ ຢ້ຽວຖາວ, ວົງດົນຕີ ທັງລອງ ແບ່ງປັນ ແບ່ງປັນວ່າ:
“ປະຊາຄົມ ອາຊຽນ ໄດ້ຮັບການສ້າງຕັ້ງຂຶ້ນ, ເວລານັ້ນ ບັນດາຈຸດວັດທະນະທຳທີ່ເປັນເອກະລັກສະເພາະຂອງບັນດາປະເທດອາຊຽນຈະ ມີຫລາຍໂອກາດເພື່ອນຳເອົາໂຄສະນາ, ພົວພັນແລກປ່ຽນ. ນ້ອງຫວັງວ່າ ບັນດາປະເພດສິລະປະພື້ນເມືອງຂອງຫວຽດນາມ ຈະມີໂອກາດໄດ້ແນະນຳໃຫ້ບັນດາເພື່ອນມິດສາກົນ ແລະ ເພື່ອນມິດໃນບັນດາປະເທດ ອາຊຽນ ເພື່ອໃຫ້ພວກເພື່ອນສາມາດເຂົ້າໃຈກ່ຽວກັບວັດທະນະທຳທີ່ເປັນມູນເຊື້ອຂອງຫວຽດນາມກວ່າ.”
ສຳລັບ ກອງສິລະປະກອນ ກຳປູເຈຍ, ເຂົາເຈົ້າໄດ້ນຳເອົາວາດຟ້ອນ Kon Trem ໂດຍບັນດານັກສຶກສາ ກຳປູເຈຍ ພວມດຳລົງຊີວິດ ແລະຮ່ຳຮຽນ ຢູ່ ຮ່າໂນ້ຍ ສະແດງ. ບັນດາຄູບ່າວສາວຍິງຊາຍ ໃນຊຸດອາພອນພື້ນເມືອງຂອງກຳປູເຈຍ ຟ້ອນລຳທຳເພງ ຕາມສຽງດົນຕີທີ່ມ່ວນຊື່ນພ້ອມດ້ວຍບັນດາທ່າຟ້ອນທີ່ອ່ອນຊອ້ຍເຮັດໃຫ້ຜູ້ຊົມມີຄວາມປະທັບໃຈທີ່ສຸດ. Noun Sothea, ນັກສິລະປິນເຂົ້າຮ່ວມລາຍການໃຫ້ຮູ້ວ່າ:
“ຊາວກຳປູເຈຍ ທຸກຄົນ ລ້ວນແຕ່ຮູ້ຈັກ ຟ້ອນ Kon Trem ແລະ ວາດຟ້ອນນີ້ເຄີຍໄດ້ນຳເອົາສະແດງໃນໂອກາດບຸນປະເພນີຂອງຊາວ ກຳປູເຈຍ. ວາດຟ້ອນນີ້ ໄດ້ສະແດງໃຫ້ເຫັນຄວາມສະຫນິດສະຫນົມ, ໃຈດີ ແລະ ສຸດອົກສຸດໃຈຂອງປະຊາຊົນ ກຳປູເຈຍ.”
ນັກສິລະປິນບັນດາປະເທດອາຊຽນ
ພາບ:hanoitv.vn
|
ເຖິງວ່າ ບໍ່ໄດ້ນຳເອົາວາດຟ້ອນທີ່ເປັນເອກະລັກສະເພາະຂອງໄທມາສະແດງໃນ ງານລາຕີ ກໍຕາມ, ແຕ່ດ້ວຍສຽງຂັບຮ້ອງທີ່ອ່ອນຊອນ ເຕັມໄປດ້ວຍຄວາມປະທັບໃຈຂອງນັກສິລະປິນໄທ ນັດທະກອນ ຄອງໃຫຍ່ ຜ່ານບົດເພງ “ເດືອນເພງ” ແລະ “ແຜ່ນດິນຂອງເຣົາ" ພ້ອມກັບພາບພົດກ່ຽວກັບປະເທດຊາດໄທ ໄດ້ສາຍຢູ່ຫນ້າຈໍໃຫຍ່, ເຮັດໃຫ້ຜູ້ຊົມທັງໝົດມີຄວາມເຂົ້າໃຈຕື່ມອີກກ່ຽວກັບຄວາມງາມຂອງປະເທດໄທ ແລະ ຊາວໄທ. ນັກຮ້ອງ ນັດທະກອນ ຄອງໃຫຍ່ ແບ່ງປັນວ່າ:
ສຽງນັກຮ້ອງນັດທະກອນ
ສ່ວນ ວາດຟ້ອນ Lenggang Nyai ໂດຍກອງສິລະປະກອນ ອິນໂດເນເຊຍສະແດງ ໄດ້ຮັບສຽງຕົບມືຊົມເຊີຍຢ່າງຟົດຟື້ນຈາກຜູ້ຊົມ. ນິີ້ແມ່ນວາດຟ້ອນຂອງ ຈາກາຕາ ນະຄອນຫລວງ ຂອງອິນໂດເນເຊຍ ຊື່ງແມ່ນສະຖານທີ່ ມີ ຊົນເຜົ່າ Betawi ດຳລົງຊີວິດ. ພິເສດ ວາດຟ້ອນນີ້ຍັງມີການປະສົມປະສານຂອງປະເພດກິລາ Pencat Silat ຊື່ງແມ່ນມວຍສິລະປະທີ່ເປັນມູນເຊື້ອຂອງ ອິນໂດເນເຊຍ. ນັກສິລະປິນ Ayu Kartika ມາຈາກອິນໂດເນເຊຍ ໃຫ້ຮູ້ວ່າ:
“ນອກຈາກວາດຟ້ອນທີ່ເປັນມູນເຊື້ອຂອງ ອິນໂດເນເຊຍ, ຂ້າພະເຈົ້າປາດຖະຫນາຢາກມີກາລະໂອກາດແນະນຳບັນດາຈຸດວັດທະນະທຳອື່ນທີ່ເປັນເອກະລັກສະເພາະຂອງ ອິນໂດເນເຊຍຄື: ເພງພື້ນເມືອງ, ເຄື່ອງດົນຕີທີ່ເປັນມູນເຊື້ອ ມາແນະນຳໃຫ້ຊາວຮ່າໂນ້ຍ. ປະຈຸບັນ ຊາວຮ່າໂນ້ຍ ບໍ່ທັນຮູ້ຈັກປານໃດກ່ຽວກັບປະເທດຊາດ ກໍຄື ວັດທະນະທຳ ອິນໂດເນເຊຍ. ສະນັ້ນ ຂ້າພະເຈົ້າຄິດວ່າ ລາຍການພົບປະແລກປ່ຽນຄືມື້ນີ້ຄວນສືບຕໍ່ຈັດຕັ້ງຂຶ້ນ.”
ທ່ານນາງ ສາຍຊອນ ໄຊປັດຢາ ມາຈາກ ໄທ ໃຫ້ຮູ້ວ່າ: ງານລາຕີ ນີ້ ແມ່ນຈັບອົກຈັບໃຈ ແລະ ຄວາມຮູ້ສຶກບໍ່ອາດຫລົງລືມໄດ້.
ສຽງທ່ານນາງສາຍຊອນ
ງານລາຕີ ຍັງມີການເຂົ້າຮ່ວມຂອງກອງສິລະປະກອນ ມາຈາກ 3 ປະເທດອື່ນໃນ ອາຊຽນຄື: ລາວ, ບຣູໄນ ແລະ ມາເລເຊຍ. ແຕ່ລະລາຍການສິລະປະລ້ວນແຕ່ມີຈຸດທີ່ເປັນເອກະລັກສະເພາະຂອງແຕ່ລະປະເທດສະມາຊິກ ອາຊຽນ ແລະ ໄດ້ຮັບການຊົມເຊີຍຈາກຜູ້ຊົມນະຄອນຫລວງຮ່າໂນ້ຍ. ເພື່ອນ ທູອວຽນ ໃຫ້ຮູ້ວ່າ:
“ນີ້ແມ່ນລາຍການສິລະປະຈັບອົກຈັບໃຈທີ່ສຸດ. ມີຫລາຍລາຍການສິລະປະພື້ນເມືອງທີ່ເປັນເອກະລັກສະເພາະຂອງບັນດາປະເທດໃນອາຊຽນ. ນ້ອງມັກລາຍການ “ສຽງພິນສາຍດຽວ” ຂອງຫວຽດນາມ ໂດຍ ນັກຮ້ອງ ຈ້ອງເຕີນ ສະແດງ, ນອກນັ້ນ ລາຍການຟ້ອນຂອງນັກສິລະປິນລາວ ນ້ອງກໍນິຍົມຊົມຊອບທີ່ສຸດ.”
ງານລາຕີ ຊາຍຄາ ອາຊຽນ ອັດລົງດ້ວຍ “ບົດເພງກ່ຽວກັບອາຊຽນ” ໂດຍນັກສິລະປິນບັນດາປະເທດ ອາຊຽນ ສະແດງ. ຮູບພາບບັນດານັກສິລະປິນໃນຊຸດອາພອນພື້ນເມືອງ, ມືຈັບທຸງຊາດຂອງ 10 ປະເທດ ອາຊຽນ ໄດ້ສ້າງເປັນຮູບພາບກ່ຽວກັບກຸ່ມກ້ອນມະຫາສາມັກຄີ ອາຊຽນ, ເປັນການຢັ້ງຢືນ ອາຊຽນ ຈະສືບຕໍ່ເປັນກຸ່ມພັນທະມິດທີ່ໝັ້ນຄົງ, ສັນຕິພາບ ແລະ ສະຖຽນລະພາບໃນປະຈຸບັນ ແລະ ໃນອະນາຄົດ.