(vovworld)- ແຕ່ວັນທີ25-26/10/2016 ຢູ່ ຮ່າໂນ້ຍ ຈະດຳເນີນກອງປະຊຸມຂັ້ນສູງຮ່ວມມື ກຳປູເຈຍ - ລາວ - ມຽນມາ -ຫວຽດນາມ (CLMV) ຄັ້ງທີ 8, ກອງປະຊຸມຂັ້ນສູງຍຸດທະສາດການຮ່ວມມືເສດຖະກິດ Ayeyawady - ເຈົ້າພະຍາ ແລະ ແມ່ຂອງ (ACMECS) ຄັ້ງທີ 7 ແລະ ກອງປະຊຸມເວທີປາໄສເສດຖະກິດໂລກ ກ່ຽວກັບແມ່ຂອງ.
ໂດຍແມ່ນສະມາຊິກຕັ້ງຫນ້າ ແລະ ມີຄວາມຮັບຜິດຊອບ, ຫວຽດນາມ ໄດ້ ແລະ ພວມປະກອບສ່ວນຫລາຍຢ່າງທີ່ສຳຄັນໃນການຮ່ວມມື CLMV ແລະ ACMECS. ສຳລັບ CLMV ຫວຽດນາມ ໄດ້ສ້າງກອງທຶນການສຶກສາໃຫ້ແກ່ບັນດາປະເທດ ກຳປູເຈຍ, ລາວ, ມຽນມາ. ລາຍການກອງທຶນການສຶກສານີ້ໄດ້ຮັບການຕີລາຄາສູງ ແລະ ສະເຫນີສືບຕໍ່ປະຕິບັດໃນໄລຍະ 2016 -2020. ໃນ 2 ກົນໄກການຮ່ວມມື CLMV ແລະ ACMECS, ຫວຽດນາມ ລ້ວນແຕ່ສວມບົດບາດປະສານງານໃນຂົງເຂດຮ່ວມມືສະເພາະຂະແຫນງຈຳນວນຫນຶ່ງ ແລະ ໄດ້ຜັນຂະຫຍາຍການເຄື່ອນໄຫວແທດຈິງຫລາຍຢ່າງເພື່ອຊ່ວຍຊຸກຍູ້ການຮ່ວມມືຮອບດ້ານລະຫວ່າງ 5 ປະເທດ. ໂດຍຮັບຮູ້ໄດ້ຄວາມສຳຄັນຂອງການນຳໃຊ້ຊັບພະຍາກອນຢູ່ລົ່ງແມ່ນ້ຳຂອງແບບຍືນຍົງ, ຫວຽດນາມ ໄດ້ຕັ້ງຫນ້າຊຸກຍູ້ບັນດາການເຄື່ອນໄຫວຮ່ວມມືກ່ຽວກັບສິ່ງແວດລ້ອມ ແລະ ການຄຸ້ມຄອງແຫລ່ງນ້ຳ. ຫວຽດນາມ ເປັນປະເທດທຳອິດຍົກອອກແນວຄວາມຄິດສ້າງຕັ້ງກຸຸ່ມປະຕິບັດງານກ່ຽວກັບສິ່ງແວດລ້ອມໃນຂອບເຂດ ACMECS ແລະ ປະຈຸບັນແມ່ນສວມບົດບາດເປັນເຈົ້າພາບຮ່ວມຂອງກຸ່ມປະຕິບັດງານດັ່ງກ່າວ.
ກອງປະຊຸມຂັ້ນສູງ ACMECS ຄັ້ງທີ 7 ແລະ ກອງປະຊຸມຂັ້ນສູງ CLMV ຄັ້ງທີ 8 ຈະຈັດຂຶ້ນຢູ່ຮ່າໂນ້ຍ ດ້ວຍຫົວຂໍ້ວ່າ: “ມຸ່ງໄປເຖິງອະນຸພາກພື້ນແມ່ນ້ຳຂອງທີ່ມີຄວາມຂະຫຍັນຂັນເຄື່ອນ ແລະ ວັດທະນາຖາວອນ: ກຳແຫນ້ນກາລະໂອກາດ, ສ້າງຮູບປະທຳໃນອະນາຄົດ”. ກອງປະຊຸມຄັ້ງນີ້ແມ່ນເພື່ອໃຫ້ບັນດາການນຳພິຈາລະນາສະພາບການປະຕິບັດບັນດາແຜນການດຳເນີນງານທີ່ໄດ້ຮັບການຮັບຮອງເອົາ ເພື່ອເອກະພາບບັນດາມາດຕະການຮ່ວມມື ແນໃສ່ຍົກສູງກຳລັງແກ້ງແຍ້ງຂອງບັນດາພື້ນຖານເສດຖະກິດ, ຊຸກຍູ້ການເຊື່ອມໂຍງເຂົ້າກັບພາກພື້ນ ແລະ ຮັບມືກັບບັນດາສິ່ງທ້າທາຍລວມເພື່ອອະນາຄົດສັນຕິພາບ, ວັດທະນາຖາວອນຂອງອະນຸພາກພື້ນແມ່ນ້ຳຂອງ. ແລະກໍໃນໂອກາດນີ້, ຕາມຂໍ້ລິເລີ່ມຂອງຫວຽດນາມ, ກອງປະຊຸມເວທີປາໄສເສດຖະກິດໂລກ ກ່ຽວກັບພາກພື້ນແມ່ນ້ຳຂອງ ຈະໄດ້ຮັບການຈັດຕັ້ງຂຶ້ນເປັນຄັ້ງທຳອິດໃນໂອກາດພ້ອມກັບບັນດາກອງປະຊຸມຂັ້ນສູງ ACMECS ແລະ CLMV ເພື່ອໂຄສະນາຄວາມສາມາດບົ່ມຊ້ອນຂອງພາກພື້ນແມ່ນ້ຳຂອງເຖິງປະຊາຄົມວິສາຫະກິດສາກົນ.