(vovworld)- ການສຸມໃສ່ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ພັດທະນາຊົນນະບົດ ຍາມໃດບັນດາປະເທດອາຊຽນ ກຳນົດແມ່ນຈຸດສຸມຍຸດທະສາດ, ແມ່ນຂົງເຂດບຸລິມະສິດເພື່ອສ້າງປະຖົມປັດໄຈອັນໝັ້ນແກ່ນໃຫ້ແກ່ການພັດທະນາແບບຍືນຍົງຂອງ ອາຊຽນ ໃນຊຸມປີຈະມາເຖິງ. ສະນັ້ນ ທີ່ບັນດາກອງປະຊຸມຂັ້ນລັດຖະມົນຕີ ອາຊຽນ ກ່ຽວກັບການພັດທະນາຊົນນະບົດ ແລະ ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ (AMRDPE) ລ້ວນແຕ່ຍົກອອກບັນດາມາດຕະການ, ກົນໄກຮ່ວມມືໃຫມ່ເພື່ອຊຸກຍູ້ວຽກງານລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ພິເສດ ທີ່ກອງປະຊຸມ AMRDPE ຄັ້ງທີ 9 ດຳເນີນໄປຢູ່ ນະຄອນຫລວງ ວຽງຈັນຫວ່າງແລ້ວນີ້, ກົນໄກ “ຮ່ວມມືພາກລັດ, ເອກະຊົນ ແລະ ປະຊາຊົນ” ໄດ້ຮັບຖືວ່າແມ່ນທິດກ້າວເດີນໃຫມ່ໃນການພັດທະນາຊົນນະບົດ ແລະ ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ບົດຂຽນຂອງນັກຂ່າວ ແອງດາວ ແລະ ໝີບີງ.
ທ່ານນາຍົກລັດຖະມົນຕີ ລາວ ທອງສິງ ທຳມະວົງ
ກ່າວຄຳປາໄສທີ່ກອງປະຊຸມ
ພາບ:MyBinh
|
ດ້ວຍຄາດໝາຍ ສຸມໃສ່ເຂົ້າໃນວຽກງານຫັນເປັນບັນຫາຂອງສັງຄົມ ແລະ ຄູ່ຮ່ວມມືລະຫວ່າງພາກລັດ ແລະ ເອກະຊົນ, ບັນດາຫົວຫນ້າຄະນະຜູ້ແທນບັນດາປະເທດ ອາຊຽນ ເຂົ້າຮ່ວມກອງປະຊຸມ AMRDPE 9 ໄດ້ພ້ອມກັນແບ່ງປັນບັນດາບົດຮຽນຂອງຕົນໃນການພັດທະນາຊົນນະບົດ ແລະ ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ.
ໃນໄລຍະຜ່ານມາ, ບັນດາປະເທດ ອາຊຽນ ບັນລຸໄດ້ໝາກຜົນຫລາຍຢ່າງທີ່ຫນ້າຊື່ນຊົມ ໃນກິດຈະການ ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ຕາມທ່ານເລເລືອງມີງ, ເລຂາທິການໃຫຍ່ ອາຊຽນ ແລ້ວ: ເພີ່ມທະວີວຽກງານຮ່ວມມືລະຫວ່າງພາກລັດ - ເອກະຊົນ ແລະ ປະຊາຊົນ ແມ່ນຈຸດສຸມຂອງວິໄສທັດ ອາຊຽນ ຫລັງປີ 2025. ສິ່ງດັ່ງກ່າວຈະຊ່ວຍ ອາຊຽນ ສຳເລັດຄາດໝາຍຮັດແຄບຊ່ອງຫວ່າງການພັດທະນາລະຫວ່າງບັນດາປະເທດ ສະມາຊິກ ແລະ ເພື່ອປະຕິບັດໄດ້ສິ່ງດັ່ງກ່າວ ຕ້ອງມີການເຂົ້າຮ່ວມຂອງທຸກພາກສ່ວນໃນສັງຄົມ.
“ເພື່ອຮັບປະກັນການຮັດແຄບຊ່ອງຫວ່າງການພັດທະນາ, ການລົບລ້າງຄວາມອຶດຫິວຫລຸດຜ່ອນຄວາມທຸກຍາກແມ່ນເນື້ອໃນຈຸດສຸມຂອງອາຊຽນ. ໃນທົດສະວັດຜ່ານມາ, ອັດຕາສ່ວນຜູ້ທຸກຍາກຢູ່ບັນດາປະເທດສະມາຊິກໄດ້ຫລຸດລົງ ກວ່າ 4 ເທົ່າ, ໝາຍຄວາມວ່າປະມານກວ່າ 400%. ນີ້ແມ່ນຜົນງານອັນໃຫຍ່ຫລວງ ນັ້ນແມ່ນຍ້ອນມີບັນດານະໂຍບາຍພັດທະນາແບບຍືນຍົງ, ໃນນັ້ນ ຖືເປັນສຳຄັນການພົວພັນຄູ່ຮ່ວມມືລະຫວ່າງທຸກພາກສ່ວນໃນສັງຄົມ. ບັນດາຜົນງານທີ່ພວກເຮົາບັນລຸໄດ້ ບໍ່ພຽງແຕ່ຍ້ອນມີການປະກອບສ່ວນຂອງບົດບາດຊີ້ນຳນຳພາຂອງລັດຖະບານເທົ່ານັ້ນ ຫາກຍັງຂອງທຸກພາກສ່ວນອື່ນໃນສັງຄົມຄື: ພາກເອກະຊົນ, ບັນດາອົງການບໍ່ຂຶ້ນກັບລັດຖະບານ, ບັນດາອົງການພັດທະນາ ແລະ ມີການຊ່ວຍເຫລືອຂອງບັນດາຄູ່ຮ່ວມມື ອາຊຽນ, ອົງການ ສປຊ, ອົງການຈັດຕັ້ງສາກົນທີ່ເຄື່ອນໄຫວໃນຂົງເຂດນີ້.”
ກອງປະຊຸມຂັ້ນລັດຖະມົນຕີ ອາຊຽນ ກ່ຽວກັບການພັດທະນາຊົນນະບົດ ແລະ ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ (AMRDPE) ຄັ້ງທຳອິດໄດ້ຮັບການຈັດຕັ້ງຂຶ້ນເມື່ອປີ 1997 ແລະ ໄດ້ຮັບຮອງເອົາຮ່າງແຜນການດຳເນີນງານກ່ຽວກັບການພັດທະນາຊົນນະບົດ ແລະ ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແລະ ແຜນການດຳເນີນງານກ່ຽວກັບເຄືອຂ່າຍຄວາມສະຫງົບປອດໄພສັງຄົມໃນອາຊຽນ.
ສອງປີເທື່ອຫນຶ່ງ, ບັນດາປະເທດສະມາຊິກ ອາຊຽນ ພ້ອມກັນຈັດກອງປະຊຸມເພື່ອປຶກສາຫາລືບັນດາແຜນການໃຫມ່, ວາງອອກບັນດາການເຄື່ອນໄຫວລະອຽດ, ສ້າງລະບອບນະໂຍບາຍໃຫ້ການພັດທະນາຊົນນະບົດ ແລະ ລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ທີ່ບັນດາກອງປະຊຸມໃກ້ໆນີ້, ຄື ກອງປະຊຸມຂັ້ນລັດຖະມົນຕີ ອາຊຽນ ກ່ຽວກັບການພັດທະນາຊົນນະບົດ ແລະ ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ (AMRDPE) ຄັ້ງທີ 7 ຈັດຂຶ້ນຢູ່ ບຣູໄນ ເມື່ອເດືອນ 11/2011, ບັນດາປະເທດ ໄດ້ຮັບຮອງເອົາຮ່າງແຜນການດຳເນີນງານ ກ່ຽວກັບການພັດທະນາຊົນນະບົດ ແລະ ລົບລ້າງຄວາມອຶດຫິວທຸກຍາກ ໄລຍະ 2011-2015. ທີ່ກອງປະຊຸມຄັ້ງທີ 8 ຢູ່ ຢາກກາກຕາ ປະເທດ ອິນໂດເນເຊຍ ເມື່ອເດືອນ 7/2013, ບັນດາປະເທດ ອາຊຽນ ໄດ້ກຳນົດມາດຕະການໃຫ້ແກ່ການພັດທະນາຊົນນະບົດ ແລະ ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ແມ່ນ “ຊຸກຍູ້ເລື່ອງມອບສິດໃຫ້ປະຊາຄົມເພື່ອຍົກສູງລະດັບຄອງຊີບໃຫ້ດີກວ່າ ແລະ ໝັ້ນຄົງກວ່າ.” ຍ້ອນມີທິດທາງຢ່າງຖືກຕ້ອງ ແລະ ມີບັນດາມາດຕະການເໝາະສົມ ສະນັ້ນ ອັດຕາສ່ວນຜູ້ທຸກຍາກຢູ່ບັນດາປະເທດສະມາຊິກ ອາຊຽນ ໃນທົດສະວັດຜ່ານມາຫລຸດຜ່ອນສົມຄວນ. ຜູ້ມີລາຍຮັບບໍ່ທັນຮອດ 1USD/ມື້ ໄດ້ຫລຸດລົງຈາກລະດັບ ໃນ ຈຳນວນ 2 ຄົນຈະມີຜູ້ຫນຶ່ງບັນລຸລາຍຮັບຕ່ຳກວ່າ 1USD/ມື້ ປະຈຸບັນໃນຈຳນວນ 8 ຄົນຈຶ່ງມີຜູ້ຫນຶ່ງບັນລຸລາຍຮັບ1USD/ມື້. ແລະ ໃນຫນຶ່ງທົດສະວັດຜ່ານມາ, ການພັດທະນາກະສິກຳ, ຊົນນະບົດຢູ່ປະເທດຈຳນວນຫນຶ່ງ ໄດ້ມີບັນດານະໂຍບາຍດີ ເພື່ອຫັນ ຂົງເຂດດັ່ງກ່າວເປັນບັນຫາຂອງສັງຄົມ ແລະ ນີ້ກໍແມ່ນປັດໄຈສຳຄັນເພື່ອພັດທະນາແບບຍືນຍົງຢູ່ແຕ່ລະປະເທດເວົ້າສະເພາະ ແລະ ອາຊຽນເວົ້າລວມ. ແບ່ງປັນກ່ຽວກັບບັນຫານີ້, ທ່ານ Katiman Kartowinomo, ຫົວຫນ້າ SOM ກ່ຽວກັບການພັດທະນາຊົນນະບົດ ແລະ ລົບລ້າງຄວາມອຶດຫິວທຸກຍາກ ອິນໂດເນເຊຍ ເວົ້າວ່າ:
“ຢູ່ ອິນໂດເນເຊຍ, ພວກຂ້າພະເຈົ້າເຫັນວ່າ ຂົງເຂດຊົນນະບົດແມ່ນປະຖົມປັດໄຈໃຫ້ແກ່ການພັດທະນາ. ສະນັ້ນ ພວກຂ້າພະເຈົ້າອະນຸຍາດໃຫ້ຂົງເຂດນີ້ມີຫລາຍສິດກວ່າ ກໍຄືສຸມໃສ່ແຫລ່ງກຳລັງໃຫ້ເຂົາເຈົ້າຫລາຍກວ່າ. ເຮັດຄືແນວນັ້ນ ປະຊາຊົນ ສາມາດສ້າງແຜນການຕາມຄວາມຕ້ອງການ ແລະ ການຄຸ້ມຄອງແຫລ່ງຊັບພະຍາກອນຂອງຕົນ. ຜ່ານນັ້ນ ເຂົາເຈົ້າສາມາດຕອບສະຫນອງໄດ້ສິ່ງທີ່ເຂົາເຈົ້າຕ້ອງການໃນອະນາຄົດ.”
ນອກຈາກວາງອອກກົນໄກໃຫມ່ໃຫ້ແກ່ການພັດທະນາຊົນນະບົດ ແລະລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ກອງປະຊຸມຂັ້ນລັດຖະມົນຕີ ອາຊຽນ ກ່ຽວກັບການພັດທະນາຊົນນະບົດ ແລະ ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ (AMRDPE) ປີ 2015 ຍັງຮັບຮອງເອົາແຜນການດຳເນີນງານໃຫມ່ໃຫ້ແກ່ໄລຍະ 2016-2020, ສຸມໃສ່ເຂົ້າໃນ 6 ຂົງເຂດບຸລິມະສິດ, ໃນນັ້ນ ມີບັນຫາພັດທະນາເສດຖະກິດຊົນນະບົດ, ການຮ່ວມມືລະຫວ່າງພາກລັດ -ເອກະຊົນ ແລະ ປະຊາຊົນ. ບັນດາເນື້ອໃນນີ້ຈະຍື່ນສະເຫນີຕໍ່ກອງປະຊຸມສຸດຍອດ ອາຊຽນ 27 ຮັບຮອງເອົາ ເພື່ອປະກອບສ່ວນສ້າງປະຊາຄົມອາຊຽນ ໃນທ້າຍປີນີ້.