(vovworld) - ແນວຄວາມຄິດສ້າງຕັ້ງປະຊາຄົມອາຊຽນແມ່ນຄາດໝາຍທີ່ມີມາ ນັບແຕ່ສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ໄດ້ຮັບການສ້າງຕັ້ງຂຶ້ນ. ມາຮອດປະຈຸບັນ, ດ້ວຍຄວາມຕັດສິນໃຈສຸງສຸດຂອງການນຳ 10 ປະເທດອາຊຽນ, ວິວັດແຫ່ງການສ້າງຕັ້ງປະຊາຄົມໃກ້ຈະປະກົດຜົນເປັນຈິງ. ແຕ່ເຖິງຢ່າງໃດກໍ່ຕາມ, ສຳລັບປະຊາຊົນ, ປະຊາຄົມໄດ້ຮັບການສ້າງຕັ້ງຈະນຳມາເຊິ່ງຜົນປະໂຫຍດໃດໃຫ້ແກ່ເຂົາເຈົ້າ, ແລະ ເລື່ອງຫັນຈາກສະມາຄົມປະຊາຊາດເປັນປະຊາຄົມແມ່ນມີຄວາມໝາຍຄືແນວໃດ, ບໍ່ແມ່ນວ່າຜູ້ໃດກໍ່ສາມາດເຂົ້າໃຈຢ່າງຄົບຖ້ວນໄດ້. ຍ້ອນເຫດນັ້ນ, ເພື່ອກະກຽມໃຫ້ຈຸດເວລາທີ່ປະຊາຄົມອາຊຽນໃກ້ຈະປະກົດຜົນເປັນຈິງນັ້ນ, ບັນດາປະເທດອາຊຽນ ພວມຍູ້ແຮງການໂຄສະນາ, ຍົກສູງຄວາມຮັບຮູ້ໃຫ້ແກ່ປະຊາຊົນ.
“ຂ້າພະເຈົ້າກໍ່ຍີນກ່ຽວກັບການເຊື່ອມໂຍງອາຊຽນ, ແຕ່ມັນຄືແນວໃດ,ບາດກ້າວສຳຜັດຄືແນວໃດ ຫຼືວິວັດແຫ່ງການເຊື່ອມໂຍງຄືແນວໃດພວກຂ້າພະເຈົ້າບໍ່ທັນຮູ້ຢ່າງຄົບຖ້ວນ“.
“ໂດຍແມ່ນພົນລະເມືອງອາຊຽນ, ຂ້າພະເຈົ້າມີແຕ່ເຂົ້າໃຈໄດ້ວ່າ, ເມື່ອປະຊາຄົມໄດ້ຮັບການສ້າງຕັ້ງ, ຢູ່ຫວຽດນາມ ຂ້າພະເຈົ້າສາມາດຊື້ຜະລິດຕະພັນຂອງບັນດາປະເທດອາຊຽນ ຢ່າງງ່າຍດາຍ ແລະ ກົງກັນຂ້າມປະຊາຊົນບັນດາປະເທດອາຊຽນອື່ນໆ ກໍ່ສາມາດຊື້ບັນດາຜະລິດຕະພັນຂອງຫວຽດນາມ ທີ່ນຳເຂົ້າປະເທດຂອງເຂົາເຈົ້າໄດ້ຢ່າງງ່າຍດາຍ. ຜ່ານຜະລິດຕະພັນເຫຼົ່ານັ້ນ, ຄວາມເຂົ້າໃຈເຊິ່ງກັນ ແລະ ກັນລະຫວ່າງບັນດາປະເທດອາຊຽນ ຈະໄດ້ຮັບການເພີ່ມທະວີຂຶ້ນ“.
ຄຳເຫັນຂອງປະຊາຊົນສອງຄົນ, ໃນນັ້ນມີຜູ້ຕາງໜ້າວິສາຫະກິດຫວຽດນາມ, ໄດ້ສະແດງໃຫ້ເຫັນສ່ວນໃດສ່ວນໜຶ່ງກ່ຽວກັບຄວາມຮູ້ ກ່ຽວກັບປະຊາຄົມຂອງປະຊາຊົນໃນແຕ່ລະປະເທດອາຊຽນ. ບໍ່ພຽງແຕ່ຢູ່ຫວຽດນາມ, ໝາກຜົນແຫ່ງການສຳຫຼວດຫວ່າງແລ້ວນີ້ຂອງຄະນະເລຂາອາຊຽນ ກໍ່ໃຫ້ຮູ້ວ່າ 80% ຈຳນວນພົນລະເມືອງໃນຕົວເມືອງຂອງບັນດາປະເທດອາຊຽນ ແມ່ນໄດ້ຍີນກ່ຽວກັບປະຊາຄົມອາຊຽນ, ໃນນັ້ນ 76% ຈຳນວນຜູ້ທີ່ໄດ້ຮັບການສຳຫຼວດ ແມ່ນບໍ່ຮູ້ຈັກເຖິງບົດບາດໜ້າທີ່ຂອງກຸ່ມ. ເປັນອັນວ່າມີເກືອບ 1/3 ຈຳນວນພົນລະເມືອງອາຊຽນເຂົ້າໃຈໄດ້ຜົນປະໂຫຍດຈາກປະຊາຄົມອາຊຽນ, ນັ້ນແມ່ນສິ່ງທີ່ໜ້າວິຕົກກັງວົນ. ທ່ານອະດີດລັດຖະມົນຕີຊ່ວຍວາການກະຊວງການຕ່າງປະເທດຫວຽດນາມ ເລກົງຟຸ້ງ, ປະທານສະມາຄົມມິດຕະພາບຫວຽດນາມ - ອາຊຽນ, ແບ່ງປັນວ່າ:
“ປະຊາຄົມອາຊຽນ ບໍ່ແມ່ນຂອງສະເພາະບັນດາການນຳ, ບັນດານັກການເມືອງ, ຫາກປະຊາຄົມອາຊຽນ ແມ່ນຂອງປະຊາຊົນອາຊຽນ. ປະຊາຊົນແມ່ນຜູ້ປະຕິບັດ, ຊຸກຍູ້ ແລະ ປັບປຸງມັນ. ດັ່ງນັ້ນປະຊາຄົມນີ້ຕ້ອງເພື່ອປະຊາຊົນ, ມຸ່ງໄປສູ່ປະຊາຊົນ ແລະ ຖ້າຫາກປະຊາຊົນມີຄວາມໄວ້ເນື້ອເຊື່ອໃຈ, ປະຊາຊົນປະຕິບັດ ມັນຈຶ່ງມີປະສິດທິຜົນ. ໃນຊຸມປີຜ່ານມາ, ບັນດາການເຄື່ອນໄຫວພົວພັນແລກປ່ຽນປະຊາຊົນແມ່ນຟົດຟື້ນທີ່ສຸດ ແຕ່ຕາມຂ້າພະເຈົ້າ ແມ່ນບໍ່ທັນຄົບຖ້ວນເທື່ອ. ເພື່ອມີຄວາມສະໜິດຕິດພັນ, ລັດຖະບານປະເທດຕ່າງໆຕ້ອງເພີ່ມທະວີການໂຄສະນາກ່ຽວກັບປະຊາຄົມ“.
ຍ້ອນເຫດນັ້ນ, ພ້ອມກັບການກະກຽມກົນໄກເໝາະສົມໃຫ້ບັນດາສະມາຊິກຂອງປະຊາຄົມ, ບັນດາປະເທດອາຊຽນພວມຮີບເຮັ່ງກະກຽມໃຫ້ຄວາມ “ຕື່ນຕົວ“ ຂອງປະຊາຊົນກ່ຽວກັບປະຊາຄົມກ່ອນໄລຍະແຫ່ງການສ້າງຕັ້ງ. ບັນດາການເຄື່ອນໄຫວຄື: ການໂອ້ລົມສົນທະນາ, ງານພົບປະແລກປ່ຽນປະຊາຊົນ, ກອງປະຊຸມສຳມະນາ, ງານວາງສະແດງ, ການສ້າງຕັ້ງຫໍສະໝຸດຮູບພາບ ແລະ ສື່ມວນຊົນ, ການເປີດສະຫຼອງເວັບໄຊ, ການສ້າງຫໍສະໝຸດອາຊຽນ ຢູ່ບັນດາໂຮງຮຽນໃຫ້ນັກສຶກສາ… ໄດ້ຮັບການຜັນຂະຫຍາຍຢ່າງຄົບຊຸດຢູ່ບັນດາປະເທດອາຊຽນ. ແຕ່ລະປະເທດກໍ່ ມີລາຍການຮູບເງົາເອກະສານ, ໂທລະພາບກ່ຽວກັບປະຫວັດແຫ່ງການສ້າງຕັ້ງ, ພັດທະນາຂອງອາຊຽນ ແລະ 10 ປະເທດສະມາຊິກ, ແນະນຳບັນດາຈຸດທີ່ຄ້າຍຄືກັນຂອງອາຊຽນໃນຂົງເຂດດົນຕີ, ຟ້ອນ, ເຄື່ອງນຸ່ງປະຈຳຊາດ, ເຄື່ອງຫັດຖະກຳສິລະປະ… ທ່ານເອກອັກຄະລັດຖະທູດ ອິນໂດເນເຊຍປະຈຳຫວຽດນາມ Mayerfas, ຢືນຢັນວ່າ:
“ບັນດາລາຍການໄດ້ຮັບການຜັນຂະຫຍາຍຢ່າງຂຸ້ນຂ້ຽວຢູ່ແຕ່ລະປະເທດ, ສິ່ງດັ່ງກ່າວສະແດງໃຫ້ເຫັນຄວາມຕັດສິນໃຈຂອງອາຊຽນ ໃນບັນຫາກໍ່ສ້າງປະຊາຄົມລວມ, ຖືປະຊາຊົນເປັນໃຈກາງ. ບັນດາປະເທດອາຊຽນ ພວມມານະພະຍາຍາມເພື່ອປະກອບສ່ວນໃຫ້ປະຊາຄົມລວມອາຊຽນ. ພວກຂ້າພະເຈົ້າຫວັງວ່າປະຊາຊົນອິນໂດເນເຊຍ ເວົ້າສະເພາະ, ອາຊຽນເວົ້າລວມ ຮູ້ສຶກໄດ້ວ່າ, ເຂົາເຈົ້າແມ່ນພາກສ່ວນໜຶ່ງຂອງອາຊຽນ“.
ໃນປີນີ້, ອາຊຽນ ເຫັນດີຜັນຂະຫຍາຍໂຄງການກໍ່ສ້າງສູນວັດທະນະ ທຳອາຊຽນ ໃນແຕ່ລະປະເທດອາຊຽນ ແລະ ວັນທີ 8/8, ສູນວັທະນະທຳແຫ່ງທຳອິດ ຈະໄດ້ຮັບການເປີດສະຫຼອງຢູ່ໄທ. ເມື່ອໂຄງການນີ້ປະຕິບັດສຳເລັດ ຈະປະກອບສ່ວນເພີ່ມຄວາມຮູ້ກ່ຽວກັບປະຊາຄົມໃຫ້ແກ່ປະຊາຊົນແຕ່ລະປະເທດ.
ປະຈຸບັນ, ໃນຈຳນວນຊາວອາຊຽນ 10 ຄົນນັ້ນ, ມີ 6 ຄົນອາຍຸຕຳ່ກວ່າ 30 ປີ, ໝາຍຄວາມວ່າຈຳນວນຜູ້ອາຍຸໜຸ່ມຂອງພາກພື້ນກວມກວ່າ 320 ລ້ານຄົນ. ນີ້ແມ່ນກຳລັງທີ່ຈະສ້າງບາດກ້າວຫັນປ່ຽນສຳຄັນຈາກສະມາຄົມປະຊາຊາດ ເປັນປະຊາຄົມໃຫ້ອາຊຽນ. ຄວາມຈິງແລ້ວ, ໄວໜຸ່ມຫວຽດນາມ ຫຼາຍຄົນ ໄດ້ມີສະຕິຢ່າງຈະແຈ້ງ ແລະ ມີບັນດາທັກສະທີ່ຈຳເປັນ, ເພື່ອຕອບສະໜອງຄວາມຮຽກຮ້ອງຕ້ອງການເຊື່ອມໂຍງ. ເຟືອງລິງ, ປະລິນຍາໂທ ມະຫາວິທະຍາໄລເສດຖະກິດ, ມະຫາວິທະຍາໄລແຫ່ງຊາດ ຮ່າໂນ້ຍ, ແບ່ງປັນວ່າ:
“ນ້ອງຄິດວ່າ, ຄວາມສາມາດຂອງຕົນກໍ່ສາມາດຕອບສະໜອງຄວາມຕ້ອງການຂອງຕະຫຼາດແຮງງານຢູ່ໃນໂລກ, ພິເສດແມ່ນບັນດາປະເທດໃນກຸ່ມອາຊຽນ. ໃນລາຍການຮຽນທັງໝົດ, ນ້ອງລ້ວນແຕ່ໄດ້ຮັບການຝຶກຝົນທັກສະນຳໃຊ້ຊອບແວ, ພາສາຕ່າງປະເທດ, ພາສາອັງກິດ “.
ເພື່ອໃຫ້ປະຊາຊົນສະໜິດຕິດພັນນຳກັນ, ກໍ່ສ້າງສັງຄົມຮັບໃຊ້ປະຊາຊົນໃຫ້ດີທີ່ສຸດ ແມ່ນໜຶ່ງໃນບັນດາຄາດໝາຍສຳຄັນ ເຊິ່ງບັນດາປະເທດອາຊຽນ ພວມມຸ່ງໄປເຖິງ. ດ້ວຍບັນດາການກະທຳລະອຽດຈາກລັດຖະບານແຕ່ລະປະເທດ, ສະຕິຂອງປະຊາຊົນແຕ່ລະຄົນ, ປະຊາຄົມອາຊຽນທີ່ຮັ່ງມີດ້ວຍສີສັນວັດທະນະທຳ, ເປັນເອກະພາບໃນຫຼາຍຮູບຫຼາຍແບບພວມຄ່ອຍໆປະກົດຜົນເປັນຈິງ.