(vovworld)- ອະນຸສາວະລີຮ່ວມສຳພັນສູ້ຮົບ ຫວຽດນາມ -ລາວ ໄດ້ຮັບການ ກໍ່ສ້າງ ຢູ່ເມືອງປາກຊ່ອງ ແຂວງຈຳປາສັກ ພາກໃຕ້ຂອງລາວ. ນີ້ແມ່ນຫນຶ່ງໃນຈຳນວນອະນຸສາວາລີ 4 ແຫ່ງໄດ້ຮັບການກໍ່ສ້າງຢູ່ລາວ ເພື່ອຈາລຶກບຸນຄຸນ ແລະ ຄວາມອົງອາດກ້າຫານຂອງບັນດານັກຮົບ ທະຫານອາສາສະໝັກ ແລະ ຜູ້ຊ່ຽວຊານຫວຽດນາມ ທີ່ໄດ້ເສຍສະຫລະຊີວິດໃນຊຸມປີຕໍ່ສູ້ປົດປ່ອຍສອງຊາດ. ໂຄງການບູລະນະປະຕິສັງຂອນກິດຈະກຳອະນຸສາວະລີຮ່ວມສຳພັນສູ້ຮົບ ຫວຽດນາມ -ລາວ ທີ່ຫາກໍ່ໄດ້ຮັບການເປີດສະຫລອງຫວ່າງແລ້ວນີ້ ແມ່ນສັນຍາລັກແຫ່ງຄວາມສາມັກຄີສະຫນິດຕິດພັນລະຫວ່າງສອງຊາດ ແລະ ຈະຍືນຍົງຄົງຕົວຕາມການເວລາ. ໃນລາຍການຊາຍຄາອາຊຽນພາກນີ້ ນັກຂ່າວ ໝີບີງ ແລະ ມີງດືກ ຈະແນະນຳກິດຈະກຳ ອະນຸສາວະລີຮ່ວມສຳພັນສູ້ຮົບ ຫວຽດນາມ -ລາວ.
ກິດຈະກຳຍົກລະດັບ ແລະ ບູລະນະ ອະນຸສາວະລີຮ່ວມສຳພັນສູ້ຮົບ ຫວຽດນາມ -ລາວ ເລີ່ມລົງມືກໍ່ສ້າງແຕ່ວັນທີ 16 ສິງຫາ 2014 ໃນເນື້ອທີ່ທັງໝົດ 4,5 ເຮັກຕາ. ກິດຈະກຳນີ້ລວມມີ 13 ຫນ້າວຽກ, ໃນນັ້ນພົ້ນເດັ່ນແມ່ນຮູບປັ້ນທະຫານ ຫວຽດນາມ ແລະລາວ ທີ່ຮຽງບ່າຮຽງໄຫລ່ກັນ, ຍົກປືນຂຶ້ນ. ຮູບປັ້ນນີ້ຖືກຕັ້ງຢູ່ຕໍ່ຫນ້າຮູບແກະສະຫຼັກ ຢູ່ໃຈກາງເຂດອະນຸສາວາລີ. ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ເວົ້າດ້ວຍຄວາມຕື້ນຕັນໃຈວ່າ: ໃນຊຸມປີແຫ່ງການຕໍ່ສູ້ໂຮມປະເທດຊາດເປັນເອກະພາບ, ສອງຊາດ ລາວ ແລະ ຫວຽດນາມ ຍາມໃດກໍສາມັກຄີ, ຮຽງບ່າຮຽງໄຫລ່ ພ້ອມກັນຕ້ານສັດຕູໂຕດຽວ.
ບັນດາຜູ້ແທນເຂົ້າຮ່ວມພິທີເປີດສະຫລອງອະນຸສາວາລີ
ພາບ:vov
|
ສຽງທ່ານ ຈັນສະໝອນ
ເມື່ອໄດ້ກັບຄືນຢ້ຽມຢາມສະຫນາບຮົບເກົ່າ ພາຍຫລັງ 44 ປີ, ພັນເອກ, ວິລະຊົນກຳລັງປະກອບອາວຸດ ຫງວຽນດືກຈ່ວຽນ, ອະດີດຫົວຫນ້າກອງຮ້ອຍສືບສວນບັ້ນຮົບປາກຊ່ອງມີຄວາມຮູ້ສຶກຕື້ນຕັນໃຈເມື່ອໄດ້ເຫັນປະຈັກຕາກິດຈະກຳທີ່ຈາລຶກບຸນຄຸນ ແລະ ຄວາມອົງອາດກ້າຫານ ຂອງບັນດາຜູ້ຮ່ວມກົມກອງ, ເພື່ອນສະຫາຍຂອງຕົນ ແລະ ບັນດານັກຮົບທີ່ເສຍສະຫລະຊີວິດ ເພື່ອຍາດເອກະລາດໃຫ້ແກ່ສອງຊາດ. ພັນເອກ ຫງວຽນດືກຈ່ວຽນ ໃຫ້ຮູ້ວ່າ:
“ບັ້ນຮົບປົດປ່ອຍ ປາກຊ່ອງ ມີຄວາມໝາຍສຳຄັນໃນຍຸດທະສາດ, ແມ່ນການຕໍ່ສູ້ອັນນອງເລືອດທີ່ສຸດ. ທະຫານສອງປະເທດໄດ້ພ້ອມກັນຮ່ວມສຳພັນສູ້ຮົບ, ມີຜູ້ຮ່ວມກົມກອງຂອງພວກຂ້າພະເຈົ້າຫລາຍຄົນຖືກເສຍສະຫລະຊີວິດຢູ່ເຂດ ປາກຊ່ອງນີ້.”
ສຳລັບປະຊາຊົນສອງປະເທດ, ສາຍພົວພັນລະຫວ່າງສອງພັກ, ສອງລັດ, ປະຊາຊົນ ແລະ ກອງທັບສອງປະເທດ ຫວຽດນາມ ແລະ ລາວ ຍາມໃດກໍໄດ້ຮັບການເພີ່ມພູນຄູນສ້າງ, ກາຍເປັນສາຍພົວພັນແບບພິເສດ ສ້າງເປັນກຳລັງແຮງເພື່ອໃຫ້ສອງຊາດຍາດໄຊຊະນະອັນຍິ່ງໃຫຍ່. ນີ້ກໍແມ່ນຄວາມຮູ້ສຶກຂອງເພື່ອນ ພົນທິດາ, ນັກຮຽນໂຮງຮຽນມັດທະຍົມ ປາກຊ່ອງ. ເພື່ອນ ພົນທິດາ ແບ່ງປັນວ່າ: ມາແຫ່ງນີ້ ນ້ອງມີຄວາມເຂົ້າໃຈຕື່ມອີກ ແລະ ຈົດຈຳບຸນຄຸນອັນໃຫຍ່ຫລວງຂອງບັນດານັກຮົບທີ່ໄດ້ເສຍສະຫລະຊີວິດເພື່ອຊາດ, ບັນດາທະຫານເຈັບປ່ວຍ, ນັກຮົບເກົ່າຂອງສອງປະເທດ, ແມ່ນຜູ້ສ້າງເປັນວິລະກຳອັນສະຫງ່າລາສີ, ສ້າງຫນ້າປະຫວັດສາດແຫ່ງຄວາມສາມັກຄີແບບພິເສດ, ສະຫນິດຕິດພັນລະຫວ່າງສອງຊາດ ຫວຽດນາມ ແລະລາວອ້າຍນ້ອງ.
ນັກຮຽນໂຮງຮຽນປາກຊ່ອງເຂົ້າຮ່ວມພິທີເປີດສະຫລອງ
ອະນຸສາວາລີ
|
ສຽງເພື່ອນ ພົນທິດາ
ອະນຸສາວະລີ ຄວາມສາມັກຄີຮ່ວມສຳພັນສູ້ຮົບ ລາວ-ຫວຽດນາມ ຢູ່ເມືອງປາກຊ່ອງ ແຂວງຈຳປາສັກ ບໍ່ພຽງແຕ່ມີຄວາມໝາຍສຶກສາໃຫ້ລຸ້ນຫນຸ່ມເທົ່ານັ້ນ ຫາກຍັງຈົດຈຳບຸນຄຸນຄົນລຸ້ນກ່ອນ, ຜູ້ທີ່ໄດ້ເສຍສະຫຼະຊີວິດເພື່ອພື້ນຖານເອກະລາດຂອງສອງຊາດ ຫວຽດນາມ ແລະ ລາວ. ເສົາຄ້ຳທັງສອງເບື້ອງຂອງອະນຸສາວາລີມີແຖວຕົວຫນັງສື“ ປະເທດຊາດຈາລືກບຸນຄຸນ ແລະ ປະຊາຊົນລາວຈົດຈ່ຳຄຸນງາມຄວາມດີບັນດາທະຫານອາສາສະໝັກຫວຽດນາມ ທີ່ໄດ້ອຸທິດຕະຫລອດຊີວິດຂອງຕົນໃຫ້ແກ່ການປະຕິວັດລາວ.”
ຖ້າຫາກທ່ານມີໂອກາດແວ່ຢາມປະເທດລ້ານຊ້າງທີ່ສວຍງາມ, ສະຫງົບສຸກ ແລະ ຮັກແພງແຂກຄົນ, ທ່ານຢ່າລືມແວ່ຢາມ ອະນຸສາວະລີຮ່ວມສຳພັນສູ້ຮົບ ຫວຽດນາມ - ລາວ ເພື່ອເຫັນໄດ້ຄວາມສາມັກຄີສະຫນິດແຫນ້ນຂອງປະຊາຊົນສອງປະເທດບໍ່ພຽງແຕ່ໃນໄລຍະສົງຄາມເທົ່ານັ້ນ ຫາກນັບທັງໃນໄລຍະສັນຕິພາບອີກດ້ວຍ.