(vovworld)- ຫວຽດນາມ ແມ່ນປະເທດສະຫນິດສະຫນົມ, ປະຊາຊົນຮັກແພງແຂກຄົນ, ມາເລເຊຍ ແມ່ນປະເທດມີງານບຸນຕ່າງໆເຕັມໄປດ້ວຍສີສັນຊາດ, ປະເທດໄທ ດ້ວຍສະຖານທີ່ທ່ອງທ່ຽວລືຊື່ຫລາຍແຫ່ງ ຫລື ປະເທດ ອິນໂດເນເຊຍ ມີພື້ນຖານວັດທະນະທຳທີ່ເປັນເອກະລັກສະເພາະ… ນັ້ນແມ່ນສິ່ງທີ່ທ່ານສາມາດພົບເຫັນເມື່ອມາຢ້ຽມຊົມງານວາງສະແດງ “ອາຊຽນ 48 ປີແຫ່ງສັນຕິພາບ ແລະ ພັດທະນາ, 20 ປີທີ່ ຫວຽດນາມ ເຂົ້າເປັນສະມາຊິກ ອາຊຽນ” ໂດຍສະຫະພັນບັນດາອົງການຈັດຕັ້ງມິດຕະພາບ ນະຄອນ ຮ່າໂນ້ຍ ສົມທົບກັບສະຖານທູດບັນດາປະເທດ ອາຊຽນ ຢູ່ ຮ່າໂນ້ຍ ຈັດຂຶ້ນ ແຕ່ວັນທີ 8 – 15/9/2015 ຢູ່ ຮ່າໂນ້ຍ.
ພິທີໄຂງານວາງສະແດງອາຊຽນ 48 ປີແຫ່ງສັນຕິພາບ ແລະ ພັດທະນາ
ພາບ:dangcongsan.vn
|
ງານວາງສະແດງ“ອາຊຽນ 48 ປີແຫ່ງສັນຕິພາບ ແລະ ພັດທະນາ, 20 ປີທີ່ ຫວຽດນາມ ເຂົ້າເປັນສະມາຊິກ ອາຊຽນ” ຖືກໄຂຂຶ້ນໃນເວລາ 9 ໂມງຂອງຕອນເຊົ້າວັນທີ 8/9, ເຖິງວ່າ ຝົນຕົກຫນັກກໍຕາມ ແຕ່ແຂກເຂົ້າຢ້ຽມຊົມເກືອບ 100 ຄົນ ຢືນເຕັມຫ້ອງວາງສະແດງໃນເນື້ອທີ່ປະມານ 60 ຕາແມັດ ຢູ່ ສະຫະພັນບັນດາອົງການຈັດຕັ້ງມິດຕະພາບ ນະຄອນ ຮ່າໂນ້ຍ. ຈາກປະຕູຍ່າງເຂົ້າໃນຫ້ອງວາງສະແດງ, ທ່ານຈະພົບເຫັນ ປ້າຍໂຄສະນາ ຂະຫນາດໃຫຍ່ຫລາຍແຜ່ນ. ໃນແຕ່ລະແຜ່ນ ມີພາບກວ່າ 100 ຮູບ ທີ່ແນະນຳກ່ຽວກັບບັນດາປະເທດສະມາຊິກ ອາຊຽນ. ທຳອິດ ແມ່ນບັນດາ ພາບຖ່າຍແນະນຳກ່ຽວກັບປະເທດ ມາເລເຊຍ. ນັ້ນແມ່ນຮູບພາບ ຕືກແຝດ Petronas ທີ່ມີຊື່ສຽງຢູ່ນະຄອນຫລວງ ກົວລາລຳເປີ, ຮູບພາບຂອງບັນດາບ່າວສາວ ມາເລເຊຍ ນຸ່ງຊຸດອາພອນພື້ນເມືອງທີ່ມີສີສັນຫລາກຫລາຍ. ທາງຫນ້າແມ່ນບັນດາພາບຖ່າຍກ່ຽວກັບປະເທດ ມຽນມາ ດ້ວຍຮູບພາບຂອງວັດຄຳ ຊື່ງແມ່ນສັນຍາລັກຂອງ ມຽນມາ ຫລື ຮູບພາບກ່ຽວກັບ ປະຊາຊົນ ມຽນມາ ໃນງານບຸນຫົດນ້ຳ. ຄຽງຂ້າງນັ້ນ ແມ່ນບັນດາຮູບຖ່າຍກ່ຽວກັບປະເທດ ໄທ ດ້ວຍຮູບພາບຂອງຫໍພະແກ້ວ, ຮູບພາບຂອງບັນດາເຮືອຂົນສົ່ງໝາກໄມ້ ແລະ ດອກໄມ້ ຢູ່ ຕະຫລາດນ້ຳ ຂຶ້ນກັບແຂວງ ຣັດຈະບູຣີ. ທ່ານນາງ ຫວູທິຫາຍ, ຮອງປະທານປະຈຳ ສະຫະພັນບັນດາອົງການຈັດຕັ້ງມິດຕະພາບນະຄອນ ຮ່າໂນ້ຍ, ຫົວຫນ້າ ຄະນະຈັດຕັ້ງໃຫ້ຮູ້ວ່າ:
“ງານວາງສະແດງຄັ້ງນີ້ ຢາກແນະນຳບັນດາຮູບພາບຂອງແຕ່ລະປະເທດສະມາຊິກ ອາຊຽນ ແລະ ບັນດາບາດກ້າວພັດທະນາຂອງບັນດາປະເທດອາຊຽນ, ໃນນັ້ນ ມີ ຫວຽດນາມ. ແຂກມາຢ້ຽມຊົມງານວາງສະແດງຄັ້ງນີ້ ຈະເຂົ້າໃຈຢ່າງຈະແຈ້ງກ່ຽວກັບປະຊາຄົມ ອາຊຽນ ກໍຄືແຕ່ລະປະເທດ ອາຊຽນ ກວ່າ. ເຂົາເຈົ້າຈະເຫັນໄດ້ວ່າ ບັນດາປະເທດ ອາຊຽນ ມີສະຖານທີ່ທ່ອງທ່ຽວໃດທີ່ສວຍງາມ. ນອກນັ້ນ ງານວາງສະແດງຍັງມີບັນດາວິສາຫະກິດ, ສະນັ້ນເຂົາເຈົ້າ ສາມາດເປີດກວ້າງການໂຄສະນາການທ່ອງທ່ຽວ. ພິເສດ ແມ່ນບັນດາວິສາຫະກິດ ມາເລເຊຍ ພວມສົນໃຈຍູ້ແຮງການທ່ອງທ່ຽວ.”
ພິເສດ ງານວາງສະແດງຄັ້ງນີ້ ຍັງວາງສະແດງບັນດາຮູບຖ່າຍແນະນຳໂກ່ຽວກັບ ໄລຍະ 20 ປີທີ່ຫວຽດນາມ ເຂົ້າເປັນສະມາຊິກ ອາຊຽນ. ນັ້ນແມ່ນ ບັນດາຮູບຖ່າຍບັນດາການນຳໃນກອງປະຊຸມລັດຖະມົນຕີການຕ່າງປະເທດ ເວທີປາໄສການຮ່ວມມື ອາຊີ ເອີລົບຄັ້ງທີ 9 ດຳເນີນໄປຢູ່ຮ່າໂນ້ຍ, ພິທີສະເຫນີຕົວກຸ່ມແມ່ຍິງປະຊາຄົມ ອາຊຽນ ຢູ່ ຮ່າໂນ້ຍ ຫລື ຮູບຖ່າຍ ງານລາຕີພົບປະແລກປ່ຽນວັດທະນະທຳ ອາຊຽນ. ທ່ານ Rosland Bin Sarif , ອັກຄະລັດຖະທູດ ມາເລເຊຍ ປະຈຳຫວຽດນາມ ໃຫ້ຮູ້ວ່າ:
ຂ້າພະເຈົ້າຕີລາຄາສູງບົດບາດ, ຄວາມຮັບຜິດຊອບ ແລະ ລັກສະນະສ້າງສັນຂອງຫວຽດນາມ ໃນຕະຫລອດ 20 ປີແຫ່ງທີ່ຫວຽດນາມ ເຂົ້າເປັນສະມາຊິກ ອາຊຽນ. ຫວຽດນາມ ໄດ້ປະກອບສ່ວນຢ່າງຕັ້ງຫນ້າ ເຂົ້າໃນການຊຸກຍູ້ຄວາມສາມັກຄີ, ສະຖຽນລະພາບ. ຜົນງານຂອງຫວຽດນາມ ຢູ່ ອາຊຽນ ໄດ້ສ້າງພື້ນຖານອັນໝັ້ນແກ່ນໃຫ້ອະນາຄົດ ແລະ ການເຊື່ອມໂຍງ ຂອງ ຫວຽດນາມ ກັບເພື່ອນມິດສາກົນ.”
ຕາມຄະນະຈັດຕັ້ງແລ້ວ, ນັບແຕ່ມື້ເປີດປະຕູມາຮອດປະຈຸບັນ, ສະເລ່ຍ ແຕ່ລະມື້ມີຊາວຮ່າໂນ້ຍ ແລະ ຊາວຕ່າງປະເທດ ມາຢ້ຽມຊົມປະມານ 200 ເທື່ອຄົນ. ທ່ານ ຫງວຽນລາຍ, ຊາວຮ່າໂນ້ຍ ພວມຊົມຕະຫລາດນ້ຳຂອງໄທ ທີ່ງານວາງສະແດງນີ້ ໃຫ້ຮູ້ວ່າ:
“ງານວາງສະແດງຄັ້ງນີ້ ແມ່ນໂອກາດເພື່ອໃຫ້ທຸກຄົນພົບປະກັນ ແບ່ງປັນອາລົມຈິດ ກ່ຽວກັບ ອາຊຽນ. ບັນດາຮູບຖ່າຍຢູ່ທີ່ນີ້ ແມ່ນອຸດົມສົມບູນຫລາຍຮູບຫລາຍແບບ. ແຕ່ລະປະເທດ ອາຊຽນ ລ້ວນແຕ່ມີທັດສະນີຍະພາບສວຍງາມ ແລະ ມີຊື່ສຽງໃນໂລກ. ບັນດາຮູບພາບນີ້ ເຮັດໃຫ້ຂ້າພະເຈົ້າຢາກໄປຢ້ຽມຊົມບັນດາທັດສະນິຍະພາບຂອງບັນດາປະເທດສະມາຊິກ ອາຊຽນ. ຂ້າພະເຈົ້າມີໂອກາດໄດ້ໄປຢ້ຽມຢາມ ສິງກະໂປ, ມາເລເຊຍ, ອິນໂດເນເຊຍ ແລ້ວ, ໃນນັ້ນ, ຂ້າພະເຈົ້າມີຄວາມປະທັບໃຈທີ່ສຸດກ່ຽວກັບປະເທດ ສິງກະໂປ. ເຖິງວ່າ ສິງກະໂປແມ່ນປະເທດບໍ່ໃຫຍ່ປານໃດ ແຕ່ຂ້າພະເຈົ້າມີຄວາມປະທັບໃຈຕໍ່ຄວາມເປັນລະບຽບຮຽບຮ້ອຍທາງສັງຄົມ, ການປົກປັກຮັກສາສິ່ງແວດລ້ອມ, ຄວາມສີວິໄລຢູ່ສິງປະໂປ.”
ງານວາງສະແດງ “ອາຊຽນ 48 ປີແຫ່ງສັນຕິພາບ ແລະ ພັດທະນາ, 20 ປີທີ່ ຫວຽດນາມ ເຂົ້າເປັນສະມາຊິກ ອາຊຽນ” ເປີດປະຕູ ແຕ່ 9ໂມງ ເຊົ້າຮອດ 17 ໂມງແລງ ນັບແຕ່ວັນທີ 8-15/9 ຢູ່ ສຳນັກງານສະຫະພັນບັນດາອົງການຈັດຕັ້ງມິດຕະພາບ ນະຄອນ ຮ່າໂນ້ຍ, ເລກທີ 15 A ຖະຫນົນ ຫລີເທື່ອງກຽດ ແລະ ຜູ້ເຂົ້າຊົມບໍ່ຕ້ອງເສຍຄ່າ.