(vovworld)- “ ວັນສາຍຮູບເງົາ ອາຊີຕາເວັນອອກສ່ຽງໃຕ້”ໂດຍມີການເຂົ້າຮ່ວມຂອງບັນດາຜູ້ກຳກັບການສະແດງຫນຸ່ມມາຈາກ ຫວຽດນາມ, ກຳປູເຈຍ, ອິນໂດເນເຊຍ, ມຽນມາ ແລະ ໄທ ຫາກໍດຳເນີນໄປຢູ່ຮ່າໂນ້ຍ ໄດ້ສ້າງຄວາມປະທັບໃຈໃຫ້ແກ່ຜູ້ຊົມ. ນີ້ກໍແມ່ນກາລະໂອກາດທີ່ດີ ເພື່ອໃຫ້ບັນດາຜູ້ກຳກັບການສະແດງຫນຸ່ມໃນພາກພື້ນ ອາຊີຕາເວັນອອກສ່ຽງໃຕ້ ພົບປະ, ແລກປ່ຽນບົດຮຽນ, ຍົກສູງລະດັບຄວາມຮູ້ດ້ານວິຊາການ.
ບັນດາແຂກເຂົ້າຊົມຮູບເງົາ
|
ໃນຮູບເງົາເອກະສານ 6 ຊຸດເຊິ່ງຖືກສາຍໃນ “ວັນສາຍຮູບເງົາອາຊີຕາເວັນອອກສ່ຽງໃຕ້” ລວມມີ: Where I go ຂອງຜູ້ກຳກັບການສະແດງ ກຳປູເຈຍ Neang Kavich, Behind the screen ຜູ້ກຳກັບການສະແດງ Aung Nwai Hthway ມາຈາກ ມຽນມາ, Another colour TV ຂອງຜູ້ກຳກັບການສະແດງມາຈາກ ອິນໂດເນເຊຍ Yovista Ahtajida& Dyantini Adeline, Consider ຂອງຜູ້ກຳກັບການສະແດງ ໄທ ປະນຸແສງ ສຸໂຕ ແລະ ຮູບເງົາ 2 ຊຸດຂອງຫວຽດນາມ ຄື: Mount A Mu sung ແລະ Madame Phung last journey ຂອງ ຜູ້ກຳກັບການສະແດງ ເລຕວນແອງ ແລະ ຫງວຽນທິທຳ. ຮູບເງົາແຕ່ລະຊຸດ ມີເນື້ອໃນ ແລະ ສານທ່ີແຕກຕ່າງກັນ ແຕ່ລ້ວນແຕ່ວາງອອກບັນດາບັນຫາທີ່ເປັນຫນ້າສົນໃຈໃນສັງຄົມປະຈຸບັນ. ຊຸດ ຮູບເງົາ “ຄິດໄລ່ຊັ່ງຊາ” ຂອງໄທ ແມ່ນຫົວເລື່ອງກ່ຽວກັບບັນຫາປ່ຽນເພດຜ່ານການສັງເກດໃນສັງຄົມ. ຊຸດ ຮູບເງົາ “Another colour TV” ຂອງອິນໂດເນເຊຍ ແມ່ນສ່ອງແສງບັນດາເງື່ອນໄຂວັດທະນະທຳ ແລະ ເສດຖະກິດຂອງຄອບຄົວຫນຶ່ງທີ່ດຳລົງຊີວິດຢູ່ຊານນະຄອນ ອິນໂດເນເຊຍ, ໃນນັ້ນຜູ້ເປັນແມ່ຕົວລະຄອນເອກ. ລາວມີຊີວິດຢູ່ໂດດດຽວໃນເຮືອນພ້ອມກັບໂທລະທັດ, ກໍ່ແມ່ນເພື່ອນຜູ້ດຽວຂອງລາວ. ເພື່ອນມີງລອງ, ນັກສຶກສາມະຫາວິທະຍາໄລຊັບພະວິຊາ ຮ່າໂນ້ຍ ແບ່ງປັນວ່າ:
“ນີ້ແມ່ນຊຸດຮູບເງົາຂອງບັນດາຜູ້ກຳກັບການສະແດງໃນພາກພື້ນ ສະນັ້ນ ມີເນື້ອໃນໃກ້ຊິດກັບຊີວິດຕົວຈິງ. ຊຸດ ຮູບເງົາ ຂອງ ກຳປູເຈຍ ແມ່ນຕື້ນຕັນໃຈຫລາຍ, ເວົ້າເຖິງບັນຫາລູກຊອດ ໄດ້ຊ່ວຍໃຫ້ຂ້າພະເຈົ້າເຂົ້າໃຈສ່ວນໃດຫນື່ງກ່ຽວກັບຊາວ ກຳປູເຈຍ, ບາງຄົນທີ່ພວມປະສົບກັບຄວາມຫຍຸ້ງຍາກ. ຊຸດຮູບເງົານີ້ແມ່ນເວົ້າເຖິງຄວາມຈິງ, ມີລັກສະນະວັດທະນະທຳມະນຸດຫລາຍກວ່າ. ການເຄື່ອນໄຫວຄືແນວນີ້ແມ່ນດີທີ່ສຸດ. ນັ້ນແມ່ນການພົວພັນແລກປ່ຽນເຮັດໃຫ້ປະຊາຊົນ ແຕ່ລະປະເທດມີຄວາມເຂົ້າໃຈເຊິ່ງກັນ ແລະ ກັນກວ່າ.”
ບໍ່ພຽງແຕ່ໄວຫນຸ່ມມີຄວາມສົນໃຈ ແລະ ຢາກໄດ້ຮັບຊົມບັນດາຮູບເງົາດັ່ງກ່າວເທົ່ານັ້ນ ຫາກຜູ້ຊົມທີ່ມີອາຍຸສູງຄືລຸງ ຮວ່າງຮຽນ ຢູ່ ຮ່າໂນ້ຍ ກໍຮູ້ສຶກປິຕິຊົມຊື່ນເມື່ອໄດ້ຮັບຊົມບັນດາຮູບເງົາໂດຍຜູ້ກຳກັບການສະແດງຫນຸ່ມໃນພາກພື້ນຜະລິດອີກດ້ວຍ. ລຸງ ຮ່ວາງຮ່ຽນ ເວົ້າວ່າ:
“ບັນດາຜູ້ກຳກັບການສະແດງຫນຸ່ມ ມີວິໄສທັດໃໝ່, , ມີຫົວຄິດປະດິດສ້າງ, ນຳມາເຊິ່ງສິ່ງທີ່ໃຫມ່ອ່ຽມໃຫ້ແກ່ຜູ້ຊົມ. ຂ້າພະເຈົ້າຫວັງວ່າ ຈະມີການສາຍຮູບເງົາຄືແນວນີ້ອີກຫລາຍຄັ້ງ ເພື່ອໃຫ້ຜູ້ຊົມເຂົ້າໃຈຕື່ມອີກກ່ຽວກັບທຸກດ້ານໃນຊີວິດສັງຄົມຂອງບັນດາປະເທດໃນພາກພື້ນອາຊີຕາເວັນອອກສ່ຽງໃຕ້. ພຽງແຕ່ຮູບເງົາເອກະສານຈຶ່ງຊ່ວຍຜູ້ຊົມເຂົ້າໃຈກ່ຽວກັບຊີວິດການເປັນຢູ່ຂອງປະຊາຊົນບັນດາປະເທດໃນພາກພື້ນໄດ້”
ຟິມ Madame Phung last journey
|
“ວັນສາຍຮູບເງົາອາຊີຕາເວັນອອກສ່ຽງໃຕ້” ຂຶ້ນກັບໂຄງການ DocNet ອາຊີຕາເວັນອອກສ່ຽງໃຕ້ ໄດ້ຮັບການປະຕິບັດຕາມແນວຄວາມຄິດຂອງສະຖາບັນ Geothe ໂດຍສະຫະພາບເອີລົບອຸປະຖຳ. ໂຄງການໄດ້ຮັບການປະຕິບັດແຕ່ປີ 2012 ເພື່ອຫນູນຊ່ວຍບັນດາຜູ້ກຳກັບການສະແດງຫນຸ່ມ ອາຊີຕາເວັນອອກສ່ຽງໃຕ້, ຊື່ງລວມມີ: ບັນດາປະເທດ ກຳປູເຈຍ, ອິນໂດເນເຊຍ, ໄທ, ຫວຽດນາມ, ມຽນມາ, ຟິລີບປີນ. ໃນໂຄງການ ຍັງຈັດຕັ້ງບັນດາຊຸດຮຽນກ່ຽວກັບການຜະລິດຮູບເງົາເອກະ ສານ ໂດຍບັນດາຜູ້ຊ່ຽວຊານສາກົນເປັນຜູ້ສອນ, ກອງປະຊຸມສຳມະນາ ກ່ຽວກັບຄວາມສາມາດຂອງບັນດາຜູ້ກຳກັບການສະແດງຫນຸ່ມ ອາຊີຕາເວັນອອກສ່ຽງໃຕ້. ຜ່ານນັ້ນ ຊ່ວຍໃຫ້ບັນດາຜູ້ກຳກັບການສະແດງຫນຸ່ມ ຍົກສູງຄວາມສາມາດຜະລິດຮູບເງົາເອກະສານ, ໂຄສະນາບັນດາຮູບເງົານີ້ອອກສູ່ໂລກ. ອ້າຍ Neang Kavich, ຜູ້ກຳກັບການສະແດງ ກຳປູເຈຍ ໃຫ້ຮູ້ວ່າ:
“ການເຄື່ອນໄຫວນີ້ໄດ້ສ້າງຄວາມປະທັບໃຈ ແລະ ມີຄວາມໝາຍທີ່ສຸດ, ເພາະວ່າ ໄດ້ຊ່ວຍໃຫ້ຂ້າພະເຈົ້າມີບົດຮຽນ, ຄວາມຮູ້ດ້ານວິຊາການ, ທິດສະດີ ແລະ ພຶດຕິກຳຕົວຈິງ. ເຖິງວ່າ ມາຈາກບັນດາປະເທດແຕກຕ່າງກັນ, ມີພື້ນຖານວັດທະນະທຳແຕກຕ່າງກັນກໍ່ຕາມ ແຕ່ການເຄ່ືອນໄຫວນີ້ ໄດ້ປະກອບສ່ວນເພີ່ມທະວີຄວາມເຂົ້າອົກເຂົ້າໃຈລະຫວ່າງບັນດາປະເທດໃນພາກພື້ນ.”
“ວັນສາຍຮູບເງົາອາຊີຕາເວັນອອກສ່ຽງໃຕ້” ໄດ້ຮັບການຈັດຕັ້ງຂຶ້ນ 2 ປີເທື່ອຫນຶ່ງ. ເຖິງວ່າ ນີ້ແມ່ນຄັ້ງທີ 2 ແຕ່ໄດ້ຮັບຄວາມຊົມເຊີຍຈາກຜູ້ຊົມຫວຽດນາມ ກໍຄືການຕອບສະຫນອງຢ່າງຕັ້ງຫນ້າຈາກບັນດາຜູ້ກຳກັບການສະແດງຫນຸ່ມໃນພາກພື້ນ ອາຊີຕາເວັນອອກສ່ຽງໃຕ້. ນີ້ກໍແມ່ນຫນຶ່ງໃນບັນດາການເຄື່ອນໄຫວເພື່ອເພີ່ມທະວີຄວາມເຂົ້າໃຈເຊິ່ງກັນ ແລະ ກັນ ລະຫວ່າງປະຊາຊົນບັນດາປະເທດໃນພາກພື້ນ ເພື່ອມຸ່ງໄປສູ່ການສ້າງປະຊາຄົມ ອາຊຽນ ໃນປີ 2015.