(vovworld)- ງານວາງສະແດງ “ອາຊຽນ - ສີສັນວັດທະນະທຳ” ໄດ້ດຳເນີນແຕ່ວັນທີ 3-17/8/2016 ຢູ່ຮ່າໂນ້ຍ. ໃນຂອບເຂດຂອງງານວາງສະແດງ, ແຂກເຂົ້າຮ່ວມ ຈະມີໂອກາດໄດ້ຊົມບັນດາພາບຖ່າຍທີ່ສວຍງາມກ່ຽວກັບບັນດາສະຖານທີ່ທ່ອງທ່ຽວຂອງບັນດາປະເທດ ອາຊຽນ, ບັນດາງານບຸນວັດທະນະທຳທີ່ເຕັມໄປດ້ວຍສີສັນ ແລະ ຄົ້ນຫາສິລະປະແຕ້ມລວດລາຍໃນຜ້າ Batik ທີ່ເປັນມູນເຊື້ອຂອງປະເທດ ມາເລເຊຍ. ໃນລາຍການຊາຄາ ອາຊຽນ ພາກນີ້ ພວກເຮົາຂໍແນະນຳບັນດາຈຸດວັດທະນະທຳທີ່ແຕກຕ່າງກັນຢູ່ງານວາງສະແດງ ອາຊຽນ ສີສັນວັດທະນະທຳ.
ເຂດວາງສະແດງຂອງໄທ
ພາບ:docbao.net
|
ຫ້ອງວາງສະແດງມີເນື້ອທີ່ປະມານ 80 ຕາແມັດ ຕັ້ງຢູ່ຊັ້ນຫນຶ່ງຂອງຫໍພິພິດທະພັນແມ່ຍິງຫວຽດນາມ ໄດ້ກາຍເປັນເຂດວາງສະແດງວັດທະນະທຳຂອງບັນດາປະເທດອາຊຽນ. ເມື່ອເຂົ້າຊົມໃນຫ້ອງວາງສະແດງນີ້, ສິ່ງທຳອິດທີ່ດຶງດູດໃຈຜູ້ຊົມແມ່ນ ບ່ອນທີ່ນັກສິລະປະການແຕ້ມລວດລາຍໃນຜ້າ Batik. ບັນດາຫີບສີຂຽວ, ສີແດງ, ສີເຫລືອງ, ສີອິດໄດ້ວາງເປັນລະບຽບຢູ່ເທິງໂຕະ. ຄຽງຂ້າງນັ້ນ ເພື່ອນຫງວຽນຮ່ວາງແອງ ນັກສຶກສາປີທີຫນຶ່ງ ຢູ່ມະຫາວິທະຍາໄລອຸດສາຫະກຳພວມຊັ່ງຊາຄວນເລືອກເອົາສີໃດໃຫ້ເໝາະສົມ. ຄິດໄປຄິດມາ, ຮ່ວາງແອງ ໄດ້ຕັດສິນເລືອກເອົາສີຂຽວເພື່ອນຳໃຊ້ໃນການທາສີຕາມລວດລາຍທີ່ມີຢູ່ແລ້ວໃນຜ້າສີຂາວ- ໂດຍບັນດານັກສິລະປະການຕ່ຳແຜ່ນແພ Batik ຢູ່ໂຮງງານ Ikarrtini ທີ່ມີຊື່ສຽງຢູ່ ກົວລາລຳເປີ ຜະລິດ. ຄຽງຂ້າງນັ້ນ ມີເພື່ອນຫນຸ່ມອື່ນອີກ 2, 3 ຄົນ ກໍພວມທົດລອງປະເພດສິລະປະທີ່ໃຫມ່ອ່ຽມນີ້. ເພື່ອນຫນຸ່ມ ຫງວຽນຮ່ວາງແອງ ໃຫ້ຮູ້ວ່າ:
“ນີ້ເປັນຄັ້ງທຳອິດ ຂ້າພະເຈົ້າໄດ້ທົດລອງແຕ້ມລວດລາຍໃນຜ້າ Batik. ຕາມຂ້າພະເຈົ້າແລ້ວ, ສິ່ງຍາກທີ່ສຸດແມ່ນການປະສົມສີໂດຍກົງໃນແຜ່ນແພ. ເມື່ອນຳໃຊ້ຟອຍ ທາສີຕ້ອງເຮັດແນວໃດບໍ່ປະໃຫ້ສີອອກສູ່ລວດລາຍອື່ນ.”
ຜູ້ແນະນຳວິທີແຕ້ມລວດລາຍຜ້າ Batik ໃຫ້ບັນດາເພື່ອນຫນຸ່ມ ແມ່ນທ່ານນາງ Kartini Ilias, ນັກສິລະປະການ ແຕ້ມລວດລາຍໃນ ຜ້າ Batik ມາຈາກ ປະເທດ ມາເລເຊຍ. ເມື່ອແບ່ງປັນກ່ຽວກັບຂັ້ນຕອນຂອງປະເພດສິລະປະນີ້, ທ່ານນາງ Kartini Ilias ໃຫ້ຮູ້ວ່າ:
“ສິລະປະແຕ້ມລວດລາຍ ຜ້າ Batik ຢູ່ມາເລເຊຍ ມີມາກ່ອນນີ້ກວ່າ 300 ປີ ແລະ ສ່ວນຫລາຍໄດ້ນຳໃຊ້ໃນຊີວິດ. ບັນດາຊຸດອາພອນຢູ່ ມາເລເຊຍ ລ້ວນແຕ່ໄດ້ຫຍິບດ້ວຍ ຜ້າ Batik. ເພື່ອແຕ້ມລວດລາຍໃນ ຜ້າ Batik ແຜ່ນຫນຶ່ງໃຫ້ສຳເລັດ, ຂັ້ນຕອນທຳອິດນັ້ນແມ່ນ ຕ້ອງຕົ້ມນ້ຳມຶກ. ຫລັງຈາກນັ້ນ ນຳໃຊ້ຟອຍທາສີ, ຊື່ງແມ່ນອຸປະກອນພິເສດໃນການແຕ້ມລວດລາຍຜ້າ Batik. ຖັດມາ ພວກຂ້າພະເຈົ້າຖອກນ້ຳມຶກເພື່ອສ້າງລວດລາຍໃນ ຜ້າ Batik. ຕໍ່ມາຈຶ່ງນຳໃຊ້ຟອຍທາສີ. ເມື່ອແຕ້ມສຳເລັດແລ້ວ ຕ້ອງຮັກສາໄວ້ໃນເວລາ 2 ຊົ່ວໂມງ ເພື່ອໃຫ້ຜ້າແຫ້ງ. ຢາກມີຜ້າ batik ກວ້າງປະມານ 2 ແມັດເພື່ອຕັດເສື້ອໃຫ້ສຳເລັດ ຕ້ອງເສຍເວລາ 5 ວັນ. ທຸກຂັ້ນຕອນລ້ວນແຕ່ເຮັດດ້ວຍມື.”
ເຂດວາງສະແດງຂອງລາວ
ພາບ:docbao.net
|
ຢູ່ຄຽງຂ້າງບ່ອນນັກສິລະປະການແຕ້ມລວດລາຍໃນ ຜ້າ Batik ແມ່ນບ່ອນວາງສະແດງຂອງ 10 ປະເທດສະມາຊິກ ອາຊຽນ. ຢູ່ໃນປ້າຍໂຄສະນາຂະຫນາດໃຫຍ່ ຢູ່ເທິງຝາຜະນັງ ແມ່ນບັນດາສະຖານທີ່ທ່ອງທ່ຽວຂອງແຕ່ລະປະເທດຄື Marina Bay ຂອງສິງກະໂປ ຫລື Angkor Wat Angkor Thom ຂອງກຳປູເຈຍ, ຮູບພາບຂອງບັນດາງານບຸນພື້ນເມືອງຂອງບັນດາປະເທດຄື: ບຸນຫົດນ້ຳຂອງ ກຳປູເຈຍ, ບຸນລ່ອຍກະທົງຂອງໄທ ຫລື ວາດຟ້ອນ Apsaraຂອງກຳປຸເຈຍ. ຢູ່ຂ້າງ ປ້າຍໂຄສະນາ ຂອງແຕ່ລະປະເທດ ແມ່ນບັນດາຊຸດອາພອນປະຈຳຊາດ. ຜູ້ຊົມໄດ້ເຫັນປະຈັກຕາບັນດາຊຸດເສື້ອຍາວທີ່ເປັນປະເພນີຂອງຫວຽດນາມ, ຊຸດອາພອນ Phasin ມີສີສັນຫລາກຫລາຍຂອງ ໄທ. ຊຸດອາພອນມີສີເຫລືອງເຫລື້ອມ, ຕ່ຳດ້ວຍລວດລາຍລະອຽດອ່ອນກໍຄືຖັກແສ່ວຢ່າງສວຍງາມ ຫລືຊຸດອາພອນ Nyonya Kebaya ຂອງສິງກະໂປ ຖືກຫຍິບດ້ວຍມືຢ່າງງາມຕາ. ເພື່ອນ Hoeung Sophany, ນັກສຶກສາ ກຳປູເຈຍ ແລະ ເພື່ອນ ເລຫວຽດແອງ, ແຂກເຂົ້າຊົມງານວາງສະແດງໃຫ້ຮູ້ວ່າ:
“ເຂົ້າຮ່ວມງານວາງສະແດງຄັ້ງນີ້ ນ້ອງເຫັນວ່າ ແຕ່ລະປະເທດລ້ວນແຕ່ມີຈຸດພິເສດສະເພາະຂອງຕົນ. ຕົວຢ່າງຄື ກຳປູເຈຍ, ມີວາດຟ້ອນ Apsara, ລາວ, ໄທ ກໍມີວາດຟ້ອນພື້ນເມືອງຂອງປະເທດເຂົາເຈົ້າ. ນ້ອງມັກຊົມການວາງສະແດງຂອງປະເທດໄທ. ເພາະວ່າ ໄທມີບັນດາຊຸດອາພອນປະຈຳຊາດ ແລະ ເຄື່ອງສິລະປະຫັດຖະກຳສວຍງາມທີ່ສຸດ.”
“ສິ່ງທີ່ຂ້າພະເຈົ້າຮູ້ສືກປະທັບໃຈທີ່ສຸດໃນງານວາງສະແດງຄັ້ງນີ້ ນັ້ນແມ່ນ ຂ້າພະເຈົ້າໄດ້ເຫັນປະຈັກຕາຊຸດອາພອນປະຈຳຊາດຂອງບັນດາປະເທດອາຊຽນ. ພິເສດແມ່ນບັນດາຊຸດອາພອນຂອງແມ່ຍິງບັນດາປະເທດອາຊຽນ ມີສີສັນຫລາກຫລາຍງາມຕາ ແລະ ຖືກຫຍິບຢ່າງລະອຽດລະອໍ”
ຕາມຄະນະຈັດຕັ້ງ, ນັບແຕ່ມື້ເປີດປະຕູງານວາງສະແດງມາຮອດປະຈຸບັນ, ສະເລ່ຍ ແຕ່ລະມື້ມີແຂກເຂົ້າຊົມປະມານ 150 ເທື່ອຄົນ, ນັບທັງຊາວ ຮ່າໂນ້ຍ ແລະ ນັກທ່ອງທ່ຽວຕ່າງປະເທດ. ງານວາງສະແດງ ອາຊຽນ -ສີສັນວັດທະນະທຳເປີດປະຕູຮອດວັນທີ 17/8, ສະນັ້ນ ຜູ້ໃດພວມດຳລົງຊີວິດ ແລະ ເຮັດວຽກຢູ່ຮ່າໂນ້ຍ ຫລື ມີແຜນການມາຢ້ຽມຢາມ ຮ່າໂນ້ຍ ຢ່າລືມແວ່ຢາມງານວາງສະແດງນີ້.