(vovworld)- ປະຈຸບັນ, ບັນດາວິສາຫະກິດ ຫວຽດນາມ ໄດ້ມີຫນ້າຢູ່ 16/18 ແຂວງ, ນະຄອນ ຂອງລາວ. ວັນທີ 21/10 ຜ່ານມາ, ຢູ່ ນະຄອນຫລວງ ວຽງຈັນ, ເປັນຄັ້ງທຳອິດ, ນາຍົກລັດຖະມົນຕີ ລາວ ທອງລຸນ ສີສຸລີດ ໄດ້ມີການພົບປະ, ໂອ້ລົມສົນທະນາກັບບັນດາວິສາຫະກິດ ຫວຽດນາມ ທີ່ພວມລົງທຶນດຳເນີນທຸລະກິດຢູ່ລາວ. ທີ່ການພົບປະສົນທະນາ, ບັນດາວິສາຫະກິດ ຫວຽດນາມ ໄດ້ລາຍງານສິ່ງສະດວກ, ຄວາມຫຍຸ້ງຍາກ, ຂໍ້ຕິດຄັດໃນການເຄື່ອນໄຫວລົງທຶນ ດຳເນີນທຸລະກິດຢູ່ລາວ ປະຈຸບັນເມື່ອລົງທຶນ.
ນາຍົກລັດຖະມົນຕີ ລາວ ທອງລຸນ ສີສຸລີດພົບປະ ໂອ້ລົມສົນທະນາກັບບັນດາວິສາຫະກິດ ຫວຽດນາມ
ພາບ:vov
|
ໄລ່ຮອດເດືອນ 9/2016, ຫວຽດນາມໄດ້ມີ 266 ໂຄງການໄດ້ຮັບຫນັງສືອະນຸຍາດລົງທຶນຢູ່ລາວ ດ້ວຍຍອດຈຳນວນທຶນຈົດທະບຽນແມ່ນ 5,1 ຕື້ USD, ຫລາຍທົບ 1,3 ເທົ່າ ກ່ຽວກັບປະລິມານ ແລະ ສູງທົບ 1,26 ເທົ່າກ່ຽວກັບຍອດຈຳນວນເງິນລົງທຶນເມື່ອທຽບໃສ່ປີ 2011. ປະຈຸບັນ ຫວຽດນາມ ຢືນອັນດັບທີ 3 ໃນຈຳນວນບັນດາປະເທດລົງທຶນຢູ່ລາວ. ຈຳນວນທຶນ FDI ຂອງຫວຽດນາມ ເຂົ້າລາວ ໄດ້ເພີ່ມຂຶ້ນຢ່າງລຽນຕິດໃນໄລຍະຜ່ານມາ ນັບທັງປະລິມານໂຄງການ ແລະ ຍອດຈຳນວນເງິນ. ວົງເງິນການຄ້າສອງສົ້ນຂອງສອງປະເທດໃນໄລຍະ 2011 - 2015 ໄດ້ເພີ່ມຂຶ້ນສະເລ່ຍ 20%/ປີ. ເຖິງຢ່າງໃດກໍຕາມ, ການຮ່ວມມືດ້ານເສດຖະກິດຂອງສອງປະເທດເວົ້າລວມ ແລະ ການເຄື່ອນໄຫວລົງທຶນຂອງບັນດາວິສາຫະກິດຫວຽດນາມຢູ່ ລາວ ເວົ້າສະເພາະ ພວມປະສົບກັບຄວາມຫຍຸ້ງຍາກ, ຂໍ້ຕິດຄັດ. ການໂອ້ລົມສົນທະນານີ້ມີຄວາມໝາຍທີີ່ສຸດ ດ້ວຍຜູ້ແທນເຂົ້າຮ່ວມກວ່າ 200 ຄົນ ຊື່ງແມ່ນຜູ້ຕາງຫນ້າໃຫ້ບັນດາວິສາຫະກິດຫວຽດນາມ ພວມລົງທຶນດຳເນີນທຸລະກິດຢູ່ລາວ. ທ່ານ ຫງວຽນກີມເຊີນ, ຜູ້ອຳນວຍການໃຫຍ່ ບໍລິສັດໃຫຍ່ ນ້ຳມັນ ຫວຽດນາມ - ລາວ (PV OIL) ໃຫ້ຮູ້ວ່າ:
“ໂດຍແມ່ນວິສາຫະກິດ ຂ້າພະເຈົ້າເຫັນວ່ານີ້ແມ່ນການພົບປະສົນທະນາສຳເລັດຜົນທີ່ສຸດ ແລະ ເປັນຄັ້ງທຳອິດ ທີ່ນາຍົກລັດຖະມົນຕີ ລາວ ໄດ້ໂອ້ລົມສົນທະນາໂດຍກົງກັບບັນດາວິສາຫະກິດຂະຫນາດນ້ອຍ, ກາງ ແລະ ໃຫຍ່ຂອງຫວຽດນາມ. ນອກນັ້ນ ເຂົ້າຮ່ວມການພົບປະສົນທະນານີ້ ຍັງມີລັດຖະມົນຕີ, ຮອງລັດຖະມົນຕີບັນດາກະຊວງ, ຂະແຫນງການຂອງລາວ ແລະ ຕອບຄຳຖາມໂດຍກົງບັນດາບັນຫາຊື່ງບັນດາວິສາຫະກິດຫວຽດນາມ ລົງທຶນຢູ່ລາວໄດ້ຍົກອອກມາ. ຍິ່ງກວ່ານັ້ນ, ບັນດາກະຊວງ, ຄະນະ, ຂະແຫນງການລ້ວນແຕ່ຖືວ່າ ບັນດາວິສາຫະກິດຫວຽດນາມ ມີກາລະໂອກາດໄດ້ສຳຜັດກັບການນຳ, ບັນດາອົງການວິຊາສະເພາະເພື່ອພ້ອມກັນແກ້ໄຂບັນດາບັນຫາຕິດຄັດ.”
ຜູ້ຕາງຫນ້າບັນດາວິສາຫະກິດຫວຽດນາມທີ່ການພົບປະສົນທະນາ
ພາບ:vov
|
ທີ່ການໂອ້ລົມສົນທະນາ, ຜູ້ຕາງຫນ້າບັນດາວິສາຫະກິດໃຫຍ່ຂອງຫວຽດນາມ ທີ່ລົງທຶນຢູ່ລາວຄື: ກຸ່ມບໍລິສັດອຸດສາຫະກຳ ຢາງພາລາຫວຽດນາມ, ກຸ່ມບໍລິສັດ ກອບສ ລອງແທ່ງ, ກຸ່ມບໍລິສັດເຄມີ ຫວຽດນາມ ຢູ່ລາວ ໄດ້ຍົກອອກຄວາມຫຍຸ້ງຍາກ, ຂໍ້ຕິດຄັດຈຳນວນຫນຶ່ງໃນການເຄື່ອນໄຫວລົງທຶນຢູ່ລາວ. ທ່ານ ຫງວຽນຕຽນດືກ, ຮອງຜູ້ອຳນວຍການໃຫຍ່ກຸ່ມບໍລິສັດຢາງພາລາ ຫວຽດນາມ ສະເຫນີວ່າ:
“ບັນຫາແຮງງານຍາມໃດກໍແມ່ນສິ່ງກີດຂວາງໃນບັນຫານຳໃຊ້ຄົນງານເປັນຈຳນວນຫລາຍ ຄື: ບັນດາໂຄງການຂອງກຸ່ມບໍລິສັດຢາງພາລາ. ທີ່ບັນດາເຂດມີໂຄງການລົງທຶນ ພວມຂາດແຄນຄົນງານ ແລະ ອ່ອນດ້ອຍດ້ານທັກສະ. ກ່ຽວກັບບັນຫາທີ່ດິນ, ປະຈຸບັນ ບໍລິສັດ Quasa Geruco ຍັງບໍ່ທັນລົງນາມໃນສັນຍາເຊົ່າທີ່ດິນກັບລັດຖະບານລາວ. ສະນັ້ນ ພວກຂ້າພະເຈົ້າສະເຫນີ 3 ບັນຫາຄືດັ່ງນີ້: ທີຫນຶ່ງ ກ່ຽວກັບບັນຫາທີດິນ, ສະເຫນີລັດຖະບານ, ບັນດາກະຊວງຂະແຫນງການ ແລະ ທ້ອງຖິ່ນຂອງລາວ ພະຍາຍາມຊ່ວຍວິສາຫະກິດປັບປຸງດ້ານນິຕິກຳກ່ຽວກັບທີ່ດິນ; ທີສອງ ກ່ຽວກັບເວລາ, ຂ້າພະເຈົ້າສະເຫນີ ສະຖານທູດຫວຽດນາມ ເປັນເອກະພາບ ກ່ຽວກັບໄລຍະເວລາເຊົ່າທີ່ດິນ ແລະ ບັນຫາສົ່ງອາກອນຄືນໃຫ້ແກ່ບັນດາວິສາຫະກິດ; ທີ 3 ແມ່ນລະດັບລາຍຈ່າຍໃຫ້ແກ່ຄົນງານຫວຽດນາມ ເມື່ອຂໍລະບຽບການເຮັດວຽກຢູ່ລາວແມ່ນສູງເກືອບ 20% ລາຍຮັບຂອງຄົນງານ ແລະ ປາດຖະຫນາວ່າ ລັດຖະບານລາວ ຈະຫລຸດຜ່ອນລາຍຈ່າຍປະເພດນີ້ລົງ”
ບັນດາວິສາຫະກິດຫວຽດນາມ ປະສົບກັບຄວາມຫຍຸ້ງຍາກຂໍ້ຕິດຂັດ ຈຳນວນຫນຶ່ງ ຍ້ອນສອງປະເທດຍັງບໍ່ທັນມີການແນະນຳລະອຽດທີ່ກ່ຽວຂ້ອງເຖິງການຜັນຂະຫຍາຍການປະຕິບັດບັນດາສັນຍາ, ຂໍ້ຕົກລົງທີ່ໄດ້ຮັບການລົງນາມ; ຍັງບໍ່ທັນມີນະໂຍບາຍຫນູນຊ່ວຍ, ບຸລິມະສິດລົງທຶນພື້ນຖານໂຄງລ່າງຢູ່ເຂດຫ່າງໄກສອກຫລີກ, ເຂດປະສົບກັບຄວາມຫຍຸ້ງຍາກເພື່ອດຶງດູດບັນດານັກລົງທຶນຕ່າງປະເທດ. ໃນການໂອ້ລົມສົນທະນາມາເປັນເວລາ 3 ຊົ່ວໂມງ, ທ່ານນາຍົກລັດຖະມົນຕີ ລາວ ໄດ້ຮັບຮູ້ບັນດາຂໍ້ສະເຫນີຂອງບັນດາວິສາຫະກິດ ຫວຽດນາມ. ທ່ານນາຍົກລັດຖະມົນຕີ ລາວ ທອງລຸນ ສີສຸລີດ ກໍສົ່ງເສີມບັນດາວິສາຫະກິດ ຫວຽດນາມ ຕ້ອງມີຍຸດທະສາດ ລົງທຶນຍາວນານຢູ່ລາວ.
ສຽງທ່ານ ທອງລຸນ
ເຖິງວ່າ ເວລາທີ່ສະຫງວນໃຫ້ແກ່ການໂອ້ລົມສົນທະນາບໍ່ຫລາຍ ແຕ່ເລື່ອງທ່ານນາຍົກລັດຖະມົນຕີ ລາວ ແລະ ກວ່າເຄິ່ງຫນຶ່ງຈຳນວນທ່ານລັດຖະມົນຕີ ໃນລັດຖະບານ ລາວ ມີຫນ້າໃນການໂອ້ລົມສົນທະນານີ້ ໄດ້ພິສູດໃຫ້ເຫັນວ່າ ເລື່ອງລັດຖະບານ ລາວ ປາດຖະຫນາຢາກດຶງດູດບັນດານັກລົງທຶນຫວຽດນາມ ຫລາຍກວ່າອີກ, ປະກອບສ່ວນປັບປຸງການພົວພັນທີ່ເປັນມູນເຊື້ອແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ຫວຽດນາມ ລາວກວ່າອີກ.