(vovworld)- ການພົວພັນຮ່ວມມືລະຫວ່າງຫວຽດນາມ ແລະ ກຳປູເຈຍ ພັດທະນາໃນຫລາຍຂົງເຂດ, ໃນນັ້ນ ການສຶກສາ ບຳລຸງສ້າງຍາມໃດກໍສວມບົດບາດສຳຄັນ. ໄລ່ຮອດປີ 2015, ມີນັກສຶກສາກຳປູເຈຍ ປະມານ 3000 ຄົນ ພວມຮ່ຳຮຽນຢູ່ບັນດາມະຫາວິທະຍາໄລ ຫວຽດນາມ. ສະເພາະໃນປີ 2015, ລັດຖະບານຫວຽດນາມ ໄດ້ສະຫງວນທຶນການສຶກສາໄລຍະຍາວ ແລະ ໄລຍະສັ້ນໃຫ້ແກ່ນັກສຶກສາກຳປູເຈຍ 1045 ຄົນ. ຄຽງຄູ່ກັນນັ້ນ, ນັກສຶກສາກຳປູເຈຍ ຍາມໃດກໍໄດ້ຮັບຄວາມເອົາໃຈໃສ່ ແລະ ການຊ່ວຍເຫລືອຢ່າງສຸດຈິດສຸດໃຈຈາກໂຮງຮຽນ, ຄູອາຈານກໍຄືບັນດານັກສຶກສາຫວຽດນາມເພື່ອມີຄວາມອຸ່ນອ່ຽນໃຈໃນການຮ່ຳຮຽນ, ຍາດໄດ້ຜົນງານດີທີ່ສຸດ.
ນັກສຶກສາລາວ ແລະ ຫວຽດນາມ ໃນງານພົບປະແລກປ່ຽນ
ວັດທະນະທຳ ສິລະປະ
ພາບ:zing.vn
|
ນັກສຶກສາກຳປູເຈຍ ສ່ວນຫລາຍເຂົ້າຮຽນບັນດາຂະແຫນງຄື: ການແພດການຢາ, ກະສິກຳ, ເສດຖະກິດ, ສະຖາປານິກ, ການປ້ອງກັນຊາດ, ປ້ອງກັນຄວາມສະຫງົບ… ຢູ່ ບັນດາມະຫາວິທະຍາໄລໃນບໍລິເວນ ຮ່າໂນ້ຍ, ທາຍບີງ, ນະຄອນໂຮ່ຈິມີນ ແລະ ແຂວງຈຳນວນຫນຶ່ງທີ່ຕິດກັບຊາຍແດນສອງປະເທດ. ຖ້າຫາກອາກາດຢູ່ພາກໃຕ້ ຫວຽດນາມ ມີຫລາຍຈຸດທີ່ຄ້າຍຄືກັນກັບກຳປູເຈຍ, ສຳລັບບັນດານັກສຶກສາກຳປູເຈຍ ທີ່ພວມຮ່ຳຮຽນຢູ່ພາກເຫນືອຫວຽດນາມແລ້ວ, ຄວາມຫຍຸ້ງຍາກທຳອິດ ແມ່ນຄວາມແຕກຕ່າງກ່ຽວກັບອາກາດ. Chhay Seng Hua, ນັກສຶກສາປີສຸດທ້າຍມະຫາວິທະຍາໄລຊັບພະວິຊາ ຮ່າໂນ້ຍ, ປະທານສະມາຄົມນັກສຶກສາ ກຳປູເຈຍ ຢູ່ ຫວຽດນາມ ອາຍຸການ 2015-2016 ໃຫ້ຮູ້ວ່າ: ຫນຶ່ງໃນບັນດາຄວາມຫຍຸ້ງຍາກທີ່ສຸດນັ້ນແມ່ນຕ້ອງລຶ້ງເຄີຍກັບອາກາດຫນາວຈັດຢູ່ພາກເຫນືອຫວຽດນາມເມື່ອລະດູຫນາວວຽນມາ.
“ເງື່ອນໄຂດຳລົງຊີວິດຢູ່ຫວຽດນາມ ແລະ ກຳປູເຈຍ ແມ່ນແຕກຕ່າງກັນ, ນັບທັງບັນຫາກິນດື່ມແລະການດຳເນີນຊີວິດ ແລະ ພິເສດແມ່ນອາກາດ. ເມື່ອລະດູຫນາວວຽນມາ, ພວກນ້ອງເຄີຍປະສົບກັບຄວາມຫຍຸ້ງຍາກ, ພິເສດພວກເພື່ອນຫາກໍມາຮຽນເຄີຍປະສົບບັນຫາກ່ຽວກັບສຸຂະພາບ.”
ໂດຍກຳໄດ້ຄວາມຫຍຸ້ງຍາກນັ້ນ, ບັນດາກະຊວງ, ຂະແຫນງການກ່ຽວຂ້ອງຂອງຫວຽດນາມ ກໍຄືບັນດາມະຫາວິທະຍາໄລ ໄດ້ມານະພະຍາຍາມຊອກຫາມາດຕະການ, ຍົກລະດັບພື້ນຖານໂຄງລ່າງເພື່ອຮັບປະກັນບັນດາເງື່ອນໄຂດຳເນີນຊີວິດໃຫ້ແກ່ນັກສຶກສາ ກຳປູເຈຍ. ປະລິຍາເອກ ໂງທິກີມຢູງ, ຮອງອຳນວຍການມະຫາວິທະຍາໄລສະຖາປານິກ ຮ່າໂນ້ຍ ໃຫ້ຮູ້ວ່າ:
“ຫໍພັກຢູ່ໂຮງຮຽນພວກຂ້າພະເຈົ້າເຄີຍສະຫງວນໃຫ້ແກ່ບັນດາເປົ້າໝາຍບຸລິມະສິດ, ລູກຫລານຂອງຄອບຄົວໃນເປົ້າໝາຍນະໂຍບາຍ, ດ້ວຍ ຫ້ອງນອນຫ້ອງລະ 8 ຄົນ. ເຖິງຢ່າງໃດກໍຕາມ ສຳລັບບັນດານັກສຶກສາ ລາວ ແລະ ກຳປູເຈຍ, ຕາມສັນຍາລະຫວ່າງລັດຖະບານ, ພວກຂ້າພະເຈົ້າໄດ້ກໍ່ສ້າງຫໍພັກຫລັງຫນຶ່ງຕື່ມອີກສະຫງວນໃຫ້ແກ່ນັກສຶກສາ ລາວ ແລະ ກຳປູເຈຍ, ຫ້ອງນອນຫ້ອງລະ 2 ຄົນ. ໃນສົກຮຽນນີ້, ກະຊວງກໍ່ສ້າງໄດ້ມີຄວາມເອົາໃຈໃສ່ສະຫນອງງົບປະມານເກືອບ 100 ຕື້ດົງໃຫ້ພວກຂ້າພະເຈົ້າເພື່ອຍົກລະດັບຫໍພັກທັງໝົດ. ແລະ ຮອດຕົ້ນປີ 2017 ເມື່ອພວກຂ້າພະເຈົ້າບູລະນະສຳເລັດແລ້ວ, ບັນດາເພື່ອນນັກສຶກສາຈະໄດ້ຊົມໃຊ້ເງື່ອນໄຂດຳເນີນຊີວິດດີກວ່າອີກ.”
ແຂວງ ທາຍບີງ ແມ່ນຫນຶ່ງໃນບັນດາທ້ອງຖິ່ນມີນັກສຶກສາກຳປູເຈຍ ມາຮຽນຫລາຍກວ່າໝູ່ຢູ່ຫວຽດນາມ, ດ້ວຍພວກນ້ອງນັກສຶກສາປະມານ 200 ຄົນພວມດຳລົງຊີວິດ ແລະ ຮ່ຳຮຽນ ຢູ່ ໂຮງຮຽນມະຫາວິທະຍາໄລການແພດການຢາຂອງແຂວງ. ໃນປີ 2014, ມະຫາວິທະຍາໄລການແພດການຢາແຂວງ ທາຍບີງ ລະດົມບ້ວງເງິນອຸປະຖຳລວມມູນຄ່າ 10.000 USD ເພື່ອຕິດຕັ້ງລະບົບເໝາະນ້ຳຮ້ອນໃຫ້ນັກສຶກສາກຳປູເຈຍ ພວມຮ່ຳຮຽນຢູ່ໂຮງຮຽນ. ທ່ານ ຫງວຽນກວກຕຽນ, ຮອງຜູ້ອຳນວຍການມະຫາວິທະຍາໄລການແພດການຢາ ທາຍບີງ ໃຫ້ຮູ້ວ່າ:
“ປີ 2015, ແຂວງ ທາຍບີງ ໄດ້ສ້າງຕັ້ງສະມາຄົມມິດຕະພາບ ຫວຽດນາມແລະ ກຳປູເຈຍ. ມີສະມາຊິກຈຳນວນຫນຶ່ງໃນສະມາຄົມໄດ້ກາຍຮັບນັກສຶກສາ ກຳປູເຈຍເປັນລູກຮັກ, ເປັນບ່ອນອີງທາງດ້ານວັດຖຸ ແລະ ຈິດໃຈໃຫ້ພວກນ້ອງ. ແຕ່ລະປີ ເມື່ອໂອກາດບຸນປີໃຫມ່ປະຈຳຊາດ ວຽນມາ, ຄະນະກຳມະການປະຊາຊົນແຂວງ ທາຍບີງ ລ້ວນແຕ່ຈັດຕັ້ງງານພົບປະກັບນັກສຶກສາ ກຳປູເຈຍ, ມອບຂອງຂວັນ, ຢ້ຽມຢາມພວກນ້ອງ.”
ສຳລັບ Kao Rottana, ນັກສຶກສາປີທີ 2 ມະຫາວິທະຍາໄລ ຮ່າໂນ້ຍ, ການຊ່ວຍເຫລືອ, ແບ່ງປັນຢ່າງແທດຈິງແມ່ນມາຈາກບັນດາໝູ່ເພື່ອນໃນຫ້ອງຮຽນ.
“ນ້ອງຂໍຂອບອົກຂອບໃຈໝູ່ເພື່ອນໃນຫ້ອງຮຽນ. ໃນຊຸມປີທຳອິດເຂົ້າຮຽນ, ພວກນ້ອງເວົ້າພາສາຫວຽດ ຍັງບໍ່ທັນດີປານໃດ, ມີຫລາຍບົດທີ່ອາຈານສອນພວກນ້ອງບໍ່ເຂົ້າໃຈ. ແຕ່ໝູ່ເພື່ອນນັກສຶກສາຫວຽດນາມໄດ້ຊ່ວຍເຫລືອພວກນ້ອງຢ່າງສຸດຈິດສຸດໃຈ. ພວກນ້ອງຈັດຕັ້ງງານພົບປະແລກປ່ຽນເປັນປະຈຳໃນໂອກາດພິເສດຄື: ເມື່ອເສັງຈົບວິຊາວັນບຸນຕ່າງໆ. ພິເສດໃນບຸນປີໃຫມ່ Chol Chnam Thmay ຂອງ ປະຊາຊົນ ກຳປູເຈຍ ພວກນ້ອງໄດ້ຈັດຕັ້ງຢູ່ຫໍພັກ ແລະ ເຊີນພວກເພື່ອນນັກສຶກສາຫວຽດນາມ ມາຮ່ວມເປັນຈຳນວນຫລວງຫລາຍ.”
ມີພະນັກງານກຳປູເຈຍກວ່າ 2000 ຄົນເຄີຍໄດ້ຮັບການບຳລຸງສ້າງຢູ່ມະຫາວິທະຍາໄລຫວຽດນາມ ພວມປະຕິບັດງານໃນຖານະຕຳແຫນ່ງທີ່ແຕກຕ່າງກັນໃນກົງຈັກລັດນີ້ ແມ່ນພະຍານຫລັກຖານຢ່າງມີຊີວິດຊີວາການຊ່ວຍເຫລືອຢ່າງແທດຈິງ ຊື່ງຫວຽດນາມ ສະຫງວນໃຫ້ແກ່ ກຳປູເຈຍ. ທ່ານ Prak Nguon Hong, ເອກອັກຄະລັດຖະທູດ ຜູ້ມີອຳນາມເຕັມແຫ່ງລາຊະອານາຈັກ ກຳປູເຈຍ ປະຈຳຫວຽດນາມ ສະແດງຄວາມເຊື່ອໝັ້ນວ່າ: ສອງປະເທດຈະສືບຕໍ່ເສີມຂະຫຍາຍຈິດໃຈນັ້ນໃນໄລຍະຈະມາເຖິງ.
“ຂ້າພະເຈົ້າມີຄວາມເຊື່ອໝັ້ນວ່າ ການນຳບັນດາກະຊວງ, ຂະແຫນງການ, ບັນດາມະຫາວິທະຍາໄລ, ຄູອາຈານ, ບັນດານັກອຸປະຖຳຈະສືບຕໍ່ຫນູນຊ່ວຍແກ້ໄຂຄວາມຫຍຸ້ງຍາກຂອງ ນັກສຶກສາ ດ້ວຍຄວາມເອົາໃຈໃສ່, ການຫນູນຊ່ວຍທັງດ້ານວັດຖຸ ແລະ ຈິດໃຈ. ອາລົມຈິດອັນດີງາມ, ການແບ່ງປັນຄວາມສາມັກຄີຂອງສອງຊາດພວກເຮົາມີມາແຕ່ດົນນານແລ້ວ, ປະກອບສ່ວນຮັກສານ້ຳໃຈມິດຕະພາບສອງຝ່າຍ ກຳປູເຈຍ -ຫວຽດນາມ, ມຸ່ງໄປເຖິງການຂ່ຳນັບຮັບຕ້ອນການສະເຫລີມສະຫລອງ 50 ປີແຫ່ງວັນສ້າງຕັ້ງການພົວພັນທາງການທູດ ລະຫວ່າງ ກຳປູເຈຍ ແລະ ຫວຽດນາມ ໃນປີ 2017”
ໃນໄລຍະຈະມາເຖິງ, ຫວຽດນາມ ຈະສຸມໃສ່ບຳລຸງພາສາຫວຽດ ແລະ ພາສາຫວຽດສະເພາະຂະແຫນງໃຫ້ແກ່ນັກສຶກສາກຳປູເຈຍໃນຕະຫລອດວິວັດການສຶກສາຂັ້ນມະຫາວິທະຍາໄລ. ສິ່ງດັ່ງກ່າວບໍ່ພຽງແຕ່ຊ່ວຍເພີ່ມທະວີປະສິດທິຜົນການສຶກສາເທົ່ານັ້ນ ຫາກຍັງປະກອບສ່ວນຍົກສູງຄວາມເຂົ້າໃຈໃຫ້ນັກສຶກສາກຳປູເຈຍ ກ່ຽວກັບວັດທະນະທຳ ແລະ ຊາວຫວຽດນາມ.